مش عايز اتجوز 16

العروسة الخامسة عشر

عم حسين الحلوانى ... عم حسين..... اللى باخد منه التورته والجاتوة وانا رايح اشوف العرايس ... فكرينة .... عم حسين خلص توضيب محل الورد وكلمنى فى التليفون وقالى : انا عرف يابنى ان يوم الخميس دايما عندك مشغول ... بس الخميس ده افتتاح المحل الجديد ونفسى تشرفنى ... قولت له : اكيد جاى ياعم حسين والعروسة بتاعة الاسبوع دة تتأجل ... هوه انت يعنى شايف لى جوازة بتتم ؟!!! .. يوم الخميس رحت الافتتاح ... محل كبير وشيك جدا ... معمول فيه شوية ديكورات روعة ...سلمت على عم حسين وباركت له... واحنا واقفين مع بعض جات بنت حلوة وشيك ووشها سمح قوى ... عطت لى علبة عصير منجه وقالت : اتفضل يا فندم ... اخدت العصير وانا عينى مانزلتش من عليها ..وقلت : شكرا... عم حسين قال : بنتى رشا ... الباشمهندس خالد ... قولت اهلا وسهلا .. تشرفنا ... عم حسين استأذن وقالى : حشوف الضيوف وارجع لك ... قولت له وانا عينى مش عارف انزلها من على رشا ... اتفضل يا حاج انا مش غريب ... قولت لرشا : على فكرة ديكورات المحل رائعه ... ياترى مين اللى عملهالكوا ... قالت لى : عجبك ؟... قولت : جدا ... قالت لى: انا .. قولت: مش معقول .. قالت : انا اتخرجت من الفنون الجميلة السنه دى و ده اول شغل ليه .. بس ياخسارة .. ماخدش فلوس ... بابا بقى ومش معقول اخد منه فلوس ... قولت : انا بقى بقالى فترة عايز اجدد ديكور مكتبى فى الشركة ومكسل .. بس بعد ماشوفت الذوق العالى ده ... ياريت توافقى وتغيرى لى ديكورات المكتب ...قالت لى : تحت امرك ....وكملنا كلامنا وافترقنا على انها تيجى لى المكتب تانى يوم علشان ترفع المقاسات ...وتشوف ايه اللى ممكن يتعمل ... روحت البيت وان فى منتهى السعادة ... بوست امى وحضنت اختى وهزرت مع ابويا ... احساس لذيذ احساس الحب من اول نظرة دة .. آه... حب ....مالكوا ... كنت غلطان لما ماكنت مش مصدق فى الحب ..وكنت غلطان لما كنت مش عايز اتجوز ... ايه المشكله يعنى ... عيل وغلط وياما العيال بتغلط ...رشا قعدت تشتغل فى ديكورات المكتب شهر كامل ... ( زى قلب كامل كده ) شهر كامل واحنا مع بعض كلنا مع بعض وشربنا مع بعض ... عرفت اخلاقها وطباعها ...عرفت اسلوبها فى الكلام والتفكير ... لقيت بينا حاجات كتير مشتركة ... وفى يوم التسليم .. قولت لها انا عايز اكلمك فى موضوع مهم .. قالت لى : اتفضل ... قولت : بصراحة كدة ومن غير مقدمات ... انا ...انا .. قالت : اتفضل قول ... قولت : بصراحة كدة وبدون مقدمات ... انا معجب جدا بيكى من ساعة ماشوفتك ... وقررت انى اتقدم لعم حسين علشان اخطبك ... رشا بيضا ... بس بعد ماقولت الكلمتين دول بقت لون الطماطم ... وقالت وهيه باصه فى الارض : الكلام دة مع بابا ... قولت لها : اكيد طبعا ...بس عايز اعرف رأيك ... قالت وهيه بتاخد الشنطه علشان تمشى : لو بابا وافق انا موافقة ... وخرجت جرى من غير سلاموا عليكوا....

طبعا حناخد معانا ايه دى كانت مشكله ... يعنى الجاتوه حيبقى من عند عم حسين ولا من محل تانى ... لغايه امى ما قالت: عندى الحل... قولت لها : قول ياجميل .. قالت : انتو ناسيين ان احنا فلاحين ولا ايه ؟ ... احنا ناخد زيارة فلاحى ... وفعلا اتصلنا بعمى اللى على طول عمل لنا جسر جوى... بط وفراخ وحمام وقشطة وزبدة ورقاق ... ويوم الخميس كنا انا والحاج وامى واختى عند عم حسين بنخطب رشا... طبعا محدش سابنا نقعد نتعرف ... يعنى لا صلاة عشا ولا تعالوا افرجكوا على الشقة ... دخلنا فى التفاصيل على طول ... اتفقنا على الشبكه والمهر والفرح والدخله ...طبعا انتوا مستنين النهايه ....والله ما انا عرف اقول لكوا ايه .. انا عارف انكوا بتتمنولى الخير ... وده اللى حصل فعلا ... اتجوزت ... انا ورشا اتجوزنا ... وعندنا دلوقتى رانا ويوسف ... وسعيد جدا فى حياتى ....عارفين احسن حاجة فى الجوازه دى ايه .؟؟؟ ان انا اتجوزت من البنت اللى كنت بأحلم بيها ... وغيرت ديكورات المكتب ببلاش ... والجاتوه والورد بتاع الفرح برضة كان ببلاش ... هوه معقوله احاسب حمايا ... دا حتى الراجل يزعل ...ههههه طبعا بأهزر ... أو مش بهزر ... فعلا ياجماعة الخير ... اللى ربنا يحبه يرزقه بالزوجة الصالحة ...الف حمد وشكر ليك يارب ... عوضت صبرى خير .

