السبت، 4 أغسطس، 2012

غطينى والطمى يا انشراح


غطينى والطمى يا انشراح
بقالى شهر بسأل نفسى مين اللى بيحكم مصر ؟ بعد ايبك ما مات وشجر الدر اتقتلت ؟ مين بيحكم مصر ... مهيطل ولا مرشدىولا ميشو ولا روبن هود تيم (يوسف وديبو والرايق )...؟ طاب مهيطل مش فاضى غير انه يطلع زمايل القروانه من السجن ويلمهم فى سوق المتعة ... ومرشدى قاعد على المكتب لابس السلطانية وماسك السبحة وحاطط يافطة كاتب عليها مرشدى عليه السلام ... ميشو بقى لو احسنا النية خد جنب وبيحافظ على الحاجة الوحيدة اللى فضلت بعد معركة المنصورة .... ولو اسأنا النية ضمن انه مايتهانش فى ارزل العمر .... روبن هود تيم مش عايزين يصدقوا انهم حراميه حتى لو كان اللى بيعملوه خير ....
اللى بيحكم مصر هو شعب مصر ... هوه اللى بينظم مرورة ... هوه اللى بيفض خناقاته ... هوه اللى بيلم زبالته .... هوه اللى بيقيد شمعه ... هوه اللى بيلم من بعضة علشان يعالج نفسة ويوزع شنطة رمضان ....
ما ايه رأيكوا بقى كفاية اشتغالة لنفسنا ... كفاية نحور على بعضينا ونعترف ان احنا شعب زباله ... عبيد كابر عن كابر ... سبعتلاف سنه بنبوس الجزم ... ملناش لا فى حرية ولا فى ديموقراطية ... ايه رايكوا نبطل نصدق ونقول على نفسنا ان احنا شعب جميل ... ونعترف ان ثورة 25 ينايم صحت فينا اخلاقنا الوسخة وجهلنا وتخلفنا ...
مش عيب انك تكون وسخ وتقول انا وسخ ... العيب انك تكون وسخ وتضحك على نفسك وتمسك سبحه وتلبس نسوانك حجاب ... صارح نفسك بنفسك علشان تعرف تعيش .. داللى جاى مش قد اللى راح ولا انت غاوى تنادى وتقول غطينى والطمى يا انشراح .

هناك تعليق واحد: