بنعبدوها .....بس

بنعبدوها...... بس

بنبقوا مش مبسوطين وزعلانين من حاجات كتير بنعملوها ... ورغمن عن كده برضك بنعملوها ... ولو حد سألنا طاب انتوا مصممين تعملوا الحاجات اللى بتزهقكوا ليه ؟ حنردوا ونقولوا : هيه كده ... طول عمرها كده ... اهلينا كانوا بيعملوا كده...

طاب بابا وماما وجدوا وتيتا ماكانوش فاهمين ... تقوموا تعملوا زيهم ليه ؟ .. الجماعة كانو بيغلطوا ... تقوموا تغلطوا زيهم ليه ؟....

احنا بنضحك على الكفار فى الافلام ونقول شوف العالم العبيطة ... بيعبدوا الاصنام وهما عارفين انها لا تنفع ولا تضر ...ونتتريق ونقول كانوا  بيعملوا الاصنام من عجوة علشان لما يجوعوا  يكلوها ...ها ها ها هاى...مع اننا زيهم بالظبط ... بنعبد اصنام اباؤنا الاولون...... والبيت والغيط مليانين اصنام من عجوه ... صنم الجواز والجهاز والنادى ... صنم البنت زى الولد ... لغاية مابقت البنت ولد والولد بنت ... صنم ان جالك الغصب خده بجميلة ... صنم ان بيت ابوك اتهد خدلك منه قالب .. صنم ان غلبك بالمال اغلبية بالعيال ... صنم يا مأمنه للرجال يا مأمنه للمية فى الغربال ... صنم تشتغل كتير تغلط كتير تتجازى ... ماتشتغلش ماتغلطش تترقى ... صنم ان نزلت بلد تعبد العجل ... حش وارميلة ... صنم مرسى راجع والاخوان احباب الله ..

وومازلنا نجلس لنشاهد افلام الكفار ونضحك ... ونقول : ايه العالم العبيطة دى ... ازاى بيعبدوا اصنام .. وهما عارفين انها لاتضر ولا تنفع ....  ونتتريق ونقول كانوا بيعملوا الاصنام من عجوة علشان لما يجوعوا  يكلوها....

طاب وربنا الكفار طلعوا اجدع مننا ... على الاقل  كانوا بيستفادوا من الاصنام ويكلوها ... لكن احنا ........... بنعبدها بس ....

التعليم فى مصر بين الحلم والكابوس(3)

التعليم فى مصر بين الحلم والكابوس (3)

الطالب المبسوط

اهم  عنصر فى العملية التعليمية هوه الطالب اللى كلنا بنخدم امه وبنتمناله الرضا يرضى علشان يكبر ويبقى بنى ادم ... قوم الطالب ده مبسوط بالتعليم كده ... حتاخد ايه من واحد بيقولك : انا ايه اللى يخلينى اصحى الساعة سته الصبح واغسل وشى فى السقعة دى ... واتعارك مع الحاجة علشان افطر ... والبس وانزل اخبط مشوار للمدرسة علشان لما اوصل اقابل واد ابن واطية لابس كاب احمر وعاملى فيها حبيب العادلى فى زمانه ... وينزلنى اققف طابور مالهوش اى تلاتين لازمة .. وناظر ماسك خرزانه بيتوعد ويهدد ... ولما ندخل الفصل نقعد على تختة مكسرة مسمارها ينتش البنطلون ضبة ومفتاح ... البنطلون اللى جايبة بالعافيه بعد قصيدة الفقر والشقى والعيال  اللى مابترحمش .. اللى بيسمعهالنا الحاج كل مانطلب حاجة ... داغير شرح المدرس اللى مش عارف هوه مدرس ايه بالظبط ... ماهو داخل عينه حمرا وبيتتاوب ... شيقان على رزقة طول الليل يا ولداه ... طاب وعلى ايه يا عم ... مانريح الكل ... وشيل دا من ده يرتاح ده عن ده ..

ما قوم براحتى .. اضرب نسكافيهى ... واخد لى دورين كاندى كراش ..وانزل بوستين اشتم فيهم الحكومة ...واروح الدرس ... المستر يلخص لنا الليله فى كلمتين من اللى بيجوا فى الامتحان نحفظهم ونخش نرجعهم فى ورقة الاجابة  وخلصنا .. واخرج بقى مع العيال نضرب الكانز والشيبسى والكنتاكى ونعاكس بنات الناس ودماغنا يا معلم ... اه .. على فكرة كله متساوى ... طب زى هندسة زى اداب اجتماع ..كله قاعد .. العالم دى عبيطة والنعمة ...فاكرين ان الشهادات هيه اللى بتشغل وتجيب فلوس ... ياعم لو ابوك مش دكتور وعنده عياده ... ملهاش لازمة كلية الطب ... لو ابوك ماعندوش سوبر ماركت مالوش لازمة كلية التجارة ... لو بابا مش ممثل مالوش لازمة معهد السيما ..

