إختفاء عم عشم فى ظروف غامضة

إختفاء عم عشم فى ظروف غامضة

عم عشم اختفى من كام يوم ومحدش عارف هوه راح فين ... ناس بتقول ان عبده موته غزه بسكينه جاب اجله .... وناس بتقول دا اتحرق فى العمارة بتاعة الارهابيين اللى فى مدينة نصر ... وناس بتقول كان مهاجر لليونان والسفينة غرقت بيه ...فى الحقيقة محدش عارف الحقيقة ...اهو كله كلام ...المهم عندى ان عم عشم غار فى ستين داهية الهى لايرجعة قادر يا كريم ...

الجميل بقى ان من ساعة ما عم عشم اختفى والدنيا بدأت تزهزه ...وبدأت حلول للمشاكل اليومية تظهر فى الافق ...وبدأنا رحلة طز ذات الالف ميل ... ايوه طز .. طز فى الاخوان والسلفيين ... طز فى العيوطة ومرشدى ... طز فى الاشتراكيين والليبراليين ... طز فى 6ابريل والبرادعى ... طز فى الفضائيات وميدان التحرير .... وحنعيش يعنى حنعيش ومش حنسلم ونطاطى ونجرى ونتعشم فى ولاد الكلب مشتهيين السلطة .... وعليه تقرر ماهوه اّت :

                          

                        انشاء جمعية طز فيكى ياحكومة

عم عشم ومتلازمة استنى

عم عشم ومتلازمة استنى

عم عشم كائن هلامى لزج ... يعيش فى الاتموسفير المصرى منذ قديم الأزل ... يوجد فى طين مصر ونيل مصر وهوا مصر ومجارى مصر ...ولأن عم عشم كائن هلامى لزج فالكثيرون لا يشعرون به .... وان كان يصيب الاغلبية المصرية بما يسمى متلازمة استنى.

وفى دراسة منأنية للفترة من نهاية السبعينات الى الان .... وجد ان عم عشم لايفنى ولايستحدث من عدم ...كما ان له قدرة عالية على اعادة تصنيع ذاته (ريسيكلنج).... فنجد ان احمد زى الاسطى احمد ...زى الحاج احمد ...زى المقدس احمد .... وابو دقن... زى ابو من غير دقن.. زى ابو كانيش وحظاظة ... كله لوك لوك ... لوك لوك ...ومصلحة شعب مافيش ... ناس نفسها تعيش بكرامة ... مافيش .

فى نهاية السبعينات قال عم عشم  ان سنه 81 سنه الخروج من عنق الزجاجة والرخاء ...وفى التسعينات قال : اصبروا فالارهاب سبب الوباء ...والان قال : الربا والهام شاهين سبب البلاء ... وينتشرعم عشم.. ويستنى الشعب... ويستنى ويستنى .

اما عن اعراض متلازمة استنى فهى ظاهرة لمن فى وجهة بصر ومن فى قلبه بصيرة ومنها :

·       ضياع براءة الاطفال

·       يأس الشباب

·       عنوسة البنات

·       ضياع السيكو سيكو عند الرجال

·       بهدلة ومرمطة العواجيز

·       ظهور عائلة السبكى للانتاج الفنى

·       ظهور ثقافة التوكتوك .. وعيش نمله تاكل سكر

·       ظهور دعاة اسلاميين يسبون ويشخرون ويقولون أحا .

سيناريو صلاة العيد الكبير

سيناريو صلاة العيد الكبير

الاول كل سنة وانتوا طيبين وعيد اضحى سعيد عليكوا .

نبدأ بقى السيناريو:

·      60تشكيل امن مركزى بشراباتهم الجديدة علشان الريحة... لتأمين الفسحاية ... عربية مكشوفة عليها بلالين اسلامى يركبها عمدة العياط ...

·      بانوراما على العمدة وهو يرتدى الجلابية البيضة صنع فى الصين اللى جاياله هدية من السعودية .

