اجازة مفتوحة
مولد وصاحبة غايب ... محدش يعرف ويحس بمعنى الجملة دى الا اللى حضر مولد قبل كدة واشترى حب العزيز وشاف بريللو وهوه بيلف بالموتوسيكل على الحيطة ... ولان مش كتير شاف المولد ... لان دلوقت بقى اسمة دريم بارك ... واحساس الملاهى لايمكن يكون زى احساس مولد السيدة غنيمة ...زى ما احساس الايس كريم عمرة مايبقى زى احساس الدندرمة اللى عليها الدبان من عربية الجلاطة اللى فى سوق الجمعة ... عموما اللى عايز يحس احساس المولد يبص على المحروسة اليومين دول .... حاجة كدة ماتتوصفش ... حاجه كدة فله ... قشطة ... هبل فى الجبل ... عباطة فى البطاطا ... خيبة بالويبة ... تعالى معايا نطوف ونشوف ... ائتلاف شباب الثورة ... مجلس امناء الثورة ... ائتلاف مصر ... عمرو خالد فى القناة الاولى بيرمى البزور ... وفى القناة التانية بيعمل حزب ... وعلى الفضائية بيترشح رئيس ....البرادعى قرر انه يتنازل عن الدكتوراة ويقدم السى فى لمخدماتى الحى علشان عايز يشتغل خدام لشعب مصر .... وعمرو موسى اللى فهمته منه لغاية دلوقت انه عايز يترشح بس لغاية دلوقت مش عارف عايز يترشح رئيس جمهورية ولا رئيس دوله .... حيبان .... كله حيبان ... اه جمال حشمت بتاع الاخوان عامل حديث فى صوت الامه بيقول فيه انه مش حيسيب حقة وحيلاحق مصطفى الفقى فى المحاكم علشان زور انتخابات 2005 ... دا غير انه بيطالب الفقى انه يطلع يعتزر للشعب المصرى عن اشتراكه فى الانتخابات ....اوعوا تفتحوا البورصة ... لا... لازم تفتحوا البورصة ... عشرين اعتصام تحت شباك مجلس الوزراء و بينادوا بالوقوف جنب عصام شرف ....كنيسه بتنهد ... مكان بيتعبد فيه ربنا بيتهد ... ونطلع بيافطة بتقول مسيحى ومسلم ايد واحدة .... نعمل اعتصام عند ماسبيرو اسبوع ونوتر الدنيا ... وبعدين ننضف مكانا واحنا ماشيين ونرفع يافطة لا للفتنة الطائفية ...قاعدين نتكلم على ثروة الرئيس وهوه فى شرم ولا فى تبوك ... وجيمى سايب دقنة وسوزان عندها اسهال وفريدة مخاصمة بابى ... وقبل الاستفتاء بتلت ايام افتكرنا ان فية تعديلات دستورية لازم نتناقش فيها ... وبعدين ادونا فرصة ننظم نفسنا ... يعنى تلت اربع خمس سنين كدهوه عقبال مانظبط ... ليبرالى ...قومى ...ناصرى ... اشتراكى ... اخوانى ...سلفى ... جهادى ... وسطى ... وطنى ... مسيحى ... حقوقى ... عبود راجع من على الحدود بعد ماقتل انور ... راجع فرحان مبسوط مش متدايق انه قتل ... ايه فيه حاجة ... حد ليه شوق فى حاجة ... اه ...احنا الجهاد وراجعين ...حد نفسة فى حاجة ....
وعلشان كلها بقت هردبيس ...على رأى جدى الله يرحمه ... ولانه مافيش فايدة من الحوارات والكلام .... قررت ان اقوم باجازة مفتوحة ... لان شايف ان حكاية المدونة دى مبقلهاش لازمة ... لانها بقت زى القربة المقطوعة ... مابينوبنيش منها غير النفخ ... وانا اتنفخت بما فية الكفاية ... خصوصا ان مبقاش فاضل بعد العبط اللى احنا فية غير ان ايبك يقتل اقطاى ... وشجر الدر تقتل ايبك ... وام على تقتل شجر الدر ... وقطز يقتل على ... وبيبرس يقتل قطز ... قلاوون يقتل بيبرس....و........وفى الاخر الشعب حيقتل نفسة علشان يرتاح من الكلام.
يالا باى ائتلاف ... شاو عمرو موسى ... شالوم برادعى .. جزاكم الله خيرا يا اخوان ... سعيدة يامسيحيين ... اللى اللقاء فى الجنة ياعبود ... عليه العوض يامصر
لا لا لا عليك العوض ايه بس يا مصر ....مين الي قالي يا بت انتو ما حضرتوش ثورة قبل كده ما تخافيش مصر دي هترجع احسن من الاول
ردحذفاختلف معاك يا دكتور طول عمرنا في سوق جمعة وتلات وهردبيس ع الآخر بس دلوقتي كله ع المكشوف وفيه فرصة انك تاثر وتتاثر وتقول واختلف معاك ودي حاجة كويسة ده موشر اننا بدانا الف باء ديمقراطية صدقني الشعب دلوقتي هوا الي هيقرر لانه ما بقاش غبي ...
ولو بفرض فيه ناس ليها مصالح وعايز تكوش ...دورنا احنا كمان نديها حبة هردبيس لصالح مصر بكرة هيبقى احلى ان شاء الله...وبالعكس كل مدون ناشط لازم يكتب دلوقتي اكتر من الاول على اد ما ربنا يفتح عليه واهو كله في الهردبيس ...الا هو ايه الهردبيس ده :)
الاخ العزيز اسلام احييك من كل قلبى على هذا المقال لانه وبصراحه احسن تحلتل ووصف لحالة الفوضى اللى بتمر بيسها البلد اليوميين دول بس لازم تعرف ان كل ثوره وليها اعداء بيحاولو يفطسوا فيها واكيد هما اللىمستفيدين من المولد ده زى المستفيدين من وجود مولد ابو حصيره
ردحذف