الخميس، 12 مارس 2009

نجاشى و أورجانزا

نجاشى و أورجانزا

جرس التليفون رن الساعة 3 الفجر نط مهند من على السرير... يارب استر ...دا مين اللى بيطلب فى الوقت دة...ربنا يستر ...رفع السماعة لقى صوت امة الحاجة أورجانزا بتصرخ وتعيط...

أورجانزا : الحقنى يابنى..... الحقنى يا ياضنايا

مهند بخضة : خير يامه ابويا جرى له حاجة.... ؟

أورجانزا : هودة بيجراله حاجة ...اهو زى الجن قدامى

مهند : طاب خير يامه ...والنبى قولى انا مش عارف امسك اعصابى

أورجانزا وصوتها كل دموع : انت لازم تطلقنى من ابوك....و دلوقت حالا

اول حاجة عملها مهند انه خبط راسة فى التربيزة اللى عليها التليفون وقال لها:

ماشى يامة .... بس المأذون زمانة نايم دلوقتى ....ممكن نخليها الصبح ... اول مايصحى حاجيبة واجيلك

أورجانزا :لأ لو مجيتش دلوقت يبقى قلبى وربى غضبان عليك ليوم الدين

مهند :طاب يامه ماهى مش مستاهله مأذون ...ابويا يقولك انتى طالق وخلصنا ... وابقى اجيب المأذون الصبح

أورجانزا :اة وعايزنى ابات معاة فى الشقة وانا مش على زمتة ...عايزنى اقعد معاة فى الحرام

مهند باستعطاف : ماهو يامه لما يطلقك حتبقى لسة فى العدة ..يعنى لسة فى الحلال برضة

أورجانزا : ايوة ..ماهو يقدر يردنى لوعاز ....لأ... حتيجى ولا لأ

مهند باستعطاف : يامه والنبى ... الساعة تلاتة ..والجو برد ..والدنيا بتشتى

أورجانزا بتهديد : خلاص متجيش ..ماتجيش لأمك اللى شالتك فى بطنها ...ورضعتك من صدرها...روح قلبى وربى .......

وقبل ما تكمل الدعوة مهند قالها خلاص يا مه انا جاى وقفل السماعة ودخل يلبس هدومه

مرات مهند قالتله اية بتلبس ورايح فين؟ !

مهند : ابدا .. حشوف مأذون علشان امى عايزة تتطلق دلوقت

ردت مراتةوقالت طيب... ماتنساش تقفل الباب وراك بالمفتاح ..وشدت الغطا وادتة ضهرها ونامت

لبس مهند ... ونزل ويادوب وصل لباب الشارع .... والدنيا سيول يامعلم ...رجع جرى ياخد الشمسية

...ونزل ...قال فى نفسه ياساتر الشارع مافيهوش بنى ادم .. وهما خطوتين .... وطلع لة كلب بلدى معتبر ...بلدى بلدى يعنى العفانة... والجوع..قعد يقول استر يارب ... وسمع كل الايات اللى حافظها... لغاية ما الكلب عدا من جنبة.... ولسة ما كملش كلمة الحمد لله ...الا والكلب يتضير لة ......ومطاردة يامعلم ولا مطاردة السيما.... الكلب يهوهو...والسما بتبرق .. والشتا سيول ...والشمسية بتطير... وقع مهند على الارض والكلب حصلة ... وربنا كريم .. كان مهند لابس الكلسون ..وبنطلون البيجاما تحت البنطلون

...فالعضة ما وصلتش للاخر الحمد للة.... ايوة يادوب قطعت البنطلون من ورا .... القصد مهند بقى مية ... والشمسية طارت و ماعرفش يجيبها ....ووصل مهند بالسلامة ...ابوة فتح لة الباب ....ودخل مهند

مهند : ايه يابا فية ايه زعلتها لية؟

نجاشى : برضة ... برضة انا اللى زعلتها... حسبى الله ونعم الوكيل ... ما انت طول عمرك ابن امك مهند : معلش يابا ..الستات عايزة المسايسة ..