·      يصل العمدة الى الفسحاية... يفرشوله السجادة الخضرا المصنوعة فى الصين وجاياله هدية من تركيا ... علشان يصلى عليها ... اصله من النوع اللى بيقرف.

·      تركز الكاميرا على العمدة وهوه بيكبر ويهلل.

·      يصلى العمدة العيد ويجلس ليسمع الخطبة الاولى ... ايوة الاولى ماهوه حيلقى الخطبة التانية .... ماهو اللى ماتعرفهوش ان الخطبة فى الجمعة والعيد بقت خطبتين دلوقت ... الاولى يقولها الامام والتانية يقولها العمدة ... دين جديد بقى .

·      تبدأ الخطبة بالترغيب ... عن الحب والاحضان... والجيش اجدع من ابويا ...ومش حيغمض له عين الا لما يحقق اهداف الثورة ... ثم يختم بالترهيب ... اتقوا شر الحليم اذا غضب ... والناس الوحشة اللى بتحاول تدمر مصر حنديها بالجزمة .

·      بعد الخطبه ... يجيبوله العجل والسكينه .. يمسك السكينه ويرفعها لاعلى ويوريها للجمهور (يقلد الاخ بوحه )..والجمهور يهلل ويكبر

·        يسمى ويدبح العجل ... صوت المذيع يصف خطوات الدبح بالتفصيل ... ويشرح مهارة العمدة فى استخدام السكينه والسيطرة على  العجل ... انه عمدة من طين مصر .

·      بعد الدبح والسلخ ... يوزع العمدة الزمامير والنضارات اللى بمناخير وشنب على الجالية المصرية فى مصر .... اما لحمة العجل فيوزعها تلت على اخوانا فى غزة وسوريا ... وتلت لاصدقائنا فى قطر وتركيا ... وتلت لاعضاء الخيبة والندامة .

·      العمدة يركب العربية المكشوفة ويروح بيته علشان يحضر لخطبة الجمعة الجاية ... يانهار اسود ... دا العيد دة يوم جمعة ... يعنى حنسمع اربع خطب ... يانهار اسود ... يعنى طقمين شربات لعساكر الامن المركزى ... لطفك يارب .

·      تبدا برامج التوك شو والصحف الخاصة والتويتر والفيس فى اللطم والولوله ولا حياة لمن تنادى .

·      كل سنه وانت طيبة يامصر وبعوده الايام ... والهى وانت جاهى فى دى الايام المفترجة يجيله البعيد التهاب فى احباله الصوتية قادر يا كريم .

كل شيله يشبهله (بعد رساله الغرام )

الهولوكوست و أمن الدولة

اليهود اقلية ... الاخوان أقلية ...

اليهود يكذبون .... الاخوان يكذبون ...

اليهود معاهم فلوس كتير ... الاخوان معاهم فلوس كتير .....

اليهود عندهم كتاب حكماء صهيون ... الاخوان عندهم الوصايا العشربتاعة حسن البنا ...

اليهود كان عندهم بنجوريون ... الاخوان كان عندهم سيد قطب ...

اليهود شعب الله المختار ... الاخوان فصيل الله المختار ...

اليهود عندهم الغاية تبرر الوسيلة ... الاخوان عندهم الغاية تبرر الوسيلة ...

اليهود عندهم جناح عسكرى ... الاخوان عندهم جناح عسكرى ...

اليهود عندهم نظرية الاغتيالات.. الاخوان عنهم نظرية الاغتيالات.

اليهود عندهم فزاعة الهولوكوست... الاخوان عندهم فزاعة أمن الدولة....

اليهود يبكون على حائط المبكى ... الاخوان يبكون على حائط امن الدوله ..

اليهود بيتفقوا مع امريكا ... الاخوان بيتفقوا مع امريكا ...

اليهود يعملوا فى صمت ... الاخوان يعملوا فى صمت ....

