السبت، 26 فبراير 2011

بصراحة كدة انا مش متفائل

بصراحة كدة انا مش متفائل

ممكن اكون قديم ... قديم قديم يعنى ... وجايز اكون شريك مخالف وخلاص .... وممكن اكون شايف ان اللى جاى مش بتاع جيلى ...فبعافر علشان افضل موجود ... وجايز اكون ساذج واذناب الحزب الوطنى بتلتف حواليه وانا مش دارى ....وممكن اكون خايف على مصر ... وممكن برضة ماتكونش مصر فارقة معايا ... وكل خوفى على بناتى فى ظل التطور الطبيعى للجان الشعبية بسيوفها وخناجرها بتوع قريش ... ممكن اكون كدة علشان فرق السن والكبر عبر ... زى ما انتوا عارفين ... وممكن اكون هادى علشان ماليش اطماع ... او حيادى علشان النظام السابق ما اذنيش فى حاجة ... يعنى مانضربتش فى قسم ولا حد قالى كلمه بايخة ... حتى المرور لما كان بيسحب رخصتى ... حق الله باكون غلطان فعلا ... ماحصلش مرة ان امن الدوله عين عليه مدير غبى لانى اصلا ربنا شفانى من الحكومة من بدرى ... وكان كل صراعى مع النظام السابق انى عايز المرتب يكفينى لغاية اخر الشهر ... وجايز ويمكن ويمكن وجايز ...وبما اننا بعد الثورة بقينا كلنا فاهمين كل حاجة ومكشوف عننا الحجاب وبنعرف النوايا وبنطلع على الغيب ... مين فيكوا يقدر يقول لى انا مين فى دول ؟ .... انا اقولكوا بطريقة الهندسة بتاعة اعدادى : بما ان انا نفسى مش عارف انا مين بالظبط ... اذن ولا واحد فيكوا حيعرف انا مين ... ومدام انا مش عارف وانتو مش عارفين ... يبقى اللى بيحصل حوالينا دة طبيعى جدا جدا جدا ....طبيعى انك ياتجيبلى تكنوقراطة يابلاش ياوله ... روح رجع البطاطا يابلاش يا وله ... طبيعى ان 83 مليون مصرى فجأه وبقدرة قادر تحولوا الى خيراء استراتيجيون ...وفقهاء دستوريون ...ومنظرون ... وقضاة ... وجلادون ... طبيعى ان حب مصر فى اننا ندهن الرصيف ونشيل الزباله علشان ندى فرصة للزبالين يعتصموا براحتهم قدام الحى .... طبيعى ان يكون فيه ناس شايفة ان التورته لسه فيها حاجة تتاكل وان استقالات الصحف القومية بالعبيط وان فاتك الميرى اتمرغ فى ترابه ياحمار .... طبيعى ان كله عايز يطلع على المنصة ... واللى مايطلعش يا يعيط يا يتقمص ... واالى يطلع يبقى خد لقب الخومينى ويافرحة امه بيه ... ياعينى عليكى يا بلد كل رموزك فقاقيع .... طبيعى ان الجيش يبقى نصة فى الشارع علشان ينظم المرور ... ونصه التانى على الحدود مع مجنون ليبيا ....... طبيعى ان افرازات عائله حرب بتحاسب جنرالات الجيش المصرى ... ماهى شرعية ثورية بقى .... طبيعى ان اسرائيل ماحدش يسمع لها حس ...وطبيعى ان السفينة الحربية بتاعة ايران تروح تزور ميناء اللاذقية ... صله رحم ... اعترض بقى .... طبيعى ان احنا نخسر كل يوم ملايين وان اتكلمت ... يقولو لك ماتجيب الفلوس اللى برة الاول ... طاب يا اخونا مانجيب الفلوس اللى برة وكمان اللى جوة ولا هوه خراب والسلام ... طبيعى ان ولا وزير حيجى حيعجب ... طبيعى ان احمد شفيق لازم يرحل علشان هوه من نظام حسنى ... ولما تتكلم يقولك اه شفيق وزير طيران شاطر بس ماينفعش رئيس وزارة ... طاب ما انت اللى بتقول اهه انه كان وزير شاطر فى زمن النظام اللى مش شاطر ... ولا هية لازم تتجاب على الارض علشان نرتاح .... طبيعى انك ترفض اللجنه الدستورية علشان طارق البشرى فيه مسحة دينية ... ماهو الدين بقى سبه اليومين دول .... والنغمه بقت الشعب يريد دوله مدنية ....بلاها علمانية علشان الكلمة دى بتدايق ناس كتير خليها مدنية ... طبيعى ان مفهوم الديموقراطية بقى ان لسعادتك مطلق الحرية انك توافق على رائى وبس .... لكن لو ماوفقتش ... تبقى بتبيع دم الشهيد ... ومن اذناب الحزب الوطنى ... خاين للثورة ... وتتحط فى القائمة السوداء ... ومتاسفين على موقفك ... ومكناش فاكرين انك عميل .... ويخسارة اتخدعنا فيك.

