الثلاثاء، 8 فبراير 2011

وحشتينى يا مصر ... وحشتينى ياشيخة

وحشتينى يا مصر ... وحشتينى ياشيخة

يوم الجمعة اللى قبل جمعة الغضب دافعت و باستماتة على ان هذا الشعب لا ولن يثور ..... وخلال الاسبوعين الماضيين ....تارجحت كثيرا مابين مؤيد ومعارض .... وماخبيش عليكوا وصلت انى مش عارف اخد موقف ... ياترى انا مع دول ولا مع دول ... ولكن بعد ان سقطت ورقة التوت عن الجميع ....استطيع ان اقول رأيى الان : ان رجالا مثل وائل غنيم ....انحنى لهم واباركهم واشكرهم لانهم ضمنوا لبناتى مستقبلا كريما .... انحنى لكل من مات شهيدا فى سبيل الحرية التى يأسنا ان تولد يوما .... لكن الشاب الامور اللى طلع مع خيرى رمضان فأنى ثابت عند رائى .... عيب يابنى كدة .... اما بالنسبة اللرئيس حسنى مبارك فانا مع خروجة مكرما فى جو من الشرعية ... ليس حبا او كرها ... ولكن لان الشرعية هى التى لابد وان تحكمنا لو اردنا ان نعيش عهدا جديدا .... ولانه لا يجب ان نضحى باحسن مافى خلقنا وهو حفظ الجميل لرجل قدم الكثير لمصر ... قد اخطأ ... ولكن لابد للانتقام من حدود ....

كلنا فضفضنا وشتمنا وسبينا وطلعنا غلنا وانفجرنا وعبرنا وايدنا و وخونا .... وبعدين ... حنفضل كدة كتير ولا ايه ؟ ... لندع السياسيون يعملون ... ولندع المعتصمون واقفون يضمنون لنا نجاح الثورة... يضمنون ان التغيير سوف يحدث ....ونبدأ فى رسم خريطة المستقبل الذى دفع ثمنه رجال كل ذنبهم انهم طالبوا بالحرية ..... نعم رجال ...مش شباب طاهر برىء نقى زى مابيقولو ا اللى مش شايفين فى مصر غير انها تورته بالكريز ...كل واحد عايز يلهط منها حته ... الهى الكريزة تقف فى زوركوا يابعدا ....

لا اخفيكم انى احسست انى كهل عجوز وانا اقف اشاهد مايجرى ... احسست انه ليس لى مكان فى هذا الزمن القادم .... فكرت فى ان اتنحى جانبا لافسح المجال لرجال مصر الشرفاء لان القادم هو زمنهم وليس زمنى ...وقبل ما بناتى تقف فى الصاله ويقولوا لى اتنحى ... او يقولوا لى نريد... اسقاط ...اسلام .... وما خبيش عليكوا ... انا حاسس ان امهم اليومين دول بتحاول تخترقهم علشان تنفذ اجندتها الخاصة ... ماهى الاسبوع اللى فات جابت لهم كنتاكى .....( كنتاكى ياولاد الكلب ... بيضحوا بدمهم علشان كنتاكى ؟؟؟!!!! ...)... لكنى قررت ان اشارك ... حتى تنتهى مدتى فى الحياة ... فهى بلدى... مصر الحبيبه الغالية .. قد لا استطيع ان اقف فى التحرير ... قدلا استطيع ان اتظاهر فى الشوارع او اقف مع اللجان الشعبية .... ولكنى استطيع ان اشارك بمدونتى فى صنع هذا المستقبل عن طريق ما اتقنة واحبة الا وهو التنمية البشرية ... ان مصر فى هذا الوقت لا ينقصها سوى التنمية البشرية ... تنمية الانسان وفكرة وعقله .... ان مصر الان بحاجة الى عقول وقدرات ... ان مصر تستطيع فى خلال خمس سنوات ان تصبح احسن بلد فى العالم .... والله العظيم خمس سنين بس

وابتدا من البوست القادم ... سابدأ فى الحديث عن فن الاتصال والادارة واساليب التفكير والقيادة والتسويق ..والبرمجة اللغوية العصبية ... وكل مايساعد فى تقديم نموذج لانسان متحضر قوى فكريا وعقليا ..... ساقدم كل ما اعرفة لكى يا مصر

وتحيا مصر حرة مستقله ... تحيا مصر فوق الجميع .... تحيا مصر ام الدنيا اللى علمتها يعنى اية حضارة ... ولسه بتعلمها ... وحتفضل تعلمها

ويحيا رجال مصر .... وبناتها اللى بميت راجل ...اللى عملوا لنا اللى ماكناش متخيلين انه يحصل . والف رحمه ونور على شهداءنا ...

