حشيش الارض

حشيش الارض

الكتاتنى هوه هوه فتحى سرور ... الشاطر هوه هوه احمد عز ... البلتاجى هوه هوه كمال الشاذلى ... العريان هوه هوه صفوت الشريف ... الجديد هوه هوه حسنى ... مافيش حاجة بتتغير ...  ومافيش حاجة حتتغير .... بهدوووووء اقعد واتفرج عليهم نفر نفر .. حتلاقيهم هما هما .... بص كويس بتركيز .... حتلاقينا احنا كمان زى ما احنا .... هيه هيه ... وهما هما ... واحنا احنا ... ثورة بقى انتفاضة هوجة اغتيالات حرب انقلاب  ... حتفضل مصر هيه هيه .... اللى راكبين هما هما ... واحنا  ... احنا احنا ... هما النخل العالى فى العلالى ... واحنا حشيش الارض ... اى نعم مافيش ريح تهزنا ... ولاهوا يهدنا .... بس علطول بينداس علينا بالجزم ...احنا حنفضل زى ما احنا ... نصبر بمرارة ... ننكت بمرارة ... كل اللى بنعمله ... ان احنا بنطلغ غلنا وهمنا فى بعضنا ...

حتفضل هيه هيه وحيفضلوا هما هما وحنفضل احنا احنا ....ويا سيدى ... حلم وراح ...  زى مليون حلم وراح ... ايه اللى جد يعنى ...مابويا بالاشتراكية و حلم .... وجدى سلم على الريس وباسه  وخد الخمس فدادين وحلم ... وجد جدى بنى الهرم وحلم .... مافرقتش يعنى ما احنا بنحلم من سبعتلاف سنه ومافيش حلم بيتحقق ... عادى يعنى ماتعرضهاش .

ياعم دماغك ....يالا ارجع لاصلك ... حضر دكر البط علشان الموسم ... اسلقه و حمرة وخد الشوربه سقى بيها الرقاق ... واتغدى ومصمص.... وحلى بحلاوة الموسم ... واضرب كوباية شاى التموين ابو نص التمن ... واحبس بالسيجارة الكليوبترا ... وباليل ..... بلبع قرص الفياجرا مع قرص عين الكتكوت ... وشغل التت على ماالحباية تعمل مفعولها ....... وصدق انك راجل ...... واتقلب على ضهرك ... واتخمد وشخر .... وابقى استحمى الصبح ........ يمكن .... يمكن..... جايز تطهر .(حلم برضة انك تطهر )

نص الخطاب الاول لرئيس

نص الخطاب الاول لرئيس

ايها الاخوان والاخوات :

اعاهد الله العلى العظيم على التمسك بالبرنامج والجهاد فى سبيل تحقيقة والقيام بشرائطة .. والثقة التامة فى القيادات الحديثة ... والسمع والطاعة لمطالب الاخوان والاخوات فى المنشط والمكره... واقسم بالله العظيم على ذلك وابايع عليه والله على ما اقول وكيل .

                          ( الهتيفة : الله اكبر ولله الحمد )

ايها الاخوان والاخوات :

 اننا نرسى دولة القانون ... لذلك سوف احلف اليمين امام الدستورية العليا ... ولاننى ثائر منكم سوف انزل الميدان لاطالب مع اخوانى بالغاء المكمل ... احنا فى ثورة والثورة مكمله .

                          ( الهتيفة : الله اكبر ولله الحمد )

ايها الاخوان والاخوات :

اننى رئيس لكل الشعب ... لكل الشعب... ولذلك سوف استقيل من رئاسة حزب الذل والندامة  ... ولكنى كمواطن له الحق فى ان ينتمى الى حزب ... فاننى لن استقيل من حزب الذل والندامة  .

                          ( الهتيفة : الله اكبر ولله الحمد )

ايها الاخوان والاخوات :

اننى اتعهد بالحفاظ على كافة المعاهدات التى وقعت عليها الجمهورية ... وخاصة معسكر ديفيد .... كما اتعهد بمراجعة بنود معاهدة معسكر ديفيد.. كما اتعهد باعادة العلاقات مع تيران لاحداث توازن استراتيجى فى المنطقة. .

