الثلاثاء، 19 مايو، 2009

الكتالوج

الكتالوج 1

اشتريت دى فى دى ...ما أنا من النوع المدمن تكنولوجيا ...على فكرة ممكن ما اكولش ...ما اشربش ...ما البسش ...لكن اشوف جهاز فية فكرة جديدة وما اشتريهوش ...تبقى مشكلة ....بس دة مش موضوعنا ...موضوعنا انى اشتريت الدى فى دى ....واول ما دخلت وانا بهدومى ...اقعدت اركب واوصل السلوك فى التليفزيون ...قعدت كتير ...يجى ساعتين ونص ...اجرب واغلط واحط الاحمر مع الاحمر ماينفعش احط الاحمر مع الاصفر ..برضة ماينفعش ..بصراحة الجهاز كان حيبوظ اكتر من مرة ...دا غير ان سنون التوصيل كانت حتتكسر ...لولا ان ربنا ستر ...عدت عليا مراتى وقالت لى بلهجة كدة انا ماحبتهاش بصراحة قالت: ياسيدى ما كنت تقرا الكتالوج الاول وشوف المفروض تعمل اية واعملة ...كدة توفر وقت وتحافظ على الجهاز ....وبدال ماتبوظ الجهاز تستمتع بية ....ومشيت وسابتنى ....ومارضتش تكمل الجملة ...من غير ماتقول انا عارف هية كانت عايزة تضيف كلمة ياغبى ....بس هية مارضتش ..خافت طبعا ...القصد ...فكرت شوية فى كلامها ...طبعا من غير كلمة ياغبى ....عجبتنى قوى كلمة اقرا الكتالوج وشوف المفروض تعمل اية واعملة ...كدة توفر وقت وتحافظ غلى الجهاز ...ونطت فى دماغى الفكرة الجديدة والى حاسميها الكتالوج ...وحتكون برضة سلسلة ومحدش يتتريق ويقول سلسلة... سلسلة مافيش خاتم فى القعدة دى ...وبرضة حنتكلم عننا ..البنى ادمين.... الانساننيين ...ياترى احنا بنشغل نفسنا صح وماشين حسب الكتالوج ولا بنعمل زى حالاتى لما ركبت الجهاز من غير ما اقرا الكتالوج وكان حيضيع منى ......قبل مانسى فية آية عايز نقراها كويس قوى ونكررها كذا مرة ونفكر فيها بالراحة ونقارنها باللى احنا بنعملة و باللى حوالينا ... بس نقراها بهداوة براحة كدة..

بسم الله الرحمن الرحيم وهم يحسبون انهم يحسنون صنعا .صدق الله العظيم

هناك 9 تعليقات:

  1. الله يفتح عليك

    بس ماليش دعوه كلمة الكتالوج دي بتاعتي مش بتاعة المدام

    ايوه انا دايما اقول الدين وكتاب الله وشرعه ده الكتالوج

    الى يمشي على الكتالوج ما يتعبش ابدا ابدا

    الواحد لما بيشتري جهاز لازم يبص فى الكتالوج

    طيب ما احنا الى خلقنا منزل معانا الكتالوج بتتفزلكوا ليه يا بشرررررررررر

    تسلم ايدك ولسان المدام والجواهرجي بتاع السلاسل
    ههههههههههههه

    طيب والنبى السلاسل مش موضه انا عايزه عقد
    هههههههههههههه

    بنهزر يا باشا مش بنتريق حاشا لله

    ردحذف
  2. مانا عارف ياباشا والله وياستى دا توارد افكار مش مهم الكتالوج بتاع مين المهم نقراة

    ردحذف
  3. الله شكلها هاتكون سلسلة عسولة ومفيدة

    شكرا للمدام انها اوحت لك بالفكرة

    ياريت كله يفهم الكتالوج ويوفر على نفسه التجارب اللى تضيع وقته وعمره وعقله وجهده

    واوافق صبرنى جدا جدا على كلامها ان ربنا نزلنا الكتالوج ما علينا سوى قراءته وفهمه ثم العمل به

    وكدا نبقا تمام التمام

    ردحذف
  4. د. اسلام
    امس سمعت عن جرار اجدى القطارات اللى كان فى التصليح .. الفنى صلحه وضبط السرعة50 وشال الفرامل .. والقطار انطلق بلا سائق واكل 5 عربيات و10 اشخاص قبل ما ينقلب ويولع
    افتكرتك لما قلت نبدأ بنفسنا واللى يهمل يعدم فى ميدان عام ..
    الحادثة كانمت حتتحول لكارثة لولا ستر ربنا
    افتكرتك وافتكرت كل اللى اهملوا
    حسبى الله
    فى انتظار سلسلة الكاتالوج
    تحياتى

    ردحذف
  5. عملنا الاضراب يادكتور ومستمرين فيه
    بقدر المستطاع وفى انتظار سلسلة الكتالوج
    على فكرة انا عاملة عندى سلسلة
    ادعوك للمرور عليها
    تقبل مرورى وتحياتى

    ردحذف
  6. يااااااااااااااه ده انت متاخر قوى

    انا لما جربت كذة مرة وخربت الدنيا
    بقيت قبل ما اشترى اى جهاز ادور على الكتالوج

    بالنسبة للسؤال :
    معظمنا ماشى بالبركة وزى ما تيجى تيجى وعشان كده ده حال بدلنا

    سلام عليكم

    ردحذف
  7. جميلة فكرة الكتالوج واشكر السيدة زوجة حضرتك على ايحائها لك بالفكرة

    فكرتنى بحاجة شفتها كتير فى الواقع وحتى كتير انا شخصيا كنت بعملها.. الواحد ساعات بيحب يتفلحص ويثبت ان عنده قدرات خارقة فى تشغيل الأجهزة.. مع ان الكتالوج قدام عنيه.

    والآيه هتأمل فى معناها أكتر شوية

    ردحذف
  8. سلامو عليكم

    اول مره اعدى هنا

    هما سعات بيطلع من بقهم كلمات كده درر يعنى
    ماتفهمش بيجيبوها منين و كانت تايهه عننا فين
    ربنا يوفقك
    منتظرين السلسله ان شاء الله

    ردحذف
  9. حلوة قوي طريقتك في توصيل الفكرة
    (:
    بانتظار الجديد
    تحيــــاتي

    ردحذف