احسن حاجة انك تثور على الظلم والفساد وقله الادب والمسخرة ... بس بصراحة انا خايف لايكون كل اللى اتعمل دة والدم اللى اندفع دة يكون كله علشان اكله كباب وكفتة وبدال ماكنا بنعزف نهاوند وسيكا للى فات ... حنعزف بوب للى جاى .... بصراحة كدة انا مش متفائل ...

هناك 8 تعليقات:

  1. http://www.almasryalyoum.com/news

    طب تفاءل اوى ياسيدى

    http://www.youtube.com/watch?v=yxziuBBUA84

    ردحذف
  2. http://www.sharmlifeblog.com/2011/02/blog-post_26.html

    خد دى كمان

    ردحذف
  3. يا دكتور كفاية انت قلبت حاجات زى المواجع بجد .

    الشعب مش بيتعامل بذكاء للأسف ، الفول أثر فى 3\4 الشعب المصرى .

    فبلاه الفول :)

    أنا مش عارف أقول أيه بصراحة ، يلا ربنا يستر بقى .

    ردحذف
  4. هيسترها
    في ايه اكتر من البوظان اللي حصل الغتره اللي فاتت
    بص
    الفكره ان اللي بيحصل دي علي رأي كلمه كاتب عجبتني
    الالام الشفاء
    مكفايهمتدمرين 30 سنه
    اكيد هيحصل تخبط لما نحاول نصل
    وربنا معانا والحمد لله
    فمهما يعملوا
    انتا تريد وانا اريد
    والله يفعل مايريد
    بس خلاص

    ردحذف
  5. الناس اللي في علم حضرتك بيصنعوا الامل مبتاثروش بمواقف عبده مشتاق للمنصة ولا محللين معامل التحاليل المضروبة

    ردحذف
  6. اولا مادام انا مواطن لي حق الانتخاب يبقى من حقي افهم واتكلم فى السياسه وابقى محلل سياسي فيما يخصنى

    ثانيا : انا شوفت حلقة ابن شادي ومش شايفه ان كان فى اي تطاول على الجيش وليه مش عاجبك الشرعيه الثوريه اشمعن ادتوها للبجباشي جمال عبد الناصر ؟؟ والى راحوا وقفوا للملك وقالوله تخرج بره

    مع العلم ان لحد الان شايفه 23 يوليو انقلاب عسكري ايده الشعب
    انما ما نحن فيه هو ثوره شعبيه فى تمام شكلها حتى لو كانوا على خطا وانما هى ثوره شعبيه اضطر الجيش الى مساندتها حيث انه ما عندوش بدائل تانيه عقلانيه

    كون انك تحتار ده عادي ناس كتير بتحتار ومش عارفه تاخد موقف معين من حاجات كتير

    انا كمان فى نقط معينه باحتار فيها بس الحقيقه مش باقعد ايدى على خدي واقول انا حيرانه

    وانما بادور باسمع كل الناس باقرا فى تاريخ الثورات بحاول افهم الى فات عشان افهم الى جاي
    ثم باعقلها واتوكل

    لو كنت مش واثق فى نظافه الى حصل حاول تاخد انت موقف وتحمي مصر وتقول لا لكل من يحاول استغلال الموقف

    صباحك فل يا دوك

    ردحذف
  7. اه كمان بالنسبه لحكاية التفاؤل انا من قبل الثوره وانا ما بين آملة يحدوني الخوف وخائفة يحدوني الامل

    عادي

    لكن فى جميع الاحوال فانا احسن الظن بربي وباقول

    يارب احنا كنا بقينا وحشين اوي

    يارب احنا اتحركنا وقولنا لا وطالبنا بحقوقنا وبذلنا الدم واتغيرنا مافيش حد فينا الى ما فى حته جوه اتغيرت واتحرت ايام الثوره
    يارب خليك معانا

    غير دؤوب دعائي اللهم عليك بالظالمين اللهم رد كيدهم الى نحرهم وارنا فيهم عظائم اياتك ودلائل قدرتك

    وواثقه من كرم ربنا وفضله ان شاء الله

    ردحذف
  8. الخوف شىء طبيعى فى الفتره دى

    لكن الخوف اللى هيشل التفكير هو دى اللى مرفوض تماما

    وربنا قال ( واستبشروا خيرا)

    خليك متفائل بقى

    ردحذف