اليهود عايزين يملكوا العالم ... الاخوان عايزين يملكوا العالم ...

اليهود بيقولوا احنا صح باسم الدين .. الاخوان بيقولوا احنا صح باسم الدين .

الشعب المصرى كسر اليهود سنة 73 ... الشعب المصرى حيكسر الاخوان سنة .... ؟؟؟؟

ملحوظة : الملك فاروق" ليبرالية ".... جمال عبد الناصر " اشتراكية " ... انور السادات " انفتاحية " ... حسنى مبارك " مهلبية " .... زى مانتوا شايفين مافيش واحد فيهم زى التانى ... ورغمن عن كدة ما اتفقوش غير على حاجة واحدة بس ... هيه انهم هما الاربعه كانوا ضد الاخوان ... ياترى ليه ... هه ... ليه صحيح ؟!!

ثورة أغبياء أم غباء ثورة

ثورة أغبياء أم غباء ثورة

الاوله  : حسنى غبى ماطلعش للشعب فى الوقت المناسب وشال الوزارة وحل مجلس الشعب ..... فأنخلع.

الثانية  : اتباع اغبياء حبوا ينشوا الدبانه من على راس حسنى فخبطوة بطوبة وعملوا موقعة الجمل فدخلوا السجن .

الثالثة : مجلس اعلى للقوات المسلحة غبى ... افتكر انه لما يراضى الكل ويدى حتة زيادة للاخوان انه بكده حيعدى بالبلد ... فاتشتم على الهوا مباشرة وبدون فواصل .

الرابعة : شهداء اغبياء ... ضحوا بنفسهم علشان المرتزقة والمراوغين والكدابين ولابسى الحظاظات يعملوا السبوبة الكبيرة ويحبوا ويتجوزوا .... حسبنا انهم فى الجنة .

الخامسة : ثوار اغبياء ماصدقوش اللى هما فيه ( ماهى مفاجأة انها تتقلب ثورة ) وانقلبوا على بعض ... وشاى الفضائيات اللى بالياسمين ... لف عقولهم ومحدش يقولى رومانسية شباب ثائر ... زمن الرومانسية ولى يامعلم .

السادسة :فلاحين اغبياء بنوا على الارض الزراعية اللى بياكلوا منها ... ولاباعوا ولا سكنوا وعليهم ديون للمقاول غير ديون بنك التسليف ... وبيزرعوا الدره فى قصريات على السطح دلوقت .

السابعة :اخوان متأسلمين اغبياء ... طمعهم وغبائهم عماهم وحبوا يكوشوا على كل حاجة ... فضاع منهم كل حاجة ... واوعى تقولى خدوا الرئاسة  ... جمال عبد الناصر كان اجدع منه واتعزل عن البلد ... وحسنى كمان ... واوعى تفكر انه حيقدر يكون السادات ... عنوان الجواب بيقول ان  اخره ... اخره اخره يعنى نبطشى فرح كداب ولا جمعية نلم بيها تمن التكتك .

التامنه : مجلس شعب غبى ... قعد يدن ويمص فى هولز ويعمل عمليات تجميل ويحارب الجنزورى ... فالناس زرغتت ووزعت شربات لما اتحل .

التاسعة : مرشحى رئاسة اغبياء  ... محدثين رئاسة ... بعد ما اقنعوا الشعب الاهطل انهم ثوار .. (كان فاضل يقولوا انهم شهدا ) مااتفقوش على واحد فخدوا الشلوط المتين اللى جه فى العصعص عدل .

العاشرة : شعب غبى ... قال لالالالا ... ده ضل مبارك ... مش عايزة ... قام مختار مبارك اهطل وعيوطة وبدقن وجاموسة ضاحكة .