نجاشى : واحنا يعنى ا للى بهايم.... معندناش دم...... مابنحسش ولا اية؟!

مهند قالة طاب اهدى يابا ... وتعالى احكى لى اية اللحصل ...بس والنبى شوف لى فوطة انشف بيها المية اللى علية دى

ولسة بينشف بالفوطة وسمع امه بتصرخ من جوة

أورجانز : اتودودوا ... اتودودوا كمان ... بدال ماتخش جرى على امك تشو ف اللى بيحصل لها...

امك اللى ربتك ..وكبرتك ... وعملتك راجل ...ومراتك الدايخة جات خادتك على الجاهز

مهند : ياما مالك ومال مراتى دلوقت ؟!

أورجانزا : ايوة دافع عنها دافع ..مانا خلاص مبقاليش لازمة .. انا اللى رضعت ..وشخخت ..وغيرت ماهو ايوة.. . ربى ياخايبة للغايبة

مهند : سيبك يامه من مراتى دلوقت وقولى لى اية اللى حصل

أورجانزا : اللىحصل؟ مانت ماتعرفش اللى حصل ..ماهو حتعرف منين ... هو انت حد بيشوفك

مهند : يامةهوة مش انا كنت عندكوا امبارح العصر

أورجانز : ماعرفش بقى اهو خلصنى من الراجل دة وخلاص ...دا كان يوم اسود يوم ماتجوزتة

مهند : يامة اليوم الاسود دة كان من خمسين سنة ...!! لزمتة اية بس ..انتو مالكوش الا بعض

أورجانزا : ايوة ...ايوة يا اخويا بدليل انة قاعد يشكر فى امينة رزق... ويقول شايفة وقفت جنب جوزها ازاى لغاية ما كبرتة ...ولاعيالها طالعين كلهم فى مراكز مهمة....ليه انشاء الله ... هوة انا كنت قصرت فى اية.... دانا شايلة همه وهم اهلة من يوم ماتجوزته ... دا داخل علية ماحلتهوش غير مرتبة

مهند : امينة رزق مين يامة؟!!

نجاشى وهوة حاطط وشة فى الارض : الممثلة يابنى... محنا كنا بنتفرج على فيلم قديم عمك محروس عطاهولى على سى دى وقالى اسهر سهرة تفكرك بايام زمان

مهند : اه ... بس يامة امينة رزق دى ماتت من زمان

أورجانزا : وانا مالى ماتت ولا عيشة .... انا فى نكران الجميل الل قدامك دة

مهند : خلاص يامة ابويا غلطان ومايستاهلكيش ...خليكى انتى العاقلة

نجاشى : لية هو نا اتجننت ولا اية دو ولية بتخرف ...زعلانة من ممثلة ماتت فى فيلم ابيض واسود

مهند : يابه يابه الله يسترك وحياة حبيبك النبى...... ماهو مالكش حق برضة ...امى يامه تعبت معانا...

ولازم نقدرها ونديها حقها

أورجانزا : ابدا... الطلاق يعنى الطلاق

مهند : ماشى بس خلى بالك يامة لوطلقك مالكيش حق فى الشقة ...انتى مش حاضنة ....

أورجانزا بتردد : ولايهمنى

مهند : ماشى مش مشكلة .... دى نور لما اقولها ان ماما حتيجى تقعد معانا حتفرح قوى

أورجانزا نور مين دى اللى اقعد معاها ... وبعدين البنطلون بتاعك مقطع كدة لية ... روح يانجاشى شوف لة بنطلون فى الدولاب ..... وابعدوا عنى بقى رفعتولى الضغط ...عايزة انام ... يللا برة..

جاتك نيلة انت وابوك

مهند خد ابوة وخرج وهوة بيقولها داحنا من غيرك مانسويش يامة ..... لبس مهند بنطلون بدل اللى اتقطع ...ودخل ابوة ينام .. طبعا فى الاوضة التانية...