اه نسيت .... روّح يا بردعى لاحسن الحاجة قلقانة عليك .... رأيى وانا حر فيه ... هية ديموقراطية ولا مش ديموقراطية ؟!!!!

هناك 5 تعليقات:

  1. بما انك بقي من دمنهور في مظاهرة بكرة بعد الظهر في التوبة

    ردحذف
  2. حمدا لله عالسلامة يا دكتور
    اهلا بك فى صفوف الثوار
    اصبر شوية معلش مش عايزينك انت اللى تتنحى
    عايزين الراس الكبيرة
    وبينى وبينك بقى انا كنت مع الخروج الامن .. والخروج المشرف
    بس شعورى اختلف بتصاعد الاحداث وميرضينيش اقل من انه يتعلق فى الميدان ويتحاكم محاكمة عسكرية
    الميدان اللى شهد سفك دماء المصريين
    الميدان اللى شهد مذبحة المصريين
    لازم يتحاكم مينفعش يعدى كده ابداااااااااا
    محاكمة ويستاهلها كمجرم حرب نستخسرها فيه يعنى
    ده الشعب المصرى ابو الكررررررررم
    ...
    سعيدة جدا بمبادرتك للمشاركة فى صنع مستقبل الوطن.. مصر
    ربنا يقدرك ويوفقك يارب
    ويعين كل ابناء مصر الشرفاء وينصرنا فى كل ميدان
    ..
    الحاجة ام البرادعى هاريانى تليفونات برضه قولتلها يمكن تلاقيه على تويتر هههه

    ردحذف
  3. كنت بحسبك اصغر من كده و بس على كل ده يثبت وجهة نظري فيك من البداية انك راجل محترم , كنت بفكر في كده بس بعد هدوء الامور
    اختلاف اخير ان شاء الله ولن يفسد للود اي شىء , مبارك مجرم ومش من حق المجرمين اي خروج امن يتحاسب على ال70 مليار دولار بتوع الجارديان وعلى 300 شهيد اعزل وعلى 30 سنة اعتقالات عشوائية بدون محاكمة وتعذيب ممنهج في السجون , وحالات وفاة تحت التعذيب ده غير بيع الغاز بنص تمنه لليهود , والمبيدات المسرطنة اللي وزيرها متحاسبش . لو طلع برىء اوعدك اني اول واحد حيروح يبوس رجله مش راسه ولو طلع مجرم , فديننا مفيهوش رموز لان نبينا طلب من الصحابي ان يقتص لنفسه منه ومبارك ليس في محل مقارنة مع نبينا الذي قال لو ان فاطمة بنت محمد سرقت لقطعت يدها انما اهلك الذين من قبلكم انه اذا سرق فيهم الشريف تركوه واذا سرق الضعيف قطعوه

    ردحذف
  4. ههههههههههه

    حلو جدا يا دكتور ، وعلى فكرة أنا مع الثورة من أول يوم ، لغاية بعد الخطاب التانى لمبارك بحوالى يوم كامل ، وبعدها بدأت أفكر ، ومازلت متأرجحا فى الأفكار :)

    على فكرة يا دكتور ، كويس الخطوة اللى هتاخدها بتاعة التنمية البشرية دى . وربنا يديك على أد نيتك وعملك .

    أنا كنت عملت واجب ، وحولتهولك ، لكن الظاهر كده حضرتك مش هتعمله .

    عموما هتلاقيه فى الرابط ده : -

    http://mo7eb-rofail.blogspot.com/2011/02/blog-post_06.html

    منتظر رد أو تعليق حضرتك على الموضوع بتاعى ، ولو ممكن تعمل الواجب برضه :)

    تحياتى الجامدة جدا :)

    ردحذف
  5. دكتور اسلام
    ازيك وعامل ايه وشكرا لسؤالك عنى
    ربنا يفرحنا بيكو ياابنى
    وباى حد يقدم اى حاجة نافعة لمصر
    ويولى عليها من يصلح
    ويالا ابدأ باذن الله فى بوستات التنمية البشرية
    ربنا ينفع بك ويحفظك لاسرتك
    تحياتى

    ردحذف