فهيم ونعيم وهانى

فهيم ونعيم وهانى

فهيم ونعيم وهانى ... شباب مصرى زى الورد البلدى المفتح فى موسم الربيع ..... فهيم الكبير دبلوم زراعة ... نعيم الوسطانى معهد فنى تجارى .... هانى الصغير ليسانس اداب قسم اجتماع .... الصدفة بس اللى خلتنى اشوفهم واقعد معاهم واكل معاهم واشرب شاى واشد حجر معسل سلوم ....

فهيم ونعيم وهانى واخدين ارض فى الصحرا .... بين الارض وبين بيتهم 350 كيلوا .... مشوار يعنى ...بيروحوا الارض يوم السبت الصبح ... ويروحوا لاهلم يوم الخميس العصر ...

فى الصحرا ماعندهمش تليفزيون وبالتالى ماعندهمش دش ... ولا لاب توب ولا نت ولا فيس بوك ولا تويتر ..... بيقواموا الفجر كل يوم ... يصلوا ويفطروا ويطلعوا على الارض يشغلوا الديزل علشان يطلع ميه يرووا بيها الزرع .... ويفضلوا شغالين لغاية الضهر مايدن .... يصلوا ويتغدوا ويرجعوا يشتغلوا لغاية العصر .... يصلوا ويشربوا الشاى ويرجعوا يشتغلوا فى الارض لغاية المغرب ....يصلوا ويتعشوا ويفضلوا سهرانين لغاية مايصلوا العشا ويناموا .....

اتغديت معاهم ... فول من الارض ... بابا غنوج من بدنجان الارض ... عيش من قمح الارض ... بصل اخضر برضة من الارض ... ارض مصر ... رمل مصر تراب مصر اللى معجون بعرقهم وشقاهم .

بعد الغدا خدونى يفرجونى على الزرع ... كانوا فرحانين وهما بيشرحولى فرحة الاب اللى بيشوف ابنه بيكبر قدام عينية ....فهيم ونعيم وهانى.... زارعين غله وفول وفلفل وبدنجان .... وترمس ...ولما سألت عن الترمس قالوا لى دا لنا بنسلقه ونملحه ونأزأز ...اه نسيت اقول لكوا لقيت بركة كبيرة متبطنه بمشمع وفيها ميه .... سألت ... قالولى :ساعات الديزل بيعطل اوبيبقى فيه ازمه سولار واحنا بنبقى محتاجين ميه ... فلما الديزل بيشتغل نقوم محوشين ميه فى البركة تنفعنا لما نحتاجها للزرع ... استنوا..... استنوا ... شوفوا عبقرية المصرى .... جابوا زريعة (سمك صغير) وحطوة فى البركة وكل يوم يرموله العيش اللى بيفضل منهم ... الزريعه تاكل وتكبر تبقى سمك ياخدوه ويشوه وياكلوه بالهنا والشفا ....

قهيم ونعيم متجوزين وعندهم عيال ... هانى بقى مستنى يبيع محصول السنه دى علشان يتجوز... العروسه موجودة ... قصة حب حلوه من ايام الكليه .... من عندهم من البلد... هانى قالى ادعى لى يا دكتور ربنا يلم شملنا ( يارب ياهانى يسعدك يارب ).

وانا ماشى ( على فكرة ماكنتش عايز امشى ) عطونى هدية من الارض ... بدنجان وفلفل وفول اخضر ..... وترمس علشان أأزأز .

فهيم ونعيم وهانى ... ورونى ان لسه فيه شباب رجاله فى مصر ... شباب عايشين علشان مصر وعلشان يوكلونا .... عايشين علشان مصر واهل مصر .... ومتأكد ...انهم اول شباب حيستشهد لو قامت حرب مع اسرائيل .... مش تقولى فيس بوكك وفيس بوكى وثوار فضائيات ومدونات ....الثوار اللى بجد هما فهيم ونعيم وهانى ... ثوار عايشين علشان مصر مش بيستشهدوا علشان ............ علشان ايه حد يقدر يقولى ؟؟؟!!!

