آآآآه ... ياوطنطن

آآآآه ... ياوطنطن

اللى بيطرد امه اللى ربته وكبرته وعملته بنى ادم من الشقة علشان يتجوز فيها الامورة اللى حتفك زنقته وشرطها الوحيد انها ماتعيشش مع حماتها على اساس حبسة الحرية وكدهون .

واللى عايشة حالة الاستايل والكرياتينين والماركيتنج والمالتى ناشيونال وابوها بقى حمل عليها فتوديه دار السنين اللى بتاخد شىء وشويات على اساس ان هيه اللى بتدفع وكدهون .

واللى بيخون صاحبه علشان ياخد مكانه فى البيت والشغل على اساس ان كله مكتوب ومحدش بياخد رزق حد وكدهون .

واللى قررت انها تسيبله العيال وترفع قضية خلع علشان عايزة تعيش بقى ؟!! ... وهوه ... على قد حاله ومش مكفى طموحاتى وغيرة جاهز ومستنى الاشارة من الصوبع الصغير ..على اساس ان محدش بيعيش مره واحده وكدهون ... خدت بالك من ضمير الغائب اللى فى الجملة اللى فاتت ... ده فى اللغة بيبقى للتحقير وكدهون .

واللى بيشتغل ديلر ويبيع البيسه ويتاجر فى العمله ويهرب البضاعة من المينا على اساس ان الشاطر هوه اللى يعرف يجيب الجنى (الجنيه يعنى )وكدهون .

واللى بتورد المتعه لمن يشتهى مع الاستعداد لتوصيل الطلبات للمنازل وتوفير الاماكن والادوات اللازمة .. على اساس ان الناس تعبانه والبنات عايزة تلبس وتاكل زى غيرها وكدهون .

واللى فاتح هايبر ماركت فتاوى ... وقاعد على الكاشير يعد فلوس صكوك الغفران ويعمل عروض مجانية  للشهادة ...على اساس انه الوكيل الحصرى للدين فى منطقة الشرق الاوسط وكدهون .

واللى فاتحة مطعم تيك اوى وتوصيل الوجبات للفضائيات وخصم خاص للحم الغلابة الفيليه ودم اشهدا بالتلج المجروش على اساس ثورة ثورة وكدهون .

اللى بيرفع علم بلد تانية غير علم بلده ويهد فى اساسها وجيشهاعلى اساس عايزين نبدأعلى نضيف وكدهون .

واللى ابن وسخة كل شغلته انه يبرر لكل ده فى افلام ومسلسلات وسخة زيه على اساس ان الفن يرصد المشاكل ومايحلهاش وكدهون .

وفى النهاية .. اللى مش شايفين او مش عايزين يشوفوا او عاملين مش شايفين على اساس ان القرشين اللى تحت البلاطة يسترونا ومادام بعيد عن قفايا يبقى احنا فى الامان وكدهون .

بعد كل اللى فات حأسأل سؤال رفيع ... هوه اللى بيبيع ابوه وامه وعياله ودينه وشرفه ويروج للسفاله والوساخة والمطنش  ممكن يصعب عليه انه يبيع وطنه ؟؟؟!!!

والسؤال الرفيع يجيب سؤال ارفع : هوه يعنى ايه كلمة وطن ؟؟!!!

شكر خاص للمهندس احمد ايوب صاحب فكرة اللى قرر يبيع بييع اى حاجة حتى الوطن .

إستنى او خد لك تصبيرة

إستنى او خد لك تصبيرة

عايز العب فى الشارع مع العيال ....استنى لما بابا يرجع ويوافق ....التصبيرة :العب قدام باب االشقة ماهو بابا مش حيوافق اكيد  .

عايزآكل... استنى لما الاكل يستوى ... التصبيرة :خدلك شاندوتش جبنة بالطماطم.... ماهو الاكل لسه ماتحتطش على النار من اصله .

انا بحب بت الجيران ... استنى لما تكبر ... التصبيرة: حبها من طرف واحد ماهو الحب شعور مش للصغيرين وزى اختك وكدهون .

عايز العب فى اشبال النادى .... استنى لما تخلص ثانوية عامة ... التصبيرة : العب فى الخرابة علشان النادى عايز موافقة ولى الامر.

عايز اشتغل .... استنى لما تخلص تعليمك .... التصبيرة : اشتغل فى الاجازة  من ورا الحاج ليقولوا عليه مش عارف يوكلك.

عايز اعمل ماجستير فى جراحة الخيول .... استنى القسم يشوف  .... التصبيرة :  اعمل دبلومة ...علشان القسم مافيهوش غير جراحة البقر .

عايز شقة ... استنى لما الحكومة تبنى ... التصبيرة : خدلك ايجار مؤقت علشان الحكومة مش حتبنى يا اهبل .

عايز اخرج مع خطيبتى .... استنى لما تكتب الكتاب ... التصبيرة :اخرج معاها من ورا ابوها واعى حدش يشوفكوا ماهو لو عرف فيفسخ الخطوبة .

