لما شعب يزنق التتار بين جبلين ويحدفهم بالطوب وينقذ العالم من ذل وهوان وخراب كان حيشوفه ....يبقى ده شعب عبقرى .... لما شعب يولع فى ابراج الصليبيين ويحاربهم من غير دروع بفارس وسيف وبس فيهزمهم بملوكهم وقلب اسدهم ... يبقى ده شعب عبقرى ... لما شعب يطفش حمله بعتاها الامبراطورية العظمى التى لاتغيب عنهاالشمس بعد مايحميهم بمية مغلية فى حوارى رشيد ... يبقى ده شعب عبقرى ... لما شعب ينهزم وينكسر ومايعديش عليه ست سنين ويعدى اكبر مانع مائى بعوامات بلاستيك ويهد ساتر ترابى بخراطيم ميه ... ويرجع كرامتة فى ست ساعات ... يبقى ده شعب عبقرى ... لما شعب يعمل نوع جديد من الثورات ...ثورة من غير قائد ومش اكتر من لمه فى ميدان ويافطة واحبال صوتية ... ويقدر يسقط ديكتاتورية من اكبر الدكتاتوريات فى العصر الحديث فى تمنتاشر يوم ... يبقى ده شعب عبقرى ... .
لما ده يبقى تاريخ شعب ...لما ده يبقى ابداع شعب ... لما دى تبقى عظمة شعب .... ليه بقى مستكترين على نفسنا ان احنا نكون من دول العالم المتحضر .... ليه مش مصدقين ان احنا ممكن نقود العالم ونبقى رئيس الفصل .... ليه صورتنا الذاتية قدام نفسنا مجرد تابع ذليل مقلد مستجدى للقمة العيش وحباية الدوا .... هما العالم التانية دى اجدع مننا فى اية ...؟....ولا هيه دى مشكله العباقرة الازليه ؟ ... ماهو دايما العبقرىكدة ...كسلان ... مش كفايه كسل بقى ؟ مش كفاية لوك لوك ؟ ... مش كفاية فيس بوك وعالم افتراضى وهاش تاج وتريقة على اللى ورا عمر سليمان والجلابية ؟ ... مش كفاية توك شو وهلفطة ليل نهار ؟ ... ماتيجى نستغل الوقت ده ... نشتغل بما يرضى الله ... نجرب مرة احساس اننا بنتقلد مش بنقلد ... نجرب ان يكون لنا اكلنا وشربنا ولبسنا وعادتنا وتقاليدنا وافكارنا واسلوبنا وموضيتنا ورؤيتنا واغانينا .... نجرب نعتز بنفسنا ونقعد نتفرج على العالم وهوه بيقلدنا .... والله نستحق ... وعندنا من العقل والامكانيات والخبرات والحضارة اللى مش عند حد .... مصر حلوة ياولاد ... بس احنا مش حاسين بيها وبقيمتها .... احنا اعظم شعب فى العالم ... ومن غير مانقول على نفسنا المختار ...واللى عمل اكتر مننا يورينا نفسه ... وان كانوا فرسان ينزلولنا الميدان .
ملحوظة : 4 ساعات يوميا فيس بوك وتوك شو ... يعملوا 120 ساعة فى الشهر ... يعنى 1440 ساعة فى السنة ... يعنى فى عشر سنين يعملوا 14400 ساعة .... يعنى فى عشرين سنة يعملوا حوالى سنتين وفر ... يعنى اتنين دبلومه ... يعنى ماجستير ... يعنى مهارة جديدة ... يعنى حفظ القران ... يعنى تعلم لغة ... يعنى احتراف برمجة الكمبيوتر ... عيش معايا اكتر .... يعنى لو 20مليون مصرى بس كل واحد فيهم وفر سنتين فى العشر سنين الجاية .... يبقى حنوفر 80 مليون سنه ... يعنى كلينتون حتقعد مع نبيل العربى علشان تتفاوض معاه يزود المعونة المصرية لامريكا .... يعنى اسرائيل حتبقى من الكائنات المنقرضة .... وسمعنى احلى سلام ... بلادى بلادى لك حبى وفؤاادى .... والختمة الشريفة ماهى صعبة.
يقول الله
ردحذفان يريدا اصلاحا يوفق الله بينهما
شفت ان الاصلاح تعلق بالارادة , هيه دي المعادلة
ههههههههههههه
ردحذفوعشان كده مصر ياولاد ، مصر ياولاد ، حلوة الحلوين !!!
طبعا علشان حضرتك وامثالك فيها يا دكتور .
حلو التفاؤل ده ، وحلوة الروح دى ، وحلو انت يا دكتور :)
تحياتى ، وهحاول أطبق النصيحة ، أسيب الفيس بوك ؟؟ صعبة جدا جدا ، بس هحاول .
طالما أنى هوفر سنتين فى عشرين سنة ، ليه محاولش ؟
محب
ردحذفالاول كل سنة وانت طيب وعيد سعيد عليك وعلى الاسرة الكريمة يارب
ثانيا انت حتوفر سنتين فى عشر سنين مش عشرين ... انا كتبتها غلط ... وبصراحة مكسل اصلحها