مش عايز اتجوز 15

العروسة الرابعة عشر

انا عارف انى بأتاخر عليكوا ... بس علشان نفسى اجيب لكوا اخبار كويسة ... ماهى كانت البدايه كويسة ... والعروسة كانت كويسه ... عقل وتدين واصل ونسب وجمال ... رحت اول مرة مع الحاجة واختى ... ورحت تانى مره لوحدى ... رحت تالت مرة بردة لوحدى .... على فكرة كل مرة كنت بأروح كنت باخد معايا حاجة ... جاتوه ...تورته .. شيكولاته ... وكله من الغالى والله ... حتى فى اخر زيارة ..ام العروسة قالت : ياخالد يابنى خف ايدك شويه ... انت داخل على جواز ... كده عمرك ماحتعرف تعمل قرش .... فى المرة التالته بقى اتفقت مع ابو العروسة ان احنا نجيب الرجاله ونتفق على التفاصيل ...وفعلا أخدت الحاج وخالى وجبت تورتايه ايس كريم من بتاعة موفينبيك ... ما المرة دى ابويا بقى اللى رايح مش اى حد ... دخلنا وسلمنا وكان مع ابو العروسه خالها برضة .. وبدأ الكلام فى الدنيا وفى السياسة والتوريث واولياء الله الجدد واللى بيعملوه فى الصحفيين ... وشويه وابويا قال : شوف ياحاج صلى على النبى ... كلنا قولنا عليه الصلاة والسلام ... احنا جايين نطلب ايد بنتكوا لخالد ابنى ... ابو العروسة رجع بضهرة كدة واتفرد وقال: دا يشرفنى ياحاج ...ابويا قال : ندخل فى التفاصيل بقى يا حاج ... طلباتك ايه؟ ..وقبل ما الراجل يرد ويقول طلباته ..خال العروسة انطلق يامعلم : دا كان متقدم لها عريس وكان قاعد هنا مكانك كدة ياحاج وكان معاه شنطة فلوس ...كنت حأرد عليه بس لقيت ابويا بيضغط على رجلى وهوه بيقول : طبعا طبعا بتكوا تتاقل بالمال ومايكفيهاش كمان ... قال الخال : ايوه.... انتوا بقى حتجيبوا شبكة بكام ... ابويا قال وهوه بيبص لابوا العروسة : احنا ياحاج حنجيب شبكه بعشرين الف ... رد ابو العروسة : والله يا ابو خالد ... الشبكة دى هدية من العريس لعروسته ... دخل الزبون تانى : هوه ايه اللى هدية وايه اللى عشرين الف .. دا بت خالتها جايلها شبكة بخمسة وعشرين الف ... هيه مش اقل من بت خالتها ... ابويا برضة بص لابو العروسة وقال : انت ايه رايك ياحاج ؟ ... ابو العروسة قال: والله ياحاج انت عرف البنات وازاى بيبصوا لبعض .... ابويا قال : خلاص يا حاج خمسه وعشرين .. والخمسه دول هدية منى لبتنا ....ودخل الزبون وقال : واحنا بنكتب قايمه .... دخل خالى وقال : وماله حقها وحقكوا ... العفش اللى حايجى حيتكتب فى القايمة ... رد الزبون : مش العفش بس ... كل اللى حايجى فى البيت ... والاحسن .. نكتب قايمه بميت الف جنيه ... خالى بدأ ينفعل :طاب لو الحاجات كانت اقل من ميت الف جنيه ... قال : وايه يعنى انتوا حتلاقوا زى بتنا ؟ .... دا فيه عريس مكلمنى عليها وكان عايز يجى بكرة ومعاه شنطين فلوس ... طبعا انا قاعد باغلى ومش قادر اتكلم احتراما لابويا وخالى ... لكن لقيت ابويا بيقول لى : مش عايز تقول حاجة ياخالد ... حسيت ساعتها انه بيقول لى انطلق خد قرارك انا ماليش فيه ... بصيت كدة وقولت : والله يابا انا شايف ان احنا مش حنقدر على البيعة دى ..يعنى واحد داخل بشنطة فلوس والتانى عايز يجى بشنطتين فلوس ... لا ياحاج : انا مقدرش ادخل مزاد على بضاعة انا مامعييش تمنها ... الا لودخلت ... ممكن اخسر التأمين ... ... بصيت لابو العروسة وكملت : وانت ماترضليش الخسارة يا حاج مش كده ولا ايه ..وعموما الجواز قسمه ونصيب ... وكفايه ان احنا اتعرفنا على ناس كويسة .... وحصل شوية خزعبلات كدة وابتسامات من ورا القلب وروحنا ...

انتوا شايفين ان حظى وحش واكيد زعلانين علشانى ... بس انا شايف ان فيه امل ان المرة الجاية الاقى العروسة ... ماهى البنت دى كانت كويسة ... بس اهلها بقى ... يالا ...

مش عايز اتجوز 14

العروسه الثالثة عشر

وحشتكوا مش كدة ... والله ما اخرنى عليكوا غير الشديد القوى .. اصلى قعدت يجى اسبوع فى البيت عيانوزهقان ومكتئب ومش طايق نفسى ... طبعا عايزين تعرفوا السبب ... السبب العروسة الاخرانيه اللى ححكيلكوا حكايتها ...شوف ياسيدى ... طبعا كالعادة جبت الجاتوه ورحنا للعروسة اللى اهلها استقبلونا استقبال الفاتحين ... امى واختى زى مانت عارف طلعوا برة فى الصاله ... وابوالعروسه ...لاااا ... دانزل يشرب حجر معسل على القهوه .... المهم بقى ... العروسة عادى يعنى .. لا حلوه ولا وحشة ... بس كانت مكشرة ... مش تكشيرة زعل ولا عركه ... لا تكشيرة زهق .. ملل ... قلق ... ومع التكشيرة حاطه على وشها ابتسامه غصب ... فالابتسامه طالعة زى ماتقول اشمئزاز كدة ... قولت استعنا على الشقى بالله ... ماتخدش يابنى بالمظاهر ... ناخد وندى فى الكلام ونشوف ..سالت : انا عرفت انك فى اخر سنه فى كليه الحقوق ... قالت ايوه ... ربنا يعديها على خير ... قولت ايه مش مذاكرة ولا ايه ... لا بذاكر وبذاكر كويس قوى ...بس الاساتذه متدبأنى ... بيجيبوا اسئله صعبه قوى ... انا عارفة انهم بيبقوا عايزين يشوفونى مزاكرة كويس ولا لا ... قولت : قصدت متدبئين الدفعة بتاعتكوا ... قالت : لا انا بالذات ... بس انا مش بديهم فرصة واحل كويس ... بس برضة بيدققوا فى ورقتى لما بيجوا يصححوها ...قولت : طاب ليه انت بالذات ... قالت : انا عارفة ...زمايلى اللى فى الكليه راحوا وقالوا لهم عليه كلام وحش ... ومن يومها وهما متدبئنى ... قولت : طاب ومحاولتيش تقعدى مع الدكاترة دول وتفهميهم الحقيقة .... قالت : حتى لو طلعت لهم واتكلمت معاهم مش حيصدقونى ... دول بيراقبوا كل تحركاتى عايزين يمسكوا عليه غلطة ..بس مش عارفين ...قولت : وبيراقبوكى ازاى ... قالت ... كل حته انا باروحها حاطين فيها كاميرات سريه ... قولت : يعنى ممكن يكون فيه كاميرات هنا ... قالت لى : ماتبصش ... قولت ماهو لو فيه كاميرات حيسمعونا ... قالت لى :لا .. الكاميرات من غير صوت ... قولت طاب والحل ... قالت المكان الوحيد اللى مافهوش كاميرات هوه اودة النوم ... قولت كويس ... قالت لى: لا مش كويس ... دول متتفقين مع الجيران علشان يراقبونى ومن ورا الشيش ... قولت : طاب وبعدين : قالت باقفل الشيش والازاز علشان مايشوفنيش ... قولت : انت ليكى صحاب ؟ ... قالت لى: قاطعتهم كلهم ... قولت ليه : قالت لى : بيتكلموا عليا من زرا ضهرى ... بص ... لو حد قالك عليه حاجة ماتصدقش ... دول كلهم متفقين مع الدكاترة اللى فى الكليه قولت : حيقولوا لى ايه .....قالت : كلام اصل هما عايزين يسواؤا سمعتى ... علشان انا بنت شريفة ومحدش لمسنى .. طول عمرى ماحدش لمسنى ....حتى وانا بنت صغيرة فى تالته ابتدائى ... مافيش مخلوق لمسنى ...وبدأت تتوتر والعرق ملى وشها ...قولت : هدى نفسك ... انا عارف .. ولو ماكنتيش بنت شريفة وعفيفة ماكنتش جيت علشان اخطبك ... قالت : يعنى انت خلاص حتخطبنى ...قولت فى نفسى : يانهار طين ياولاد ... ان احأتدبس ولا ايه ... قولت يعنى نتعرف ولو فيه وفاق .. ربنا يسهل.. قالت : اهوه ... رجعت فى كلامك اهوه .. يبقى صدقت اللى بيقولوه عليه .... وبدأ صوتها يعلى : دول كدابين ... محدش عارف حاجة .. محدش شاف حاجة ... انا ماليش ذنب ... كل حاجة جات غصب عنى ... انا ... وفجأة اغمى عليها ووقعت على الارض ... حاولت انادى على حد يلحقها ... صوتى ماكنش راضى يطلع ... اتمالكت نفسى وناديت على امى ... دخلت ام العروسه بطريقة غريبه ... كانت هادية خالص .. قعدتها وخبطت على خدها وفاقت ... قولت : ..انا ... انا... ام العروسه قالت : ماتقلقش يابنى دى بس اصلها ماكلتش حاجه النهاردة ... فجالها هبوط ... شويه كده وحتبقى كويسه ... قلت فى نفسى : الحكابه مش حكايه هبوط .. شكل الحكايه دى بتتكرر كتير ... طبعا استأذنا بحجة ان لينا زيارة تانيه ...علشان نسيب العروسة ترتاح ... واحنا ماشيين كان نفسى اقول لامها بنتك عايزة دكتور نفسانى ... بس قولت وانت مالك ياواد الا تلبسك مصيبه ... بصراحة البنت دى صعبانه عليه قوى ... قوى قوى .. بس اعمل ايه ؟؟؟!!

