العروسة السابعة
المرة دى كنت عند واحد صاحبى ... شفت فى الشارع بتاعه بنت حلوة عجبتنى ... سألته عنها ... قالى :ناس كويسيين ... وابوها وامها موظفين حكومة محترمين ... والبنت ماحدش فى المنطقة كلها يقدر يقول عليها نص كلمه ... قولت على خيرة الله .... صاحبى خد لنا ميعاد .... الخميس طبعا ...وانا راجع من الشغل .... ايوه ياسيدى ...من غير تريقة ... جبت علبة الجاتوه وباليل خدت امى واختى ورحنا للعروسة .... امى واختى خرجوا يتفرجوا على الجهاز التحفه اللى العروسه جايباه ... وابو العروسة طلع يصلى العشا ...العروسة قال لى : اتفضل البيبسى ...ولا انت مابتحبوش ... وقبل ما أجاوب كملت : اصل انا بأموت فى حاجة اسمها بيبسى ... انا بأشرب فى اليوم على الاقل ازازه اتنين لتر ... هما بيقولوا لى ان ده خطر وبيسبب هشاشه العظام ... بس اعمل ايه ماقدرش اعيش من غير بيبسى ...امبارح على العشا رحت اجيب ازازة البيبسى من التلاجة ...مالقيتهاش ... زعلت قوى ...ماما قالت لى معلش اصلى خالتك سوسو كانت هنا وماكنش عندى حاجة اقدمها لها ... خالتى سوسو دى كل شوية تيجى وتقعد تشتكى من الواد فؤاد ابنها ... واد لعبى كده وملموم على شلة فسدانه ... طول النهار فى الشارع ... بقاله تلت سنين مش عارف ياخد الثانويه العامة ... انا مش عارفة الناس مستصعبة الثانويه العامة دى كدة ليه؟ ... انا خدتها من غير دروس .. اه والله وجبت مجموع كمان ... كنت باحفظ الكتب من الجلدة للجلدة ... كان عندى واحده صاحبتى اسمها سميرة ... كنا صحاب الروح بالروح ...مافترقناش الا لما خلصنا الكليه ... بس لغاية دلوقتى احنا صحاب ... موبيلات وكده .. وساعات بنتقابل ... مش كتير يعنى ماهى اصلها اتجوزت واتلخمت فى العيال وجوزها ... حاكم جوزها على طول مسافر اكل عيشه بقى ... فهية اللى بقت مسؤله عن كل حاجة ... سميرةواحنا فى الثانويه ... كانت بتاخد دروس ... وكانت تقولى يابت ماتيجى معانا .. احنا ساعات بنزوغ من الدروس ونطلع نتفسح ونتفرج على المحلات ... طبعا انا ماكنتش برضى .. علشان انا عارفة لو بابا عرف يطين عيشتى ... اصل بابا ده شديد قوى... هوه حنين بس مايحبش الكدب ابدا ... حتى فى شغله ... مزعل ناس كتيرة منة ... اصل بابا دة عامل زى السيف ...لايعرف شمال ولا يمين ... على فكرة بابا قالى انك مهندس كمبيوتر ... يعنى انت بتفهم فى الكمبيوتر ؟ ... اصل انا نفسى اشترى كمبيوتر ... نجلاء ... صاحبتى بتقول لى على الفيس بوك والمدونات ... نفسى اشوف الحاجات دى ... بس مستصعبه الكمبيوتر مع ان نجلاء بتقولى دا سهل قوى ... كل الحكايه اخد دورة ال سى دى فى اسبوع وابقى ممتازة فيه ... ولو انى يعنى ماليش فى حكاية التكنولوجيا دى ... انا بحب المسلسلات ... شوفت تمثيلية اهل كايرو ... كانت حلوة قوى ... والبت السوريه دى اللى اسمها كندة ... حلوه قوى ... بس بصراحة كدة مستغربة النهاية ... ازاى اب يقتل بنته ... ايه العباطة دى ...ولا تمثيليه زهره ... حلوه بس ماكنتش متبعاها قوى ... رمضان بقى وانت عارف ... ماهو انا اللى كنت بأحضر الفطار ...وانضف البيت ... ماهى ماما الله يكون فى عونها بتشتغل ... واختى ايدك منها والارض ... حاطه الام بى ثرى فى ودنها طول النهار وسرحانه ... معلش لسه صغيرة بكرة تكبر ... الا انت عند اخوات تانيه غير اختك اللى جات معاكوا دى ... بس الحق ... باين عليها طيبه .. ومامتك كمان ...شكلها طيبه ... حاكم انا طول عمرى ليه نظرة فى الناس وعمرها ماخيبت .... ايه ياباشمهندس انت مابتشربش البيبسى ليه ... اوعى يكون مابتحبوش ... دا أنا باموت فيه....
حاولت انى اتكلم واقول لها كفايه بقى ... بس ماقدرتش ... ايه دة ... يانهار مش فايت ... انا .. انا ... انا بقيت اخرس........
لاااااااااااا لا نصيحة من اختك ..الزواج من بنت زي هذي انتحااااااااااار
ردحذفلا انسى عنوانها ان شاء الله لو هي اجمل بنت في الكون انساها
وووو انتا استحملت كيف لو انا كان اخذت فيها اعدام
لو كانت عارفة انه بيدخل كل بيت بالجاتوه
ردحذفكان يمكن صعب عليها وسكتت
كريم الأخ ده قوي
ذوق وشيك وكريم وابن ناس حقيقي
انا شايفة احسن ميتجوزش
اصله خسارة في البنات كلها :))
انت عجبك الشو ..وهى كانت اكيد متوترة ومعرفتش تسكت ..انت الراجل .. يعنى فى اول مقابلة انت اللى تدور دفه الكلام .. حرام عليك . دى ابيض خالص .. بكرة بعد الجواز هى هتبقى ولا السينما الصامتة.
ردحذفعقبال العروسة الجاية .
ههههههههههههههههههههههههه حلوه حلوه حلوه
ردحذفبس انا شايفه فى تلقيح على الرغي والرغايين اينعم انا ودعت اسمي القديم بس برضه ماله يا اخويا الرغي والنبى دى دمها خفيف ومسليه
بس تبطل تشرب بيبسي بس وتبقى كويسه هههههههههه
تسلم اديك يا فندم
ههههههههههه
ردحذففظيعة البنت دي
اعتقد مسابتش فرصة ليك تقولها عن إذنك
شكلك خرجت من غير ما تتكلم
معلشي يا خالد
استحمل وان شاء الله تلاقي بنت الحلال الكويسة