يا انا يا انتى يا حكومة
انا اكتر واحد فى الدنيا ممكن تلاقية يتعامل مع دوواوين الحكومة ... مش حبا فيها لا سمح الله ...لكن غصب عنى والله ...فى الضرايب تلاقينى ...فى التامينات تلاقينى .. فى السجل التجارى ...فى الغرفة التجارية ..فى الشهر العقارى ...فى مكتب العمل ....حظى كدة ...اعمل اية ...كل ماروح اخلص ورقة ماتخدش خمس دقايق ....اقعد فيها يومين تلاتة ....هات وصل نور..... هات وصل كهربا. ........هات شهادة من اتنين موظفين لايقل مرتبهم عن اربعين جنية .....طاب هوة فية حد مرتبة اقل من اربعين جنية دلوقت .....حتى لو فية ....هوة مش بنى ادم ...والحكومة مأمناة على شغلها ...طاب لو مش مأمناة.... شغلتة لية ؟...واية الفرق بين الموظف اللى مرتبة اربعين جنية واللى مرتبة اقل من اربعين جنية؟!! ... دا غير هات شهادة الميلاد.... الاصل طبعا ...وشهادة الثانويةالعامة ...طاب يا جماعة ماهى شهادة البكالوريوس اهية ..هوة ممكن اخد شهادة البكالوريوس من غير ماخد الثانوية العامة؟!!! .....طلبات ماتنتهيش ...طاب ليه ..على راى بنتى لما تحصل لها حاجة ما تعجبهاش ....والاغرب والاعجب انك لما تروح تسأل عن ملفك ...يقولك بكل بساطة ..ضاع !!! ...فخدتها حكمة من موظف قديم...صارت بيبى وبينة صداقة من كتر ما رحت لة ...قالى اوعى يابنى تاّمن للحكومة ... وفى يوم نطت فى دماغى فكرة جهنمية ...اعذب بيها الموظفين زى ما بيعذبونى ....نزلت اشتريت شنطى جلد بايد ,,, وكتبت عليها يا انا يا انتى يا حكومة ...شوف بقى حطيت فيها اية ...شهادة الميلاد.. وشهادة الجيش.. وشهادة البكالوريوس... وشهادة الاعدادية ...وشهادة الابتدائية
ورحت حصانة ناصر ..الحضانة اللى كنت فيها زمان ... وجبت منها شهادة مختومة تثبت انى كنت فيها سنة تسعة وستين .... وانى كنت حسن ا لسير والسلوك ...وطبعا حطيت البطاقة ...وجواز السفر ..وشهادات ميلاد بناتى ..وعقد جوازى ...وورقه مختومة من اتنين شهود ان الشاهد الاولانى على جوازى مات ...بس همه كانوا حاضرين ...وفيش وتشبية لمن يهمة الامر ..وكارنية النادى ...وشهادة مختومة انى من ابوين وجدين مصريين ....وقولت اعمل الدى ان اية بالمرة ...مالحكومة بقت تكنولوجية ...وشهادة اخلاء الطرف من الجيش ...ووصل النظافة اللى بناخدة من مجلس المدينة ... وشهادة من دكتور انى على قيد الحياة ...وانى خالى من الامراض المعدية ...بس اللى معرفتش اجيبها .. شهادة انى خالى من الامراض العصبية والنفسية ...محدش رضى يديهالى لما عرفوا حكاية الشنطة دى ...القصد ...ومن يومها الشنطة مابتفارقنيش ....بس تروح فين يا صعلوك بين الملوك ....رحت ديوان من الدوواوين اخلص ورقة ...وقفت قدام الموظف وكلى ثقة فى نفسى ...مافيش ورقة يطلبها اللا واقولة اهية ... كان جويا احساس شرير بالشماتة..... ماانا مش منولة غرضة ....عذبتة ...كنت فرحان فية قوى ...طبعا الراجل كان تعبان ...قالى بغيظ ...ماشاء الله ماشاء الله ...كل ورقك جاهز ... بس لو تعرف تجيب ورقة فاضية ...اكتب لك فيها الطلب يبقى كتر خيرك ...وبكل شماتة....فتحت الشنطة وطلعت له ورقة فلوسكاب ابيض ...اتغاظ اكتر وقالى ...لأ ...اناعايز مسطر ...قولت له ولا يهمك ورحت مطلع له ورق مسطر ...قالى طاب انت نسيت الدمغة طلعت له الدمغة ..قالى عايز طابع شرطة ...قولت له اتفضل ...الراجل كان حيعيط.... مش مرتاح يا ناس .. مش واخد على كدة .... قالى طاب ماشى ماشى ..احنا كدة خلصنا .... بس لازم تروح تدفع فى الخزنة .... قولت قوى هات الوصل ....قالى بشماتة ... الساعة اتناشر وخمسة ....والخزنة بتقفل الساعة اتناشر ...تعالى بكرة ... وابتسم حتة دين ابتسامة ...وقام وهوة بينادى هات لى كوباية شاى يا منعم ...