                          ( الهتيفة : الله اكبر ولله الحمد )

ايهاالاخوات :

انا عايز كل واحده فيكوا تطمن خالص ... كل واحدة تلبس اللى هيه عيزاه ... براحتها خالص .. تلبس بنى ... تلبس كحلى .. ازرق .. اسود ... براحتك خالص ... علشان بيقولوا ان الرئيس  حيحجب الستات ... الرئيس مابيحجبش الستات ... عمر الرئيس ماقال ان الستات تتحجب ... دا ربنا اللى بيقول ومدام ربنا اللى بيقول يبقى لازم ننفذ كلام ربنا .

                          ( الهتيفة : الله اكبر ولله الحمد )

ايها الاخوان والاخوات :

اننا دولة مدنية دينية .... جمهورية ملكية...سنية شيعية ... واقتصادها رأسمالى اشتراكى ... ومرجعيها الازهر والمقطم ... ان حرية الرأى والتعبير والابداع مكفولة للجميع بمجرد استلام التصريح ... انى معكم وعليكم ... انى بكم وبدونكم ... اننى الرئيس لا كذب ... انى الرئيس .. انى الرئيس ... انى الشاطر ... انى بلوة سودا ....انى الرئيس يالا خافوا منى ... انى بلوه سودا .. انى الشاطر

والسلاموا عيكم ورحمة الله وبركاته .

                          ( الهتيفة : الله اكبر ولله الحمد )

صباح اليوم الاول فى قصر رئاسى

صباح اليوم الاول فى قصر رئاسى

نهار داخلى :

بانوراما لحجرة نوم الرئيس ...

 يرقد الرئيس على سريرة فى وضع الجنين .... تحاول الحاجه ايقاظة بهدوء ...

ام محمد : حاج ... ياحاج ... اصحى ياحاج ... الساعة بقت حداشر ... قائد الحرس بقاله ساعة بيخبط علينا .

يستيقظ ابو محمد مفزوعا : جاى جاى .... بس والنبى بلاش ضرب على القفا .

ام محمد : استر يارب ... مالك ياحاج ... وضرب ايه اللى على القفا ؟!

ابو محمد : حضرى الشنطة بسرعة ياحاجة ... وماتنسيش الفوطة زى المرة اللى فاتت ... دا انا قعدت سنه انشف وشى فى ديل الجلابية .

ام محمد : لا اله الا الله ... انت بتحلم ولا ايه ياحاج ... شنطة ايه وفوطة ايه وديل جلابية ايه .

ابو محمد مستنكرا : مش بتقولى ظابط امن الدوله بيخبط .

ام محمد ضاحكة : الله يحظك يا حاج ... الله لا يرجعها ايام ... انا بقولك قائد الحرس الجمهورى بيخبط ... انت نسيت انك الريس ولا ايه .

يعتدل ابو محمد ويبصق عن شماله قائلا : اعوذ بالله من الشيطان الرجيم ... بينى وبينك ياحاجة ... مش عارف اخد عليها ولا اصدقها ... كوابيس فى النوم من ناحية امن الدوله ... وكوابيس فى الصحيان من المعلم والممتاز ... يالله اهو كله علشان مصر .

ام محمد : قوم بس يا حاج وصلى على النبى ... تبات نار تصبح رماد ... ومحدش عارف الخير فين ... بس انا عايزاك المرة دى تتناصح بقى وتلم الشعب حواليك ... اه ... يعنى كل يوم الصبح كدة تطلع عليهم فى التليفزيون ... وتصبح عليهم ... محافظة محافظة ومركز مركز ولو عرفت تجيب من الرقم القومى اساميهم وتصبح عليهم واحد واحد يبقى خير وبركة.. اه والنبى ياحاج اوعى وانت بتصبح على المحافظات تنسى البحيرة المره دى ... حاكم زعلانين منك قوى انك نسيتهم فى الخطاب اللى قولته بعد النتيجة... بيقولوا ماكنش العشم ينسانا بعد ما وقفنا معاه .

ابو محمد : ايه .. هما حيزاولونى من اولها ... ولا علشان عطونى صوتهم يعنى ... لااااااا ... انا الرئيس ... ولو مش عارفين اعرفهم ... ايوه ... انا الرئيس .

يرن جرس التليفون الخصوصى .. ترفع ام محمد السماعة وتقول ... اهلا اهلا ... صباح الخير ياسيدنا المعلم .

