الجمعة، 2 يوليو، 2010

سيكو !

سيكو !

فاكر وانت معدى مرة فى البيت كدة .... ورحت لاطش كباية ولا فازة ولا طبق وموقعة وكاسرة ... فاكر اول حاجة عملتها ايه ؟... انا اقولك اول حاجة عملتها اية ؟... صرخت وقولت: مين الحمار اللى حط الكباية دى هنا .... أو قولت: فيه بنى آدم يحط الفازة فى المكان دة؟!! .... او قولت : الطبق مكانة المطبخ يابهايم .....

بينى بينك كدة ... الحمار والبنى ادم والبهايم مالهومش ذنب ... الذنب ذنبك انت ... انت اللى ماشى مسطول مش باصص قدامك ....

ماتقلقش دة شئ عادى بيحصل مع الناس كلها .... بس خلى بالك لما يبقى على طول على طول ... وعمال على بطال فيه حد هوة السبب وديما فيه حمار وبهايم موقفين حالنا ... يبقى كدة داخليين فى سكة السيكو ... وطريق ساعة تروح وساعة تيجى .

الحكومة عملت مترو الانفاق ... وكتبت على باب نزول وعلى الباب التانى طلوع .... الحكومة ممكن تعمل اية تانى ؟!.... احنا بقى نطلع من النزول ومن الطلوع ... ونفس الحكاية فى النزول والدنيا تبقى زحمة ... فنقول حكومة بت ستين كلب مش عارفة تعمل مواصلات مريحة...

الحكومة بتحط رادار على الطرق السريعة ... علشان تمسك الناس الوحشة اللى بتجرى بسرعة فتقلل الحوادث ... قوم اية الناس تنبه بعضها ويقلبوا النور لبعض علشان مايتمسكوش ... فالحوادث تكتر فنقول حكومة بت ستين كلب مش مهتمية بارواح البنى ادمين .

الحكومة بتوفر شغل بربعميت خمسميت جنية ... بس بعيد شوية عن حضن ماما ... مانرضاش ونضيع عمرنا على القهوة واحنا بنقول عايزين نتجوز ... بس نعمل اية حكومة بت ستين كلب المفروض توفر لنا شقق وعفش وعروسة ... وياسلام لو عيلين ... هواحنا لسه حنروح البيت ؟

خالد سعيد ... شهيد حقوق الانسان .... اولا : ربنا يرحمه ويغفر له ولينا ... ثانيا : خالص العزاء لأهله واصدقاءة .... ثالثا : ولا واحد .... ايوة.... ولا واحد من اللى كتب فى النت ولافى الجرايد ولاطلع على الدش يعرف الحقيقة ... ربنا بس هوه اللى يعرف الحقيقة ... كل الحكاية ...حكومة بت ستين كلب مافيهاش حقوق انسان ... والحقونا يا اوروبا ويا امريكا يابتوع حقوق الانسان ...يابلاد يامحترمة ... ياللى عمرها ماكان عندها جوانتناموا ... ولا ابوغريب .. ولاكلاب بتنهش فى بنى ادمين عريانين ملط .....

خالد سعيد لازم ياخد حقة ... موضوع غير قابل للنقاش ....بس الطريقة ازاى يا بشر .

كل الناس بتكدب ... انا وانت بنكدب ... كل الحكومات بتكدب ... وكل الشعوب عارفه ان حكوماتها بتكدب ... بس الشعوب السوية عندها ثقافة المصلحة العامة ... مش ثقافة أهو طلع غلك وخلاص ...واللى يحصل يحصل.

انا شايف ان الشعب المصرى بدأ يمشى فى طريق السيكو ... والحكومة من الشعب يعنى هية كمان ماشية فى طريق السيكو ... فانتظروا اى شئ غير ان مصر تكون بلد محترمة وشعبها شعب حضارى ...

قول ورايا ..... قول .... ساعة تروح ....وساعة تيجى ....هيه قول

هناك 10 تعليقات:

  1. انا معك في الجزء الاول كلمة كلمة فعلا نحن دائما نحمل غيرنا المسؤولية دون ان ننتبه الى اننا ايضا نعتبر من مسببات ما نشتكي منه لكن الجزء التاني من التدوينة اخالفك فيه الرأي انا أيضا اون ان الحقيقة عند الله لكن ايماني هذا لايمنع ان العدل يجب ان يطبق هناك قوانين هناك تحقيق هناك طب شرعي هناك وسائل كثيرة تتيح معرفة الحقيقة لو كانت الرغبة فعلا صادقة لمعرفتها اما ان ندع الحقيقة تضيع بحجة الحفاظ على المصلحة العامة فتأكد اننا بذلك نضع اول مسمار في نعش هذه المصلحة العامة المنشودة.
    ايضا الغرب صحيح عنده ابو غريب وغوانتانامو لكن مع كل ذلك في مجال حقوق الانسان هو أسبق منا بمراحل الفرد هناك له قيمة ووجود والمنظمات الحقوقية والمحتمع المدني تضغط وتدافع وتهاجم اي مس بحق من هذه الحقوق لذا فمقارنتنا بهم ليس لها مقام هنا فكما تقول القاعدة الفقهية "لاقياس مع الفارق"
    تحياتي

    ردحذف
  2. سلام عليكم
    ازيك يا دوك انا جايه على ساعه تروح وساعه تيجى كده على طول

    طيب خلينا نتفق الاول انها حكومه بنت ستميت هوهو بصراحه وبعدين نتفاهم فى الباقي

    احنا شعب لا يعلم حقوقه ولا واجباته وان علمهم لا يحاول الحصول على حقه بطريق مشروع ولا يقوم بواجباته كما يجب

