الأحد، 11 يوليو 2010

كدة وكدة

كدة وكدة

مصر مافيهاش حاجة بجد .... جملة سمعتها ... ولما فكرت فيها لقيتها صح قوى ... مصر فعلا مافيهاش حاجة بجد ... مافيهاش حاجة بحق وحقيقى ... كله فيها كده وكده ... حكام كده وكده بيعيطوا على الشعب وعلى محدودى الدخل وبيزودوا المرتبات 30% ويغلوا الاسعار 300%...دبلوماسيين كده وكده ...ليل نهار بيغنوا بعبقرية الدبلوماسية المصرية ... ومش عارفين يظبطوا دول حوض النيل ... زراعيين كده وكده ... بيستوردوا اللحمه من دول المجاعة ...والقمح علشان يوفروا الميه لملاعب الجولف ... اقتصاديين كده وكده ... بيزودوا الدخل القومى ...بالضرايب وبيع البلد حته حته فى مزادات هيه كمان كده وكده... ديموقراطيين كده وكده .... هاريين ابونا بتداول السلطه .. وهما قاعدين فى اماكنهم من ايام عبد الوارث عسر وامينه رزق ... شيوخ كده وكده ... بينتصروا لنفسهم ويفتوا فى رضاعة الكبير وبول النبى .... مدرسين كده وكده بيربولنا اجيال كده وكده فى مراكز دروس خصوصية ممنوعه بقانون كده وكده وعاملين لها اعلانات فى الشوارع اكتر من اعلانات الانتخابات اللى هيه كمان كده وكده ..واللى حيجبولنا فيها سيدنا البدوى بعد ماطفوا نور نور ... ومدد ودستتين شمع .. وكله كده وكده ...منظمات حقوق انسان كده وكده ..قال بيدافعوا عن البنى ادمين اللى بيتهانوا فى اقسام البوليس ... ومش واخدين بالهم من الاهانه اللى بنتهانها فى الشارع والمواصلات والزباله والجرى ورا لقمة العيش ...حكومه ذكيه الكترونيه كده وكده ... جرب وقدم طلب وشوف الملف فيه كام ورقة ....اعلام كده وكده بيقول انه بيحب مصر وعلشان كدة بينشر غسيلها الوسخ ليل نهار على العالم ... فن وفنانين كده وكده ...كل ابداعتهم خمرة وقمار ونسوان عريانه وعشوائيات.....طب كده وكده .... علاج كده وكده ... جواز عرفى ... يعنى جواز كده وكده ... خلع ... يعنى طلاق كده وكده ... عيشه كلها كده وكده .........................ويبقى الوضع على ماهو عليه واللى مش عاجبه يروح لمحامى كده وكده ويلجأ للقضاء اللى هوه كمان بقى كده وكده ...... يابلد باعبيطة ...ياهبله

هناك 5 تعليقات:

  1. هههههههههه
    والله عندك حق
    وزيد عليهم كمان تعليم كده وكده
    سنين بتضيع من العمر هدر بدون داعى واخرتها يتخرجوا معاهم شهادة كده وكده يقعدوا بها فى البيت
    او يشتغلوا بها شغلانة كده وكده مش فى تخصصهم
    ولو فى التخصص تبقى برضه كده وكده عشان معدش فيه ضمير
    ده حتى الضمير بقى كده وكده
    والتدوين صحافة كده وكده
    يوووووووو
    انا خايفة اطلع انا كمان كده وكده فى الاخر

    تحياتى وتقديرى

    ردحذف
  2. بس الخلع مش طلاق كده وكده

    ردحذف
  3. تمثلياااااااااااات

    بالظبط الله ينور عليك

    هى كلها بقت كده وكده

    كلها تمثليات سخيفه بتدور من حوالينا واذا كنا اكثر تحديدا وخصوصا للساسيين والاعلاميين

    نقول تمثليات قذره وسخيفه

    ااااااااااااه يا بلد

    ردحذف
  4. في الجون
    المعنى في الجون
    شكلا
    وموضوعا

    ردحذف
  5. يبقى الوضع على ما هو عليه وعلى المتضرر الجوء الى ........
    فى ايه تانى فى حيانتا كلها مش كده وكده
    موضوعك جيد للغايه
    بجد موضوع مش كده وكده

    ردحذف