يقع ابو محمد من على السرير ... ويجرى زاحفا ويأخذ التليفون من الحاجة .

ابو محمد بصوت مرتعش : السلام عليكم ورحمة الله وبركاته يا مولانا المعلم ..ابدا والله يامولانا المعلم دا انا صاحى من بدرى ....عفوك يا مولانا ... والله ماحتتكرر تانى يا مولانا .. حاضر يامولانا ... من النهاردة ... البلان حتبقى عندك شهرى واسبوعى .... حاضر يامولانا  ويومى ... حاضر يامولانا ... لا طبعا فاهم ... كل اللى حيقول عليه الممتاز  ... كله يامولانا ... والله العظيم كله يامولانا ... اتفضل يامولانا ... اتفضل يامولانا .

بعد ان يغلق ابو محمد التليفون ينظر الى الحاجه بعتاب قائلا : كده ياحاجة ... كدة قاعدة تتسايرى معايا وضيعتى الوقت ... انا نازل على المكتب ... المعلم حيكلمنى على تليفون المكتب بعد عشر دقايق .

ام محمد وهى تجرى وراءة : استنى ياحاج ... استنى بس .. حتنزل المكتب بالجلابية  ياراجل ؟! وكمان حافى ...... الهى يخرب بيت الرياسة اللى حتضيع منى الراجل .... بس معلش اهو كله علشان مصر .

ملحوظة : يارب يخلف ظنى .... علشان مصر ....!!!!!!!!!!!

ثورة أغبياء أم غباء ثورة

ثورة أغبياء أم غباء ثورة

الاوله  : حسنى غبى ماطلعش للشعب فى الوقت المناسب وشال الوزارة وحل مجلس الشعب ..... فأنخلع.

الثانية  : اتباع اغبياء حبوا ينشوا الدبانه من على راس حسنى فخبطوة بطوبة وعملوا موقعة الجمل فدخلوا السجن .

الثالثة : مجلس اعلى للقوات المسلحة غبى ... افتكر انه لما يراضى الكل ويدى حتة زيادة للاخوان انه بكده حيعدى بالبلد ... فاتشتم على الهوا مباشرة وبدون فواصل .

الرابعة : شهداء اغبياء ... ضحوا بنفسهم علشان المرتزقة والمراوغين والكدابين ولابسى الحظاظات يعملوا السبوبة الكبيرة ويحبوا ويتجوزوا .... حسبنا انهم فى الجنة .

الخامسة : ثوار اغبياء ماصدقوش اللى هما فيه ( ماهى مفاجأة انها تتقلب ثورة ) وانقلبوا على بعض ... وشاى الفضائيات اللى بالياسمين ... لف عقولهم ومحدش يقولى رومانسية شباب ثائر ... زمن الرومانسية ولى يامعلم .

السادسة :فلاحين اغبياء بنوا على الارض الزراعية اللى بياكلوا منها ... ولاباعوا ولا سكنوا وعليهم ديون للمقاول غير ديون بنك التسليف ... وبيزرعوا الدره فى قصريات على السطح دلوقت .

السابعة :اخوان متأسلمين اغبياء ... طمعهم وغبائهم عماهم وحبوا يكوشوا على كل حاجة ... فضاع منهم كل حاجة ... واوعى تقولى خدوا الرئاسة  ... جمال عبد الناصر كان اجدع منه واتعزل عن البلد ... وحسنى كمان ... واوعى تفكر انه حيقدر يكون السادات ... عنوان الجواب بيقول ان  اخره ... اخره اخره يعنى نبطشى فرح كداب ولا جمعية نلم بيها تمن التكتك .

التامنه : مجلس شعب غبى ... قعد يدن ويمص فى هولز ويعمل عمليات تجميل ويحارب الجنزورى ... فالناس زرغتت ووزعت شربات لما اتحل .

التاسعة : مرشحى رئاسة اغبياء  ... محدثين رئاسة ... بعد ما اقنعوا الشعب الاهطل انهم ثوار .. (كان فاضل يقولوا انهم شهدا ) مااتفقوش على واحد فخدوا الشلوط المتين اللى جه فى العصعص عدل .

