الثلاثاء، 25 سبتمبر، 2012

حمامة الحاج مانجة +( وربنا انا سابق عصرى كاتبها قبل ماتحصل)


حمامة الحاج مانجة

الحاج منجة جه من البلد وخد شقة فى التجمع الخامس بعد ما ربنا كرمه واتنطأ وبقى له شان وشنشان ... بدأ يمارس حياتة الجديدة .. بس انتوا عارفين الطبع غلاب ... واللى فيه داء مايبطلوش ....
الحاج منجة بعت البلد وجاب قفصين طيور فراخ على بط على حمام ... وخد بلكونة المطبخ  وعملها عشش للطيور ... وبدأ مشروع تربية الطيور ... اهو منها مايحسش بالغربة فى البتاع اللى اسمه كمبوند ... وفى نفس الوقت يمارس حاجة  هوه بيعرف يعملها .
الحاج منجة كان عاطى لكل نوع طيور اسم ... يعنى لما نفسه تهفه على ديك رومى يقول للحاجة ام محمد : ادبحيلنا طائر البهجة ... ولو عندة عزومة وعايز يدبح بطة ووزة والباقى لابو العلا ... يقول للحاجة : ادبحيلنا طائر الوحدة وطائر النجدة ... اما بقى لما يرسم لليله جمعة طحن ويتعشى حمام  ... يقول للحاجة : ادبحى جوزين من طائر ال.......  ايوه بالظبط ابو جناحين وريش ده... طول عمرى باقول ذكاء القارىء لا حدود له .
القصد الوز والبط والرومى والحمام بيعملوا دوشة دا غير الريحه ... قوم الجيران اللى فى الكمبوند اشتكت من الريحة والدوشة ,,,, الحاج منجه وعدهم انه حيركب شفاط علشان يمنع الريحة ويبطن الحيطة علشان الصوت وفوق دة ودة حيدى لكل واحد طائر هدية ... الجيران صدقت ومشت ... ماهو الزفر برضة له نكهته ... وفيلم الكنتاكى والعيشة الملزقة دى صعب برضة ....
الحاج منجة كعادته من ايام الشقى مالوش عهد ولا كلمة ... يعنى لا بطن الحيطه ولا ركب شفاط ولا عطى حد من الجيران طائر من اللى قال علية .
انتوا عارفين بقى احنا فى توابع ثورة والناس ماعدش عندها خلق ... قوم الناس اتلمت تحت التراس بتاع الحاج منجة وهتفت ...الجيران تريد الطائر ... الجيران تريد الطائر.
 الحاج منجة نفذ نصيحة الحاج مرشدى عمدة البلد ومعبرش الجيران .... الجيران زادت والهتاف صوته بقى عالى ...
البواب طلع للحاج منجة وقاله ياحاج اديهم الطائر اللى وعدتهم بيه ... انت ماتعرفش العالم دى ... دى عالم يبان عليها طيبه ... بس الحقيقة دى عالم صيع .
الحاج منجة قاله : يابنى الطيور اللى عندى يادوب تكفينى انا والجماعة ... بقى احنا نتعب ونشقى ونتذل وهما يجوا ياخدوا على الجاهز ...
 البواب قاله  :طاب انا عندىفكرة يا حاج ... اطلع وريهم اى طائر وقولهم انه قاعد على البيض واول مايفقس حأديكوا ...
خرج الحاج منجة على الجيران بانفعال .... وقف فى التراس ....وقال :  هوه ده الطائراللى عندى ........... وطلع لهم الحمامة .....
بهدوء غريب ................ الجيران مشيت

هناك تعليق واحد:

  1. ياولد يالاعيييييييييييييييييييب قوى قوى قوى قوى يخرب بيت عقلك ده انت داهيه جامده روح أشيخ أو تعالى هنا أحسن وياريت تقول لنا عن توقعاتك للفترة القادمة وخصوصا استفتاء الدستور ومجلس الشعب لو سمحت-حبشى

    ردحذف