مش عايز اتجوز 13

العروسة الثانية عشر

دخلت عليه امى وانا قاعد على النت اقرأ فى مدونه حنعيش يعنى حنعيش ... قالت : ايه يا خالد انت لسه قاعد ... انت ناسى ان النهاردة الخميس ... قوم يابنى البس اتأخرنا على العروسة ... قولت : والنبى ياماما سيبينى فى حالى .. بلا عروسة بلا محروسة ... انا كدة حلو وزى الفل ... مش عايز اتجوز ... مش شايفة البوست الاخرانى بتاع حنعيش يعنى حنعيش بيقول ان الطوفان جاى ... قالت : هوه انت لسه متابع الراجل ده ... سيبك منه ماتخليش كلامه يأثر فيك ... دا ربنا كبير يابنى وعالم بحالنا ... سيبنى بس اهبدهولك تعليق غير معروف اخليهولك يقفل المدونه دى ... قلت ضاحكا : ياواد يابتاع النت وعرفت كمان التعليقات .... قالت : جرى ايه ياواد ... دا الفيس بوك بتاعكوا ده مولود على ايدى .... المهم ... قمت لبست وعملنا اللى بنعمله كل اسبوع ... خبطنا ودخلنا ... ريحة البخور كانت تخنق ... شويه وجات العروسه ... وهيه داخله علينا امها قالت : اسم الله والحارس الله وضمت صوابعها الخمسه وعملت بيهم دايرة فى الهوا ... وقالت : بتى اللهم صلى على النبى بكالوريوس اقتصاد وعلوم سياسية ... ماشاء الله الله اكبر ... خرج الحاج يصلى العشا ... الحاجة قالت لامى واختى : تعلوا نقعد فى الصاله ونسيب العرسان يتعرفوا على بعض ... النهاردة الخميس... جايبين فيلم حلو على روتانا سينما ...

العروسه كانت لابسه سلسله فيها كف وفى وسط الكف عين ... ولابسه خاتم فيه فص ازرق كبير ... سالت بتضرع : هوه ممكن نفتح الشباك ؟... اصل البخور جامد قوى .... قالت : حاضر وفتحت الشباك وهيه بتقول : هوه انت مابتحبش البخور ... قولت : لا ابدا بس انتوا مكترينه شويه ... قالت : بالعكس ... داحتى البخور النهارده خلص وبابا كسل ينزل يجيب ... قولت : النهارده ..؟ .... هوه انتوا بتبخروا كل يوم ....؟ ... قالت : طبعا .... وراحت موطيه صوتها وقالت : اصل البخور بيطرد العين .. ويراضى الاسياد ... انتفضت وقولت : ايه ؟؟؟ ...اسياد ... قالت : ماتخفش ماتخفش ... احنا عاملين احتياطتنا ... عمرهم ما يزرونا .... قولت : احتياطات ازاى يعنى ؟ ... قالت كل ركن من اركان البيت فيه حجاب... قولت : ياسلاااام ! ... قالت : آه والله ... اصل كل حاجه وليها حجابها ... سألت : ازاى يعنى ... قالت : اقولك ... يعنى مثلا اختى بعد ما تجوزت كانت دايما على خلاف مع جوزها .... رحنا للشيخ عمل لنا حجاب المحبه ... ومن يومها مافيش خلافات بينهم خالص ... قولت : ياسلااام ..!! قالت : آه والله ... قولت : والحجاب ده فيه ايه ؟ ... قالت : حقولك بس اوعى تقول لحد ... اصل دى اسرار ... قولت: لا ماتخفيش مش حاقول لحد ... قالت : دى ياسيدى ورقة مكتوب فيها يا بدوح يا بدوح يا بدوح .... الف بين الروح والروح ... بحق العلم واللوح ... وآدم وحوا ونوح ... وبعدين تتقفل الورقة على شكل حجاب وبعدين مولانا يعزم عليها ويبخرها ... وتلبسها الوحدة فى رقبتها ... كل يبقى زى الفل ... قولت : ياسلااام ....! قالت: اه والله قولت : طاب وعدم الوفاق ده كان سببه ايه .....قالت : ماحنا عرفنا بعد كدة ... واحده صاحبة اختى ... منها لله بقى ... كانت عامللها عمل بعدم الوفاق حطاه تحت السرير ... قولت : وحطته ازاى ؟ ... قالت : شوف الكهن ياسيدى... قالت لها والنبى افرش معاكى ... علشان افك عقدة من عقد المرتبه ... اختى طيبه ... وافقت ... اتاريها وهيه بتفك عقدة المرتبه ...راحت حاطه العمل تحت السرير ... قال وعامله صحبتها ..... قولت : طاب وتفك عقدة المرتبه ليه ؟ ... قالت علشان يجيلها عريس ... قولت فى نفسى : يانهار اسود على العيشة واللى عايشينها ... مال المرتبه ومال العريس ؟!! ... العروسه حست بيه وقالت : افهمك ... ماهى الواحدة لما مايجيلهاش عرسان ... تروح لاى واحدة لسه بتفرش عفشها وتفك عقدة من عقد المراتب ... مايفوتش اسبوع الا والعريس يخبط .... قولت : ياسلاااام ..!! قالت اه والله ... قولت : بس انا مش مصدق ان فيه ستات شريره كدة ... قالت لى : لا صدق دا فيه اللى اكتر من كدة ... ورجاله بقى مش ستات .... قولت : احكى لى .... قالت : اخو جوز اختى ... قولت : ماله ؟ ... قالت : كانت لسه والدة ... وقال ايه كان عايز يدخل يبارك لها ... وكان شايل كيس اسود ... لولا ستر ربنا امى خدت منه الكيس وفتحته..... وفعلا ... لقت فيه لحمه ...قولت : وفيها ايه دى ؟!! قالت فيها ايه ... دا كان عايز يشاهرها ... قولت : يشهرها ازاى مش فاهم ... قالت : يشاهرها ... يعنى مايخليهاش تخلف تانى ...قولت : برضه مش فاهم ؟ ... قالت : ما اصل الواحدة لما تكون والدة ... لو راجل دخل عليها وهوه حالق دقنه ..او شارى لحمه ... ماتحملش تانى ... قولت : ياسلااام ؟!!... قالت اه والله ... قولت لو حصل يعنى ... ليها حل؟ ...قالت :ايوه ليها حل ... بس وجع دماغ بقى ...جوزها ينزل يوم الجمعة ... ويلم عشر برايز من عشر رجاله ...كل واحد منهم بريزة ... ولازم يكون الرجاله اسمهم محمد ....ولازم يكونوا لابسين جلابيه بيضا ...وقبل ما ادان الجمعة يدن ... قولت : وبعدين ... قالت : يلف العشر برايز فى قماشه ومراته تتحزم بيهم لغايه ماتبان البشارة .... قولت : ياسلااام ..؟! قالت اه والله ... قولت : انت تقديرك ايه فى الكليه ... قالت : كنت باطلع بامتياز كل سنه ... ماعدا اخر سنه ... طلعت بجيد جدا ...قولت : لازم ماكنتيش حاطه حجاب النجاح ... قالت بتعجب : فعلا ... بس انت ايه اللى عرفك ؟ قولت : ماهو انا نسيت اقولك ان اختى اللى تحت الارض بتقولى كل حاجة .........

