الثلاثاء، 13 يوليو، 2010

مافاضلش الا الإيه

مافاضلش الا الإيه

الاسبوع اللى فات كان موسم 27 رجب ... كل سنه وانتوا طيبين ...انا ما اعرفش عادة المواسم دى جابوها منين ... بس قريت مرة انها عادة شيعيه من ايام الفاطميين لماكانوا بيحكموا مصر ... ايوة ماهوالفاطميين حكموا مصر 200 سنه ... وبعدين اشمعنى هما يعنى ماطوب الارض حكم مصر ... القصد ... وانا نازل الصبح لقيت ورقة ملزوقة على باب الشقة مكتوب فيها ... هات دكر بط علشان الموسم بكره .... بس ...من غير كل سنه وانت طيب... ولاصباح الخير .... مش مهم ... وانا راجع من الشغل عديت على الفرارجى اللى قالى : خلاص ياباشا الدكورة خلصت ... انت اتأخرت ... ولأنى عارف انه لو مكلناش بط فى الموسم حيبقى اعوذ بالله ارتكبنا نوع من انواع الشرك الاصغر ॥دا غير ان حتحصل مشكله كبيرة انا مش قدها ... ميلت على الفرارجى وقولت له باستعطاف : ماينفعش اروح من غير دكر بط ... الفرارجى بص لى بشماته وقالى : مش قولت لك يا باشا الدكورة خلصت !!!!... طبعا انا مش محتاج اوضح ان الفرارجى كان قصدة على دكورة البط !!؟؟هيه اللى خلصت ... قولت له طاب ظبطنى وانا حأظبطك ... قالى : مانت ياباشا ناسينى من زمان !!!... قولت له ظبطنى وشوف .... قالى : عقبال ماتشرب فنجان القهوة حيكون الدكر جاهز ... بس .... ايه ؟ ... قولت له : ايه ... قالى : الإيه ولا ايه؟ ... قولت له :آآآآآه ... وفتحت الشنطه وعطيت له علبتين من الإيه ...اللى لونهم ازرق ..... بص للعلبتين كدة وقالى : دول يكفوا اسبوعين بس ؟ وبقيت الشهر ياباشا....؟؟؟؟... بصيت له باستغراب ... قالى وهوه بيفرد صدره... صحه ياباشا ... نوديها فين ؟!؟!... عطيته علبتين كمان وقعدت اشرب القهوة واتفرج علية ... مسك الدكر ...لوى رقبته ... دبحه... رماه فى حلة الميه المغلية ... كل ده فى ثوانى من غير رحمه ولا شفقه ... افتكرت لما كنت امسك دكر البط لأبويا علشان يدبحه ... كان بيفرهدنا ... وحتى بعد مايندبح كان يقوم ويقعد ويفرفر ... بس ابويا كان بيسيبه .... كان يقولى حرام دى حلاوة روح سيبه لغاية مايموت ... قعدت اقارن بين زمان ودلوقتى ... هوه ليه دلوقتى لا بقى فيه رحمه من اللى بيدبح ولا مقاومه من اللى بيندبح .... اه ..... ولابقى فيه عقل يفك الارتباط الشرطى بين الموسم ودكر البط والشرك الاصغر ...الواضح ان كل اللى فاضل ... الإيه ... وكمان الكداب يقول: اوديكى فين ياصحه

ملحوظة :

كان ائمة الشيعة فى خطبه الجمعه ايام حكم الفاطميين لمصر ... يشتمون سيدنا عمر بن الخطاب على المنابر بطريقة مميزة ... هذة الطريقة هى التى استخدمتها النساء فى المناطق الشعبية فى الخناقات والتى كانت تنتهى بكلمة ياعووووووووووومر .... دلاله على اقصى انواع الردح ...

هناك 5 تعليقات:

  1. هو بعيدا عن آخر ملحوظه الي انا مش فاهمها
    بس هو كل ده عشان دكر بط
    و كمان علبه ايه بقي الى انت اديتهاله ^___^ ؟؟؟
    .............

    كل سنه وا نت طيب

    ردحذف
  2. كل سنه وانت طيب
    ويااااااااااااااارب الاسام اللي جيه دي
    تكون بخير وسلامه:)

    ردحذف
  3. اصحى يا نايم ووحد الدايم

    (حملة الجسد الواحد)

    أرجوا من المدونين الموقرين أن يضعوا شعار الحملة واسمها فقط فوقها (حملة الجسد الواحد) في الشريط الجانبي لمدوناتهم كدلالة على وحدة صف أمة محمد، ومن أجل قيام الولايات المتحدة الإسلامية

    لمزيد من المعلومات

    http://dndanh111.blogspot.com/2010/06/blog-post_14.html

    جعله الله في ميزان حسناتكم .. آمين

    ردحذف
  4. لا البوست بتاعك ده عايز بتاع 3 صفحات عشان ارد عليه

    بجد والله بس انا هاختصر عشان مش قادره

    اولا ايا يكن تقليعة المواسم جايه منين

    يا سيدى سيب الناس تلاقي سبب تجيب عشانه دكر بط ولا نتايه مش مهم

    الاخ الفرارجي بتاع الصحه ده طب يعنى لزمته ايه ايه الاخ ابو صحه ؟؟
    الحقيقه ما حدش فاهم اي حاجه فى اي حاجه وكله بيبلبع وخلاص

    وسؤالك الى اثار الحزن والمراره فى حلقي أي والله العظيم مراااااااره

    هوه ليه دلوقتى لا بقى فيه رحمه من اللى بيدبح ولا مقاومه من اللى بيندبح

    ومش عاااااارفه برضه ليييييييييه لييييييييييييه

    والارتباط الشرطي والله مش عارفه حضرتك بس كل الى انا فاكراه ان يوما ما كلناش بط مش عارفه كلنا وربنا نسيت

    والشيعه طول عمرهم فى مصر وغير مصر وفاطمين وغير فاطميين بيشتموا فى الصحابه كلهم

    احيانا الايام دي بيحاولوا يتلموا على وسائ الاعلام خاطبين ودنا احنا كمسلمين عموما


    المهم كلت دكر البط بالهنا والشفا ولا ايه يا دوك
    ولا يكون ما فاضلكش الا الاجنحه

    كل سنه وانت طيب يا باشا

    ردحذف
  5. كل سنه وانت طيب
    المهم يكون دكر البط مش عجوز علشان ما يخش سوى على النار ويسلام عليه لما يكون محشى فريك بالمكسرات وااااااااااااااااو حكايه

    وحلو عوووووووووووووومر

    ربنا يبارك حياتك ويسعد اوقاتك

    ردحذف