الأربعاء، 29 سبتمبر، 2010

مش عايز اتجوز10

العروسة التاسعة

رحت للحلوانى علشان اجيب علبة الجاتوه بتاعة كل اسبوع ... مالقتهوش هناك ... ولانه بقى صاحبى سالت عليه خفت لا يكون عيان ولا حاجة ... قالولى دا واقف مع العمال فى المحل الجديد وهما بيوضبوه ... وقالولى: دا المحل جنبنا لو عايز تروح له ... قولت اروح اسلم عليه وابارك له ... استقبلنى بحفاوة باركت له.... قالى : والله يابنى ربنا يبارك لى فيك وفى اللى زيك ... لولاكوا ماكنتش خدت المحل دة .... قولت وحتعمله ايه يا حاج ... برضة تورتات وجاتوهات ... قالى : لا ... انا لقيت ان الشباب اللى زيك زهقوا من مجايب الجاتوه كل يوم ....قولت اعمل بقى محل ورد ... اهو تغيير وبدال ماتدخلوا على الناس بالجاتوه تدخلوا عليهم بالورد يمكن ربنا يفك نحسكوا ... قولت والله يا حاج عندك حق ... وان شاء الله كدة الافتتاح امتى ؟... قالى كلها شهر ولا شهرين ... وطبعا حتشرفنى فى الافتتاح ... قولت : اكيد ياحاج وحأجيب معايا كمان دستة جاتوه .... رحنا باليل للعروسة ... واحنا طالعين على السلم لقينا عركة لرب السما بنت واقفه على السلم قدام باب العروسه وبتتخانق مع جارتها اللى فوق.... ام العروسه قالت لنا: اتفضلوا ...اتفضلوا .....دخلنا وقعدنا فى الصالون نسمع اللى بيحصل فى المعركه ... البنت اللى كانت على السلم بتقول : ياوليه يامايله ... يازبالة النسوان ...التانيه تقولها : لمى نفسك يابت لاحسن انزل اجرجرك من شعرك وامسح بيكى السلم .... ترد البنت : طاب انا ليه شعر... الدور والباقى عليكى ياقرعة ... يامصديه ... انزلى كدة وانا اوريكى مين اللى يتسيق بيه السلم ياصفرة يا مقشفة... صوت تالت: خلاص بقى يانوسه هوه حصل ايه يعنى ؟...نوسه : خلاص ايه .. الوليه المعفنه ام غسيل منتن سايبه غاسيلها يخر على البلكونه.... بوظلنا غسيلنا اللى طالع عنينا فى غسيله ... الست اللى فوق : غسيل ايه يا أم غسيل ... هيه الخرق اللى منشراها دى بتسميها غسيل ... نوسه : خرق خرق ياختى.... بس اهى انضف منك يامأرحه.... على الاقل مش مخرمين من كل ناحيه ... خبـيهم ياختى فى الحبل اللى ورا خبـيهم ... الست اللى فوق : انا مش حرد عليكى انا حاخلى جوزى لما يجى ينزل يطربقها عليكوا .. نوسه : اسم الله يا امو جوز.... جوزك دا عليكى ياحلوه ... تورنشيه وتلمعيه و........... صوت رابع : اهمدى بقى نوسه... نوسه : مانتش شايف يا حاج طولة لسانها .... يامره ياعايبة .....نفس الصوت : خلاص بقى يانوسه ... اخزى الشيطان وصلى على النبى .... نوسه : اللهم صلى عليك يانبى ....طيب علشان خاطرك بس ياحاج .. لكن والنبى ومن نبى النبى نبى ما انا مفوتهالها....خلصت الهيصة اللى برة ... دخلت ام العروسه ... سلمت علينا وقالت: احنا اسفين يا جماعة ... والله ما انا عارفة اقول ايه ؟ بس انتوا عارفين بقى ... الواحد مابيختارش جيرانه ... امى قالت : ولايهمك ياختى ... الناس اشكال والوان ... دخل ابو العروسه سلم علينا وقعدنا نتكلم فى احوال الدنيا وشويه وقال لام العروسة : ماتخلى نانيس تجيب الشاى.... ولا عايزة العريس يقول علينا بخله ... قولت : لا سمح الله ياحاج ... انتوا بيت كرم ... نانيس دخلت وهيه شايلة صينيه الشاى مكسوفة وحاطه وشها فى الفناجيل ... حطت الصينيه ...ابوها قال : اقعدى يابنتى ... عنئذنك ياباشمهندس حأصلى العشا ... وقفت وقولت اتفضل ياحاج ... حرما مقدما ... ام العروسه قالت : ماتيجوا ياحاجة افرجكوا على الشقة ... وخرجت امى واختى ... قولت فى نفسى العروسه باين عليها خجوله قوى ... دى مارفعتش وشها من الارض من ساعة ما دخلت ... قولت لها : ازيك يا نانيس ... قالت وهيه لسه باصة فى الارض الله يسلمك ... قولت لها : ارفعى وشك انت مكسوفة ولا ايه .... رفعت وشها وهيه بتقولى : لا ابدا ... بس الموقف محرج .............. يانهار اسود ... دى البت اللى كانت بتتعارك على السلم ... ايوه ... ايوه ... نوسه.... ايوه نوسه دلع نانيس ... قولت : هما بقى بيدلعوكى بنوسه ... ابتسمت بخجل : ايوه ... قولت : فيه حد تانى فى العمارة اسمه نوسه ... قالت لى : لا ... قولت لها : انت اللى كنتى بتزعقى للست اللى فوق ... واتحولت يامعلم ... ست دى يتقال عليها ست ...دى بنى ادمه زباله ...واطيه ...من بيئة واطيه ... كنت عايزاها تنزلى بس ... دا انا كنت مرمرطت بكرامتها الارض ... قال وتخوفنى بجوزها قال ... اصلك ماشفتوش ... الدلعدى شورتها...... قولت فى نفسى: الدلعدى ... الكلمة دى قديمه قوى .... جابتها منين دى ....قولت : بس هدى نفسك ...واتحولت تانى يامعلم ...وقالت بهدوء ورقة : انت كيد بتقول انى وحشة ... ابدا والله دا انا حتى مابعرفش اشتم ولا ازعل حد ... بس هيه اللى نرفزتنى .... دا حتى كل صحابى بيقولوا عليه انى اهدى واحده فيهم ... قولت : طبعا طبعا بس الواحد فى نرفزته بيبقى وحش ... قالت لى: مش كدة والنبى ؟ ... قولت لها : اكيد طبعا ....وعدت القاعدة واتفقنا ان المرة الجايه حيكون معانا الحاج علشان نتكلم فى التفاصيل .... وطبع ماكانش فيه مره جاية