فهيم ونعيم وهانى..... مايفهموش يعنى ايه عصيان مدنى ؟! لكن يفهموا يعنى ايه زرعة تكبروتوكل ومتخليش الايد تتمد لحد ... هيه دى الحرية اللى يفهموها .... مش حرية وضع الصابونه.

على قد مافرحت بيهم على قد مازعلت انى ماعملتش حاجة بجد فى شبابى .... وضيعته اونطة .... قال و زى الاهبل بكمل تضييع عمرى على الفيس بوك .... عيل عبيط بقى تقولوا ايه ؟!!!

ادعولى فى الحرم

ادعولى فى الحرم

الحمد الله ساجدا شاكرا على فضله فى ابتعادى عن الادمان ..... وتخلصى من اثارة ..... اخيرا لغيت الفيس بوك .... ياعم انا عايز اعيش واموت محترم ..... لا عايز اشتم ولا اتشتم .... لا عايز اغتاب ولاعايز نميمة .... والساعتين بتوع الفيس دول انزل فيهم كتاب ولا اقرألى بحث على النت ... وأن كان على مصر .... فلها رب يحميها .... اما انا فرب العيال ...اللى لازم يطلعوا بنى ادمين بيعرفوا يفكروا ويفهموا ويبحثوا قبل مايقرروا .... ودى مسئوليتى اللى ربنا حيحاسبنى عليها ..... فازاى اعلمهم وانا نفسى ناقص علام ....

عموما ادعوا لى . مش بس فى الحرم ... ادعولى انى اتوفق كدة فى مهمتى ... واقدر انقذ نفسى وعيالى من مزبلة الجهل والتخلف اللى احنا عايشينها .................... واخيرا .. تحيا مصر .. رغم عن الحاقدين والجهله والالمنافقين والمرضى النفسسين....... والاهم من البارد عى ...
يوووووووووه .......مش قولت توبت .... هوه مافيش فايدة ؟؟؟؟!

مجلس ادارة النادى الاهلى

مجلس ادارة النادى الاهلى

· من كام سنه كدة طلع واد لعيب فى الاهلى اسمه ابراهيم سعيد .... الواد اللى كان بيصبغ شعرة بنى ده ... الواد لعييب لعيبب يعنى .... الواد كان لسه صغير ....بس الاعلام ماسبهوش ... قعد ينفخ فيه ويسخنه لغايه ما الواد اتفرعن واتنطط على النادى .... قام مجلس ادارة النادى الاهلى طردة .... وقال ما اتخلقش اللى يضغط على النادى .....

السؤال هنا .. هل الاهلى لما طرد ابراهيم سعيد... اتأثر او خسر البطولات؟ .. الاجابة لأ.

السؤال التانى .. حد يسمع عن ابراهيم سعيد دة حاجة دلوقتى ؟

الاجابه ...لأ.

السؤال التالت ... الاعلام اللى كان بيسخن ابراهيم سعيد وينفخ فيه ويعمل له بوسترات بيجيب سيرته دلوقت ؟....

الاجابه لأ. ........ انتهت الاسئله وشكرا .

· وعلشان احنا شعب لا نسمع واذا سمعنا لانفهم واذا فهمنا سرعان ماننسى ... مابنتعلمش .

وعلشان احنا شعب يعشق انتاج الفرعون ... علشان نعيش جو المطحونين والتعبانين ونقعد نمارس هوايتنا فى الشكوى والتنظير ونعمل فى مدونات ونصوصو على التوترات ومايمنعش نشتغل ثوار ونكسب ماديا ومعنويا ونفسيا.... ماهانش علينا نخلص من حسنى مبارك ( بالصدفه) ... فجرينا علشان ننتج فرعون جديد ... المشكله ان المرة دى انتجنا يجى الفين تلتلاف فرعون ... ونفخنا فيهم وسخناهم وطبلنالهم ورقصنالهم ... رغم انهم ماكانوش يحلموا ... مجرد الحلم انهم يبقوا هامان مش فرعون .