والنبى حد يقول لامى مش عايز اتجوز .... والنبى والنبى ..

مش عايز اتجوز12

العروسة الحادية عشر

يوم الخميس ...........................................................................................

..........................................................................................................

دخلت العروسة وهيه شايله الحاجة الساقعة والجاتوه .... كانت لابسة حاجة مش عارف هيه ايه بالظبط .... لاهيه بدى ولا هيه بلوزة ولاباين انه قميص ولا حتى شاكله شيرز .... وشيرز بلغة قدماء المصريين يعنى بلوفر .... دا غير الطرحة اللى لا لون ولاطعم ولا ريحة ... قولت فى نفسى : ياواد ماتخدش بالمظاهر ... عموما فيه ناس كتير ذوقها وحش فى اللبس ...بس بتبقى شخصيه كويسه وفكرهاعالى واسلوبها حلو ...العروسه من اول ماقعدت وهيه بتعدل وتلف وتشد فى الحاجة الغريبة اللى هيه لابساها ...حسيت انها عايزة تقولى : ايه رايك؟... فقولت من ورا قلبى ...شيك قوى الطقم ده عليكى ... قالت بفرح : مرسى ...انا جيبته فى التخفيض بالفين وسيعميت جنيه ... لقطه ... كان بالفين وتسعميه.....قولت : ياه مش غالى شويه .... قالت بفخر : لأ طبعا ... دا كريستيان ديور .... قولت : ودى بقى حاجة كويسه ؟!....قالت باستغراب : طبعا ... دا سينييه ... قولت : جميل ان الواحد يشترى حاجه ماركه .... قالت لى: طبعا انا مابشتريش الا الحاجات السينييه ... دا غير انى مابدخلش الا المحلات الكلاس ... يعنى مابشتريش الا من سيتى سنتر ... كارفور ... ولما بننزل اسكندريه فى الصيف باشترى من سان استيفانو مول ... سألت : يعنى انت مابتشتريش غير كريستيان ديور ... قالت : لا طبعا ... بغيير يعنى مرة ايف سان لوران ... ومرة شانيل ... وساعات بس قليله لما مابلاقيش حاجة عجبانى ... باشوف حاجات من بتاعة هانى البحيرى ... بس يعنى مش كتير ... كنت عايز اسأل مين هانى البحيرى ده ... بس طريقتها فى الكلام عنه حسستنى انه حاجة جامده ومشهور ...وماينفعش ماكونش اعرفة .... فقولت اسكت يا واد احسن لك ... قالت :على فكرة ... احنا كلنا كده ...اهم حاجة لما نشترى نشترى سينييه ... امبارح اخويا جاب طقم ديزيل روعة ... تى شيرت وبنطلون بالف وتلتميت جنيه بس ... قولت لها : بس ؟ قالت لى اه والله بس ... قولت : ماصدقش ديزل وبالف وتلتميت جنيه بس ؟ قالت : اه والله... امال يساوى كام ؟ .. قولت والله الديزيل على حسب انت نازله فين ... يعنى اللى رايح القاهرة مش زى اللى رايح اسوان ... والفرنساوى غير الاسبانى ...بصيت لى بتعجب ... مافهمتش القفشة ... بصراحة عندها حق ... قفشه مش سينييه خالص ... قالت : امال انت بتحب ماركات ايه ؟ ... قولت : والله انا مش بركز فى الماركه على قد ما بركز ان الحاجة تبقى ذوق وشيك وشكلها حلو ... قالت: غريبة دى ... فيه حد يقدر يلبس حاجة مش سينييه....قولت : يعنى ... لسه الموضوع ده ماوصلناش ... قالت : بس انا شايفه ان مامتك واختك لبسهم حلو وشيك .. باين عليه سينييه ... قولت لها : ده حقيقى ... العبايه اللى لابساها الحاجة ماركة ام سينا الخياطة ... والتيير اللى لابساه اختى ماركة عم حافظ هوزن ... العروسة بصت لى باشمئزاز وقالت : يعنى ... ماركات ماسمعتش عنها ... قولت ازاى بقى ... دى ام سينا مشهورة انها بتعمل حردة الكم ولا اجدع مقص دار ... ولا عم حافظ هوزن ... احسن من يلفق ديل جيبه فى القطر المصرى كله ... وفجأه دخل علينا اخو العروسه .. لابس تى شيرت معفن ... وبنطلون جينز زباله من الاخر ... قالى : اهلا وسهلا يا باشمهندس معلش كان المفروض اكون فى استقبالك ... بس اصلى بادور على ال سى دى ناشيونال يابانى اصلى ... بقالى اسبوع مش لاقى ... ماتعرفش الاقيه فين ... قولت له : اسألك اصل انا ماليش غير فى الكمبيوترات ...قالى : طيب ماتنساش والنبى يا باش مهندس .. قام علشان يمشى ... قومت وانا فى ايدى كاس البيبسى وفى نفس اللحظة قامت العروسة الدنيا اتلخبطت .. وكاس البيبسى وقع على التيشرت الديزل اللى بقى ماركة بيبسى .... اخو العروسة اتجن وقعد يصرخ التى شيرت التىشيرت ... وقلع التى شيرت علشان يلحق البقعة قبل ما تثبت ...اه نسيت اقولكوا على حاجه مهمه ... لما قلع التى شيرت .... كان لابس فانله داخليه ماركة المشربيه ... اه يعنى مخرمه من كل ناحيه ... وفى النص مقطوعة ضبه ومفتاح ... الموقف كان محرج للغايه ... استأذنا واحنا على السلم قولت لابو العروسه : على فكره ياحاج .... مصنع ناشيونال اليابانى الاصلى قفل من خمسه وعشرين سنه ... وفتح مصنع فى الصين ومصنع فى ماليزيا ... وبقى اسمه باناسونيك .....

