الأربعاء، 16 سبتمبر، 2009

لا صينى ولا يابانى الصح هوة الربانى

لا صينى ولا يابانى الصح هوة الربانى

قررت انى اسمى كل حاجة با سمها كدة اريح ...وعلى فكرة بدون اى تجاوزات

بكار واد حليوة بعيون زرقة زى بتوع السيما اللى بيهبلوا البنات العبيطة واللى مش عبيطة بشكلهم وتصرفاتهم....بكار ماسبش واحدة عرفها الا وزنى معاها ....ايوة ...ماهوة زانى ...وبيتباها بكدة ....بس مابيقولش انا زانى ...بيقول انا دون جوان ...كدة بتبقى اشيك وتلم بنات اكتر ....ماهو فتك ومقطع السمكة وديلها ومقرقش شوكها كمان ...كان دايما يقول مافيش بنت ما قدرش اجيبها ....وفضل على كدة لغاية ماتعب وزهق

بكارة قررت انها تعيش ...خمرة ورقص وزنى ...عادى ...كانت بتزنى بسهولة فتح الكانز ...بس اوعى تفتكر انها من اياهم ...دى ماكنتش بتزنى الا مع اللى تحبة ويحبها ..... وطبعا كانت بتحب يوم بعد يوم ....وعمرها ماخدت فلوس... .فبلاش تبقى فلاح ودماغك تروح بعيد ..كل الحكاية انها مقتنعة ان جسمها دا شىء ملكها تعمل فيه وبيه اللى هية عايزاة ....بس بكارة كانت واعية ....فتح الكانز كان برة المنطقة خالص ...مش عايزين وجع دماغ....

الدكتور سقاطة ...زهق من العيانين الفقر وقرر يلم فلوس ....وفتح سنتر تجميل بس تجميل من نوع خاص ....ماهو كلة تجميل والفكرة الاساسية فى التجميل هو ارجاع الشىء لاصلة ....واقنع نفسة انه بيعمل خير ....بيرجع الشىء لاصلة ويتستر على الولايا اللى زنوا بس بيقولوا انهم انضحك عليهم .... دا غير انة بيرحم العيال اللىكانت حتيجى من انهم يسمعوا كلمة ابن الحرام ....اكيد كانو حيتدايقوا ؟؟؟

ام بكار قالت لبكار شوف بقى يا ابنى كفاية بقى سرمحة انت لازم تتلم بقى ...شوف لك واحدة بنت ناس محجبة تصونك وتصون شرفك ....بكار قال لها فعلا يامه انا تعبت شوفى انتى وانا موافق....ام بكار قعدت تدور وتلف فى دماغها مش لاية حد كويس ماهى مش عيزاها شريفة وعفيفة بس ...ياسلام لو تكون غنية كمان .... شوية ودخلت عليها اختها خدوا بعض بالاحضان وقعدوا يتكلموا فى موضوع جوازة بكار ....خالة بكار قالت لها جرى اية ياام بكار انتى ناسية ليه بت الدكتور سقاطة ....ادب وكمال جمال ...وحجابها مغطيها من ساسها لراسها

وابوها ربنا فتح علية وركب المرسيدس دلوقت ...ماكدبوش خبر وراح بكار وامة علشان يشوفوا البنت ...البنت عجبت بكار وامةقالت ادب واخلاق وتدين مافيش بعد كدة دا حتى ابوها مارضيش يسيبهم يتكلموا لوحدهم قال: الشرع قال لازم يكون فية محرم ...هيى دى اللى حتصون شرف ابنى ...واتفقوا على الشبكة والمهر وكافة شىء...وجه المأذون وفتح الدفتر وبدأ يكتب الكتاب

المأذون : اسم العريس انشاء الله

بكار : بكار سلف ودين

المأذون : اسم العروسة انشاء الله

د. سقاطة : بكارة سقاطة النتن

طبعا فية ناس ساذجة حتقول اية اللى حصل ليلة الدخلة .....اقولهم ولا حاجة ...مالصينى وصل ولو عايز كل يوم دخلة احنا تحت امرك