العاشرة : شعب غبى ... قال لالالالا ... ده ضل مبارك ... مش عايزة ... قام مختار مبارك اهطل وعيوطة وبدقن وجاموسة ضاحكة .

الحادية عشر : فريق غبى ... فارس فى زمن الصعاليك ... حارب خفافيش الظلام بسيف العقل والحكمة ... كان عليك بايه ياسيادة الفريق ... ياعمى روح للى يقدرك ويعرف قيمتك ...( انا معاك فى الحزب لو عملته ... ما انا كمان غبى )

الثانية عشر : انا غبى لانى متأكد وعارف وواعى وقارى وشايف ومستوعب كويس قوى ان مصر مش حيتصلح حالها ابدا ... بس برضه لسه عندى امل ... غبى بقى تقول ايه !

الثالثة عشر : اوعى تفتكر ان ماسورة الغباء خلاص صفت اللى عندها ... لايا حبى لا ... دا خرم صغير  لسه ماوصلناش للبكابورت الكبير .

الرابعة عشر : كلنا اغبياء والثورة بريئة مننا ... انها ثورة الاغبياء وليست غباء ثورة .

الخامسة عشر والاخيرة : لما بأشوف العيوطة وام محمد ( والله ماسخريه من الاشكال .. عسى ان يكونوا خيرا منى ) لما باشوفهم ... بافتكر الطبلية والفول النابت ومخلل اللارنج والزير ... بافتكر العرقسوس والسوبيا ونبوت الغفير وشخة فريال ... بافتكر الكانون والحطب وقرص الجلة اللى كان  ممكن اتنين يموتوا  بعض علشانه .. بافتكر تليفون العمدة وشيخ البلد والسلاحليك وحرامية البهايم ... بافتكر ادعوله ادعوله ودفتر الصحة بتاعنا والتواريخ فى ادينا .... وبخاف .... اخاف لمصر ترجع 100سنه ورا وتستخدم الجمل فى المواصلات ... وتبقى ثورة بدأت بموقعة الجمل ... وانتهت باستخدام الجمل كوسيلة مواصلات .....

 خسارة يامصر ... والنعمة الشريفة كنت حلوه.

لا يحمد علي مكروه سواه

لا يحمد علي مكروه سواه

الكذب عقيدتنا .. والمراوغة دستورنا .. والحكم غاية امانينا  .. تلك هي الحقيقة .. وليذهب الشعب الى الجحيم .. وليذهب الوطن الى الجحيم .. ولنحيا حياة النعيم .. افرح يا شعب بخيبة املك .. انبسط وهزر على الفيس بوك واشتم في العسكري ما هو ده اخرك .. جاهل .. منافق .. كذاب .. مرائي .. ياللا البس الجلابية القصيرة ..وصلى فى المسجد الاخوانى ... وانت طالع ماتنساش تاكل حق اخوك ... حجب او خمر اونقب المدام ... وماتنساش تاخد المزة على الطريق الدائرى علشان تحفظها سورة يوسف  .... جوز بتك ذات الاثنى عشر ربيع ومتنساش تجيب فى الجهاز سى ديهات توم وجيرى ...افرح ياشعب ووفر فيزا السعودية وحج للمقطم وملس بكفك على المقر ...ومتنساش توطى تبوس ايد المرشد ... يمكن ... يمكن يرضى عنك ويديك صك الغفران .... افرح ياشعب وشغل شبابك فى مشاريع النهضة ... شغلهم فى توكيلات السواك والمسك وحبة البركة ... شغلهم فى توكيلات بيع شرايط عذاب القبر ... يا اخى بلا ادويه بلا سلاح بلا تكنولوجيا .... افرح ياشعب وهيص واسهر فى الميدان ... افرح واهتف الله اكبر ولله الحمد .... افرح واعمل كارنية الحرية والندامة ... وانا كمان حأفرح ... حأفرح فيك ...لان الايام حتوريك ... حتوريك انك حتخسر الدنيا .... وحيزوغوا منك فى الاخرة ويقولوا لك انى برىء منك ... احنا بنخاف رب العالمين ....

مبروك ياسيادة الفرق ... والله العظيم فرحت من قلبى ... ربنا بيحبك علشان ماتوفقتش فى الانتخابات ... دا شعب بيحب الحيوانات الضاحكة .... خلص من البقرة الضاحكة ...علشان يجيب الجاموسة الضاحكة ... شعب اختار العيوطة علشان يفضل طول عمرة يلطم ...