مش عارف ليه حاسس كدة انكوا بتقولوا عليه انى اتعمدت انى اوقع كاس البيبسى على اخو العروسة ... صدقونى ... ماكنش قصدى ... او ماتصدقنويش

شكر خاص

فكرة

د. احمد السيد

مش عايز اتجوز 11

العروسة العاشرة

كالعادة يوم الخميس اخدت الجاتوه وامى واختى ورحنا علشان نشوف العروسة الجديدة ... اول ما وصلنا لشقة العروسة ... امى قالت : ايه ده يابنى؟ ... دا باين النور مقطوع ... قولت : وبعدين.... نرجع ولا ايه ؟ اختى قالت : يمكن يكونوا قاعدين فى الاودة اللى جوه ... رن الجرس واتكل على الله ... رنيت الجرس ... الجرس مارنش ... قولت : يبقى النور عندهم مقطوع .. راحت اختى مخبطة على الباب وشويه والباب انفتح ...طلع ابو العروسه ... رحب بينا وقال لنا اتفضلوا ... عدينا على الصاله اللى كانت مضلمه .... ودخلنا على السفرة اللى عرفنا انها السفرة لما قاد ابو العروسة اللمبه الستين واط المدلدله من السقف ... ومن السفرة دخلنا على الصالون اللى عرفنا انه الصالون بعد ابو العروسه ماقاد النجفة ام ست لمبات ...السفرة والصالون من مواليد معاهدة السلام ... السجاجيد مفروش عليها مشمع .. والصالون متغطى بكريتون من بتاع ستى الله يرحمها ... شويه ودخلت العروسه شايله صينية عليها تلت كوبايات شاى ومن غير ميه ... آه ... نسيت... كوبايات الشاى فى نفس الحجم اللى بأشرب فيه القهوة على قهوة الواد بندق ... خرجت ام العروسه واختى وامى علشان يقعدوا فى الصاله ... واستأذن الحاج علشان يصلى العشا .. وهوه خارج طفى نور السفرة ... العروسه هيه كمان قامت وطفت نص النجفة وقالت : سحب كهربا على الفاضى .... قولت : ايوه عندك حق الفواتير اليومين دول بتيجى نار ... العروسه عطتنى كوباية الشاى وقالت :اتفضل ... وشالت الصينيه وخرجت تديها لامى واختى... شربت ... مر ... مر يامعلم ... مافيهوش ولا نقطة سكر ...ماقدرتش اكمل .. حطيت الكوبايه على التربيزة وقعدت ... سمعت صوت ابو العروسه وهو بيزعق فى الصاله ... مين البنى ادم اللى فتح علبة التونه دى... حرام عليكوا ... بطلوا افترا بقى .... ردت ام العروسه : والنبى ماهو انا ياحاج ... تلاقيها بتك ولا الواد عز ...دخل عليا ابو العروسه وهوه ماسك علبة التونه ... علبة صغيرة من ام اتنين جنيه ... ومفتتة كمان مش قطع ... صرخ وقالى: شايف يا استاذ ... شايف الافترا بتاع العيال ... طاب ليه ... ما حنا اتغدينا خلاص ...وكمان سيابين الباقى فى المطبخ ...طاب حطوها فى التلاجة علشان ماتحمضتش ... ابتسمت وهزيت راسى ... ماهو انا ماكنتش عارف ارد اقول ايه ... دخلت العروسة ... عز... عز يابابا هوه اللى كل منها ... الواد ده لازم يتربى ... مش كفايه فاتورة التليفون جايه بتمانين جنيه .... بسبب لكه فى التليفون عمال على بطال ...ابو العروسعة ... يانهاركوا اسود ... تمانين جنية ... وعزة جلال الله ما انا دافعها وان شالله يقطعوا الحرارة ... بص لى وقال : معلش يا استاذ دوشتك ... بس اديك شايف العيال وعمايلهم ....عنئذنك ... قولت وانا مبتسم ابتسامة عبيطة : اتفضل ياحاج ... قولت للعروسه : هوة عز دايما مبزر كدة ؟ ... قالت لى : مبزر ... دا مفترى ... اقولك ايه ولا ايه ... دابيجيب جزمة كل تلت سنين ... آه ... طاب انت عارف لما يدخل يستحمى ... بيسيب الموتور قايد ربع ساعة ... يعنى خراب من كله ... فاتورة ميه وفاتورة كهربا ... الا انت بتاخد كام فى الشهر ؟ ... السؤال فاجئنى ... قولت : انا ماليش مرتب ثابت ... انتى يكفيكى كام فى الشهر ... قالت لى : ربعميت جنيه كويس قوى ... وممكن تلتميه كمان دا احنا اتنين ... قولت : لا انا بيدخل لى اكتر من كدة شويه ... قالت : خلاص نبقى نعمل جمعيات بالباقى ... قولت وحنعمل ايه بفلوس الجمعيات ... قالت نشيلها ... نجيب بيها شهادات استثمار ... قولت : بس انت مش شايفة ان تلتميت ربعميت جنيه شويه ... دا كيلو اللحمه وصل تمانين جنيه ... قالت : وايه اللى يخلينا نجيب اللحمه من الجزار ... ومالها لحمة بروتين ستار ...وبعدين هوه يعنى احنا حناكل لحمه قد ايه فى الشهر ... يادوب كل الحكايه كيلو الا ربع ... قولت : على رايك ... بس بقيت الشهر حناكل ايه ... قالت لى : مالكش دعوة انت ... انا باعرف ادبرها كويس ... ماتشرب الشاى... قولت حاضر .... قالت لى : لو برد اسخنهولك .... قولت : لا كويس وشربته مرة واحدة ... ياسيدى عد انه دوا ... وفجأه قامت جرى ... وشويه ورجعت ... وقالت : معلش اصل انا نسيت السخان والع ... وانت عارف الشعله بتسحب غاز .... قولت : ماتشوفى لنا الحاج ... علشان نستأذن ... قالت: مابدرى ... قولت: لأ ... احنا بقالنا ساعه وربع ونور الصالون قايد ... قالت لى عند حق ... استأذنا على ان لينا زيارة تانيه ... نجيب فيها الحاج ونتفق ... ونعمل حسابنا نجيب سكرنا معانا ... والاهم نجيب الكشاف من على الشاحن

نصيحه يا جماعة ... اللى عايز يتقدم للعروسه دى .... ياخد وهوه رايح دسته علب تونه مفتته ....... ابوها حيوافق على طول !!!!