الا لية والنبى الخزنة بتقفل الساعة اتناشر مع ان باقية الديوان بيقفل الساعة اتنين .....اللى يعرف يقول لى.... والنبى والنبى
هههههههههههههههههههههههههههههههههههههه
ردحذفطيب اقولك وتدينى كام طيب
هاقولك انت برضه رفيق كفاح اصل انا زيك كده على فكره كتيره باروح مصالح حكوميه واخلص ورق لشغل رضا او للولاد او للجيران عادي انا ملقيه
المهم الخزنه يا سيدى بتقفل ا لساعه 12 عشان يلحق موظف الخزنه يقفل الحسابات بتاعته وياخد الفلوس يوديها البنك لو كانت كتير او حسب قوانينه المهم يعنى انه لازم يقفل حسباته ويعمل ميزانيه يوميه للخزنه
شوف انا بقى لازما وحتما كل ما اروح اي مصلحه حكوميه اتخانق مع الموظفين وازمجر واغتت عليهم واسمعهم بؤين فى دماغهم
ولانى واحده ست ما بيعملوش معايا حاجه
هههههههههههههههههه
من يومين عملت فيها جدعه وحماتي الله يصلح حالها قعدت تزعق لولادها كلهم عشان ما حدش راضي يروح مكتب التموين يصلح غلطه فى بطاقة التموين
قلتلها هاتي يا ستى الورق وانا اروح انا
وروحت وطبعا اتخانقت مع الموظف الى كان عايزنى اجيبله صوره من بطاقات وارقام قوميه ل 18 فرد
يا حاج ما الرقم القومي قدامك فى الاستمارات هو عذاب ا لمؤمن عندكم سنه ؟
وبعدين ما احنا جبناهم قبل كده وانتم غلطوا فى البطاقه وعددها
لا ماهو مافيش عندنا اوراق
الاوراق بتروح قاعدة البيانات
طيب امال عندكم اييييييييييييه
الموظف غلط وهو بيكتب كلمه فى الاستماره
طيب خدي استماره من عند فلان
يافلان هات استماره
اهى بس انا ما عنديش الا نسخه واحده للمواطنين كلهم انزلي صوريها وتعالي
طبعا انا فضلت اقول اللهم طولك يا روح لحد لما بقى جبت اخري هوووووووووب طلعت فيهم
الورق خلص فى خمس دقايق والمكتب الى كان بيشغي رغي اتكتموا كلهم لحد ما خلصت ومشيت
وعندي من ده كتير يا استاذنا والله
وارجع واقول ااااااااااااااه يا بلد عايزه ولد
اعتقد عمرك ما هاتقابل فى حياتك رغايه زيي كده
ردحذفايه الى انا كاتباه فوق ده كله
قدرك كده بقى
ممكن تسلفنى الشنطة لو سمحت علشان الظاهر ان الناس بدأت تلسع0الله يكون فى عونك ياحكومة على هذا الشعب اللاسع وأنا رأيى الشخصى ان الحكومة المفروض تغير هذا الشعب بشعب آخر أكثر واقعية وأقل شكوى0 وسلملى على الدمغة قصدى الشنطة0حبوش
ردحذف