الثلاثاء، 7 فبراير 2012

فهيم ونعيم وهانى

فهيم ونعيم وهانى

فهيم ونعيم وهانى ... شباب مصرى زى الورد البلدى المفتح فى موسم الربيع ..... فهيم الكبير دبلوم زراعة ... نعيم الوسطانى معهد فنى تجارى .... هانى الصغير ليسانس اداب قسم اجتماع .... الصدفة بس اللى خلتنى اشوفهم واقعد معاهم واكل معاهم واشرب شاى واشد حجر معسل سلوم ....

فهيم ونعيم وهانى واخدين ارض فى الصحرا .... بين الارض وبين بيتهم 350 كيلوا .... مشوار يعنى ...بيروحوا الارض يوم السبت الصبح ... ويروحوا لاهلم يوم الخميس العصر ...

فى الصحرا ماعندهمش تليفزيون وبالتالى ماعندهمش دش ... ولا لاب توب ولا نت ولا فيس بوك ولا تويتر ..... بيقواموا الفجر كل يوم ... يصلوا ويفطروا ويطلعوا على الارض يشغلوا الديزل علشان يطلع ميه يرووا بيها الزرع .... ويفضلوا شغالين لغاية الضهر مايدن .... يصلوا ويتغدوا ويرجعوا يشتغلوا لغاية العصر .... يصلوا ويشربوا الشاى ويرجعوا يشتغلوا فى الارض لغاية المغرب ....يصلوا ويتعشوا ويفضلوا سهرانين لغاية مايصلوا العشا ويناموا .....

اتغديت معاهم ... فول من الارض ... بابا غنوج من بدنجان الارض ... عيش من قمح الارض ... بصل اخضر برضة من الارض ... ارض مصر ... رمل مصر تراب مصر اللى معجون بعرقهم وشقاهم .

بعد الغدا خدونى يفرجونى على الزرع ... كانوا فرحانين وهما بيشرحولى فرحة الاب اللى بيشوف ابنه بيكبر قدام عينية ....فهيم ونعيم وهانى.... زارعين غله وفول وفلفل وبدنجان .... وترمس ...ولما سألت عن الترمس قالوا لى دا لنا بنسلقه ونملحه ونأزأز ...اه نسيت اقول لكوا لقيت بركة كبيرة متبطنه بمشمع وفيها ميه .... سألت ... قالولى :ساعات الديزل بيعطل اوبيبقى فيه ازمه سولار واحنا بنبقى محتاجين ميه ... فلما الديزل بيشتغل نقوم محوشين ميه فى البركة تنفعنا لما نحتاجها للزرع ... استنوا..... استنوا ... شوفوا عبقرية المصرى .... جابوا زريعة (سمك صغير) وحطوة فى البركة وكل يوم يرموله العيش اللى بيفضل منهم ... الزريعه تاكل وتكبر تبقى سمك ياخدوه ويشوه وياكلوه بالهنا والشفا ....

قهيم ونعيم متجوزين وعندهم عيال ... هانى بقى مستنى يبيع محصول السنه دى علشان يتجوز... العروسه موجودة ... قصة حب حلوه من ايام الكليه .... من عندهم من البلد... هانى قالى ادعى لى يا دكتور ربنا يلم شملنا ( يارب ياهانى يسعدك يارب ).

وانا ماشى ( على فكرة ماكنتش عايز امشى ) عطونى هدية من الارض ... بدنجان وفلفل وفول اخضر ..... وترمس علشان أأزأز .

فهيم ونعيم وهانى ... ورونى ان لسه فيه شباب رجاله فى مصر ... شباب عايشين علشان مصر وعلشان يوكلونا .... عايشين علشان مصر واهل مصر .... ومتأكد ...انهم اول شباب حيستشهد لو قامت حرب مع اسرائيل .... مش تقولى فيس بوكك وفيس بوكى وثوار فضائيات ومدونات ....الثوار اللى بجد هما فهيم ونعيم وهانى ... ثوار عايشين علشان مصر مش بيستشهدوا علشان ............ علشان ايه حد يقدر يقولى ؟؟؟!!!

فهيم ونعيم وهانى..... مايفهموش يعنى ايه عصيان مدنى ؟! لكن يفهموا يعنى ايه زرعة تكبروتوكل ومتخليش الايد تتمد لحد ... هيه دى الحرية اللى يفهموها .... مش حرية وضع الصابونه.

على قد مافرحت بيهم على قد مازعلت انى ماعملتش حاجة بجد فى شبابى .... وضيعته اونطة .... قال و زى الاهبل بكمل تضييع عمرى على الفيس بوك .... عيل عبيط بقى تقولوا ايه ؟!!!

هناك تعليقان (2):

  1. هماالتلاتة بيحبوا مصر
    وكل المصريين بيحبوا مصر
    بس كل واحد بطريقته

    ردحذف
  2. انا فهيم وبشكر الدكتور جدا جدا علي الكلام اللي حضرتة كاتبة وياريت يشرفنا مرة تانية والسلام عليكم فهيم حمدي ابو زريدة

    ردحذف