على فكرة ابن بكار كان ابن سبعة بس اللى يشوفة يقول ماشاء الله ابن تسعة ...وافى كدة وحلو ...بكار كان فرحان بية قوى ....وسماة بكرى

هناك 12 تعليقًا:

  1. بصراحة الموقف مبكر جدا عن كل باكر
    ايه يا د. اسلام اللي حاصل؟
    ماهو بكار سلف ودين
    لازم يتجوز بكارة بنت النتن
    ولو متخلصش منه في بكارة
    كده كده لازم يتخلص
    السلف والدين

    ردحذف
  2. يالهووووووووى
    ايه ده؟
    انت بتجيب الكلام ده منين؟
    بس انا ليا سؤال
    الكلام ده موجود من زمان
    اشمعنى دلوقتى كل ما ادخل مدونه الاقيه بقى حديث الساعه؟؟؟؟؟؟؟؟؟؟؟
    ربنا يسترنا احياء واموات

    ردحذف
  3. هى المعادلة كدا تمام ومظبوطة مية في المية

    لازم بكار كان يتجوز بكارة

    وطبيعي بكارة تكون بنت الدكتور سقاطة

    وعادى جدا ابن بكار وبكارة يكون ابن سبعة وستة كمان

    ماهو دا عدل ربنا

    ردحذف
  4. لا اصل هما فاكرين انها لعبه

    فاكرين انها سايبه

    بينسوا كلمة وما ربك بظلام للعبيد

    باحب اوجه سؤال كمان يا فندم لكل واحد فاكر انها سايبه
    لو انت فتك فتك يعنى نار وخدت واحده بالسلوفانه بتاعتها الاصلي يا معلم مش الصينى
    وكنت انت ذا فرست وان وجه المحروس بكري كمان وكان ابن تسعه ونص كمان

    طيب مين قالك يا حلو انك انت هاتبقى ذا اونلي وان

    ماهو الاولاني ده ممكن يبقى بعده التاني والتالث والعاشر ؟؟!!!

    الناس اصلهم اتهبلوا

    ردحذف
  5. على فكرة ابن بكار كان ابن سبعة بس اللى يشوفة يقول ماشاء الله ابن تسعة ...وافى كدة وحلو ...بكار كان فرحان بية قوى ....وسماة بكرى
    ______________________________
    احسن عقاب في الدنيا ان البني ادم يعيش حمار ويموت حمار
    واهو ربنا بيعاقبه من غير مايدري
    والله ياناس كله سلف ودين وبيخلص كله في الدنيا وقصاد عنينا

    ربنا يستر علينا دنيا واخره

    ردحذف
  6. ازيك يادكتور
    عيد مبارك عليك وعلى اسرتك الكريمة
    فعلا كله سلف ودين
    ودقة بدقة وربنا يرحمنا برحمته
    تحياتى

    ردحذف
  7. تصور لطيف لقصة قد تتحقق في الدنيا وقد لا تتحقق ويكون الحساب في الآخرة
    دعونا نقاوم شيوع حدوث هذا المسار بالدعوة للخلق الكريم والأمر بالمعروف والنهي عن المنكر

    ردحذف
  8. د. اسلام
    كل سنة وانت طيب
    مش عارفة اعلق بس دايما الطيبون للطيبات و الاكيد ان الله موجود ليخلص لعباده فى الدنيا والاخرة ..

    ردحذف
  9. كل سنة و انت طيب يا دكتور
    و عيد سعيد عليك

    و بعدين يا دكتور دى سنة ربنا فى الناس اللى كدا
    و كما قال الشاعر:
    إن الزنى دين ان استقرضته
    كان الوفى من اهل بيتك فاعلم

    و كما تدين تدان

    دمت بكل خير

    ردحذف
  10. كل عام وأنتم جميعا بخير

    كل عام والأمة الإسلامية إن شاء الله منتصرة

    كل عام ونحن جميعاً إلي الله أقرب وعلي طاعته أدوم

    تقبل الله منا ومنكم صالح الأعمال

    ردحذف
  11. قصه واقعيه ميه ميه

    والا صلاح ابو سيف

    طبعا الولد لازم يكون ابن سبعه

    ناس واعيه تمام منشنه علي النار حدف

    ربنا يستر
    هو الستار

    ردحذف