عايز سيكو سيكو ... استنى لما العيال تنام ... التصبيرة : ودى العيال الدرس وتعالى ماهى العيال مابتنمش قبل الفجر .

عايز عربية ... استنى لما الحكومة تخفض الجمارك ... التصبيرة : جيب عربية اوكا 800 سى سى (حلوه سى سى دى بتغيظ الاخوان ) ماهى الحكومة مش حتخفض الجمارك يا عبيط .

عايز احج ... استنى لما تجهز البنات وتسترهم ...التصبيرة : اعمل عمرة .. ماهو بعد ماتجهز االبنات حتشحت يامعلم .

عايز اعمل مشروع .... استنى لما البلد تهدى ... التصبيرة : حط القرشين فى البنك .. ماهى البلد مش حتهدى وياسيدى نوايه تسند الزير

فعلا ... انا زير .. ولولا النوايه كنت وقعت على دماغ اهلى اتكسرك ... الحمد لله انى لقيت التصبيرة غيرى لسه مستنى ..

 بس كل املى فى ربنا انى لما اموت واتحاسب ماستناش على الاعراف ... نفسى اخش الجنة على طول ... كفاية تصبييرة لغاية كده ...

التعميم بين النظرية والتطبيق

التعميم بين النظرية والتطبيق

التعميم فى اللغة له معنيان .. الاول بمعنى جعل الشىء عاما مثل عممت الدوله التعليم ... والمعنى الثانى وهو عمم فلان فلانا ... اى لبسه العمامة ... ومدلول العمامة فى اللغة المكانة والتقدير والقيادة ...لكن اللى بيحصل دلوقتى حاجة تانية خالص ... ومفاهيم مختلفة تماما .. مفهوم التعميم دلوقتى هو مفهوم تلبيس العمه بمعناها السىء .. اى بمعنى الضحك على الزبون واستعباطة وجعله يوافق على مالايريد ...ويقول مالا يعى ...  

طريقة تعميم الاسلامى للمواطنين :

اللى بيقول ان الاخوان ارهابيين يبقى بيعمم ودى بقى تبقى سقطة فكرية تدل على ان اللى بيقول كدة مابيفكرش تفكير علمى ومش موضوعى (الرسالة التحتية : اوعى تقول ان الاخوان ارهابيين الا يقولوا عليك مش موضوعى ومابتفكرش تفكير علمى ) .. فى البلاد المتحضرة والديموقراطية بيفرقوا بين اللى بيعمله الفرد اللى فى الجماعة وبين الجماعة ذاتها ( لو قولت ان الاخوان ارهابيين يبقى انت مش متحضر ومش ديموقراطى ) ...انا معاك ان اللى غلط او مسك سلاح وروع الخلق لازم يتحاكم ( شوفت انا حقانى ازاى ... مش زيك )... لكن الاخوان كجماعة ناس طيبين ولذوذين وامامير ... ذنبهم ايه انهم مايشاركوش فى حكم بلدهم ( خليك شهم واقف جنب ابن بلدك المظلوم )..يا اخى اعتبرهم مسيحيين  يا اخى (خلى عندك نخوه ودافع عن دينك واسلامك )... وياسيدى مش معنى ان صندوق التفاح فيه تفاحة بايظة يبقى نرمى الصندوق كله ( الاخوان فاكهة غاليه ... الاخوان تفاح ) ..ده مش من المنطق ولا الحكمة ( لو قولت ان الاخوان ارهابيين يبقى انت مش حكيم ولا عند منطق ... ياللى اثبت انك مش كده ) ...عارف.. حتقولى ان الاخوان بتضرب الشعب بالنار والتليفزيون مصور الكلام دة ... اهو هوه دة التعميم اللى بقولك عليه ... اولا: اللى شفتهم فى التلفزيون دول ممكن جدا مايكونوش اخوان ... يبقى لازم نستنى القضاء يقول كلمته (شوفت احنا بنحترم القضاء ازاى )... ثانيا : لو فرضنا ان دول اخوان ... مانعممش بقى ... دول قله من الشباب المتحمس اللى خايف على البلد فبلاش ناخد الجماعة اللى بتحمى الاسلام بذنب الشباب المتحمس ده (شباب ياعم ....شباب طايش ... سامحهم وخليك انت الكبير ).

السؤال هنا هوه فيه حد يدخل عليه الكلام ده ؟

الاجابة : نعم ... كما يقولها الشيخ يعقوب .

جرب كده وشيل مابين الاقواس ... وقول الكلمتين دول باسلوب حلو وطريقة شيقة مع تعبيرات صدق واستكانه على الوش ... وياسلام بقى لو اللى بيحاورة مطبلاتى من عينة ريشة الاعلامى المعروف باسم محمود سعد  ( افتكر فيلم دم الغزال )  ...وقابل يامعلم ... تأثر ودموع ونحنحة ويسقط حكم العسكر ... والشرعية لازم ترجع .