الأحد، 24 يوليو، 2011

علم الكلام (هلفطولوجى)

علم الكلام (هلفطولوجى)

24 ساعة كلام فى الفضائيات والجرايد والمجلات والشارع والبيت والشغل والغيط واللى فى الميدان حتى البلطجية والفلول كله بيتكلم وكله بيقول انا بحب مصر .... مع ان ولا واحد فيهم بيحب مصر ....عارفين مين اللى بيحب مصر بجد .... مش حتصدقونى .... وحتزعلوا منى .... بس اهى كلمة حق امام شباب حائر .... اللى بيحب مصر بجد ... حسنى مبارك .... ممكن يكون ... ممكن يكون سرقها .... بس مارضاش يخليها ليبيا ويمن ..... طاب ماحنا كلنا سرقناها ... ايوة وماترفعش حواجبك وتزبهل .... كلنا سرقناها ....هربنا من الضرايب ... غشينا فى شغلنا .... نصبنا على زباينا ... زوغنا ... رمينا الزبالة من البلكونة .... خدنا الدوا من التامين وبعناه فى الصيدلبة وجبنا برفانات وورق تواليت ... بنينا مخالف على الارض الزراعية ... سيبنا المية مفتوحة على الفاضى .... وغيره وغيره وغيره .... كلنا سرقنا مصر .... وبنقول ان احنا بنحبها .... صدقونى محدش حبها زى حسنى مبارك .... وميدان العباسية يشهد .....

معلش انا مش بعرف اعمل عملية التصنيف بتاعة دول الثوار الاصليين ودول الثوار التايوانى .... لان رغم تحفظاتى الشديدة على الاخوان ... الاانهم اعقل حبتين .... لانهم روحوا .... ماهو لو فيه تيوانى وسط الاصلى .... الاصلى يروح فيبان التيوانى وياخد على دماغ امه .... ولا اييييييييييية ... يبقى الحسبة مش عايزة مخ احمد زويل ولا حاجة ....هية حاجة من اتنين برضة ... يا اما الثوار عارفين هما بيعملوا اية ... يا اما ماعندهومش خلفية .... لو ماعندهمش خلفية يبقى عيب قوى نمشى ورا ناس عبيطة .... لو عارفين هما بيعملوا ايه ... يبقى قدامنا حل من اتنين ... يا العالم دى استغبت وحتضيع كل اللى اتعمل ...يا العالم دى فاهمة اللى محدش فينا قادر يستوعبة .... والله لو العالم دة فاهمة اللى احنا مش فاهمينة يبقى احنا مانستاهلش نمشى وراهم .... ولو العالم دى غبية يبقى فية حل من اتنين ... يا اما غباء طبيعى او غباء صناعى ... غباء طبيعى ... يبقى مايصحش نمشى ورا كلام الناس دى ... ولو الغباء صناعى ... يبقى فية حل من اتنين ... يا اما غباء صناعى داخلى .. فلول يعنى.... ودة يخلينا مانمشيش وراهم .... يا اما غباء صناعى خارجى ... عمالة واجندات وكدة .... ودة برضة يخلينا مانمشيش وراهم .... نطلع بالتفكير المتسلسل دة باية ؟ ... مانمشيش ورا الثوار اى كان النوع اصلى او تايوانى .

ثوار مصر الاعزاء .... كفاية بقى لجل حبيبكوا النبى ... البلد داخلة على حرب اهلية واللى مش شايف البشاير يبص على روكسى واهالى العباسية .... ومهما تعملوا ايه بالذى .... مش حتقدروا تقفوا ضد الطبيعة الانسانية والتطور الطبيعى للاشيا ء ... كل حاجة عايزة تاخد وقتها ... انتوا لسة صغيرين ... بالذوق بالعافية صغيرين وخبرتكوا على قدها ... بس هية دايما كدة .... واحنا صغيرين شايفين الكبار متخلفين وقدام ورجعيين ... ولما بنكبر بنشوف الصغيرين متهورين ومتسرعين ... مع اننا كنا فى يوم من الايام صغيرين ومتسرعين وثوريين .... مش عيب لما نسمع كلام الكبار ... واوعوا تصدقول انكوا عارفين كل حاجة ... ومدام مش عارفين كل حاجة يبقى بلاش تحكموا على كل حاجة .... وارحموا البلد واهلها الغلابة اللى مايعرفوش ولا عايزين يعرفوا يعنى ايه ائتلاف ولا منسق ولا متحدث ... مايعرفوش ولا عايزين يعرفوا يعنى ايه ليبرالى ولا يسارى ولا قايمة نسبية مغلقة ...اهل مصر عايزين يربوا العيلين ويعيشوا فى امان ويناموا زى زمان وباب الدار مفتوح.اه نسيت عارفين حتبقوا كبار امتى .... لما تعترفوا انكوا صغيرين .

فاكرين مسلسل ليالى الحلمية ... لما العمدة سليمان غانم الفلاح المقرح اتجوز نازك السلحدار بنت الحسب والنسب .... خلفوا بنت ... اسمها زهرة ... زهرة بقت صحفية شاطرة قوى .... بس مش سوية ... سيكوا يعنى ... عدوانية ضد اللى بتحبه قبل اللى مابتحبهوش .... الله يرحمك يا اسامة انور عكاشة ... كان شايف كل اللى بيحصل معانا قبل مايحصل .... طول عمرة الراجل دة نوارتنا ... ونجم فى سماء الدراما

هناك تعليقان (2):

  1. مساء الخير
    اعرف اني لست مصرية وقد يكون ردك علي كرد لواء الجيش على تميم البرغوتي بما معناه انه يخليه في فلسطين بتاعته لكن هناك كلمات لا استطيع الا ان اقولها
    المثل يقول اللي ميشوفش من الغربال يبقى اعمى ومصر بفضل شبابها الثائرين حدثث فيها ثورة عظيمة اذهلت العالم كله ولو كان الشباب استمع لنصائح دعاة ما يسمى ظلماالاستقرار ماكان حكم مبارك قد زال
    يا اخي انا الغير المصرية اعرف ظلم مبارك وقهره اعرف ظلم داخليته اعرف افساده السياسي وتزويره للارادة الشعبية ارى العشوائيات الممتده على طول مصر وفقر اهلها بينما انت المصري لم ترى ذلك وتعتبر مبارك اكثر من يحب مصر
    اتمنى ان لا يزعجك كلامي لكنه كلام كنت اتردد في كتابته تعليقا على كثير مما قرأته لك مؤخرا
    دمت بكل الود وربي ينير بصيرة الجميع ليرى الحق حقا

    ردحذف
  2. خواطر شابة:
    انا كمان عارف ظلم مبارك وازاى خرب البلد ولازم يتحاكم .... القضية قضية مصر ... مصر اللى بتتفتت... انا مش بخون حد ولافى صف حد عن حد ... انا فى صف مصر ... واللى بيحب مصر مايهلفطش ليل نهار ويسخن ويصعد ... اللى يحب مصر يأثرها على نفسة واطماعة وظهورة الاعلامى ... اللى يحب مصر مايدخلش فى جدل الدستور اولا ولا الانتخابات اولا ... اللى يحب مصر مايديش فرصة للغوغاء يطلعوا ... من الاخر يا خواطر : تقدرى تقولى لى يوم الجمعة الجاية مين من عباقرة التوك شو يقدر يقول حتعدى ازاى ؟... طبيعى ان كل واحد فى مصر شايف نفسة فاهم كل حاجة ... طبيعى ان مافيش ولا واحد يختار لوزارة محدش يتفق علية .... القضية عمرها ماكانت قانون الغدر ولا محاكمة نظام وراسة ... القضية قضية بلد بتتحول لعراق ... وماتفهميش من كلامى ان مش عايز حسنى يتحاكم ... بس واحنا بنحاكمة ماننساش نحاكم نفسنا ... كلنا فسدة ... كلنا فسدة وانا اولهم.... ثورة يعنى تطهير للنفس قبل اى حاجة ... وعلى ما اعتقد ان دة محصلش لغاية دلوقت ...
    اخيرا كلامك لا يزعجنى مطلقا ... فالخلاف فى الوسيلة وليس الهدف ... ولو قريتى اللى فات بدون احكام مسبقة حتلاقينى بقول اللى بيقولة الثوار ... بس وانا بقولة مصر فى قلبى وعينى .... تحيا مصر الباقية والى نهاية حسنى والثوار وانا

    ردحذف