مش عايز اتجوز10

العروسة التاسعة

رحت للحلوانى علشان اجيب علبة الجاتوه بتاعة كل اسبوع ... مالقتهوش هناك ... ولانه بقى صاحبى سالت عليه خفت لا يكون عيان ولا حاجة ... قالولى دا واقف مع العمال فى المحل الجديد وهما بيوضبوه ... وقالولى: دا المحل جنبنا لو عايز تروح له ... قولت اروح اسلم عليه وابارك له ... استقبلنى بحفاوة باركت له.... قالى : والله يابنى ربنا يبارك لى فيك وفى اللى زيك ... لولاكوا ماكنتش خدت المحل دة .... قولت وحتعمله ايه يا حاج ... برضة تورتات وجاتوهات ... قالى : لا ... انا لقيت ان الشباب اللى زيك زهقوا من مجايب الجاتوه كل يوم ....قولت اعمل بقى محل ورد ... اهو تغيير وبدال ماتدخلوا على الناس بالجاتوه تدخلوا عليهم بالورد يمكن ربنا يفك نحسكوا ... قولت والله يا حاج عندك حق ... وان شاء الله كدة الافتتاح امتى ؟... قالى كلها شهر ولا شهرين ... وطبعا حتشرفنى فى الافتتاح ... قولت : اكيد ياحاج وحأجيب معايا كمان دستة جاتوه .... رحنا باليل للعروسة ... واحنا طالعين على السلم لقينا عركة لرب السما بنت واقفه على السلم قدام باب العروسه وبتتخانق مع جارتها اللى فوق.... ام العروسه قالت لنا: اتفضلوا ...اتفضلوا .....دخلنا وقعدنا فى الصالون نسمع اللى بيحصل فى المعركه ... البنت اللى كانت على السلم بتقول : ياوليه يامايله ... يازبالة النسوان ...التانيه تقولها : لمى نفسك يابت لاحسن انزل اجرجرك من شعرك وامسح بيكى السلم .... ترد البنت : طاب انا ليه شعر... الدور والباقى عليكى ياقرعة ... يامصديه ... انزلى كدة وانا اوريكى مين اللى يتسيق بيه السلم ياصفرة يا مقشفة... صوت تالت: خلاص بقى يانوسه هوه حصل ايه يعنى ؟...نوسه : خلاص ايه .. الوليه المعفنه ام غسيل منتن سايبه غاسيلها يخر على البلكونه.... بوظلنا غسيلنا اللى طالع عنينا فى غسيله ... الست اللى فوق : غسيل ايه يا أم غسيل ... هيه الخرق اللى منشراها دى بتسميها غسيل ... نوسه : خرق خرق ياختى.... بس اهى انضف منك يامأرحه.... على الاقل مش مخرمين من كل ناحيه ... خبـيهم ياختى فى الحبل اللى ورا خبـيهم ... الست اللى فوق : انا مش حرد عليكى انا حاخلى جوزى لما يجى ينزل يطربقها عليكوا .. نوسه : اسم الله يا امو جوز.... جوزك دا عليكى ياحلوه ... تورنشيه وتلمعيه و........... صوت رابع : اهمدى بقى نوسه... نوسه : مانتش شايف يا حاج طولة لسانها .... يامره ياعايبة .....نفس الصوت : خلاص بقى يانوسه ... اخزى الشيطان وصلى على النبى .... نوسه : اللهم صلى عليك يانبى ....طيب علشان خاطرك بس ياحاج .. لكن والنبى ومن نبى النبى نبى ما انا مفوتهالها....خلصت الهيصة اللى برة ... دخلت ام العروسه ... سلمت علينا وقالت: احنا اسفين يا جماعة ... والله ما انا عارفة اقول ايه ؟ بس انتوا عارفين بقى ... الواحد مابيختارش جيرانه ... امى قالت : ولايهمك ياختى ... الناس اشكال والوان ... دخل ابو العروسه سلم علينا وقعدنا نتكلم فى احوال الدنيا وشويه وقال لام العروسة : ماتخلى نانيس تجيب الشاى.... ولا عايزة العريس يقول علينا بخله ... قولت : لا سمح الله ياحاج ... انتوا بيت كرم ... نانيس دخلت وهيه شايلة صينيه الشاى مكسوفة وحاطه وشها فى الفناجيل ... حطت الصينيه ...ابوها قال : اقعدى يابنتى ... عنئذنك ياباشمهندس حأصلى العشا ... وقفت وقولت اتفضل ياحاج ... حرما مقدما ... ام العروسه قالت : ماتيجوا ياحاجة افرجكوا على الشقة ... وخرجت امى واختى ... قولت فى نفسى العروسه باين عليها خجوله قوى ... دى مارفعتش وشها من الارض من ساعة ما دخلت ... قولت لها : ازيك يا نانيس ... قالت وهيه لسه باصة فى الارض الله يسلمك ... قولت لها : ارفعى وشك انت مكسوفة ولا ايه .... رفعت وشها وهيه بتقولى : لا ابدا ... بس الموقف محرج .............. يانهار اسود ... دى البت اللى كانت بتتعارك على السلم ... ايوه ... ايوه ... نوسه.... ايوه نوسه دلع نانيس ... قولت : هما بقى بيدلعوكى بنوسه ... ابتسمت بخجل : ايوه ... قولت : فيه حد تانى فى العمارة اسمه نوسه ... قالت لى : لا ... قولت لها : انت اللى كنتى بتزعقى للست اللى فوق ... واتحولت يامعلم ... ست دى يتقال عليها ست ...دى بنى ادمه زباله ...واطيه ...من بيئة واطيه ... كنت عايزاها تنزلى بس ... دا انا كنت مرمرطت بكرامتها الارض ... قال وتخوفنى بجوزها قال ... اصلك ماشفتوش ... الدلعدى شورتها...... قولت فى نفسى: الدلعدى ... الكلمة دى قديمه قوى .... جابتها منين دى ....قولت : بس هدى نفسك ...واتحولت تانى يامعلم ...وقالت بهدوء ورقة : انت كيد بتقول انى وحشة ... ابدا والله دا انا حتى مابعرفش اشتم ولا ازعل حد ... بس هيه اللى نرفزتنى .... دا حتى كل صحابى بيقولوا عليه انى اهدى واحده فيهم ... قولت : طبعا طبعا بس الواحد فى نرفزته بيبقى وحش ... قالت لى: مش كدة والنبى ؟ ... قولت لها : اكيد طبعا ....وعدت القاعدة واتفقنا ان المرة الجايه حيكون معانا الحاج علشان نتكلم فى التفاصيل .... وطبع ماكانش فيه مره جاية