الطالب مبسوط كده مش عايزها تتحل ... لانه مش شايف مستقبله ... شايف ان الليله كلمتين يتحفظوا وينطرشوا فى ورقة الاجابة ... شايف ان لازم يكون ابوك مجهز لك السبووبة ... والا حتقعد على الرصيف ....

الواد عنده حق يا جماعة ... طاب والختمة الشريفة عنده حق ... وجايين نقول الطلبه وحشيين وفين ايام الطلبة والتعليم الوسطى الجميل ... الطلبة غلابه ..  احنا الكبار اللى عايزين الحرق ... والى اللقاء مع عنصر اخر من عناصر العملية التعليمية 

التعليم فى مصر بين الحلم والكابوس (2)

التعليم فى مصر بين الحلم والكابوس (2)

آه ياشعب

المفروض ان بداية من الحلقة دى حامسك عنصر عنصر من العملية التعليمة واتكلم عنه ... لكن اسمحولى أأجل الحكاية دى للحلقة الجاية ...وافضفض شوية الحلقة دى.. لان انتوا سيد العارفين اللى الكتم فى القلب حاجة وحشة ... بتجيب امراض بعيد عن السامعين .

شوف ياسيدى البية :

الفصل فى المدرسة لما بيبقى 50 عيل ... اولياء الامور يصوتوا ومن وراهم الاعلام ووائل الابراشى يولوول ياعالم كثافة الفصول عالية ياعالم .. العيال فوق بعضها ومابيفهموش حاجة ... وارحمينا بقى ياحكومة .

قوم الحكومة زى العبيطة تجرى تلم فلوس من هنا ومن هناك علشان تبنى مدارس وتجيب مهندسين ومقاولين وتبنى هيئة الابنية التعليمية ورشاوى وعمولات وسور بيقع وجهاز مركزى للمحاسابات وليلة يامعلم .

على فكرة مجموعة الدرس الخصوصى مابتقلش عن 80 عيل وبتوصل ساعات ل120 ... ولا اى انهاش من اولياء الامور ولا من الاعلام ولا من الحكومة ذاتها.... عبط ده ولا استعباط ؟

لما مصاريف المدرسة تبقى 60 جنية فى السنه ... اولياء الامور يصوتوا ومن وراهم الاعلام ولميس تولول ... ارحمونا يا عالم ارحمينا بقى ياحكومة احنا لاقيين ناكل علشان ندفع ستيييييين جنية بحالهم .

الحكومة بقى زى العبيطة تقولهم حقكوا علية ... حأعفيكوا من المصاريف السنة دى .

على فكرة العيل فى الدرس بيدفع حد ادنى 60 جنية فى المادة فى الشهر يعنى لو متوسط بياخد 3 مواد يبقى بيدفع 1800 جنية فى السنه دروس  دا غير الشيبسى والكانز والتاكسى ..وولا اى اندهاش من اولياء الامور ولا الاعلام ولا الحكومة ذاتها ..عبط ده ولا استعباط ؟

لما المدرس فى المدرس يضرب الواد البليد بالخرزانه ..تقوم الدنيا واولياء الامور تصوت ومن وراهم الاعلام وعمرواديب اخو عمده ومزته يولول .. ازاى العيل ينضرب فى المدرسة .. فين الحرية والعدالة الاجتماعية .

الحكومة زى العبيطة .. تطلع قرار ممنوع الضرب فى المدارس وتحول المدرس الغلبان للتحقيق وتنقله وظيفة ادارية .

على فكرة المدرس الخصوصى عنده خرزانه لاففها بشكيرتون علشان توجع اكتر وتلسع زياده ... وبيضرب العيال اللى مابيذاكروش ... وولا اى اندهاش من اولياء الامور ولا الاعلام ولا الحكومة ذاتها ... عبط ده ولا استعباط ؟

دا جزء صغير مر من كل اكثر مرارة ... وآه ياشعب ... البلد غلبانه على فكرة ... علشان كده ماينفعش نقول آه يابلد

التعليم فى مصر بين الحلم والكابوس (1)

التعليم فى مصر بين الحلم والكابوس (1)

                             العملية التعليمية

العملية التعليمية إيه غير طالب ومدرس وكتاب مدرسى ومنهج ومدرسة ... وشوية حاجات صغيرة جنب بعض ...

