الخميس، 7 أكتوبر 2010

الاشتغاله بين النظريه والتطبيق

الاشتغاله بين النظريه والتطبيق


بالراحة كدة وواحدة واحدة .... الانسان مننا عبارة عن ايه؟ ... طبعا غير اللحم والدم ... الانسان عبارة عن شويه مشاعر يتحكم فيهم شوية دوافع ...اكيد كلنا عارفين المشاعر ... حب ..كرة ...غضب...فرح ...حزن ... امال الدوافع هيه ايه ؟ ... الدوافع دى حاجة كل الانساننين مولودين بيها ... هيه اللى بتحركهم وتتحكم فيهم وفى تصرفاتهم وسلوكهم .... مثال : لو انت جعان ...ايه اللى بيحصل ... دافع الجوع يشتغل ... ويخليك لا على حامى ولا على بارد ... ويزقك علشان تروح تاكل ... ولما تاكل وتشبع ...تهمد وتهبط ....طاب لو مافيش اكل ... ايه اللى ممكن تعمله ؟ ... حتعمل اى حاجة علشان تاكل وتحافظ على حياتك .... ممكن تسرق ...ممكن تقتل ... صح ؟ .... فيه زى دافع الجوع ...دافع العطش ....دافع الالم ... ودافع الجنس ... ودول بقى اسمهم الدوافع الاساسيه ... المشتركة فيها جميع البنى ادمين ....

فيه بقى دوافع تانيه اسمها الدوافع المكتسبه ودى اللى احنا بنكتسبها طول ما احنا عايشيين وبنتعامل مع الدنيا ... وهيه ...الخوف ..الانتماء ...الاستكشاف ..العدوان ...... اللى فات ده كله النظريه .... امال فين التطبيق ياجميل ؟ ...حأقولك حالا ...الناس اللى فاهمه النظرية بتعمل ايه ؟.... بتدوس على دوافع البشر ...وطول ماهيه بتدوس .....الناس تطلع اللى فى جيبها ... وتبقى تحت طوعها ...وتحت رجليها وتلعبهم زى ماهيه عايزة ...ونبقى يا ولداه عجينه فى ايديهم ويعملوا فينا اللى هما عايزينه .... اديك مثال .. وانت جعان ممكن تاكل اى حاجة وتحمد ربنا وترتاح من دافع الجوع اللى تاعبك ومعذبك ... لكن لو قولت لك استنى ... فيه ساندوتش همبورجر ...وعليه طماطم ام تسعه جنيه وفلفل وجزر وكاتشب ومايونيزو مسطردة ومعاه بطاطس محمرة وكمان حجمه كبييييير ... حتعمل ايه ؟ .... حتدبدب فى الارض وتقول انا عايز من دة ....أهى أهى أهى ...طاب لو دوست على العطش بقى وقولت كوكاكولا ساقعة ومشبرة ولما بتفتح تعمل تشش وجواها تلج بيلعب والدنيا حر وانت عطشان ياحبة حين امك ....حتعمل ايه ؟ ..... بصلو قولت لك احنا عارفين اد ايه الالم اللى بتحس بيه وانت مش قادر تجيب حاجاتك الاساسيه ياكبد امك ... ولا يهمك ...اشترى بالفيزا .... وادفع لما تفرج ...تعمل ايه ؟ لو قولت لك اقعد بقى واسترخى وبص على الموزز ... فيديو كليب ونسوان عريانه ومشاهد ساخنه وشويه شذوذ مايضرش ... ودوس على الجنس ...حتعمل ايه ؟ اى نعم انت مش حتعمل حاجة وحتبص بس.... بس ده عبط منك ملناش فيه ... المهم تدفع يامعلم ... وفلوس كتير تخش جيبهم ...لكن البحر يحب الزيادة..... وفرصة انك تلاقى حد عبيط تشتغله مش كتيير .... يقوموا يلعبوا على الدوافع المكتسبه ... اوعى العربيه اللى من غير فرامل بى بى اس ....حتموت وتتقلب بيك .... اللعب على دافع الخوف .... اشترك معانا فى جبهة التغيير علشان نساعد اونكل البرادعى ... اللعب على دافع الانتماء ....تعالى اقولك اسرار الجرائم واللى بيحصل فى دهاليز الحكم واخبار الفنانين ورجال الاعمال ....اللعب على غريزة الاستكشاف .... ماتسكوتش على حقك... اعمل مظاهرات واعتصامات واقف جنب ابراهيم عيسى وعمرو اديب مبعوث العنايه الالهيه لانقاذ شعب مصر .....اللعب على دافع العدوان .... وياللللاااا ... هيصه يامعلم ... سبوبه ببلاش ... والعبطة كتيير ... هما يكسبوا ويتغنوا ... واحنا نعمل جمعيات ونشترى بالفيزا ونندين ....هما يبقوا اصحاب قنوات وجرايد وفيلات .... واحنا نزعل وننقهر ويجيلنا السكر.... علشان شالوهم من برنامج ولامن رئاسة تحرير .... هما يبقوا فووووووق .... واحنا ندفع تمن قعدتهم فوووووق ..

هوه العنوان مش كان يبقى احسن لو كان اصحوا يا عبط كفايه بقى

هناك 3 تعليقات:

  1. حاضر ها اصحى بعد ما اكل بس البيتزا اللي في ايدي دي واحلي بعدها بالسينابون :)

    ردحذف
  2. معاك حقااحنا عبط بينضحك علينا
    انا كنت متضايقة علي ابراهيم عيسي وماشية تمام ورا نظريه المؤامرة و اسكات المعارضة و الكلام اللي ماشي اليومين دول بس لما عرفت ان مرتب ابراهيم عيسي في الشهر 75000 الف جنيه " و ده كلام سيد البدوي"
    قلت يتفلقوا كلهم في بعض عالم بتستهبل

    ردحذف
  3. والله حضرتك انا شايفه ان دي كلهاتمثليات وتمثليات وتمثليات واحتمال مسرحيات كل واحد بيادي دوره

    وكله بياكل عيش على قفانا فعلا فعلا

    وانا يا اخويا فايقه ولا مقهوره على حد ولا زعلانه على حد من دول
    انا زعلانه على نفسي وعلى كل ذو كبد رطب معذب على الارض دي بسبب كلاب بينهشوا لحمه وياكله قوته وقوت عياله ويستحلقه عرقه وتعبه

    ردحذف