الأربعاء، 1 ديسمبر، 2010

توابع مولد سيدى المجلس

توابع مولد سيدى المجلس

هيه طول عمرها كده...اكتشفت انها طول عمرها كده ...وحتفضل كده دا ان مازادتش .... طول عمرها كدابة وغدارة وخداعة ... طول عمرها بايخة ورخمة ورزلة ... طول عمرها دمها تقيل ووحشة ودميمة ... طول عمرها بتستعبط وتستهبل وتنافق ... انا اللى ما كنتش شايفها ... او انا اللى ماكنتش عايز اشوفها ... انا الغلطان مش هيه ... هيه ماضحكتش عليه ولا خدعتنى ... انا اللى اشتغلت نفسى ...انا اللى ضحكت على نفسى ... انا اللى خدعت نفسى ... انا اللى امنت بيها وسلمت لها ودورت لها على اعذار وحجج هيه ماطلبطش ده .. انا اللى اتطوعت ..

المشكلة بقى ... انى مش عارف ...هوه انا كنت مقتنع باللى باعمله ... ولا ماكنتش عارف اعمل غيره ... فأقنعت نفسى بيه ... عموما الحاجات اللى هيه بتعملها دى سهله خالص ان الواحد يتعلمها ... اينعم هيه عايزة شوية وقت ومجهود وتدريب ... بس الواحد يقدر برضة لو صمم ... بس المشكله التانيه بقى ... لو الواحد اتعلم الوقاحة والبواخه والرخامه والنفاق والخداع والسفاله ... حيعرف يستخدمهم ... ولو عرف يستخدمهم ... حيبقى مبسوط ومرتاح ... ويخلص من الاحباط اللى هوه فيه ... ولاحيدخل فى احباط من نوع تانى ... احباط اللى مش راضى عن نفسه وعن اللى بيعمله ... طاب لو الواحد ماتعلمش الحاجات دى وماعملهاش ... وضعه حيبقى ايه بعد ماعرف الحقيقة ... ماهو ممكن برضة يدخل فى حاله احباط من نوع تالت .. احباط اللى انضحك عليه وانضرب على قفاه ... يعنى الخلاصه ... من احباط لاحباط يا قلبى لا تحزن .... بس اكيد فيه حل ... لكن انا مش عارفه ... لكن اكيد اكيد حأعرفه ... بس ياترى لما اعرف الحل ... الاحباط حيروح ... ولا حتعود عليه ... وتنهار نظرية حنعيش يعنى حنعيش ... وتبقى نظرية أهى عيشة والسلام .

هناك 6 تعليقات:

  1. لا المفروض نظرية حنعيش حنعيش هي اللي تستمر لان سنة لله في كونه ان بعد كل ليل ينبلج فجر جديد
    دمت بكل الود

    ردحذف
  2. ان غدا لناظره قريب
    ودوام الحال من المحال
    صح ولا

    ردحذف
  3. كان بودي اقول اي حاجه غير هى كده من احباط لاحباط

    بس عزائي الوحيد انى شايفاها كده من الاول لا هى ضحكت عليا ولا انا ضحكت على نفسي

    بس ما زال عندي امل فى الله ولا امل الا فى الله فقط

    تعالوا نقعد فى جمب بقى نكتئب لنا شويه كلنا

    حد يجيب لنا شاي بقى

    ردحذف
  4. ندى الياسمين متنسيش تعملى حسبابى معاكو فى الشاى

    التغيير قادم أى نعم مش دلوقتى ويمكن مش فى حياتنا خالص بس قادم

    (إنه لا ييأس من رحمه الله الا القوم الكافرون)

    ردحذف
  5. هو ليه مفيش رمز قوى فى البلد يقود التغيير
    زمان كان فيه احمد عرابى وسعد زغلول والضباط الاحرار
    كانت كل مرحلة فساد بتلاقى اللى يقف لها والشعب كله يبقى وراه
    هى الرجالة راحت فين
    ده حتى الوحيد اللى نادى بالتغيير بحس انه بيعمل كده من باب الشو الاعلامى
    ينام ينام ويصحى يكتبله كلمتين عالتويتر بالعربى والانجليزى
    طيب بالعربى ماشى مهو بيوجهه لمصريين
    بيكتب بالانجليزى ليه ؟؟؟
    مهو كلامه كده كده هيترجم من المتابعين والمراسلين الاجانب
    بجد شخصية مستفزة ومش عارف اصلا هو عايز ايه ولا جاى مع مين \
    المهم دلوقتى انى عايزة رمز
    اتصرفوا
    عايزة رمز يقود الشعب
    احنا فى حالة غليان بجد
    الشعب كله واعتقد ان الكل مستعد للتغيير دلوقت وحالاااااااا

    ردحذف
  6. حاجات جوايا

    ممكن تختارى الرمز من دول : -

    1 - نور الدين محمود ( ملف امستقبل )

    2 - أدهم صبرى ( رجل المستحيل )

    3 - لأ مفيش تلاتة

    عموما فيه حل تانى قدمه الدكتور أحمد خالد توفيق : -

    كونى كعبير عبد الرحمن ............

    ردحذف