الحادية عشر : فريق غبى ... فارس فى زمن الصعاليك ... حارب خفافيش الظلام بسيف العقل والحكمة ... كان عليك بايه ياسيادة الفريق ... ياعمى روح للى يقدرك ويعرف قيمتك ...( انا معاك فى الحزب لو عملته ... ما انا كمان غبى )

الثانية عشر : انا غبى لانى متأكد وعارف وواعى وقارى وشايف ومستوعب كويس قوى ان مصر مش حيتصلح حالها ابدا ... بس برضه لسه عندى امل ... غبى بقى تقول ايه !

الثالثة عشر : اوعى تفتكر ان ماسورة الغباء خلاص صفت اللى عندها ... لايا حبى لا ... دا خرم صغير  لسه ماوصلناش للبكابورت الكبير .

الرابعة عشر : كلنا اغبياء والثورة بريئة مننا ... انها ثورة الاغبياء وليست غباء ثورة .

الخامسة عشر والاخيرة : لما بأشوف العيوطة وام محمد ( والله ماسخريه من الاشكال .. عسى ان يكونوا خيرا منى ) لما باشوفهم ... بافتكر الطبلية والفول النابت ومخلل اللارنج والزير ... بافتكر العرقسوس والسوبيا ونبوت الغفير وشخة فريال ... بافتكر الكانون والحطب وقرص الجلة اللى كان  ممكن اتنين يموتوا  بعض علشانه .. بافتكر تليفون العمدة وشيخ البلد والسلاحليك وحرامية البهايم ... بافتكر ادعوله ادعوله ودفتر الصحة بتاعنا والتواريخ فى ادينا .... وبخاف .... اخاف لمصر ترجع 100سنه ورا وتستخدم الجمل فى المواصلات ... وتبقى ثورة بدأت بموقعة الجمل ... وانتهت باستخدام الجمل كوسيلة مواصلات .....

 خسارة يامصر ... والنعمة الشريفة كنت حلوه.

اتنشرت فى 26/6/2012

صرفيه شربات لجل عيون العفريت

صرفيه شربات لجل عيون العفريت 

العفريت اللى على الحاج منجه اسمه ميكروفون ... مايصدق يلاقى لمة الا ويقف يخطب ويهرتل ويهلفط .... ومايهرتلش ليه ومايهلفطش ليه مادام بيلاقى اللى بيصقف له ويقول هيييييييه.
الحاج منجة بيسافر كل اسبوع علشان يصلى الجمعة فى حته .... دا طبعا على اساس ان كل خطوة يخطيها فى طريقة  للجامع ... واحده بتذود حسنه والتانية بتحط عنه خطيئة ... ماشى يا حاج ربنا يزود حسناتك ويحط من خطاياك ...بس مش على حساب ابونا ... واذا كان منهجك فى التفكير العلمى فاكر انك مابتكلفناش حاجة وان الغلابة اللى حواليك بيقوموا بوظيفتهم اللى بياخدوا عليها مرتب ... فافكر جنابك ان مشوار الصلاة مش مجرد عساكر غلابة بتلبسهم مدنى وتقعدهم فى الصفوف اللى وراك .... خدوا دى ... الحاج منجة لما بيصلى بيقعد وراه العساكر الشقيانة الغلبانة ... بس بيلبسهم ملكى ... وعلشان العسكرى الغلبان طول النهار لابس البيادة فريحة شراب امه بتبقى منتنه ... قوم الحاج منجة اشتكى من ريحة الشربات اللى بتبقى ملية الجامع ... قوم تقرر انه يتم صرف صرفيه شربات بيضا جديدة بكيسها كل اسبوع للعساكر اللى لابسة ملكى وقاعدة فى الصفوف اللى ورا الحاج فى الجامع ... هيه الشربات اللى بتتصرف كل اسبوع دى مش بفلوس ياحاج مانجة ولا انا متهيألى ... ...بلاش الشربات بنزيم ام الطيارة اللى انت رايح جاى بيها دى بفلوس ولا انا متهيألى .... بلاش ام الغدا  اللى انت بتطفحه انت والجرمأ اللى معاك .. الغدا ده مش بفلوس ولا انا متهيألى .... وقف حال البلد اللى امها داعيه عليها ... وحظها النحس خلاك تختارها علشان تصلى فيها... دى مش فلوس ضايعة برضة ولا انا متهيألى ... وبعدين ربنا قال اذا ماقضيت صلاة الجمعة اسعوا فى الارض ... يعنى اشتغلوا ... مقالش بعد صلاة الجمعة اخطبوا فى الناس ... واذا كان العفريت اللى راكبك اسمه ميكروفون ... نجيبولك ميكرفون واقعد اخطب زى ما انت عايز فى الحمام ... لان صوت اهلك وحش ... وكلامك عبيط ...ونصيحة من واحد بيكرهك عمى :ان كان لغاية دلوقت ربنا بيسترها معاك وسميرة سعيد وهانى شاكر وحلمى بكر مابيدسوش على الزرار الاحمر ... فمش كل مرة تسلم الجرة ...   
ملحوظة:
 الحاج منجة علشان يراضى العفريت ميكروفون ويصرفة...  بيحرسة 60 تشكيل  والتشكيل 3عربيات والعربية فيها 25 عسكرى و2ظباط و2 امين شرطة ... شوفوا بقى يتكلفوا بكام شربات على حساب ابونا ... وكله علشان نصرف العفريت ميكرفون....
ملحوظة 2 :
 يالا ياشعب ورينا شطارتك ...مش انت اللى حضرت العفريت ... اصرفه بقى لو تقدر ياجميل