· انا بقى دلوقتى اللى بطالب المجلس العسكرى بتسليم السلطه فورا والان الى مجلس ادارة النادى الاهلى ... علشان هوه الوحيد اللى يقدر يمشى البلد دلوقتى (رغم انه فرعون برضه ).... مش قولتلكوا .... احنا مانقدرش نعيش من غير فرعون .... ياعالم دا جين بقاله سبعتلاف سنه ....مش ممكن يختفى فى سنه ولا اتنين ولا عشرة خصوصا لو اللى عايز يخفيه شوية فراعين .

· اخر حاجة .... محدش من ولاد الكلب بتوع الفضائيات ... طلع من لسانه انه يقول على اللى ماتوا فى الماتش ... نحسبهم شهداء ... بلاش يقول شهداء ياسيدى .... لكن يقولك ضحايا.... لكن لو كلب من اللى بيخربوا البلد ويولعوا فى الدنيا بالملوتوف مات .... يطنطن طول الليل ويغنى ويلحن ويقولك شهداء ودم الشهداء ويعمل فيها جيفارا ... لكن تقول ايه ماهواللى بيحكم مصر دلوقت الفضايات بشوية الجهله والمرتزقة والصيع اللى فيها .

وخراب يامصر

أحمد شفيق وصواريخ التورتة

أحمد شفيق وصواريخ التورتة

لما قالو لعصام شرف فى التحرير : انت من الاحرار يا عصام ... ما كدبوش ... بس لما عصام مسك الحكومة...ماعرفش ... مش علشان غير اتجاهاته ومبقاش ثورى ... ولا علشان طيب وغلبان زى مابيقولوا .... لأ .... خالص .... كل الحكاية انه ماعرفش علشان اللى على الشط عوام مش اكتر .

لما قالوا ان سمير رضوان عنده افكار جهنمية ... وبعد ما الراجل مسك وزارة الماليه ... ماعرفش برضة ... مش علشان الراجل وحش ... ولا افكارة مش جهنمية ... لأ ... خالص.... كل الحكاية انه ماعرفش علشان اللى على الشط عوام مش اكتر .

لما قالوا عن حازم الببلاوى انه خبير اقتصادى وكلامه على الفضائيات يدل على انه حيخلى مصر اجدع من امريكا ... وصفقوا وهللوا ... وبرضه لما مسك الوزارة ماعرفش .... مش علشان الراجل وحش ولا علشان ماطلعش خبير اقتصادى ... لأ ... خالص ... كل الحكاية ان اللى على الشط عوام مش اكتر .

اسامه هيكل ... لما كان بيجى مع دينا عبد الرحمن على دريم قبل ماتخسر السبوبة بعد ماعاشت دور الثورية اللى ماشى اليومين دول ... كان بيقول ويعيد ويقترح افكار زى الفل .... وبرضة لما جه الوزارة ماعرفش ....مش علشان الراجل وحش ولا كان بيقول من باب الهلفطة ....لأ ...خالص ... كل الحكاية انه ماعرفش علشان اللى على الشط عوام مش اكتر .

قيس بقى على كل اللى بيهلفطوا ليل نهار على شط الفضائيات والفيس بوك والتويتر ... التويتر بيه لا البرادعى يزعل ولا حاجة ..

دا طبعا غير اهم صفه او بصمه او وصمه للشعب المصرى الفظيع اخر حاجة..... وهيه انه عامل زى صاروخ التورته ... اللى اول ماتولعه يعملك منظر اخر حماده بالجنزبيل ... نجوم واصوات وطشطشه وفجأة وقبل ماحتى تولع الصاروخ اللى جانبه ... ينطفى ولا اكن حاجة كانت موجودة وعامله منظر وطشطشة ... وقيس يامعلم صاروخ المحاكمات .. صاروخ ولاد المخلوع فى طره ... صاروخ دم الشهيد ... صاروخ مياه النيل ... صاروخ الفتنة الطائفية .. صاروخ قطع الودان .. صاروخ مدينة زويل ... صاروخ ممر التنمية ... صاروخ القضاه والمحامين ... صاروخ البطاطس المحمرة ... صاروخ محشى البدنجان ... او البتنجان كما يحلو للبعض تسميته .

