( 1)الادراك
مافيش بنى ادم فى الدنيا زى التانى ....حكمة ربنا...اللى مش عارفين نستوعبها ...لكن لو استوعبنا الحكمه دى وفهمناها واقتنعنا بيها ... مش حتلاقى حد بيتعارك مع حد ... ولا حد بيشتم حد ...ولا حتلاقى زوجة بتنكد على جوزها ... ولا جوز بيطلع عين جوزته ...ساعتها لا حنصنف بعض ولا حنخون بعض ....طبعا انا بتكلم هنا عن الناس الاسوياء اللى مش متعمدين الظلم والفساد وركوب الامواج وتغيير الايدولوجيات عن عمد ... ولا باتكلم عن اللى ليهم اجندات خاصة ... بغض النظر عن كلمة اجندات اللى بقت سيئة السمعة .
الدنيا حوالينا من سما لارض لجبال لقمر ...موجودة وكلنا شايفينها .... بس كل واحد مدرك الحاجات دى غير التانى خالص ... كل واحد مستقبل الحاجات دى بطريقة مختلفه ... نمسك القمر مثلا .... القمر عبارة عن قرص دائرى معلق فى السماء يبعث ضوءا فضى ويظهر فى الليل بعد غروب الشمس... هذه هى حقيقة القمر المجردة .... ولكن ... واحد عايش قصة حب لاول مره ... حيشوف ان القمر فيه ملامح من حبيبته ...وبيبعت شعاع يدى جو من الرومانسية على شاعرية زمن ضاع فيه الحب وبقى تيك اواى ... ربنا يسهل والثورة تقدر ترجعه .... واحد سلفى مابيشوفش فى القمر غير انه وسيله نعرف بيها اول الشهر الهجرى علشان الصيام والحج والعيد ....واحد فى كلية العلوم كل امله انه يشتغل فى ناسا... يشوف القمر انه براكين وحفر وجزء ضلمه ساقع تلج عايز يعرف فيه ايه .....وواحد اهبل شايف ان القمر اهم من الشمس علشان بيطلع باليل ينور الدنيا لكن الشمس ملهاش لازمة علشان بتطلع بالنهار والدنيا منورة .... وواحدة عايشة فى زمن المخلل تطلع فوق السطح تخبط بغطيان الحلل علشان تطفش العفاريت اللى خانقة القمر ومخليه وشه مزرود يا حبة عين امه ....وغيرة وغيرها ... كل واحد بيشوف بطريقته ويدرك الامور بمعرفته .....
الادراك بقى باللغة العربية الفصحى يعنى : عملية استقبال المثيرات الخارجية وتفسيرها بواسطة الفرد تمهيدا لترجمتها الى سلوك .
اهى هية سلللللللللللللووووووووووك دى .... الراجل اتصرف او عمل سلوك معين نتيجة لادراكة للشىء بطريقة معينه ... الدنيا ماتهدتش يعنى ....
طاب هوه فيه حاجات بتأثر فى الادراك دة ؟ طبعا .. اهم حاجة المعرفة ... يعنى لما تعرف ان القمر بيعكس نور الشمس ... مش حتقول ان القمر احسن من الشمس ...الحاجة التانية اللى بتأثر على الادراك... البيئة المحيطة بيك ... يعنى الواحد لو عايش فى بيئة شرقيه حيد رك ان اخته قاعدة مع زميلها بطريقة غير اللى حيدركها عم الامريكانى ... وبالتالى السلوك بتاع كل واحد حيبقى غير التانى ....دا كمان تلاقى الاختلاف بين الاخوات فى العيلة الواحدة ...تلاقيهم مختلفين فى ادراكاتهم ووجهات نظرهم ... زى ظابط الامن المركزى اللى جه مع منى الشاذلى وبيحكى عن اخوه اللى كان فى المظاهرات ....تاثير الوظيفة او المهنه ... وبرضة الاحتياجات اللى بيشعر بيها البنى ادم ونفسه يحققها بتاثر هية كمان على الادراك ... الحلاق مثلا نفسه يجز شعر الزبون علشان يقبض .. فاول حاجة يشوفها ويدركها فى الراجل اللى داخله ...راس الزبون وشعرة ...
