الأربعاء، 4 أغسطس، 2010

مش عايز اتجوز 2

العروسه الاولى

ام خميس كتر خيرها قالت للحاجة على عروسه ماتتعيبش .....جمال وادب وتعليم وابوها موظف كبير ... ناس طيبين وفى حالهم ... والبت تعيش مش زى البنات بتوع اليومين دول .... امى اقتنعت واقنعت اختى وهما الاتنين اقنعونى ... يوم الخميس وانا راجع من الشغل جبت علبة جاتوه ... ماهو مايصحش ندخل على الناس ايد ورا وايد قدام ...كان ميعادنا الساعة تمانيه ... تمانيه بالدقيقة كنا بنخبط على الباب ... تمانيه وعشرة فتحوا لنا ... طلع واحد شكله كده ابو العروسه ... لابس جلابيه بيضا عليها نقط طبيخ ... باين عليه كان بيتغدى حاجه بدمعه ... طاقيه شبيكة على راسه ... وفى رجليه شبشب حمام من ابو صوبع ... بص لنا بقرف وقال هوة انت العريس ... قولت ان شاء الله ياحاج ... قال بزهق خشوا ... دخلنا ... حطيت علبة الجاتوه على تربيزة الصالون .... الراجل طلع وسابنا ... قولت لأمى شكلها كدة مش نافع ... قالت: يابنى متبقاش متسرع وماتحكمش بالظاهر ... قعدنا ربع ساعة لوحدنا وبعدين دخلت ام العروسه وفى ايدها تلت اطباق فاضيين ... سلمت وفتحت العلبة وحطت فى كل طبق حته جاتوه ... ومن غير شوك ... وقالت اتفضلوا ... ابو العروسه قعد على الكرسى ورفع رجل ونزل رجل ... اختى قالت ياحاج احنا جايين نشوف الانسه الكريمة بنتك لخالد اخويا ...قال : آه ... قالت : اسمحلها تيجى ... قال : آه بس قبل ماتشوفوها نتفق الاول ... قولت : نتفق على ايه يا حاج مش يمكن ماعجبش العروسه ... قال بحدة : آه .. مش مهم نتفق وبعدين تبقى تشوفها ... امى اتدخلت علشان تلطف الجو وقالت : ومالوا ياحاج طلباتك ايه؟ .... قال : آه ... شوفوا بقى .. انا صارف على البت دى دم قلبى ... آه ... علام واكل وشرب ولبس ... آه ... سبعه وعشرين سنه وانا بصرف ...آه يعنى مصروف عليها تقلها فلوس ... آه .. وبعدين انت ولا مؤخذة واخد واحدة موظفة ... يعنى بتدخل فلوس كمان ... أه .. دى بتقبض متين واربعين جنيه ...آه ... ماهى مدرسه بالحصه ... آه .. ولعلمك هيه بتساعد فى مصروف البيت ... آه ...امال حكفى اخواتها منين ...آه ... وعلشان نبقى على نور ... حتفضل تساعد فى مصروف البيت حتى بعد الجواز ...آه ... قولت : بس ياحاج انا ربنا كارمنى ومش عايز مراتى تشتغل ... قال : آه .. وماله ... حقك ... بس انت تدفع المتين جنيه ... آه .. امى تدخلت وقالت : ياحاج انت مش ملاحظ ان الكلام ده بدرى عليه ؟! ... مش الولاد يشوفوا بعض الاول ... الراجل نزل رجله من على الكرسى وقال : آه .. ومالوا ... بس توافقوا على الشروط الاول ...آه وياكده يابلاش ... انا بقى ماقدرتش استحمل ... وقفت وقولت : آه ... يبقى بلاش ياحاج .. يالا ياماما ... واحنا على السلم امى قالت ليه باستعطاف : والله ام خميس قالت غيركده خالص ... بس لما اشوفك يا ام خميس ...

والى اللقاء مع العروسه الثانيه.....

هناك 6 تعليقات:

  1. الحكايه هاتحلو ولا ايه ... أه

    ردحذف
  2. كان لازم قبل ما يمشي يأخذ كارتونة الجاتوه لزوم العروسة التانية ولا هي مصاريف على الفاضي هههه

    ردحذف
  3. شكلها كدا والله اعلم:)
    بسلما تحكي علي التانيه

    ردحذف
  4. لاء، أم خميس واضح إنها ما تعرفش خميس من جمعة..

    أنا اللي مزعلني في الموضوع علبة الجاتوه، آه.. :)

    دمت بـود.. :)

    ردحذف
  5. ههههههههه

    موقف فظيع .... آه

    بس برافو عليك اخدت القرار في ساعتها .... آه

    الظاهر اتعدينا من الراجل

    سأتابع باقي العرايس

    وان شاء الله تلاقي بنت الحلال

    ردحذف