الجمعة، 13 مارس 2009

فــتــَّحى الدواليب يا بت

فــتــَّحى الدواليب يا بت

من زمان مارحتش لخالتى باريس ...ايوة باريس ...دى الصغيرة خالتى الكبيرة هية اللى فرنسا

.. قولت ياواد روح اتطمن عليها ... ماتخليش الدنيا تاخدك وتنسى اهلك ..خصوصا انى عرفت ان بنتها نجلاء جالها عريس وحتتجوز قريب ..البت يا اخى كبرت وبيجيلها عرسان .. المهم رحت لها ..كانت فرحانة بيَة قوى ... خدتنى بالحضن وقعدت تحكيلى على العريس .... قالت لى ... عندة شقة .. وشغال مع ابوة فى التجارة ..وطيب .. من بخت البت نجلاء ..اصلها غلبانة وبت حلال .. مش زى البنات بتوع اليومين دول ..معلش يابنى البيت مكركب .. قولت لها ولا يهمك ياخالتى هو انا غريب ... بس اية الكراتين دى كلها ...ردت.. اصلى قولت اطلع شوار البت واشوف اية اللى ناقصها.... قولتلها ياخالتى لايمكن يكون فى حاجة ناقصة قولى اية اللى زايد .... ضحكت وقالت ..انتو كدة يارجالة ..ايش فهمكوا انتو فى شغل الستات ... اسكت دا والنبى ناقصنا حاجات كتير تصدق... بنعد الفوط لقيناهم ستين بس يعنى لسة عايزين خمستاشر فوطة.. اية يا خالتى حتدخلى البت بخمسة وسبعين فوطة ...هوة العريس ماكنش بيستحمى فى بيتهم ولا اية؟!! ردت خالتى بزهول ...انت عايز تفضحنا ولا اية ..هوة كدة العروسة لازم تخش ب75 فوطة... واتفرج معايا يامعلم ..24طقم سرير.. 4بطاطين بوشين الوزن قايم 6كيلو....بطانيتين النمر.... طقم حلل تيفال ..طقم حلل الومنيوم ... طقم حلل صاج... طبعا غير الفردانى .... طقم صينى يابانى اصلى لزوم النيش .... طقم صينى صينى لزوم الاستعمال .... طقم اركوبال لزوم الفرن ... دا غير الفنجيل والكُبيات ...... اللى زهقت من عدهم لما وصلت لل43 ... وشنطة معالق وسكاكين بمية الدهب ...وشنطة تانية بس من غير مية الدهب .... ومفرشين سرير هندى .. وكاسات تركى... والبراد ماليزى ... والسكاكين مغربى ... دا غير 12طقم خروج صيفى ... و12طقم خروج شتوى ...

دا غير توكيل جويا اللى فى الدرج التحتانى واللى طبعا ماخلونيش اشوفة .... وسبع كراتين صابون كامى ....وسبع كراتين صابون لوكس .... اكيد العريس ماكنش بيستحمى فى بيتهم...

و6 برسيل اوتوماتيك تسعة كيلو .... لييييييية هوة فية ايييية ...داجهار مدرسة الثانوية بنات ....حرام عليكى يا خالتى ... ردت وقالت ... انت عايز تضحك الناس علينا!! ...ولا تشمت العدويين فينا!! ... لما يجوا كدة فى الصباحية ويفـــتــّحوا الدواليب.... يقولوا علينا اية؟!...اسكت هو احنا جبنا زى اللى بيجيبو .. العين بصيرة والايد قصيرة...ينهار اسود ...امال لوكانت طويلة كان حصل اية ...ماناعارف ظروفها.. ...الراجل موظف وبيشتغل بعد الضهر ... امال جابت الحجات دى كلها منين ... اتلائمت وسألتها ... اكيد الحاجات دى كلفتك الشىء الفلانى؟!!..... قالت لى بكل رضا .. اهو ربك بيدبرها..... ماهو رزق البنات واسع.... اهى جمعية من هنا على جمعية من هنا ... على شوية حاجات بالتقسيط ....والراجل برضة ماسبنيش .. عمل استبدال معاش.....وربنا يقدرنا ونسدد القرض بتاع بنك ناصر .... مش بقولك يابنى رزق البنات واسع ... سرحت مع نفسى رزق اية بس ...دا انتى مديونة لشوشتك ياولية... فوقت على صوتها وهيه بتقولى ... ماهو لازم اشرف البت قدام اهل جوزها .. وقدام كل اللى حيجى فى الصباحية ويفــتـّح فى الدواليب ...سرحت تانى ...هية ايه حكاية يفــتـّح فى الدواليب دى .. هية الدواليب دى مش حاجة خاصة برضة والا انا متهيألى ...ينهار اسود ... يكونوش فى صبحيتى فتحوا دواليبى انا كمان .... مش هم الدولاب اللى فيه البدل .. مش مشكلة ..المشكلة لو كانوا فتحوا .... مش مهم مش مهم ..انا شغلى كله جيل ... ماركة يعنى ... ماكنش فية حاجة بفتة خالص ...باركت لخالتى ونزلت .. وطول السكة وانا سرحان فى سؤال نفسى حد يجاوبنى علية .... ياترى لو منعنا الناس من انها تـفــتـــّح الدواليب فى الصباحية اية اللى ممكن يحصل ؟؟؟