كانت الساعة سابعة لما وصل مهند البيت ...قابل عيالة على السلم رايحين المدرسة.... طلبو منهم المصروف ...عطاهم ..نور فتحت لة الباب ..وقالت له خش انت نام وانا حكلم الشغل اخد لك اجازة النهاردة .... الله اية البنطلون اللى انت لابسة دة ....قالها ابدا ماتقلقيش الدنيا كانت ضلمة محدش شاف حاجة ...اصل لما......الكل........وراح فى سابع نومة

هناك 7 تعليقات:

  1. هههههههههههههههههه
    هههههههههههههههههههه
    ههههههههههههههههههه

    ده لو مهند ونور كانوا كده ماكان حد عبر المسلسل ده بتيتاااااااا

    بس الست اورجانزا يعنى كتر خيرها برضه معزوره الست بتحب زوجها يدلعها
    مش يعاكس امينه رزق
    اه منكم يا رجاله عينكم زايغه
    امينه رزق
    ههههههههههههههه
    امال لو كان اتفرج علىفيلم جديد شويه كانت عملت ايه
    قتلته؟؟؟؟؟؟؟؟؟

    ههههههههههههههههه

    ردحذف
  2. هههههههههههههههههههههههههههههههههههههههههههههههههه
    عجبتنى اوي والكلب قام مضيرله دي هههههههههههههههههههههههه
    بجد ضحكت ضحك


    تصدق انا فى الاول فكرت ان عاد اسمه مهند يعنى

    وبعدين ايه اسم امه ده يا اخويا

    فين لما لقيت نور بقى فهمت

    اصلى مش متابعه المسلسلات دي يااخويا الحمد لله لسه بعقلي

    بس والنبى الى انت كاتبه احسن من الترجيع الى بيقولوه لبعض فى المسلسل

    وعلى فكره

    انا قاعده كده ما بين امه وابويا برضه

    بس مش بتوصل لطلب الطلاق يعنى

    الا انى غالبا فى الاخر اقولهم والله اتخانق مع جوزي واجيب العيال واجي اقدلكم هنا اخليكم تتلهوا فيا ايه وجع القلب ده

    تحياتي لحضرتك

    اه والنبى الهي يسترك تبقى تشيل الكلمه التأكيديه من التعليقات الا بتخنقنى

    ردحذف
  3. يانهار أبيض وملون بأسود
    ايه ده انا كرهت الأمهات ...هههه..وآل أورجانزاآل ..دي تفيدة أو أم أويأ..أو حتى أم أربعة وأربعين
    المهم جميل فعلا الحوار دي لكن للأمانة أنا كنت مستاءة من بعض الألفاظ ..
    لكن خلاف كده ..هـــايل

    جهاد مشالي

    ردحذف
  4. هههههههههههههههه
    ياعينى عليك يامهند
    ياما هتقاسى
    خلوه قوى الفكرة والطريقة

    ردحذف
  5. تسلم أيدك علي الابتسامه الجميلة الي رسمتيها علي وجوه الناس الي قرت الموضوع


    تقبلي مروري
    مجنووون

    ردحذف
  6. السلام عليكم ورحمة الله وبركاته

    هههههههههههههههه

    كل ده يطلع من نجاشي اما صحيح راجل عينه زايغه ومابيحمدش ربنا بينكر الجميل
    وبعدين هو مش عارف ان الست امينه محجوزه من زمان لسي يوسف بيه وهبي
    هههههههههههههه
    لا وايه الست اورجانزا دي كمان بتسلم كده من الاول علي طول المفروض كانت اصرت علي موقفها ماهم رجاله مايجوش الا بالعين الحمره

    يلا خلينا احنا الطيبين

    ---------------

    بقي عاوز تدي البنيه يومين خصم دا ايه الافترا ده وانا اللي بقول نظبطك في التعليقات ، مااااااااااشي ....الله يساااااااامحك

    :)))

    ردحذف
  7. نشكرك على هذا الأداء الرائع فى الواقعية المطلقة-وننتظر منك المزيد من الابداع الخيالى المتألق وأتوقع باذن الله تعالى أن يكون لدينا نجيب محفوظ جديد بفكر ملتزم ورؤية جديدة----حبشى

    ردحذف