نبطشى بعد الضهر

خطاب الرئيس مرسي في الاستاد

دوس وشوف ماذا جناه علينا ابائنا وما جنيناه على ابنائنا

جاهل بدرجة دكتوراة

جاهل بدرجة دكتوراة

الجاهل مش هوه اللى مابيعرفش يقرأ ويكتب ..الجاهل هوه اللى بيبقى عنده مشكله فى ادراك اللى حواليه ... والجهل الاكبر ...لما يدرك اللى حوالية بالعكس .... فتلاقية بيغلط فى تصرفاتة وقراراته ... والغلط يجيب غلط ... لغاية مايودى نفسه هوه ومريدية ومعارضية بالقلب  فى ستين داهية ...

ومع الاسف ومع الالم ...جهال العصر جهال بدرجة دكتوراه من نورث كارولينا ... ونورث كارولينا حته فى امريكا فيها جامعة ... اللى معاة 30 الف دولار جايبهم من الحاج او من الجماعة يقدر ياخد بيهم دكتوراه ويرجع للمحروسة علشان تلقفة الفضائيات وتستثمر فيه .... تسلكنه ( من السليكون ) وتشفطة وتنفخه وتقشرة وتصنع منه نجم نخبوى .... وتعلى عليه الاسبوت وتنور النور وتلغوش وتشوشر وهما حلقتين يا معلم ويبقى فى نظر الناس والمصيبه الاكبر فى نظر نفسه ... قائد التنوير والتقدم ومحارب الفساد المغوار  وسبارتكوس العصر الحديث... رغم انه كان بيحصحص من امن الدولة ايام الكحرته ... وكله من اجل زينة الحياه الدنيا وحب النفس وطز فيكى يامصر وطزين فيك يا شعب .

ولان اكثر الناس لا يعلمون فالطبيعى انهم لا يعقلون ايه اللى بيحصل حواليهم وليهم .... فالعقول الكسلانه التعبانة المرضانه اللى مابتفكرش ولا تعقلش بتحب دايما الصور الملونه الملعلة الجاهزة ... ومش بس بتحبها ..لا ... دى بتسجدلها وتقدسها وتضحى بروحها وماتصدقش ابدا ان فيه واحد معاه دكتوراة ممكن يكون جاهل او ضال اوعندة مشكله نفسيه تؤرقة ومبتنيمهوش الليل .... ولما تقوله كده يبص لك من فوق لتحت بقرف ويقولك وهوه بيرجع عليك : دا معاه دكتوراة من امريكااااااااااا.

