الجمعة، 9 سبتمبر، 2011

ماتحلموش باكتر من كدة

ماتحلموش باكتر من كدة

وعلشان ماسورة مرشحين الرئاسة ضربت فى مصر وغرقت الدنيا .... وعلشان كلنا بقينا بنفهم فى الاقتصاد والعلوم السياسية ... وعلشان كلنا بنحب مصر ... او بنحب السبوبة اللى بتيجى من ورا مصر ... قررت انى ارشح نفسى رئيسا لجمهورية مصر المليونية ... اينعم انا مش حأنزل الانتخابات ولا اعلق يفط بالبروفيل ... ولا حأطلع مع يسرى فودة وريم ماجد فى الاون تى فى .... لكن حأرشح نفسى مع نفسى ...... واحلف اليمين قدامى ... وأول يوم رئاسة الصبح ... ادخل مكتبى واخد اول قرار ... قرار جمهورى رقم (1) لسنة 2011 ... الغاء معاهدة السلام مع اسرائيل ... واعلان الحرب عليها .... تتتا تا ... هيييه ... تصفيق حاد ... الموضوع سهل ياجماعة خالص ... دا احنا جامدين جدا ... ومافيش تماسك احسن من كدة فى الجبهة الداخلية ... لا اخوان ماسكين فى دقون السلفيين ... ولا صوفيين عايزين يكتفوا الجماعة بشريط الستان الاخضر .... ولا عندنا ليبراليين بيشدوا فى شعر الاشتراكيين ....ولافية فلول ولا بلطجية بسيوف ولا بلطجية فضائيات ...ولا كل عشرتنفار عاملين اختلاف .... ومدارسنا اخر نظام وعلام وتربية ...ومستشفياتنا مافيهاش صراصير ولا عيانين نايمين فى الطرقة وعمالنا شغالين الاربعة وعشرين ساعة ( على باب المصنع ..مش على المكن لتفهمنى صح ولا حاجة )... ومعندناش عشوائيات ولا ناس بتبيع عيالها قبل ماتبيع كلاويها علشان تاكل ... ولا بنستورد فوانيس رمضان ولاحجارتها ...ولا بنشحت رغيف العيش ... ولا بنشحت حباية الدوا وحقنة الانسولين.... ولا بنشحت حتة السلاح ... ولا حد بيعايرنا بمعونة ... ولا الكلام دة خالص ...كله تمام .. ايه بقى مايخليناش نحارب اسرائيل ونديها بالجزمة ونحرر فلسطين ... طبعا حتقولوا لى النظام السابق هوة السبب ... ماشى هوه ابن ستين كلب جزمة .... بس ايه علاقتة بالممرضة اللى قاعدة فى الطرقة تحب فى التليفون ... وسايبة العيان لغاية ما ازازة المحلول خلصت ودخل له هوا ... ايه علاقة النظام السابق ( اللى هوة ابن ستين كلب ) باننا نرمى الزبالة من البلكونة .... ايه علاقة النظام السابق ( ابن ستين كلب ) بان الموظف يعطل حال المواطن ...

مفارقة غريبة قوى : اللى نزل العلم من على سفارة اسرائيل اسمه ( الشحات) .... رمز دة ولا ايه ؟.... ماهو طول مالشحات بيشحت ... ويفضل طول عمرة شحات ... يبقى اخرة حينزل العلم... ومتحلموش باكتر من كدة

هناك 3 تعليقات:

  1. بالتوفيق في حملة الترشيح الرئاسية ..

    ردحذف
  2. وهج البنفسج:
    اعتبر دة وعد ... حتدينى صوتك يعنى ....

    ردحذف
  3. لا طبعا انا مش هرشحك عايز تلغي معاهدة السلام علشان نقوم الصبح نلاقي سفينتين في البحر المتوسط عليها طيرات الناتو اللي من غير طيار طبعا علشان ميمتلهمش حد عماله تضرب في كل حتة فيكي يا مصر وسلملي علي أبطال الاعلام لا الافعال

    ردحذف