أوعى الدى ان اية
هوا احنا لية ماعندناش زىّ وطنى ... علشان ببساطة احنا خلطبيطة ....سلطة .... كنافة.... كل واحد فينا فى وطن غير التانى.... يحلفولك انك فرعونى ...واجدادك هما اللى بنو الاهرمات....ويأكدولك انك عربى ...كريم العنصرين.... ويقسموا لك انك اسلامى ومن ضهر عمرو بن العاص ...ويرجعوا يشرحولك انك قبطى....وسيدنا عيسى عّدى على سينا ....ويفهموك ازاى العرق التركى مادد فى نص البلد....
بدليل طابوزادة والارناؤطى...ويبينوا لك ازاى المماليك اثروا علينا ...داغير الهكسوس ....والرومان .... والكنعانيين والاسكندر الاكبر..... والفرنجة ...والانجليز ... وبونابرت .. .. وكليبر.... وسليمان الحلبى يانهار اسود ومنيل ...حتى اللى خدلنا بتارنا سورى....
الحمد للة انا متأكد ان مافيش فى دمنا .....دم هندى ....والله اعلم لغاية دلوقتى يعنى .....ويرجع السؤال احنا ملناش زى وطنى لية .... سؤال طبعا عبيط مش لما نعرف احنا مين الاول نبقى نتفق على حاجة تسترنا.... القصد ....طلع علينا حبة مثقفين وهاتك يارغى فى الموضوع دة ....واتوصلوا لحل يرضى جميع الاطراف ....مازعلوش حد .... وبدون مايشعروا ....قالو الحقيقة ....حقيقتنا ....قالوا ان مصر زى المعدة ....ايوة معدة.....لمت كل الحضارات اللى عدّت عليها ....وهضمتها ايوة ياسيدى اتهضمت الحضارات ...وانت عارف طبعا ....زى ماخدت فى العلوم فى سنة رابعة ...ما هى النتيجة النهائية للهضم.....ايوة ياسيدى احنا كدة بالظبط.....اخراج كرية الشكل والرائحة...لزج الملمس...كئيب اللون ...خرج للدنيا علشان يخرب اكتر مايعمر....يشتم اكتر مايشكر....يموت فى اللطم ...يشتكى ليل ونهار ...حتى لوكانت مستورة ....ماهو الشكوى رقوة... رقوة من العين ..والجن والعمل السفلى ..دايما عندة شماعة جاهزة...اسمها الحكومة ... ماهى حكومة بت كلب ...مابتشغلناش ...وان شغلتنا بنزوّغ ...ونشتكى ان المرتبات قليلة ..والعيشة مش مكفية ...وكارت الموبيل مابيكفيش تلت ايام... وتقسيط الكمبيوتر كاسر وسطنا بس لازم .... امال الفيديو كليب مش لازم ننزلة على الكمبيوتر امال نشوف نانسى وهايفة ازاى ....والنت ....ونعمل شات والبت تعمل واد والواد يعمل بت وهاتك يارغى للفجر ...ونتخمد للعصر ونرجع ننزل نتفسح ...والبنات لابسة بدى وجينز محزق .... بس اوعى تفتح بقك ...الطرحة تمام ولا لأ....والكل ماسك فى ايدة الكانز والايد التانية ازازة المية المعدنية ...مية معدنية فى بلد النيل؟!!! ....وكافيية... وشوبنج... وموول... وسنتر... ولمبى ... ورمضان مبروك ابو العلمين حمودة.....والأب بكل بجاحة يطلع فى الدش ...ويقول فين حق بتى..... واوعى الدى ان اية لا يعضك...بمزاجى اه ...لكن تتحرش .... شوف حاعمل فيك اية ....والنبى لاخليكوا كلكوا تتنادو باسامى امكوا ... .. عرفتوا لية بقى مصر ام الدنيا .....علشان خلفت من كل الدنيا..... وعمرها مادورت.... ولا حتدور على الدى ان اية..........وكفايا بقى علشان ... تعبت.... وزهقت... ومليت ...وطهقت ....... وسلم لى على الحوض المرصود
حلوة قوى بس كئيبة قوى
ردحذفيعنى اية الحوض المرصود دى عموما حميلة قوى
ردحذفيااااااااااه
ردحذفده انت زعلان زعل مننا هههههههههههههههههههه
انا عموما زيك زعلانه مننا بس الحقيقه موضوع اللبس الوطني ده انا لما فكرت فيه لقيت انه اساسا احنا فعلا من اصول مختلفه على مر العصور حتى ايام الفراعنه على فكره
يمكن لاننا كدوله مرت علينا الدنيا اشكال واصناف ودخلنا ضمن نطاق وسيطرة اغلب الامبراطوريات الى سادت العالم
ويمكن لاننا حلوين يا اخويا قوم الناس بيلزقوا عندنا كل ما يعدوا من علينا
هههههههههههههههههههه
وانا شايفه بقى بجد ان كون احنا مكان مأهول من قديم الازل والبركه فى النيل يعنى ده خلى الحياه عندنا مستقره ومتصله يعنى مافيش حاجه بتفنى ويجى غيرها وعليه بقى كله على كله يعنى
ولعلمك الخاص البنات الى انت بتتكلم عليهم دول انا بابقى عايزه اولع فيهم
وانا دايما اقول لرضا لعلمك الى معاهم فلوس دلوقتي العيال
اه العيل من دول منفض جيوب ابوه عشان يشيل موبايل احدث موديل وعشان تلبس هى كمان الجينز والباديهات وتلف خماشر طرحه على راسها
بيبقى نفسي انزل من العربيه اقول للبت الى لابسه جيب قصير على الركبه وعليه بوت وفي بتاع خمسه سم من رجلها كده شامين الهوا ومن فوق بدي لازق فى جلدها تقعد تعدي مسام جلدها منه وبعدين على نفوخها كابس حوالي خماشر ايشارب
بابا عايزه انزلها مخصوص اقولها ربنا يشفي المجانين
والشماعات دي انا باتخنق منها وكتبت عنها بوست اسمه التبرير وهى اساسا سبب فى تكرار الفشل فى حياة البنى ادم
تحياتي لحضرتك على البوست الجميل
وبالنسبه للحوض المرصود
انا مش عارفه حضرتك تقصد ايه
لكن انا اعرف ان الحوض المرصود ده اسم منطقه فى القاهره تقريبا وافتكر هو نسبه لقطعه اسريه اتسرقت مننا كالعاده وموجوده فى لندن باين ؟
فهمنى قصدك بليز
عزيزى أيها الكئيب أهنئك على هذا الاحباط الملىء بالكابة المحزنة أرجو من معاليك تكلمنا عن كيفية الخروج منها ونقاط النور والأمل فى حياتنا وبلدنا ان وجدت ولك جزيل الشكر أيها المكتئب الكبييييييييييييييييييييييير -حبشى
ردحذفالسلام عليكم
ردحذفبجد يا دكتور مدونتك تحفه تحفه تحفه ودمك خفيف جدا واسلوبك ساخر واتكلمت عن حاجات انا بافكر فيها وبانتقدها دايما
على فكره انا قريت كل البوستات ودى حاجه نادر ما اعملها فى مدونه باشوفها لاول مره
وعجبتنى كل البوستات
وياريت تواص على طول وتكتر لنا البوستات