دا على اساس ان امريكا بيوحى لها .... لكن حتستنى ايه من جاهل يقود جهال ...غير ان الاعلانات تزيد ... عليه العوض ومنه العوض .

تاريخ الدولة العياطية فى مصر

تاريخ الدولة العياطية فى مصر

v  الملك عى ـ اط ـ رع موحد القطرين ...مؤسس مدينة منف ... وطرد الهكسوس وقائد معركة قادش ... اول من استخدم العجلات الحربية ... بنى الاهرام الثلاثة وابو الهول وهرم سقارة المدرج ومعبد فيله وطريق الكباش ... وصلت فى عهدة التجارة الى بلاد بونت (الصومال حاليا ).

v  امير المؤمنين عياط بن العاص ... فتح مصر واقام مسجد عياط بن العاص واقر فيها السلام والامان وادخل فيها الاسلام واحسن معاملة المسيحيين .

v  السلطان عياط الايوبى .. موحد العرب وقاهر الصليبيين فى موقعة حطين ومعالج الملك ريتشاد الذى كان يأكل خروفين على العشاء لما انضرب بسهم عربى مسموم ... وبعض المؤرخين يؤكد انه تزوج فيرجينيا عرفى .

v  السلطان ركن الدين عياط البندقدارى ...وكان من المماليك البحرية ...اشترك مع سيف الدين قطز وجهاد وسلامة فى الحرب ضد التتار فى موقعة عين جالوت ورمى عليهم الحجارة من فوق الجبل وكسر دماغتهم .

v  السلطان عياط الاول ... عمل حريم السلطان الجزء الاول والتانى ... وخلى سنبل سنبل ... وقام بترحيل الصناع المهرة الى الاستانة .. وانشأ الكتاتيب .

v  محمد على عياط الكبير ... تخلص من بقايا المماليك ودبر لهم مكيدة وقتلهم فى القلعة ... وتفرغ بعدها لادارة مصر وانشأ مدرسة الالسن ومدرسة الطب ومدرسة الهندسة وانشأ اكبر ترسانه بحرية وكان الاسطول المصرى فى عهدة من اقوى الاساطيل البحرية .

v  عياط عبد الناصر ... كان احد الضباط الاحرار اللى قاموا بثورة 23 يوليو ... بنى السد العالى وامم قناة السويس وبنى جميع مصانع النصر اللى فى العالم... ومالهوش دعوة  بنكسة 67 .. المشير كان السبب.

v  عياط انور السادات ... قام بحرب اكتوبر ... الحرب الوحيدةاللى انتصرنا فيها فى العصر الحديث ... قال ومستكترينها علينا ... كما قام بمعاهدة السلام ورفض  ان يعدلها .

v  عياط حسنى مبارك .. قائد الضربة الجوية ... وصاحب اطول فترة رئاسية فى التاريخ المصرى .

v  واخيرا ... عياط بذات نفسه .... ومن انجازاته ... انه شال 600 طن زباله ومسك 5000 حرامى وخد رخص 4000سواق ...  كما انه احسن واحد يربى طيور وخاصة الحمام ... وصاحب اطول نفه واطول خطبة جمعة فى الاستاد .... ومن اهم انجازاتة انه لف العالم فى ميت يوم ... وانه الوحيد اللى كلف (بضم الكاف وكسر اللام ) بصلاة الفجر .

حفيد الشيخ سلامة حجازى

حفيد الشيخ سلامة حجازى

الخيبة الرمضانية أو الخيمة الرمضانية زى مابيسموها دلوقت .... مابتبقاش خيمة الا لو كان فيها تخت شرقى علشان يرجعنا لزمان وليالى زمان ... وبما اننا فى زمان الرجوع لزمان .... فالتخت الشرقى اعيد انتاجه بس بدال مايتعمل على مسرح ولا فى الاوبرا ... بقى بيتعمل فى الاستاد ... اهو بدل ماهو موقوف حاله ...