ليه هوه انا عبيط ارجع تانى .... احمد يا عوووووومر

مش عايز اتجوز 9

العروسة الثامنة

ملحقتش اجيب الجاتوه وانا راجع من الشغل ...قولت واحنا رايحين اعدى اجيبه ... رحنا للعروسه ... طبعا انتو عارفين اللى حصل ... بس اقول لكوا برضه ... ابو العروسه خرج يصلى العشا ... وامى واختى راحوا مع ام العروسه علشان توريهم الجهاز ... العروسه بقى ...فاردة شعرها ... لابس فستان مكسم زيادة عن اللزوم ... اكيد تعبت وهيه بتلبسه ... هوه ماكسى بس فيه فاتحه من الجنب واصله للركبه ... داغير ان قماشته ستان احمر ... وحاطة شويه مكياج يا معلم ... ايه شاريه كاتلوج اوريفلام كله ... كانت قاعدة على الكرسى اللى قدامى ويادوب هما خرجوا من هنا ... وهيه قامت قعدت جنبى على الكنبه ... عايز الحق ...لزقت جنبى ...وكل ما ابعد شويه الاقيها قربت اكتر ... كنت عامل زى فؤاد المهندس وشويكار فى مسرحيه انا وهو وهى ... مش حأكدب عليكوا ... كنت مكسوف جدا ....علبه المناديل خلصت من العرق ... كان كل املى انى اروح ... مش عايز اتنيل اتجوز ... بس اتخشبت ... قالت لى : ايه ياباشمهندس انت مكسوف ولا ايه ؟ ... قولت : لا ابدا لامكسوف ولا حاجة .. طبطبت بايدها على رجلى وقالت شاكلك حران ... حافتح لك الشباك .. قامت تفتح الشباك .. رحت قايم جرى قاعد على الكرسى اللى جنب الكنبه... رجعت وهيه بتبص لى نظرة ليها معانى وقالت : ايه قومت ليه ؟ ... قولت : علشان ابقى فى وش الشباك ... اصلى حران قوى ... قالت لى : طاب ماتقلع الجاكت ومديت ايديها علشان تقلعهولى.. بعدت شويه وقولت لا لا كدة كويس ... انت حضرتك بتشتغلى ... قالت لى وهيه بتشد الكرسى وتقربه منى : لا طبعا ... شغل ايه ... الواحدة مننا جوزها هوه شغلها ... قولت : بس الواحدة لما بتشتغل بتحس بذاتها ....قالت لى : لا دا كلام جرايد ... الواحدة ماتحسش بذاتها الا وهيه فى... مع جوزها ... هوه دة الاحساس الصح ... ولا ايه رايك ؟ ... قولت : قولت طبعا الست مالهاش غير جوزها وعيالها ... قالت لي : العيال حتكبر وتتجوز لكن الجوز هوه اللى حيفضل ... والست الشاطرة ماتخليش العيال ياخدوها من جوزها ... ماما بتقول ان انت عندك شقة ... قولت : ايوه .. شقة صغيرة كدة .. اربع اود وصاله ... قالت : احنا مش عايزين غير اودة واحدة ... قولت : لا الحمد لله الشقة اربع اود وصاله ... قالت لى : انت بتلعب رياضة ... قولت فى نفسى ايه السؤال الغريب دة ؟ ..رديت عليها : مافيش وقت بس عندى مشايه فى البيت ... يعنى ساعات بأجرى عليها ... قالت لى : لا ....لازم تمارس رياضة ... دى الرياضة اهم حاجة دى بتخلى الواحد صحته كويسه...... ويقدر يستحمل المجهود ... قولت: ربنا يسهل... قالت : ماهى اهم حاجة الصحة ... والصحة بتيجى من الرياضة والاكل الكويس ...انت عليك الرياضة وسيب موضوع الاكل عليه ... انا احسن واحدة تعمل الجمبرى والاستاكوزا ... وبأعمل شوربه فواكة البحر ولا اجدع شيف ... قولت فى نفسى انا ايه اللى جابنى هنا ... السكة دى مش بتاعتى... الحقينى يامه ... قالت لى : ايه سرحت فى ايه ياباشمهندس ... قولت : لا ولا حاجة ... مدت ايديها على الكرافته ومسكتها وقالت بدلع : كرافتتك حلوة ياباشمهندس ... شديت الكرافته من ايديها وقولت شكرا... الله يخليكى ... هوه الحاج اتأخر كدة ليه ؟ قالت لى : انت عايزه علشان تتفق معاه ؟... قولت يعنى علشان نتكلم فى شويه تفاصيل ... قالت لى : شوف انا مش عايزة منك حاجة ... الشبكة اللى انت تجيبها ... والمهر اللى عايز تدفعة ادفعة ... ومش عايزة فرح ولاهيصة ... احنا نكتب وندخل على طول ...قولت : مش بسرعة كدة دا لسه عايزين نشترى العفش ونفرش ... قالت : احنا مايلزمناش غير اودة النوم .. ونبقى نجيب الباقى على مهلنا ..ولاول مرة ماعرفش اتخلص من موقف صعب اتحطيت فيه .... لولا ان ربنا نجدنى والموبيل رن ... كان واحد صاحبى ... بيسلم عليه ويقولى اخبارك ايه ... وقفت وصرخت ازاى دة يحصل ... طلبت المطافى ولا لسه ... انا جاى حالا ...بصيت للعروسه وقولت : انا اسف مضطر انزل... النار ولعت فى الشركة ... ولو ملحقتهاش حتضيع منى ... لينا قاعدة تانيه .... ياماما..... ياماما يالا بينا بسرعة....واحنا نازلين امى قالت لى : فيه ايه يابنى ... قولت :لا ابدا يا ماما ... اصل العروسة عايزة.... إمام ....وانا خالد ...امى قالت : يعنى ايه يابنى.. ايه الحكاية؟ ... قولت : كل الحكايه انى ماعنديش استعداد ادور السرجة ... قالت لى : والله يابنى انا ماعدت فهماك خالص

شكر خاص

فكرة د. محمد H

مش عايز اتجوز 8

العروسة السابعة

المرة دى كنت عند واحد صاحبى ... شفت فى الشارع بتاعه بنت حلوة عجبتنى ... سألته عنها ... قالى :ناس كويسيين ... وابوها وامها موظفين حكومة محترمين ... والبنت ماحدش فى المنطقة كلها يقدر يقول عليها نص كلمه ... قولت على خيرة الله .... صاحبى خد لنا ميعاد .... الخميس طبعا ...وانا راجع من الشغل .... ايوه ياسيدى ...من غير تريقة ... جبت علبة الجاتوه وباليل خدت امى واختى ورحنا للعروسة .... امى واختى خرجوا يتفرجوا على الجهاز التحفه اللى العروسه جايباه ... وابو العروسة طلع يصلى العشا ...العروسة قال لى : اتفضل البيبسى ...ولا انت مابتحبوش ... وقبل ما أجاوب كملت : اصل انا بأموت فى حاجة اسمها بيبسى ... انا بأشرب فى اليوم على الاقل ازازه اتنين لتر ... هما بيقولوا لى ان ده خطر وبيسبب هشاشه العظام ... بس اعمل ايه ماقدرش اعيش من غير بيبسى ...امبارح على العشا رحت اجيب ازازة البيبسى من التلاجة ...مالقيتهاش ... زعلت قوى ...ماما قالت لى معلش اصلى خالتك سوسو كانت هنا وماكنش عندى حاجة اقدمها لها ... خالتى سوسو دى كل شوية تيجى وتقعد تشتكى من الواد فؤاد ابنها ... واد لعبى كده وملموم على شلة فسدانه ... طول النهار فى الشارع ... بقاله تلت سنين مش عارف ياخد الثانويه العامة ... انا مش عارفة الناس مستصعبة الثانويه العامة دى كدة ليه؟ ... انا خدتها من غير دروس .. اه والله وجبت مجموع كمان ... كنت باحفظ الكتب من الجلدة للجلدة ... كان عندى واحده صاحبتى اسمها سميرة ... كنا صحاب الروح بالروح ...مافترقناش الا لما خلصنا الكليه ... بس لغاية دلوقتى احنا صحاب ... موبيلات وكده .. وساعات بنتقابل ... مش كتير يعنى ماهى اصلها اتجوزت واتلخمت فى العيال وجوزها ... حاكم جوزها على طول مسافر اكل عيشه بقى ... فهية اللى بقت مسؤله عن كل حاجة ... سميرةواحنا فى الثانويه ... كانت بتاخد دروس ... وكانت تقولى يابت ماتيجى معانا .. احنا ساعات بنزوغ من الدروس ونطلع نتفسح ونتفرج على المحلات ... طبعا انا ماكنتش برضى .. علشان انا عارفة لو بابا عرف يطين عيشتى ... اصل بابا ده شديد قوى... هوه حنين بس مايحبش الكدب ابدا ... حتى فى شغله ... مزعل ناس كتيرة منة ... اصل بابا دة عامل زى السيف ...لايعرف شمال ولا يمين ... على فكرة بابا قالى انك مهندس كمبيوتر ... يعنى انت بتفهم فى الكمبيوتر ؟ ... اصل انا نفسى اشترى كمبيوتر ... نجلاء ... صاحبتى بتقول لى على الفيس بوك والمدونات ... نفسى اشوف الحاجات دى ... بس مستصعبه الكمبيوتر مع ان نجلاء بتقولى دا سهل قوى ... كل الحكايه اخد دورة ال سى دى فى اسبوع وابقى ممتازة فيه ... ولو انى يعنى ماليش فى حكاية التكنولوجيا دى ... انا بحب المسلسلات ... شوفت تمثيلية اهل كايرو ... كانت حلوة قوى ... والبت السوريه دى اللى اسمها كندة ... حلوه قوى ... بس بصراحة كدة مستغربة النهاية ... ازاى اب يقتل بنته ... ايه العباطة دى ...ولا تمثيليه زهره ... حلوه بس ماكنتش متبعاها قوى ... رمضان بقى وانت عارف ... ماهو انا اللى كنت بأحضر الفطار ...وانضف البيت ... ماهى ماما الله يكون فى عونها بتشتغل ... واختى ايدك منها والارض ... حاطه الام بى ثرى فى ودنها طول النهار وسرحانه ... معلش لسه صغيرة بكرة تكبر ... الا انت عند اخوات تانيه غير اختك اللى جات معاكوا دى ... بس الحق ... باين عليها طيبه .. ومامتك كمان ...شكلها طيبه ... حاكم انا طول عمرى ليه نظرة فى الناس وعمرها ماخيبت .... ايه ياباشمهندس انت مابتشربش البيبسى ليه ... اوعى يكون مابتحبوش ... دا أنا باموت فيه....