من مواصفات الادراك ان البنى ادم مننا وبدون مايشعر بيلم الحاجات اللى زى بعض مع بعض ... يعنى لو شاف شاب روش من ابو بوكسر ...ويشوف منه تصرفات مش مظبوطة ... يقوم يعمم ويقولك ... كل الشباب هايف وتافه ... رغم ان فيه شباب زى الورد عملوا ثورة ماكانتش على البال ولا الخاطر ...
من مواصفات الادراك كمان ان الانسان بيدرك بطريقة اختيارية ... يعنى بالبلدى بمزاجة يعنى مابيدركش او يتجاهل بعض الاشياء مع انها بتكون واضحة زى الشمس ... يا اما لانها مش مهمه بالنسبه له ... يا اما علشان هوه مش عايز يشوفها اصلا ... زى الرئيس السابق كدة ماكنش عايز يدرك ان الشعب مش عايزة ...
هنا بقى يجيى السؤال المهم ...هوه ممكن الادراك يتغير .... طبعا ممكن وممكن جدا كمان .... بس لو استبعدنا ركبان الدماغ ...والخوف من انه يتقال ان احنا غيرنا كلامنا .... والكبر والعنجهيه ...وشوية الكلام الفاضى اللى لا بيودى ولا بيجيب ده .... ولان الادراك بيجى عن طريق المعلومات ...فاذا غيرت المعلومات حيتغير الادراك ... وكمان لو بصيت للامور بنظرة عامة مش نظرة خاصة..يعنى ماخليتش احتياجاتى ورغباتى الخاصة تتحكم فيه .... بالتالى ادراكى حيبقى اوقع وشمل ...مثال من الحياة ... فيه ناس ادركت ان الرئيس السابق راجل وطنى وصاحب الضربة الجوية وليه انجازات ماحدش يقدر ينكرها ..فدافعت عنه باستماته ... لكن لما وصلت لها معلومات انه كان عارف اللى بيحصل من فساد...وان ملف التوريث بمباركتة...اتحول الادراك من حسنى مبارك البطل الى حسنى مبارك الديكتاتور الفاسد .
الى اللقاء فى الحلقة القادمة
شوف انت عارف تماما انا بعزك قد ايه
ردحذفوكمان من العقول اللي لازم اقرأ لها سواء لي مزاج اعلق او معنديش حاجة اقولها
طيب ها تصدقني اني في الفترة الأخيرة مش فهماك خالص
ممكن بل والمؤكد ان القصة مش عندك لوحدك
مؤكد عندي زحمة احداث وموصلاتي العصبية مش بتعمل بكفاءة في اتجاه واحد
بس برضه عندك جزء من الحدوتة يا دكتور
هو انت متلخبط زينا كلنا
ولا مش متلخبط خالص فمش عارف توصل لينا
فيك ايه؟
الثورة عملت فيك ايه؟
طبعا لولا انك دكتور اسلام صديقي التدويني القديم ما كنتش قلت
كنت قرأت وفلسعت
بس انا بقيت ادخل هنا اقول انت فين؟
هيه هيه ، وابتدأنا تنمية بشرية
ردحذفأنا معاك يا دكتور وهكمل معاك
التنمية البشرية دى من المجالات اللى بحبها رغم أن كل ما بييجى ابراهيم الفقى ولا أى حد تانى فى أسيوط بطنش قهرا ، الدراسة مش مخلية الواحد يتنفس .
لكن حضرتك حبة حبة هتعلمنا ان شاء الله
استمر ، وشكرا جزيلا .