والتخت فى الاصل كلمة فارسية معناها المكان الذى يتوسط المجلس ... والتخت الشرقى بيتكون من مطرب عنده قدرات خاصة فى سلطنة وامتاع المستمعين .... وبيكون ورا المطرب 5 عازفين لالات شرقى ... القانون والعود والطبلة والرق والناى والكمنجة وان كانت الكمنجة مش اله شرقى بس حطوها علشان بتعرف تعزف الربع تون ... ومحدش يسألنى يعنى ايه الربع تون ؟ لانى انا نفسى من زمان حد يعرفهولى ....

وعازف القانون هوه اهم واحد فى العازفين ولازم يكون موجود حتى لو مارجعش العربية اوكان غير شرعى ..

الاهم بقى من  المطرب والعازفين ... مجموعة البطانة ... والبطانة هى مجموعة من انصاف المواهب الغنائية ...تقف خلف المطرب وتردد مايقوله لمساعدته فى سلطنة الجمهور ... لغاية كدة وكله تمام يامعلم.

الاهم بقى السييطة ... والسييطة دول بيقعدوا بين الجمهور ... وفى حالتنا دلوقت بيبقوا هما كل  الجمهور ... دور السييطة ان كل ما المطرب يقول يا فاسدين الناس مالكوا ومال الناس .... يهللو... ويصقفوا ... فيسخنوا الجمهور الاهطل ... فيهلل هوه كمان ويصقف حتى لو الاغنية وحشة .

الاغنية اللى اتغنت النهاردة كان فيها مجهود واضح .... مكتوبة حلو والمطرب كان عايش الدور واللحن كان بيتعزف صح والبطانة قايمة بواجبها والسييطة فوق الفظيع .

 بس خسارة ... لسه فيه جمهور ودنة حلوه بيعرف الحلو من الوحش ....واذا كان حفيد سلامة حجازى فاكر ان بشوية الالترس اللى لمهم حيضحك علينا ... يبقى انت بتحلم ياشيخ .

سؤال للتفكير :السياحة زادت بنسبة 11% الشهر دة بالمقارنه بالسنه اللى فاتت فى ذات نفس الشهر .... 11%رقم ضخم .... بس السؤال بقى : هوه السنه اللى فاتت كان فيه سياحة من اصله؟

سؤال للتكفير : لو واحد سأل هيه صلاة الجمعة بتتكلف كام ؟ بيقى كافر وابن كلب ومايعرفش يعنى ايه صلاة الفجر ؟؟!!!

ملحوظة : من اشهر مغنيين التخت فى مصر ... الشيخ سلامة حجازى ...والشيخ زكريا احمد ... والشيخ سيد درويش ... والشيخ ابوالعلا محمد اللى اكتشف ام كلثوم ....الحاجة الغريبة بقى.... ان شيوخ مصر بتغنى علينا من زماااااااااان