ليه هوه انا عبيط ارجع تانى .... احمد يا عوووووومر

هناك 8 تعليقات:

  1. ههههههههههههههه
    بجد ربنا معاك
    ومستنظرين الباقي:)

    ردحذف
  2. ههههههههههههههههههههههههههههههههه
    اولا انا متشكرة جدا جدا جدا وربنا يديك الصحة ويبعد عننا النار اللي جايدة في جلوبنا يا سنوسي يا ولدي

    ثانيا
    انا أمووووووووووووت واعرف المعجم اللي انت كتبته ده جبته منين
    حتى المسلسلات مفيهاش المعجم كامل كده
    لأ مش ممكن :))
    تسلم افكارك
    بس الا بالمناسبة
    كل الرجالة في القصة بيصلوا العشا؟
    مفيش واحد فيهم بسسسسسسسسسس بينزل يشيش على قهوة ولا يروح للشلة يلعبوا دومينو؟ :)

    ردحذف
  3. اكرر سؤال الرفيقه الشقيقه الى وحشاني ستيته

    انت جايب المعجم بتاعك منين يا دوك يا لهوي كنت هاقع فى الارض من الضحك على الاكسبرشن بتاعك والتكات الفظيعه زي خبي فى الحبل الى ورا هههههههههههههههههههههههههههه

    فظييييييييييييييعه

    ردحذف
  4. الحلقات دي تحفة انا بضحك اوي لدرجة ان بنتي بتخش عليا مستغربة و تقولي "ايه يا ماما انتي بتضحكي لوحدك" بحس انه قربت تقول ماما اتجننت .كسفتني قدام العيال .استمر. في انتظار البلاوي اللي جيه " قصدي العرايس"

    ردحذف
  5. يا ادي الحظ اللي في النازل
    دانا ادمنت مدونتك ..لا ولا يفوتك انا سعودية بس كل الناس بتقولي قلبتي لهجتك مصري لييييه؟؟
    وانا مابردش الا بجملة وحدة (حنعيش يعني حنعيش )
    ^_^

    ردحذف
  6. منى
    تحياتى ... انا كنت حانهى السلسله ... بس حاكمل البلاوى قصدى العرايس

    ردحذف
  7. نور ...
    تسلمى ويسلم اهل السعوديه كلهم ...

    ردحذف
  8. بنت بميت راجل

    بس اكيد متنفعش

    ألا صحيح

    هو ليه ام العروسة بتاخد ام العريس واخته علشان تفرجهم على العفش

    عندنا مفيش حاجة زي كده خالص

    ولو العشا اذنت اخويا بياخد العريس معاه وينزلوا يصلو العشا ويرجعوا تاني

    ردحذف