الجمعة، 22 أكتوبر، 2010

مش عايز اتجوز 15

العروسة الرابعة عشر

انا عارف انى بأتاخر عليكوا ... بس علشان نفسى اجيب لكوا اخبار كويسة ... ماهى كانت البدايه كويسة ... والعروسة كانت كويسه ... عقل وتدين واصل ونسب وجمال ... رحت اول مرة مع الحاجة واختى ... ورحت تانى مره لوحدى ... رحت تالت مرة بردة لوحدى .... على فكرة كل مرة كنت بأروح كنت باخد معايا حاجة ... جاتوه ...تورته .. شيكولاته ... وكله من الغالى والله ... حتى فى اخر زيارة ..ام العروسة قالت : ياخالد يابنى خف ايدك شويه ... انت داخل على جواز ... كده عمرك ماحتعرف تعمل قرش .... فى المرة التالته بقى اتفقت مع ابو العروسة ان احنا نجيب الرجاله ونتفق على التفاصيل ...وفعلا أخدت الحاج وخالى وجبت تورتايه ايس كريم من بتاعة موفينبيك ... ما المرة دى ابويا بقى اللى رايح مش اى حد ... دخلنا وسلمنا وكان مع ابو العروسه خالها برضة .. وبدأ الكلام فى الدنيا وفى السياسة والتوريث واولياء الله الجدد واللى بيعملوه فى الصحفيين ... وشويه وابويا قال : شوف ياحاج صلى على النبى ... كلنا قولنا عليه الصلاة والسلام ... احنا جايين نطلب ايد بنتكوا لخالد ابنى ... ابو العروسة رجع بضهرة كدة واتفرد وقال: دا يشرفنى ياحاج ...ابويا قال : ندخل فى التفاصيل بقى يا حاج ... طلباتك ايه؟ ..وقبل ما الراجل يرد ويقول طلباته ..خال العروسة انطلق يامعلم : دا كان متقدم لها عريس وكان قاعد هنا مكانك كدة ياحاج وكان معاه شنطة فلوس ...كنت حأرد عليه بس لقيت ابويا بيضغط على رجلى وهوه بيقول : طبعا طبعا بتكوا تتاقل بالمال ومايكفيهاش كمان ... قال الخال : ايوه.... انتوا بقى حتجيبوا شبكة بكام ... ابويا قال وهوه بيبص لابوا العروسة : احنا ياحاج حنجيب شبكه بعشرين الف ... رد ابو العروسة : والله يا ابو خالد ... الشبكة دى هدية من العريس لعروسته ... دخل الزبون تانى : هوه ايه اللى هدية وايه اللى عشرين الف .. دا بت خالتها جايلها شبكة بخمسة وعشرين الف ... هيه مش اقل من بت خالتها ... ابويا برضة بص لابو العروسة وقال : انت ايه رايك ياحاج ؟ ... ابو العروسة قال: والله ياحاج انت عرف البنات وازاى بيبصوا لبعض .... ابويا قال : خلاص يا حاج خمسه وعشرين .. والخمسه دول هدية منى لبتنا ....ودخل الزبون وقال : واحنا بنكتب قايمه .... دخل خالى وقال : وماله حقها وحقكوا ... العفش اللى حايجى حيتكتب فى القايمة ... رد الزبون : مش العفش بس ... كل اللى حايجى فى البيت ... والاحسن .. نكتب قايمه بميت الف جنيه ... خالى بدأ ينفعل :طاب لو الحاجات كانت اقل من ميت الف جنيه ... قال : وايه يعنى انتوا حتلاقوا زى بتنا ؟ .... دا فيه عريس مكلمنى عليها وكان عايز يجى بكرة ومعاه شنطين فلوس ... طبعا انا قاعد باغلى ومش قادر اتكلم احتراما لابويا وخالى ... لكن لقيت ابويا بيقول لى : مش عايز تقول حاجة ياخالد ... حسيت ساعتها انه بيقول لى انطلق خد قرارك انا ماليش فيه ... بصيت كدة وقولت : والله يابا انا شايف ان احنا مش حنقدر على البيعة دى ..يعنى واحد داخل بشنطة فلوس والتانى عايز يجى بشنطتين فلوس ... لا ياحاج : انا مقدرش ادخل مزاد على بضاعة انا مامعييش تمنها ... الا لودخلت ... ممكن اخسر التأمين ... ... بصيت لابو العروسة وكملت : وانت ماترضليش الخسارة يا حاج مش كده ولا ايه ..وعموما الجواز قسمه ونصيب ... وكفايه ان احنا اتعرفنا على ناس كويسة .... وحصل شوية خزعبلات كدة وابتسامات من ورا القلب وروحنا ...

انتوا شايفين ان حظى وحش واكيد زعلانين علشانى ... بس انا شايف ان فيه امل ان المرة الجاية الاقى العروسة ... ماهى البنت دى كانت كويسة ... بس اهلها بقى ... يالا ...

هناك 7 تعليقات:

  1. يا حرام

    خسارة والله

    كده الاهل بيطفشوا العرسان

    وبعدين هو مين دلوقتي معاها شنطة فيها فلوس

    معلشي يا خالد

    ان شاء الله هتلاقيها

    عاجلا غير آجلا

    قول يارب

    بس اوعى تنسى تعزمنا

    ردحذف
  2. اول زياره لمدونتك
    يستاهلوا ان بنتهم تعنس و تقعد جنبهم حتي لو ملهاش ذنب و نستاهل البد تفسد وشبابها يملاهم الاحباط
    ونستاهل الجرايم تزيد وقله الادب تعلي ونستاهل ونستاهل
    عايزة اعتذر لك عن اللي شوفته لانك تستحق الاعتذار
    ربنا يرزقك الزوجه الصالحه ويبارك لك عن قريب

    ردحذف
  3. والله ماعرفه اقلك ايه
    ربنا يرذقك باللي فيه الخير ليك:)

    ردحذف
  4. حراااااااااااام عليكوا فركشتوا الجوازة احنا لما سدانا نلاقي عروسة حلوة ... خيرها في غيرها

    ردحذف
  5. أما أنا فشايف ان من حق أي أسرة أن تختار لابنتها
    و ما تزعلش يا خالد لو لك نصيب فيها كان الحديث سيكون فيه اختلاف......كبر الجمجمة و شوف غيرها

    ردحذف
  6. خالد صعبان عليا انت جدااااااااااا

    في أسر كتير للاسف دا منطقها وبتغالي في الطلبات
    المهم ان البنت لما تتجوز وتكون مش مبسوطة ممكن تتنازل عن كل حاجة في مقابل خلاصها من رجل لم تجد الراحة معه

    وفي نفس الوقت بردو للاسف في رجل لما بيروح يخطب بنت ويلاقي اهلها متستهلين في طلباتهم ومش بيطلبو الا القليل مش بيقدر دا تقديره الصحيح
    وبيفضل يعاملها على انها حد كان سهل الحصول عليه وانها مش غالية عند اهلها او كانو حابين يخلصو منها

    انا بشوف الوسطية في كل شئ حلوة وطبعا يراعى جدا الحالة الاجتماعية والمادية للطرفين

    دكتور اسلام
    اخبار حضرتك ايه ؟؟
    موضوعاتك يا فندم دائما تطرح قضايا مهمة باسلوب سلس وجميل
    تحياتي لك يا فندم

    ردحذف
  7. فيه ناس كتير بتيجى تكحلها تعميها هو خال العروسة قام بالمهمة دى ولك ان تتخيل أهل العرسة عملوا فيه ايه:)

    ردحذف