ربنا نجدك ياباشا ....

واخيرا : لو لم اكن مصريا ..... لحمدت الله كثيرا .... ولاننى مصرى ... فلا املك سوى ان احمد الله .... فلا يحمد على مكروه سواه

نشاطركم الاحزان

نشاطركم الاحزان

لمستقبل مصر الرحمة ولشعب مصر الصبر والسلوان 

الكذب عقيدتهم

الكذب عقيدتهم

الكذب عقيدتهم والمراوغة دستورهم وكرسى الحكم غاية امانيهم.

بيقولك ان المجلس العسكرى هوه اللى حاطط قانون مجلس الشعب المعيب ... طاب ياكداب ماقولتش ليه ان انت اللى دبدبت علشان القايمة تبقى تلتين والتلت فردى ... طاب ياكداب يابن الكدابين ماقولتش ليه انك انت اللى عملت مليونية علشان التلت الفردى يدخل عليه الاحزاب ... ما انت ماكنتش مصدق انك حتشم ريحة المجلس ولا حتى تقعد فى ضلة .

بيقولك ان المجلس العسكرى حل مجلس الشعب وفلوس الشعب الغلبان  اللى اتصرفت على الارض راحت على الارض ... طاب يامراوغ يابن المراوغين ماقولتش ليه على ال170 مليون جنية كتب تانية ثانوى اللى انطبعت وحيتعمل بيها قراطيس لب وعصافير الجنة علشان صممت ان الثانوية العامة تبقى سنه واحدة من السنه دى ... ووزير التعليم باس ايدك علشان تخليها من السنه الجاية .

بيقولك احنا بلد قانون والقانون لازم يتنفذ على الكبير والصغير ... طاب يامشتهى السلطة بتعارض ليه حكم الدستورية العليا بحل برطمان الزباله .

بيقولك حنقعد فى الميدان وننزل الشوارع وبيهددنا بالموت والاستشهاد والدم ...... (مش عارف ايه ) امك ... مابنخافش ... مابنتهددش ياروح ياست الحبايب... اذاكنت عايز تطلع الميدان فاحنا برضة عارفين سكته ... ان كنت عايز دم ... فاحنا بنشربه زى النسكافية ... عايزها تخرب ... عايزين نسويها بالارض ... عايز تموت ... فالموت  علينا حق ... وان كان ولابد مش حنموت جبنا ...وربنا بقى يبقى يحاسب ويشوف مين فينا اللى شهيد ؟... اللى بيدافع عن رقبة مرشدة واللى بيدافع عن بيته وعياله .... اوعى يابابا يغرك صوتك ... وان ورتهالى نقاب نقاب ... حوريهالك تشليح تشليح ....

نداء الى المجلس العسكرى ... الحكاية مش صعبه يامعلم ... قلم بس جامد على قفا الزبون ... حيفتكر على طول امن الدوله ... وان كان قلبك مش جايبك ... قولنا واحنا نروق قفا الزبون ونرجعة الجحور تانى بطريقتنا.

