الخميس، 13 يناير، 2011

الحياة بدون فياجرا.... ممكنه

الحياة بدون فياجرا.... ممكنه

قرفة بالجنزبيل وحليهم بمعلقة عسل نحل قطفة اولى ....ولا يهمك ... غذاء ملكات نحل على مسحوق جنسنج وخد معلقة... عادى ... اطحن شوية خلنجان على لبان دكر وسفهم على الريق ...... بتحصل ... ابشرلك بلحتين جوزة الطيب وشويه حبة البركة على ورقة لحمة ضانى ... اديها طبق سى فود مع جمبريتين جامبوا ... كدة مقدمناش غير الفياجرا ... طاب السياجرا ... طاب النياجرا ... الهندى ... التركى ... الالمانى ... الامريكانى بتاع فايزر ... طاب الميت مللى ... طاب المتين مللى ... طاب المضروب ... التقليد ... بس لقيتها يامعلم ...عليك وعلى شداد الحيل ... ايوه اسمه كدة ... شداد الحيل .. دا كوكتيل صينى عجب ... طاب انا اعمل لاهلك ايه دلوقت .... عيش بركة واسكت ... محدش حياخد باله ... على فكره دى شكوة ناس كتير ... وشباب ... يعنى خمسة وتلاتين اربعين سنة ....يعنى الدنيا لسه قدامهم ...طبعا حتقولوا اسرائيل بترش حاجات فى الهوا ... وحتقولوا المبيدات المسرطنة والرى بمية المجارى ... وكتمة النفس والارهاب ولزقة الوزير الفنان على الكرسى .. والانتخابات المتزورة ... هما السبب ... بس ماهية الحاجات دى طول عمرها موجودة ...طول عمرنا بنرش مبيدات وبنروى من المصرف ...وطول عمر الانتخابات بتتزور ... والوسيله الوحيدة لتداول السلطة هيه القضاء والقدر ... طول عمرنا بنعدى على العطار ناخد القرطاس ليله الجمعة ... بس كان مين اللى بيعدى على العطار؟ ... الراجل العجوز ابو ستين سبعين سنة ابوعين زايغة واللى متجوز بت فى سن عياله ... طاب ايه السبب يا حكيم عصرك واوانك ؟ .. استر يارب فى اللى جاى .... السبب يا جماعة حرب كسر النفس والمناخير اللى شناها ( اى تديرها ... وليس شناها بتاعة دور البرد ) الستات على الغلابة الرجالة انتقاما وتنفيسا عن قهر السنين ...وغيرة العمر من ولاد الكلب اللى بيعملوا اللى فى نفسهم واحنا قاعدين محبوسين فى البيت .. ماتخرجيش ماتضحكيش ماتناقشيش واعملى لاخوكى الشاى واكوي له القميص ....الحرب دى بتبدى بعد الجواز باسبوعين على اكثر تقدير ... ويشتد رحاها ويزداد وطيسها يوما بعد يوم ... قبل الجواز ينزل للزبون طقم حنية على طقم مشاعر جياشة على طقم رقة وانوثة ... وعليهم طقم سمعان كلام وامرك واللى تشوفة وكلمتك على رقبتى واللى تحبة اموت فيه وانت اللى كنت باتمناه هدية مجانية ...وبعد الاسبوعين نبدأ باسم الله ...ماهو مش معقول كدة ... سايب القميص على كرسى السفرة ... لوحد طب فجأة يقول علينا ايه ؟ ... ايه مش تغسل مكنة الحلاقة بعد ماتحلق ...والنبى دى طماطم تنجاب ... شكلك بتاخد اللى الراجل بيديهولك ... الواحدة ماتعتمدش عليك فى حاجة ابدا ... عمرك مانصفتنى ...ماشى ماشى اتغدى عند امك وسيبنا قاعدين جعانين ... واخد بالك من نفسك ومتشيك كدة ليه ... شاكلك شايف لك شوفة ... هه ... اللى خدته القرعة تاخدة ام الشعور ... بقولك ايه... انا طلعان عينى طول النهار ... مسح وكنس وغسيل وطبيخ ...انا مش فاضية لدلعك دة ... انا عايزة انام ... بكرة ... بكرة ... اصل الدنيا حر والعرق بيزهقنى ... اصل الدنيا سقعة والانبوبة فاضية ... الا عملت حسابك فى قسط المدارس بتاع العيال ...الصبح ماتنساش تاخد الزباله فى ايدك ... الزبال بقاله يومين مجاش ... يوووه ماقولنا الدنيا سقعة ... خلينا فى المهم ... تتغدى ايه بكرة ... ماتقوليش اى حاجة ...انا عازمة ماما واختى على الغدا يوم الخميس .... موسم كل سنة وانت طيب ...تصبح على خير .... الفطار عندك على السفرة ... انا داخله انام ... ماتنساش تقفل الباب كويس ...اهلا ... ماجبتش الفاكهة زى ما قولت لك ... بقالنا اسبوع ريقنا ناشف ... اقلع الجزمة برة انا لسة منضفة ... ارحموا بقى انت وعيالك ... تتغدى ولا حتصلى الاول ... اه العيال عايزين يروحوا النادى ... يفكوا شوية من جو المزاكرة ... العيال جم من النادى هلكانين وناموا ... عايز حاجة ؟ ... ماشى بس على طول ... خصيمكوا النبى ... ممكن بعد اللى بيشوفة الغلبان دة يقدر يمارس حياته الطبيعية عادى كدة ... بصراحة عنده حق ان ولا وصفة تنفع معاه ... على رأى المثل : فيه ناس ... زى القنفد ... لاتنحضن ولا تنباس .