    معااااااااااك فى ده تمام


    حضرتك لو شوفت عيل بن ستين تيت اخلاقه وحشه هاتقول عليه ايه ؟؟

    اهله ما عرفوش يربوه

    هل معنى ذلك ان الشخص ده لا يؤثم على اي حاجه يعملها عشان اهله هما الى ربوه غلط ؟؟

    ابسلوتلي نوت هو يؤثم برضه ما دام بقى كامل الاهليه عاقل بالغ

    لكن برضه ده ما يعفيش اهله من المسؤليه انهم ما عرفوش يربوه

    هما الى عملونا كددددددددددددددددددددددددددده
    والله العظيم هما الي عملونا كده

    مافيش شعب بينفذ القانون بالذوق والمحبه

    مافيش عيل بيستغيث بالديب من امه الا ان كانت امته اكثر بشاعه من الديب


    احنا شعب وحش وقليل الادب عايز يتربى

    بس ولاد ستين تيت هما الى عملوا فينا كده برضه

    تحياتي يا فندم

    وواحشني الخناق الصراحه
    جايه مشمره عن ساعديا على طول
    هههههههههههههههههههههههه

    ردحذف
  3. خواطر ... ندى ...
    احنا مش مختلفين والدليل اهوه :خالد سعيد لازم ياخد حقة ... موضوع غير قابل للنقاش ....بس الطريقة ازاى يا بشر .
    تانى حاجة ... وانا مصمم عليها ... رائى وانا حر فية ... لو قريتوا التاريخ من متين سنة حتعرفوا ان الغرب مش عايز مصلحتنا... ولا حيعوز مصلحتنا

    وحمد الله على السلامه ياست الريسه السابقة....

    ردحذف
  4. ندى :
    ماينفعش ان بعد ما اكبر وابقى طول بعرض واتعلم وافهم ... افضل اعيط واقول ابويا ولا امى ماكنش بياخدنى فى حضنة وانا صغير علشان كدة انا طالع فاشل
    وكل اللى باعمله انى ادور على حد يطبطب علية ...

    ردحذف
  5. يا فندم انا قلت الكلام ده مش معنى كده ان انا مش بالوم عليه لا قلت ما دام بقى بالغ عاقل يحاسب على افعاله ككيان مستقل

    لكن كمان يوم الحساب امه وابوه الى ما ربهوش كما يجب ان يكون هيتحاسبوا مش سايبه هى

    وخلي بالك ده مجرد مثال
    مش معنى اننا نقول خلاص بقى كل واحد حسابه عند ربه يوم الدين
    لااااااااا
    اينعم كل واحد حسابه عند ربه ما قلناش حاجه
    انما فى الدنيا فى حساب بقى على المسؤليات والجرائم والفساد واكل عرق الغلابه

    الديانات السماويه كلها فيها عقاب دنيوي مالوش دعوه خالص بالحساب فى الاخره

    نرجع لموضوعنا
    مش باقولك ابدا ان كل ما حد فينا يطلع فاشل ومتنيل على عينه يقول اصل الحكومه

    لا هو طبعا فاشل

    انما يا فندم حتى الفاشل له حقوق ادميه

    وانا ما قلتش نلجأ للغرب انا باقول نرجع للكتالوج بس والله ما قلتش اكتر من كده

    ما حك ظهرك مثل ظفرك ما حد فيهم هاينفعنا والله

    حضرتك فى كلامك اديت مثال بمداخل ومخارج المترو

    مليون قانون ومليون قرار لا ينفذ ولو نفذ فيه كوسه ولو مشي ما بيستمرش ولو استمر يبقى بغباوه

    القانون محتاج ايد تحميه ايد تحرص على تطبيقه مش هانعمل قوانين ونسيب كل واحد لضميره ونقول اه يا شعب سوقي مش متحضر

    اكثر دول العالم تحضرا امشي فيها وانت تلاقي الى بيرمي زباله فى الشارع وتلاقي الى يكسر الردار وتلاقي الى بينزل غلط فى مدخل المترو
    بس كمان تلاقي الى بيعاقب وتلاقي العقوبات محترمه توجع ولا تعورش وتلاقي الى بيصل الى بيتخرب والى بينضف الشوارع وكل حاجه موجوده هما مش شعب ملايكه والله لكن مش بلاهم نضيفه ومتقدمه من فراغ
    ومع ذلك برضه بتلاقي فساد عاااااادي جدا

    لكن احنا عندنا ايه
    الله يرضى عليك يا دكتور انا اعصابي تعبانه من البلد على الاااااااااااااخر ومخنوقه من الوضع بشكل مش ممكن بلاش تنكشني بقى كل شويه وتقول انتم الى شعب ابن ستين تيت
    عشان احنا حقيقى شعب ابن ستميت تيت عشان راضيين وقاعدينلهم يلطشوا فينا

    اه وعلى فكره انا لما باكسر حاجه اوقات لما تكون اه مش فى مكانها اقول من الحيوان الى حطها هنا ولما يكون انا الى ماشيه مسطوله باقول يادي الخيبه عليا وعلى سنينى عااااااادي يعنى

    ردحذف
  6. ندى
    شكل التصيفة كدة ماكنتش حلوة قوى ... انا موافق قوى قوى على الجملة دى :القانون محتاج ايد تحميه ايد تحرص على تطبيقه مش هانعمل قوانين ونسيب كل واحد لضميره ونقول اه يا شعب سوقي مش متحضر

    روق والنبى

    ردحذف
  7. نرجو من حضرتك الاطلاع على الفكره ونقدر مساعدتك

    ردحذف
  8. عذرا
    لعدم التعليق
    فهذه دعوه خاصه
    http://jokes-egyptian.blogspot.com

    ردحذف
  9. انت فين يا دوك ما بتكتبش جديد ليه

    ردحذف