وبما ان كل المقدمات تقول انه كل من يحاول ان يعتلى كرسى الحكم فى مصر الان اما رومانسى أو جاهل أو فاسد أوتويترى الفكر .. أو هلفطى النزعة ... أوعنده اهداف اخرى ...وبما ان المقدمات تقول ان خراب العقول والزمم والمبادئ والاتجاهات والادراكات والافكار والقيم قد وصلت الى الحلقوم .

فان النتيجة الحتمية لانقاذ مصر هى اختيار رجل استطاع وسط كل هذا الخراب ان يفعل شيئا جيدا ... شهد له العالم قبل ان يشهد له صواريخ التورته ... النتيجة... هى اختيار رجل يفهم كيف يتعامل مع هذه النوعية من اشباه البشر الخربة عقولهم ونفوسهم .... ولأننى مازلت اراهن على بقايا عقول تريد ان تحافظ على بقايا بلد ليعيش فيها بقايا اجيال قادمة ...فاننى ادعو الى ترشيح الفريق احمد شفيق رئيسا للجمهورية ... ويكفى هلفطه ولكلكه ولت وعجن وانصاف سياسيين وارباع اعلاميين واثمان مثقفين واشياء اخوانية وافرازات علمانية وكائنات اسوانية لايعلم احد حتى الان موطنها الاصلى ...

واخيرا اقرأ هذا الكلام مرة اخرى ... بدون احكام مسبقة ... ولا افكار عبيطة من عينة ان شفيق من النظام السابق وان المخلوع هوه اللى معينه وان معركة الجمل تمت فى عهده ... خليك حيادى وبص للصورة كامله بموضوعية وبعد كده خد قرارك ....

الجمعة, نوفمبر 04, 2011

امسك مناخيرى من فضلك

امسك مناخيرى من فضلك

فاكرين عادل امام فى فيلم نص ساعة جواز لما كان مصدق نفسه وبيقنع اللى حواليه انة ممثل .... وهوه فى الحقيقة دوبلير .... فاكرين الشوط اللى كان بينضرب فيه بدل يوسف شعبان اتعاد كام مرة ... ولا فاكرين مشهد وهما بيغرقوه فى حمام السباحة اتعاد كام مرة والسبب انه مش عارف يغرق كويس .... عادل امام كان مستحمل البهدله علشان كان عنده امل انه يبقى ممثل ويجى عليه يوم ويبوس ويبوس ويبوس .... وفى الاخر لا بقى ممثل ولا باس ... فضل دوبلير ينضرب وبس ...

اهو ده بالظبط اللى بيحصل معانا احنا اهل المحروسة بتوع اليومين دول .... صدقنا نفسنا ان احنا عندنا حضارة ... مع اننا يا اخى ماشركناش فيها... صدقنا اللى بيحشوه فى دماغنا من خمسين سنه... ان مصر عبقرية الزمان والمكان ... ان مصر محروسة من العين ... ان مصر موقع جغرافى فظيع اخر حاجة ...الصحراء الشرقية مانع طبيعى حماها من الاعداء مع ان الاشوريين والفرس احتلونا من الشرق ... والصحراء الغربية مانع ربانى من الاعداء مع ان الليبين احتلونا من الغرب ... والبحر المتوسط مانع طبيعى مع ان الاغريق والرومان احتلونا من الشمال ... واخيرا تضاريس الجنوب مانع طبيعى برضة مع ان الحبشه احتلتنا من الجنوب ...صدق شعب مصر الكدبه بتاعة عبقرية المكان والزمان .... صدق فكرة ان عنده حضارة ...صدق انه حيجيله يوم ويبوس ....مع ان اللى بيحصل من سبنلاف سنه يدل على انه بيتباس .

ياشعب مصر ياقمر ... فوق بقى وبطل تصدق حكاية المحروسة والحضارة والفراعنه وعبقرية المكان وجمال حمدان وان مصر جات فى القران حتحمى مصر ... محدش حيحمى مصر غير اهلها ...

فيا اهل مصر احموا مصر لجل النبى حرام عليكوا مش كدة ....

احموا مصر الا كدة ملهاش معنى غير انكوا شعب بيبوس نفسه ... والحدق يفهم .

اما عجايب والله