ببساطة كده ... لو الطالب راح المدرسة  المحترمة وسمع شرح الاستاذ المحترم ( المحترم هنا تمشى على الشرح وتمشى على الاستاذ .. كل واحد وشوقه ) ورجع ذاكر المنهج المحترم من كتاب المدرسة المحترم فى رعاية ومتابعة ولى الامر المحترم .... مصر حتبقى اجدع من امريكا.

طاب لما الموضوع بسيط قوى كده ... امال ايه مشكلة التعليم  اللى بقالها خمسين سنه دى ؟!!!!!

المشكلة ان الكل بيتكلم عن المشكلة بس مابيحلهاش ... مش علشان مش عارف يحلها لا سمح الله ... دى حلها اسهل من السهولة مافيش ..

المشكله فى اتحاد المبسوطين ... ايوه المبسوطين ... طول ما العمليه التعليمة ماشية كده الكل ربحان والكل مبسوط ... الطالب مبسوط ... المدرس مبسوط ... المدرسة مبسوطة ... اللى بيحط المنهج مبسوط ... اللى بيطبع الكتوبات مبسوط ... حتى شوية الحاجات اللى جنب بعضها ... هما كمان مبسوطين ...

والى اللقاء فى الحلقة القادمة و .... الطالب المبسوط 

وهم الزمن الجميل

وهم الزمن الجميل

الجيل اللى فات لما كبر فى السن وشعرة ابيض ونفسه بقى على الأد ..وبدا اللى حواليه يستغنوا عن خدماته الجليلة اللى كان بيذلهم بيها ... وبدا يحس انه مالوش دور فى اللى جاى ...لبس وش التقوى والعيب والحرام واللى ميصحش ... وشغل شريط فين ايام زمان ... ايام الاخلاق والمبادىء والقيم ... ايام صلة الرحم ولمه العيلة ... ايام الفن الجميل وقارئة الفنجان ومن اجل عينيك عشقت الهوى ... والافلام اللى كلها عظة وعبر مش الاسفاف والبلطجة ...

قوم تلف الايام والجيل المذلول يكبر وشعرة يبيض ونفسه يبقى على الأد ...واللى حوالية يستغنوا عن خدماته الجليلة .. فهوه كمان يلبس وش التقوى وعيب وحرام ومايصحش ويشغل سى دى ايام الزمن الجميل والعيلة واللمه والفن الجميل بتاع عبد اللطيف التلبانى وايمان البحر درويش .

ننجز بقى ...

الجيل اللى فات ضحك علينا وعيشنا فى احساس كبير بالذنب ان احنا وحشين ... واحنا بنضحك على الجيل الموجود ومعيشينه فى احساس كبير بالذنب انه وحش .

ننجز اكتر ...

مافيش حاجة اسمها الزمن الجميل ... مافيش حاجة اسمها اخلاق وعيلة ولمه وصلة رحم ... الحاجات دى فى خيالنا ... بنتمناها بس ... لكن مابنعملهاش ... الا من رحم ربى طبعا ودول قليلين قوى على فكرة .... لكن الكتار ... بيتكلموا بس .. بيطبطبوا على الجزء اللى فاضل من ادميتهم ويراضوه .. ويشحتوا نظرة الاعجاب بحالة الملائكية اللى متقمصينها ...

طاب والنعمة الشريفة كله كدب ... كله كان صايع ... واللى ماكنش صايع كان نفسه يبقى صايع ... ايوه .. لا كان فيه زمن جميل ولا اخلاق ولا فن محترم ولا دياولو... طول عمرها سرقة ونصب وعوالم والاخ مقاطع اخوه والابن عاق لابوة والبت ممرمطة امها .. كان الفن ..اوعى تكلمنى بابا ماشى ورايا .... لكن لومش ماشى ورايا عادى كلمنى مافيهاش حاجة .. كان فيه ايه الاساتوك ده اللى ماشى يتوك ده .. كان فيه المرأة المجهولة وعباس .. كان فيه نجلاء وميرفت مقضينها مايوهات وبوس .. كان فيه حمام الملاطيلى .. والمذنبون ..

احنا عالم وسخة ... والنعمة عالم وسخة ... ومش حننضف الا لما نعترف ان احنا عالم وسخة ... لكن طول ما احنا بنرمى وساختنا ورا سور الزمن الجميل ولا نرميها على الجيل الجديد اللى هوه وسخ جاهز بفعل تكنلوجيا السلفى ... مش حنشوف خير.. والعبى يامتطلقة ورقتك جات متطبقة .

يارب خد الاخوان والنوشتاء والبرادعى واهم حاجة عماد اديب وموزته .

يارب خلى حمدين... عذابة فى الدنيا اقوى ( انه عايز يبقى رئيس ومايطولهاش ).