هناك 4 تعليقات:

  1. والله الله يكون في عون أهل العروسه

    الحاجات الزيادة دي بترهق الناس وبتخليهم يستلفوا ويدينوا علشان يجيبوا الحاجت دي

    وعلي فكرة دي تقاليد موجودة بين الشعب المصري

    وعلي فكرة شكل العريس مكنش بيستحمي خالص

    تقبل مروري
    مجنووون

    ردحذف
  2. لا لا لا

    بالراحه عليا مش كده انا كنت هنا بالليل ما كانش فى البوست ده انا صاحبة عيال ههههههههههههههه

    المهم

    لا انا شايفه ان خالتك دي اوفر اوي الصراحه

    اينعم هو الاستهبال ده موجود فى الجهاز

    بس انا ولله الحمد سلو بلدنا عشرين فوطه بس
    وحياتك يا اخويا انا متجوزه بقالي 10 سنين ما اشتريتش فوط خالص ولسه عندي قيمة نص دسته فى اكياسهم جوه

    واطقم الملايات دسته بس

    والبطاطين اثنين بس


    بس الكاسات والاطقم الصينى والبلاوي دي كلها جت ولله الحمد

    عارف انا قاهرني ان النيش بتاعي والبوفيه ايضا واخدين من الشقه مساحة حوالي عشره خماشر متر مربع ومليانين علىا خرهم صينى وكاسات وما الى ذلك

    وحياتك يااخويا الكاسات بتاعتي دي طلعت مرتين ولا ثلاثه من يومها

    اما الطقم الصينى فلم يستعمل قط
    اللهم الا مره طلعت منه طبق باين مش فاكره ليه

    ون يومها باستعمل فى الطقم التاني بتاع المطبخ

    حقيقى احنا شعب مفتري


    وعلى فكره بقى انا حاليا بافكر اعمل حمله بقى مش بس مغالاة المهور

    لا وكمان الزام العروسه بنصف الموبليا وجهاز الشقه
    بالاضافه للحاجات كمان الىانت قولتها دي

    وتلاقي العريس ما شاء الله اد 3 ضلف كده وواقف يتخانق مع حماه عشان دولاب المطبخ الى جابه مش اقد مقامه

    طيب يا البعيد يا كتف انت مستني حماك يجيبلك فى بيتك ليه وبتتأمر كمان ؟؟

    طيب رجل وحسك عالي وبتجعر ما تجيب لروحك ولا مستني العروسه تجيبلك ده ايه القهر ده

    اخر مشكله حضرتها
    لقيت الكل سانن السكاكين على ابو العروسه عشان قال للعريس ياا بنى ان مش معايا قلوس ومش هاقدر اساعدك فى حفلة الفرح والى كان نصيب ابو العروسه منها 5000 جنيه
    عايز انت تعمل فرح اعمل الى انت عايزه ما يقدرش على القدره غير ربنا

    الاقيك حتى اهل العروسه الى هم قرايبى بيقولوا اه انت غلطان يا فلان انت اتفقت معاه لازم تنفذ

    اللللللله اشمعن العريس لما ما بيقدرش يجيب حاجه ابو العروسه لو ما قالوش ومالو يا ابنى الى ما يجيش النهارده يجي بكره يبقى راجل ماعندوش دم وقليل الادب ؟؟؟!!!!!

    وبعدين ده حتى حفلة فرح يعنى ممكن تتعمل بالف جنيه وممكن تتعمل بمليون جنيه

    وممكن ما تتنيلش تتعمل اصلا

    يعنى الراجل يسرق يعنى عشان العريس يروح يرقص فى الفرح طب ما يرقص فى بيتهم وخلاص ايه القهر ده

    وعادة فتح الدواليب دي انا باكرههاااااااااااا لا وايه تبص تلاقي واحده رزييييييييله بتمد ايدها كمان تمسك الهدوم وتقولك ده منين وده بكام ولبستي ده ولا ليه ؟؟؟

    عمرك شوفت غتاته كده ؟؟؟!!!

    الحمد لله تعالى اتجوزت خارج مصر وما حدش فتح دولابي هناك ما كانش فى حد اساسا يجيلنا ههههههههههههههههههههههه

    كالعاده انا رغايه

    سوري على الاطاله بس مفروسه من هذا الشعب

    لما نروح نشوف موضوع المدونات الجديده ده

    تحياتي استاذنا

    ردحذف
  3. Thanks a lot 4 ur reality, we r waiting for more and more creativity.
    yours habashy

    ردحذف
  4. اي ده اي ده

    علي كده انا اتخميت يا جدعان ولا ايه


    انا مادخلتش بربع الحاجات ديه علي فكرة

    و محدش دخل اوضتي اساسا


    دانا كده اطالب اني اتجهز من اول و جديد ولا اروح انده علي الناس انهم يجوا يشوفوا دولابي


    الحمد لله الذي عافانا مما ابتلي به غيرنا



    ملحوظة صغننة:
    حضرتك هتلاقيني رديت علي موضوعات من زمن فات بس فعلا المدونة عجبتني


    جزاك الله خيرا

    ردحذف