حاولت انى اتكلم واقول لها كفايه بقى ... بس ماقدرتش ... ايه دة ... يانهار مش فايت ... انا .. انا ... انا بقيت اخرس........

مش عايز اتجوز 7

العروسة السادسة

مش مهم مين اللى جاب لى العروسة ... ماهى ماعادتش تفرق ... ما خلاص ... بقيت اكره يوم الخميس ... ويوم الاربع علشان بعدة الخميس ... ويوم الجمعة علشان قبله الخميس .... الخميس ده قررت انى اروح فاضى وماخدتش جاتوه ولا بسبوسة ولا شيكولاته ... رجعت من الشغل ... دخلت نمت ... اختى صحتنى وقالت : قوم يا خالد حنتأخر على الناس ... قومت لبست واحنا نازلين امى صرخت : نسينا الجاتوه .... قولت: لا مش جايب وحنروح لهم كدة ... قالت لى الجاتوه فوق على السفرة ... قولت : جاتوه ايه اللى على السفرة ؟ ... قالت لى: ماهو الراجل صاحب محل الحلويات بعت علبة جاتوة مع الولد اللى بيشتغل عندة ... وقال انه خاف الا تكون رجعت متأخر من الشغل ومقدرتش تعدى عليه ... طلعت خدت علبة الجاتوه ... ورحنا للعروسه ... كالعادة ام العروسه خدت امى واختى وطلعوا برة... ابو العروسه قالى : بعدئذنك يابنى .... قاطعته : اتفضل ياحاج صلى العشا .... .. العروسه المرة دى ما كانتش حلوه ... ولا وحشه ... عاديه يعنى ... بس كانت لابسه فستان ماشى مع الطرحة والجزمه والاكسسوار ... اى نعم هوه عملى شويه مش بتاع مناسبه .. بس يدل على ان ذوقها حلو فى اللبس ... واتكلمنا ... اتكلمنا فى كل حاجه ... فى السياسة ... فى الاقتصاد ... والفن ... والثقافه ... طلعت بنت مثقفه وواعيه ومريحة فى نفس الوقت ... وفجأة وبدون سابق انذار قالت : انا موافقة من حيث المبدأ ... بس ليه شويه شروط لازم توافق عليها ... ... قولت مندهشا : اسمع ... قالت بس مش تقول ايوة .. وموافق... . قولت : امال اعمل ايه ؟ ... قالت الشروط دى لازم تتكتب فى عقد ويتسجل فى الشهر العقارى ... قولت باستغراب : طاب ليه كدة؟ .... قالت : علشان الرجاله مالهومش امان .... بنت خالتى جوزها اتجوز عليها بعد عشر سنين جواز واتجوز واحدة من دور عياله .... قولت : بس صوابعك مش زى بعضها .. فيه رجاله محترمين وبيعرفوا ربنا .... قالت : وانا ايه ضمنى انك تطلع واحد منهم ... ضحكت وقولت : سمعينى يا ستى شروطك ... قالت لى واحد ... تدفع لى 100الف جنيه اذا طلقتنى ..قولت : ياستى ربنا مايجيب طلاق ثم احنا لسه اتجوزنا ....وبعدين عقد ليه مش فاهم مش دة بيتكتب فى القسيمه ... قالت لى : لا ده مالوش دعوه بالمؤخر ... المؤخر لوحدة ... ده عقد مدنى غير الحقوق الشرعية ... اتنين ماتتجوزش عليه ولو اتجوزت عليه تدفع لى 50 الف جنيه وتطلقنى ... قبل ما افتح بقى كملت بسرعة وقالت : تلاته شغل البيت بالنص ... قولت طاب والنص ده حنحدده ازاى ... قالت : نتفق ... انا عليه الطبيخ وانت عليك غسيل المواعين ... انا انضف البيت اسبوع وانت تنضف البيت اسبوع ... انا عليه الغسيل وانت عليك التنشير ... صرخت : لااااااااا كدة ظلم ... انت يا دوب بتحطى الغسيل فى الغساله وتدوسى على الزرار ... لكن انا حيطلع عينى فى التنشير وينكسر ضهرى ... دا غير الحتت الصغيرة اللى تزهق فى تنشيرها ... ولا المشابك اللى بتقع منى ... لا ..والف لا .. قالت لى : خلاص انت عليك الغسيل وانت التنشير ... قولت اه .. كده ماشى ... فيه حاجة تانى ؟ ... قالت لى اه .. اخر حاجة ... العيال .... قولت بسخريه : انا مش حأعرف ارضع ... قالت لى : لا مش حترضع ... انت حتغيرلهم .... قولت لها ... انا موافق ... بس انا كمان ليه شروط ... قالت لى : حقك ... قول ... قولت : وبرضه فى عقد ويتسجل فى الشهر العقارى ...قالت لى : قول شروطك .... قولت : انا اصرف على البيت شهر وانت تصرفى على البيت شهر ...مصاريف مدارس العيال ... انت عليكى واحد وانا عليه واحد ... والشقه اللى حنسكن فيها تدفعى لى نص تمنها بسعر النهارده ... وتشيلى نص الشبكة ونص المهر ... وتكتبى انك متنازله عن حقك فى الخلع ... وانك اذا ما نفذتيش اى بند من البنود دى.... تدفعى لى 150الف جنيه ... قالت لى : انت بتهزر مش كدة ... قولت لها ايوة طبعا بهزر ... وقلدت اسماعيل ياسين وهوه بيقول سلاموووو عليييكو... صحيح... مافيش علاقة بين العلام والثقافة وبين الصحة النفسية.