جمال مبارك رئيسا لمصر

جمال مبارك رئيسا لمصر

صيغ المبالغة فى اللغة العربية تستخدم لتكثير وتعظيم الصفات ....وتأتى صيغ المبالغة على خمس اوزان .. فعال .. مفعال .. فعول ... فعيل ... فعل(بفتح الفاء وكسر العين ).. ومثال لذلك صفة الكذب فيقال فى المبالغة .. كذاب .. مكذاب ... كذوب ...كذيب ... كذب (بفتح الكاف وكسر الذال) ... وهناك صيغ مبالغة مشهورة ومتداولة واخرى غير متداولة لصعوبتها فى النطق والتعامل فى الكلام ...مثلما فى صفة الخوف فنقول خواف على وزن فعال ولانقول مخواف او خووف او خويف او خوف (بفتح الخاء وكسر الواو )....اما الصفة التى كتب من اجلها هذا البوست فهى صفة البكاء او باللغة الدارجة العياط ... فنقول على كثير البكاء والتباكى عيوطة وهى فى الاصل عيوط  على وزن فعول ..ولكن اضيفت لها الهاء لزيادة السخرية من هذا العيوط فنحن كما تعلمون مجتمع ذكورى وان كان ذكوريتة لاتختلف كثيرا عن سنبل فى المسلسل التركى حريم السلطان ...ففى المجتمع الذكورى نجد ان هاء اوتاء التأنيث سبه واهانه فى واقع الامر ... عموما استخدام صيغة المبالغة عيوطة لا يمنع من صحة الصيغ الاخرى ... مثل معياط ... عييط ... عيووط .. عيط... والمهم عياط على وزن فعال .... وكما ذكرت فالعياط هوالشخص كثير العياط والبكاء والتباكى والندب ...فكل ماتكلمة ... يعيط على الذل والهوان وكسرة النفس والمرمطة ايام النظام السابق ...فمثلا عندما تسأله سؤال مباشر :مثل ما اسمك ؟ فان يرد قائلا : مش عايزين نرجع لمصر القديمة وايام الزل والهوان والقهر والفساد ... انا اسمى العياط ... ولو سألته : اتغديت ايه النهاردة .؟ يرد عليك ويقول : مش عايزين نرجع لمصر القديمة وايام الزل والهوان والقهر والفساد... اتغديت محشى اسلامى ( والمحشى الاسلامى هو محشى بدون خلطة ... لان الخلطة من الاختلاط والاختلاط حرام ...لانه لايجوز ان يكون الواد بقدونس قاعد مع البت كسبرة فى صوبع واحد ... وماتقوليش ماهو بينهم الرز ... اصل الرز من (ش....ط) النظام القديم على رأى العيوطة الصغير مع منى الشاذلى ( رد فعل منى الشاذلى عجبنى قوى )... ولو سألته انت متجوز ؟ يرد عليك: مش عايزين نرجع لمصر القديمة وايام الزل والهوان والقهر والفساد ايوة متجوز .. هذه هى الاسئلة .. وتلك هى الاجابات ... وذلك هو العياط ..البكاء ..المتباكى... الكهين ..الكائد..المتمسكن ..المراوغ  .

نرجع بقى للعنوان ... مش احمد شفيق بقى .... دا لو جمال محمد حسنى السيد مبارك بكل مساوئه وموبقاته وخطاياه وسفالته ووضاعته ووساخته ورخامته ورزالته والاهم غبائه اترشح قدام الكائن العيوطة ... سوف انتخبه بكل ضمير مستريح وبكل راحة بال ساذهب لانام مطمئنا على بناتى ومستقبلهم ...سأنتخب جمال محمد حسنى االسيد مبارك .. لانه صادق ... وسخ وبيقول انا وسخ ... واضح ... سافل وبيقول انا سافل ...  حأنتخب جمال لانى مابحبش العيوطة.... مابحبش الملاوع...مابحبش الابتسامة الصفرة... مابحبش الرجوله غير الكامله ... طاب سنبل عنده عذره .... امر سلطانى بقى تعمل ايه ؟.

ملحوظة للى عايز يفهم وعنده بقايا كرامة وفتات عزة نفس ونخوه... ومستوعب ان ربنا كرمه :

يقول الشهيد (والله اعلم )حسن البنا فى حديثه المقدس :

ان عضو الجماعة بين يدى المرشد كالميت بين يدى مغسله ... يقلبه كيف يشاء ... وان خطأ المرشد اصوب من صحيح عضو الجماعة .

انا عن نفسى الوحيد اللى يقلبنى بين يديه هوه الله سبحانه وتعالى ولله المثل الاعلى .

انا عن نفسى حقى ان اقول رائى واغلط براحتى .. واعمل اللى شايفة صح وحدودى هيه حدود ربنا

انا عن نفسى مرشدى هوه سيدنا النبى محمد رسول الله صلى الله عليه وسلم  ومحدش غيره مرشدى

انا عن نفسى مابابوسش  غير ايد ورجل  ابويا وامى.

انا عن نفسى طول ماربنا عاطينى العمر ... عايش ... حى ... وانا اللى باحمى نفسى لان امى بطلت تحمينى من اربعين سنه بعد ماعلمتنى ازاى اتليف.

آه ياشعب .... آه يانخبة .... آه ياولاد التاجرة