توضيح لابد منه
اكتر من عشرين تليفون.... واكتر من رد على البوست بتاع الدى ان اية .... بيسألنى عن الحوض المرصود ...هوة بصراحة....مافيش غير الاخت صبرنى يارب اللى قربت شوية..... هوة فعلا مكان فى القاهرة بس مش حاجة اتسرقت ورجعت..... دا كان من اشهر الاماكن اللى كان بيمارس فيها البغاء تحت سمع وبصر وحراسة الحكومة... وبالقانون .....دا طبعا قبل قانون الغاء البغاء اللى كان سنة1949 ....واللى المخرجة العبقرية اللى بتدغدغ... وتونــِّس... مشاعر الناس بافلامها العبقرية ....نفسها ان الايام دى ترجع وكلة يكون بالقانون ....زى ماقالت على القناة الفضائية...... وحسبى الله ونعم الوكيل ......وشكرا الى كل من قرأ البوست..... ولا اخفيكم سرا اننى كنت قد قررت ان يكون اخر بوست ..... لانى حسيت ان مافيش فايدة من الكلام والكتابة ....بس كان تعليق فى التليفون ..هوة اللى خلانى ارجع فى قرارى .....قالى اوعى تسلم لو نجحت انك تغير واحد من السبعين مليون يبقى انت نجحت.....ثم ياخى كمل اهى حتة تبقى فضفضة وماتموتش من الكبت.... وشكرا جزيلا لكل من قرأ البوست مرة تانية..... وربنا يخليكوا لية ....بالمناسبة فية مصطلح دايما بتقولة البنات والستات لما يشوفوا بنت او ست واخدة بالها من نفسها حبيتين .... بيقولوا الست دى عايقة او البت دى عايقة ....خلوا بالكوا كلمة عايقة دى كانت زمان قبل سنة 1949 بتتقال على القوادة اللى بتشغل البنات اللى عندها فى الدعارة ...ومن اشهرهم ... بهية الزايطة عيشة النجس....فاطمة طرطور... بنبة العربجية....سيدة جرح.... ونفيسة الكبابجية
وتكملة للمعلومة مدام الموضوع انفتح ...كانت البنت اللى بتشتغل بقى ... يقولوا عليها ... مقطورة ..وكان فى حكمدارية البوليس اللى هوة قسم الشرطة دلوقتى فية دفاتر لتسجيل البغايا الاسم والعنوان.... والمكان اللى كانوا بيتجمعوا فية كان اسمة ...كرخانة ... وكان لكل واحدة من اللى بيشتغلوا كارت متابعة تروح تكشف فى مستشفى الجلدية كل اسبوعين....ويتكتب نتيجة الكشف فى الكارت ... ايوة كل واحدة معاها كارت فية اسمها وعنوانها وتاريخ الكشف الطبى .... وملاحظات تانية ... مثل...غيرت الرخصة من245 الى378.....المذكورة صارت مقطورة طرف العايقة عيشة النجس ....المذكورة تابت وسلمت الرخصة للقسم بتاريخ كذا ..... وكتير من النوع دة ... ومن اشهر اماكن بيوت الدعارة فى الوقت دة ...وش البركة ..باب الشعرية.....بولاق ...كلوت بك ....وطبعا اللى فتح السيرة ..... الحوض المرصود
اهي دي معلومات اول مره اعرفها
ردحذفخصوصا ان كلمة زي عايقه دي مشهوره جدا في اسكندريه عندنا
والحوض المرصود دي برضه
ده انا كنت مفكراه حاجه حلوة هههههههه
شكرا يا دكتور على التوضيح
لا ما كنتش اعرف انا ان الحوض المرصود ده منطقه فله كده
ردحذفانا كنت فاكراها مجرد اسم منطقه
بس برضه كنت حاسه ان حضرتك تقصد منهاحاجه معينه
بس انا اعرف اه فعلا حكاية الرخص دي بابا كان حكالي عنها
وتيته الله يرحمها
وكمان في فيلمين بيعبروا عن الموقف ده تماما الى هو درب الهوى بتاع احمد ذكي والتاني مش فاكره اسمه بتاع عادل امام وناديه الجندي
والمتسخمطه على عينها بتقولك نرجعه تاني ماهم كده كده موجودين يبقى نكشف عليهم احسن
الهي يكشف عليهم كلهم هما والى بيروحلهم الدفان عن قريب
ما يولعوا بجاز
وبعدين لو حضرتك سبت التدوين وسبت الناس وقلت مافيش فايده
وكل واحد له فكر وراي محترم زي حضرتك عمل كده يبقى مين هايفضل على الساحه ؟؟؟
الهايفين والسذج عديمى الفكر والضمير والدين ؟؟
طيب مش حرام علينا ؟؟
مش فرض كفايه هو ؟؟
لما كل واحد يقول ماليش دعوه ومافيش فايده
هانفضل طول عمرنا زي ما احنا
لكن اقله يوم الحساب ا نا هاقول ياربي انا اتكلمت لما لساني نشف لكن هم قوم لا يفقهون
بس باذن واحد احد هم يفقهون صدقنى او فيهم كتير كده
انا عملت زيك كده مره من زمان بس قبل التدوين
وفى نفس اليوم الى قررت فيه وفكرت فيه كده
او تاني يوم تقريبا
جالي اميل من شخص مجهول
قالي انا ما اعرفش انت مين ولا حتى انت بنت ولا ولد بس انا جبت اميلك من خلال حسابك فى شات ام اس ان
الى انا شوفتك هناك على الشات ده وقريت موضوع كنت بتكتبه عن التوبه والموضوع ده غير حياتي وكان وقفه مهمه فى حياتي وانا حبيت بس اشكرك على كده
طبعا رجعت فى كلامي بلا هواده وقررت ما انسحبش ابدا وما اسيبش مكاني لحد تافه ابدااااااااااااااااااااااا
وخلي بالك هاجيب البت لماضه ونيجى نرجعك للتدوين عافيه
ايوه افترا بقى ولماضه ما تقدرش تقولي لا هى عارفه هايحصلها ايه
ههههههههههههههههههههههههههه
تحياتي لحضرتك يا فندم
معقول تفكر تسيب التدوين ؟
ردحذفازاى بس ؟ دا حتى اسم مدونتك لوحده بحس انه بيبعث على الاصرار وعدم اليأس وانه مهما كانت صعوبة الظروف بردو هنحاول نعيش احسن
وكفاية العلومات الجديدة دى انا بسمع عن الحوض المرصود دا بس عمرى ما كنت عارفه ولا كنت هعرف دا ايه غير منك
تحياتى
انا كل اللي اعرفه عن الحوض المرصود انه مستشفي فقط لا غي
ردحذفزي ما حضرتك قلت مستشفي جلدي
و اخويا قاللي انه لغاية دلؤتي بيودو ليه البنات بتوع قضايا الاداب علشان يتكشف عليهم
بس باقي المعلومات لسة عارفاها من حضرتك طازة
:)
و خلاص يا فندم بطلنا كلمة عايقة او عايق ديه بتاتا البته
و بعدين تقفل مدونة ايه يا فندم داحنا لسة جايين اهه
و المدونة جميلة ماشاء الله و مواضيعها كلها مفيدة و ممتعة في نفس الوقت
جزاك الله خيرا علي المعلومات القيمة
هو الحوض المرصود كان - ومازالت- مستشفى للامراض الجلدية، لكن زمان كانت مكلفة باصدار التصاريح الطبية للبغايا. وهي موجودة في ميدان السيدة زينب لحد النهارظة فهي مش منطقة هي بس اسم مستشفى
ردحذف