العروسة الرابعة
امى قالت شوف بقى يا خالد ... المره دى جايبه لك عروسة مافيهاش غلطة ... حلوه ومحجبة وبنت ناس طيبين ... وانا عارفه امها ... متربيين سوا ... كانت ساكنه قصاد بيت جدك ... امها دمها شربات ... واكيد ... اكيد البنت حتبقى زيها .... دى كمان العروسة معاها بكالوريوس تربية نوعية ... يعنى ست بيت ممتازة ... وعلى فكرة مش عايزة تشتغل .... خلاص انا خدت ميعاد الخميس الجاى .... وجه يوم الخميس اللى بدأت اكرهه .... قولت اجيب المرة دى تشكيله جاتوه على بسبوسه على ملفيه ... اهو من باب كسر النحس ... وصلنا ... خبطنا ...دخلنا ... قعدنا ... ام العروسة خدت امى واختى علشان توريهم هية مجهزة البت ازاى .... طبعا ومن غير ما اقول لكوا عارفين ابو العروسة طلع يعمل ايه ... ايوة .... يصلى العشا .... وقعدت مع العروسة ..هيه بصراحه حلوه ... بس طخينه حبيتين ...اينعم هية مش طخينة قوى ... بس بعد الجواز اكيد حتزيد عن كدة ... القصد مسكت كاس البيبسى وقالت لى : اتفضل ...انت ماشربتش ليه ؟ ...اقولك انا عامله رز بلبن بالمكسرات يجنن ... اجيب لك طبق ؟ قولت لها ...لا شكرا ... قالت لى: بلاش انا عامله جيلى بالموز تاكل صوابعك وراة ...اجيب لك كاس ؟...قولت لها : لا مرسى انا كنت عايز .... وقبل ما اكمل الجمله قاطعتنى وقالت : شاكلك كدة ماتغديتش ...احنا عاملين بط ورقاق ومحشى ورق عنب ...حأعمل لك طبق ... قولت انا عايز اتكلم معاكى ...قالت : ومالوا اتكلم وانت بتنأنأ ... قلت : اعفينى ... اصلى يا اتكلم يا انأنأ...قالت :شاكلك كدة مش واثق فى طبيخى ...دا انا احسن واحدة بتطبخ فى مصر ... محدش كل اكلى الا وكل صوابعه وراه...انت بتحب تاكل ايه .... قولت : والله مافيش حاجة محددة ...كله نعمة ربنا ...قالت : طبعا دا الاكل احسن نعمه عطاهلنا ربنا ... هوه احنا واخدين منها ايه غير الا كله الحلوة والنومة الحلوة ...قاطعتها : انت بتشوفى ايه فى الدش ... قالت لى : قناة فتافيت ... مافيش غيرها حطاها فى الفيفوريت ...قولت : طاب بتقرى ... قالت بأفتخار : انا عندى مكتبة كاملة ...ولا مكتبة الاسرة بتاعة ماما سوزان ...سالت : ايه الكتب اللى عندك ... قالت لى : كتاب منال العلم...وكتاب حورية ... وكتاب اسامة السيد.. وكتاب منى عامر ... دا غير اعداد مجلة فتافيت ... بس اللى لسه ماجبتهوش ... كتاب الشيف شربينى اللى لسه نازل ... بس انا حاجزاه فى المكتبة ودافعة عربون ... اقولك على سر ...انا عندى شرايط فيديو لاسامة السيد ... والكنز بقى اللى محدش يعرفة .... انا عندى كتاب ابله نظيرة... اتحدى ان حد يكون عنده الكتاب ده دلوقت ...قولت هيه دى نوعية الكتب اللى بتقريها بس ... قالت لى : لأ طبعا ... انا عندى كمان كل كتب الحلويات الشرقية والغربية ... دا غير انى مسجله حلقات نرمين هنو على سى ديهات ... سألت : انتى بتقضى يومك ازاى ؟ ...قالت لى : شوف انا يا تلاقينى فى السوبر ماركت يا تلاقينى فى المطبخ .... بص انا عارفه تلاقيك بتقول البت دى بتهجص ... وتلاقيها مابتعرفش تقلى بيضيتين .... قولت : لا والله ابدا ... قالت : استنى انا عامله كانالونى بننأنأ فيه واحنا بنتقرج على المسلسل ...حاجيب لك طبق تدوق .... وقبل ما أنطق كانت خرجت من الاودة ... وشويه ورجعت وهيه شايله صينيه عليها اية ؟ ياريت طبق الكانالونى ... دى عليها رز بسمتى بالكارى والفراخ ... طاجن باميه باللحمة الضانى ...صدر بطة ورقاق وطبق محشى ورق عنب ..وسلطة خضرا ... وسلطة طحينة ...وبابا غنوج ... وعيش وطبق بسبوسة بالقشطة ... وكنافة بالمكسرات... وجيلى ... ورز بلبن .. بصت لى وقالت : نأ نأ وانت بتتكلم .... طبعا الانسان ضعيف .. نأنأت والنأنأه قلبت اكل ... والاكل قلب تلبك معوى ... وازازه البيبسى الاتنين لتر اللى مع الاكل ماقدرتش تهضم ...وجات الاسعاف ... وهما شايلينى سمعت العروسة بتقول لمامتها : اخص عليه ياماما نسيت احط له الكانالونى
ههههههههههههه
ردحذفعقبال الخمسه
هو دة جزاء اللى يمشى ورا اهله
امشى مرة ورا قلبك
مصيرك تتطب وتقع فى الحب
ووقتها انا اول واحدة خليها مفجأة
تحياتى
هههههههههه
ردحذفدى عملت بالمثل اللى بيقول اقرب طريق الى قلب جوزك معدته
اشرب يا عم اهو قلبت بتلبك معوى ابقى بلاش تنأنأ
تانى
ربنا يفرح قبك بعروسه ليها فى الاكل والرومانسيه والكتب و ........ الخ
كل سنه وانت طيب
ههههههههههههههههههههه
ردحذفهو ده البوست الى انا اوحيتلك بيه بمدونة المطبخ
يا خرابي هو في كده والنبى ؟؟
فكرتنى بواحده يا دوك كنت باكلمها فى موضوع مهم جدا والله بس الى يفهم
فبعدين فى وسط الكلام صديقه تالته قالت لها حلوه الكفته يا فلانه عاملاها ازاي ودي انطلقت حضرتك ونسيتنى وقعدت توصف فىا لكوفته وتعدد طرق الكفته حسب ما ذكرها المدعو الشيف شربينى
وبعد ما خلصت قعدت تشكر فى الشيف شربينى واضافت فى النهايه الشيف شربينى ده غيرلي حياتي
اه والله العظيم قالت كده يا اخويا
فقمت انا قلتلها يا حول الله يا ربى وانا اقول ياربي هو الواد هاني يا حبة عين امه ماله كده شعر ابيض وكرش واطلق لحيته ومن شهر اشترى رسيفر وتلفزيون لاوضته لييييييييييه
طب على فكره انا عايزه ايجار ا لاسم عشان انا الواد ابنى اسمه خالد
ندى
ردحذفبس كدة ... ايجار جديد وحادفع نص المدة كمان مقدم
انت بتجيب البنات دي منين
ردحذفههههههههههه
خطيرة العروسة دي
عايزة واحد زيها بيحب المطبخ
الله يعينك ويقويك وتلاقي بنت الحلال