ايتها الزوجات انهوا هذه الحرب فالانسان يعيش مرة واحدة ... ايتها الزوجات ارحموا من فى الارض يرحمكم من فى السماء ... يا اخونا دا دى الحاجة والحيدة اللى فاضله للغلبان يلاقى فيها نفسة بعد الذل اللى بيشوفة طول النهار ... مايبقاش انتوا والحكومة علية ....

ملحوظة : مش عايز تعليقات على البوست دة غير من الرجاله ... انا عندى عيال عايز اربيها

هناك 4 تعليقات:

  1. طب مش الى يكتب بوست بقى يبقى اده ؟؟؟
    ترجع تقول عندي عيال وبتاع

    طب ايه رايك انى اتفق معاك ولكن جزئيا


    لان طبعا مش الزوجه هى المنغص الوحيد فى الحياه وضغوطات الحياه المختلفه لها دور برضه

    وما تنكرش ان الدنيادلوقتي ما بقتش زي زمان

    دايما اقول فى بلدنا الجميل العامل البسيط الغلبان بيشقى طول اليوم عشان ياكل ويستر بيته

    والدكتور والمهندس والتاجر وكل فئات الشعب الى مش حراميه برضه كده
    طالع عين اهاليهم وبيشتغلوا 12 ساعه فى اليوم عشان بس يعيشوا عيشه كريمه

    فحرام برضه لما نحط كل حاجه فوق دماغ الزوجه

    الى اصلا اصلا عايشه فى نفس البلد ومتعرضه لنفس الضغوط

    تاني حاجه لو هو شاركها همها وهى شاركته همه هايكون بينهم ارض مشتركه يتقابلوا عليها انما طول ماهو بينفض ايده من البيت والعيال ويقولها امال انتى لازمتك ايه
    وطول ما هى عمرها ما سالته عملت ايه فى الشغل النهارده
    هايفضل كل واحد فيهم مش عاذر التاني

    ثالثا الست فى مجتمعنا مظلومه وانت عارف بتروح لبيت الزوجيه تحمل كميه من العقد والكلاكيع تسد نفق شبرا ولا سيما فيما يختص بالجانب ده من الحياه وغصب عنها الى بتعمله

    يعنى اقدر اقولك بقلب جامد ان 80% من الستات حاليا والى عمرهم من 27 الى 60 مثلا محتاجين علاج حقيقى فى الجانب ده

    الى اصغر من كده النسبه ممكن تقل شويه لكن برضه موجوده يعنى


    الاسباب كتير كتير كتيره محتاجه خمس سبع تمن بوستات عشان يكفوا كلام

    علميا القدره الجنسيه للرجل تعتمد بنسبة 50% تقريبا على المرأه الشريكه

    اعتقد ان الحل وجود مراكز متخصصه تحل المشاكل من النوع ده لان المشكله فعلا فعلا محتاجه حلول وبتهدد فعلا البناء الاجتماعي

    تحياتي يا فندم
    اهو جت سليمه معاك فى اول رد ههههههههههههه

    ردحذف
  2. ندى الياسمين
    احنا مابنخافش ... واللى عايزين نقوله بنقوله ...انا كنت بس خايف على مشاعر الناس من الهجوم ... واللى عايز يعلق يعلق ... وان كان على العيال فا ليهم رب اسمة الكريم

    ردحذف
  3. Hi there, I enjoy reading all of your article post. I wanted to write
    a little comment to support you.
    my site: viagra

    ردحذف
  4. I absolutely love your blog and find a lot of your post's to be exactly what I'm looking for.
    Do you offer guest writers to write content for yourself?
    I wouldn't mind composing a post or elaborating on most of the subjects you write regarding here. Again, awesome web log!
    Feel free to visit my blog post viagra

    ردحذف