عبقرية المصريين
انا سكن فى وسط البلد ..ورايا المحكمة ..والشهر العقارى ..وجنبى رئاسة الحى ..والعمارات اللى فى الشارع معظمها دكاترة ومعامل ومراكز اشعة ومحاميين ومحاسبين ...يعنى خلية نحل ... دا طبيعى فى وسط البلد .. والطبيعى برضة انك ماتلقيش ركنة لعربيتك بسهولة ...ماهى البلد بقت جراج كبير وسنترال اكبر ...كلة راكن العربية وكلة بيتكلم فى الموبيل .. القصد طبعا الناس طول النهار تتخانق على الركنة ... فقرروا انهم يركنوا صف تانى علشان يحلو المشكلة ... الشارع بقى صف على اليمين وصفين على الشمال ... وظهرت مشكلة اكبر ..الحتة اللى سيبينها فى النص يادوب تعدى عربية ..طاب العربية اللى جاية فى المقابل تعمل اية ... وبدات تانى وصلات الردح والشتيمة ... وذكر جميع انواع الحيوانات .. ويلعن ويلعن واب وام واخ واخت كلة دة طبيعى ماحنا شعب مابنشوفش غير نفسنا والناس اللى قدمنا دول هوا مش موجودين ...وببص على الحى ... الاقية حاطط عمدان قدامة علشان محدش يركن ... ورئس الحى باشا لما يجى يلاقى ركنة قدام الباب بالظبط ...لية يارب مخلقتنيش رئس حى ...القصد ... الغريب فى الموضوع ان على اخر الشارع تلاقى لجنة مرور مقيمة واقفة 24ساعة.... سيادتة معالى جناب الظابط واقف وهاتك يالم فى رخص اللى حزام ...واللى موبيل واللى بيدخن ..واللى غلاسة وخلاص ....غلاسة على الراكب وغلاسة على خلق الله ماهولما اوقف عربيةعلشان اشوف رخصها يبقى حوقف الطريق كلة والعربيات تزيد ... والكلاكسات تعلى ..والناس تولع فى نفسها ..وتلعن اليوم اللى فكرت تجيب فية عربية ....والله انا مش ضد ان اللى مش مركب الحزام ..وبيتكلم فى الموبايل يتعاقب .. بس السؤال هوالاصل فى عسكرى المرور تسييل حركة المرور ولا لم الرخص ..؟! برضة ماجيناش للمهم ..الناس لما بتركن صف تانى ..اللى راكن صف اول مابيعرفش يطلع بعربيتة الا لما الصف التانى يطلع الاول ... يعنى انت لو ملتزم وراكن صف اول ...وخلصت شغلك وعايز تطلع بعربيتك ماتقدرش الا لما الباشا ابن الباشايطلع الاول .. واستنى بقى يامعلم ساعة ساعتين وانشالله ماروحت ولا رحت شغلك ...وطبعا مش مضطر احكىلك عن وصلات الردح اللى بتتطور الى فيدو كليب... مش بس صوت .. وفى يوم قمت بدرى قولت اشوف الشارع وهوة رايق ...نفسى ياناس .. مستكترين الحلم كمان ...وكان اكبر كابوس شفتة فى حياتى .... لقيت الشارع كلة راكن صف تانى ..... اصبر بس ... الشارع راكن صف تانى ومافيش صف اولانى ... ايوة والله العظيم...ماهو لمابيركنوا صف اولانى مابيعرفوش يطلعوا ...فركنوا صف تانى... والله العظيم... الشارع كلة راكن صف تانى ومافيش صف اولانى وشوية ورئيس الحى جة ...شالوا العمدان ... الراجل ركن وطلع مكتبة علشان يباشر مهام وظيفتة ...ويخدم البلد ويساعد الناس ....وحنعيش يعنى حنعيش وسط الغلا وسط الغبا برضة حنعيش
ربنا يعينكم
ردحذفإحنا هنا فى القرية ميت فل
شوف يا فندم انا دايما اقول ايه ؟؟؟
ردحذفالبلد دي ما لهاش كبير
مولد وصاحبه غايب
لا ده حتى بيين صاحبه مات
انا بابقى هاموت من الغيظ لما نكون احنا فى وسط البلد عندنا فى المنصوره وندور على ركنه ما نلاقيش قوووووووم الاقي عسكري المرور يجي كده يتلطع ويشاور لرضا على مكان نركن فيه ممكن قطعه ارضا فضا او حتى شارع هانسده بس المهم انه بيخلينا نركن فيه
وبعدين واحنا راجعين ياخد بقى الى فيه النصيب
بابقى نفسي اطلع ايدي من الشباك اهفه قلم
طبعا على كلمتين لرضا مشجع الفساد بتاع الرشوه ده
على كلمتين منه اعمل اييييييييييه يعنى ارمي العربيه على الكوم وامشي . تعالى سوقي انتى وفرجينى الحلاوه .
عادي ياما فرجته وروحت القسم ودخلت فى ارصفه عادي يعنى
المهم يعنى انا برضه زيك انا مش ضد الانضباط والمخالفات والحزام والبتنجان ده
لكن انا كنت فى الامارات مافيش حاجه اسمها اقف وهات رخصك دي تمامااااااااااا
انت ماشي من غير حزام شافك اي واحد من بتوع المرور هوووووب اتهبدت مخالفه وابقى ادفع مع التجديد بقى يا حلو
وكذلك السرعه والموبايل وافري ثينج
ولا تقف ولا توقف الشارع
وطبعا حكاية الباركينج دي مصييييييييبه فى كل حته
اعتقد احنا فى المنصوره هنا نمثل نموذج من حي صغير فى القاهره
غلابه فى القاهره جدااااااا وبتصعبوا عليا
انا رغيت كتير اوي
سوري تقريبا دي عاده
ادي بقى فايدة التوك توك يا دكتور اسلام
ردحذفبس كله صف تاني دي جديده فعلا
امال الرصيف اتعمل ليه مش عشان الركن ده
الحمد لله مش عندى عربيه
ردحذفاحنا بقى عندنا العربيات بتطلع تركن فوق الرصيف
وتتفلق الناس بقى ان شالا ماعنهم مشيوا خليهم ينزلوا يمشوا فى الشارع والعربيات تلهفهم
بجد يعنى العربيات كترت اوى فى البلد دى والناس كترت اكتر وكل مكان زحماااااااااااااه