العزيزة ستيتة :
ردحذفمين فينا ما اتلخبطش وغير اتجاهه ميت مرة ... مين فينا ما قعدتش مع نفسه بدل المرة عشرة علشان يحاول ياخد موقف ... عموما فيه اساسيات لاخلاف عليها بس ردود الافعال هية اللى بتتغير ... عموما انا مع الثورة اللى عملت اللى انا شخصيا ماكنتش احلم بيه ... الاهم بقى من التورة واللى عملها واللى معاها واللى ضدها .. مصر ... مصر اللى جالها قبل كدة فرصتين من السما كانت ممكن ساعتها تكون احسن دوله فى العالم ... مرة فى ثورة 23 يوليو ومرة بعد حرب اكتوبر والاتنين ضاعوا والحمد لله ... وعلشان ربنا بيحبنا بعت لنا ثورة 25 يناير ... اللى انا مرعوب عليها وعلى مصر ....من وجهة نظرى ان كل واحد يقدم لمصر دلوقتى اللى بيفهم فيه ومالوش دعوة باللى مابيفهمش فيه ... يعنى كفاية بقى فقهاء دستوريون ... كفاية بقى خبراء استراتيجيون ... كفاية بقى مسخنون ... اللى يقدر يعمل حاجة يقدمها لبلده مصر الغالية ....يعملها,, وانا بادعى انى بفهم فى التنمية البشرية والادارة ... وعلشان كدة بدات من البوست دة احاول اوصل اللى اتعلمته يمكن اقدر اساهم ولو بظلطة فى بناء مصر ... يارب اكون عرفت اوصل وجهة نظرى
حضرتك اخترت دور تقوم به مافيش مشكله
ردحذفلكن مش معنى كده ان تنحصر الادوار كلها فى ادوار تشبه دور حضرتك
لو حبيت تبنى بيت
لازم تجيب ناس تحفر وناس تبنى وناس وناس وناس
انا ما عنديش اي تحفظ على الناس الى غيرت رايها بالعكس
لكن عندي تحفظ على مصادرة افكار واراء الاخرين
عندي تحفظ على ان ما زال الناس بتقول خلاص كفايه كده بقى قنعت كده ونبوس ايدنا وش وظهر
عندي تحفظ على تهميش فكر الاخرين وادعاء الحكمه عنهم
عندي تحفظ على كلمه بتحز فى نفسي من اول ما قلتها (انت صدقت نفسك يالا منك له ؟)
وبعد كل الى حصل وبعد كل الى غيروا رايهم
بالاقي لسه ناس بتقول مالوش لازمه الى بتعملوه دلوقتي كفايه كده
الناس بتروح التحرير ترقص الناس بتروح التحرير تعطلنا وتعطل مصالحنا
وناس كتير كتير كتير بتقول الخساره الاقتصاديه ...مش عارفه مش معدي عليهم المليارات المنهوبه فى السنين السابقه
ما علينا
لو كنت حضرتك اخترت دور التوجيه ببوستات تنميه بشريه فارجوك اشدد على يد من هم ما زالوا متبنيين دور حماية الثوره وتطهير البلاد ما زال امامنا الكثير والا والله هانلاقي نفسنا رددنا الى الاسفل وبقووووووه
تحياتي يا فندم
ندى:
ردحذفانت بتقولى :
عندى تحفظ على تهميش فكر الاخرين وادعاء الحكمة عنهم .
عندى تحفظ على مصادرة افكار الاخرين.
انا بقول :
عندى تحفظ على تهميش فكر الاخرين وادعاء الحكمة عنهم .
عندى تحفظ على مصادرة افكار الاخرين
يارب اكون قدرت اوصل وجهة نظرى
انا اعترضت على فكرك ؟؟
ردحذفالا لو كنت بتعتبر تهميش فكر الاخرين ده اساسا فكر!!!!
ولا عشان انا مش عاجبنى بل احزني فعلا جملة انت صدقت نفسك يالا من كله
وما زالت مش عاجباني
هو انا لما اقول رايي فى كلامك يبقى باصادر على رايك او لا احترمه ؟؟