الاسلام هوه الحل

الاسلام هوه الحل

فاكرين الشعار دة ... الا هوه فين دلوقت ؟!! ... محدش بيسمع عنه حاجة ....اوعوا تكونوا فاكرين انهم كانوا بيقصدوا ان الاسلام هوه الاسلام الدين وسيدنا محمد والقران والرساله وكدهوه ... لا خالص .. احنا بس اللى كنا فاهمين غلط او كنا عاملين ان احنا فاهمين صح .... هما كان قصدهم بالاسلام ان احنا نسلم لهم او نستسلم لهم ...وبما اننا فهمنا قصدهم... ايه رأيكوا نيجى على نفسنا حبتين ونعمل لهم اللى هما عايزينه ونبطل لهم حجتهم ... يعنى مش حنتعب كتير ... كلها حاجات بسيطة ... كل الحكاية ان احنا حنبطل نشرب خمرة ... ومانلبسش مايوهات تانى ... ونربى دقونا .. ونلبس نسوانا الحجاب ولو عايزين النقاب ماشى ... ومانتفرجش الا على قناة مصر 25 ... دول طوروها خالص وغيروا اللوجو ...ومانعملش اعتصامات ولامظاهرات ونقعد فى البيت ... ونلم زبالتنا... ونقفل التكيف ... ونلبس قطونيل او بفتة ارخص... ومانشربش كتير ... وحكاية الحمام دى بلاش منها ... ونعمل حسينيه قصدى اخوانيه ونلطم ونضرب نفسنا بالسكاكين... عقاب لنفسنا ان احنا سيبناهم يتعذبوا ايام المخلوع ... وندى قناة السويس لقطر ... وسينا للفلسطينين ...  ونبعت الجيش المصرى فى نزهة عسكريه لتحرير .....سوريا ... حد جاب سيرة القدس ... انتوا حتتبلوا عليه ولا ايه ؟ ... ونحضر للكبير كل خطب الجمعة ... ونحضر للكبير قوى حديث التلات ... ونحلف قدامة قسم الولاء ... ونبوس ايدة ... ونوافق على القرض ابو مصاريف ادارية ... ونفرض على نفسنا ضرايب ... وانا موامفق على ضريبة عيش اللحظة بتاعة ستيته ... ولو انها مش حتجيب فلوس كتير قوى ... ماهو ماعدناش زى الاول ... الا اذا عملناها على البوس ... كدة تلم معاهم ... ومعلش نيجى على نفسنا حبتين كمان ومافيش مانع يعنى نعدل له البنطلون ... ونمسكله المنديل ولا نسيبة ينف على ابونا عادى يعنى ...

 اه ... اهم حاجة ... اهم حاجة ... نشتم شفيق ...

ايه رايكوا؟ ... كدة نبطل له حجته ... ونديله فرصته واللى مايحصلش فى ميت يوم يحصل فى الف يوم ... الدنيا ماطارتش ...احنا بس اللى شعب مستعجل ... مش مقدر النعمة اللى بقت فى ايدة ... جاتنا نيله شعب زباله 

عصر الاورجازم

عصر الاورجازم

عدى على مصر عصور كتير ... ملكية ... حمهورية ... اشتراكية ... انفتاحية .. خصخصية ... الى ان وصلنا الى ازهى العصور .... عصر الاورجازم.

والاورجازم باللغة العربية الفصحى يدعى الارتهازة .... والارتهازة بالعامية هى الرعشة ... وبالبلدى ... النفضة اللى بيتنفضها البنى ادم فى نهاية العلاقة الحميمة ...

والاورجازم علميا هى زيادة مفاجأة فى مادتى الدوبامين والسيراتونين اللى بيفرزهم المخ فيدى احساسا قويا بالنشوة والسعادة والروقان والدغدغة والتخدير والتكسير اللذيذ للجسم .

والاورجازم بيحصل فى الحالات السوية فى نهاية العلاقة الحميمة ... لكن برضة بيحصل فى الحالات غير السوية ويسمى وقتها الاورجازم الذاتى (مصطلح من اختراعى ) ولنا خير مثال فى الحاج الكبارة لما يقعد قدام ست زى كوز المنجة الاسمعلاوى ... او احد اتباعة لما يقعد قاعدة سخنة .

ده الاورجازم الاصلى ... اما الاورجازم التقليد فده بيحصل لكل الناس (لكنه لا يستدعى الاغتسال زى الاصلى ) ... بيحصل فى مواقف معينه ..زى لحظات الانتصار ... النجاح ... الفوز ... شم الهروين ... او شد حجر حشيش ...

القضية مش فى الاورجازم ... القضيه ان الاورجازم يكون هدف فى حد ذاته ... لانه ساعتها بيكون مزيل للتوتر ... مجرد مخدر موضعى  للصراع الداخلى .. شعور مؤقت بالذات والسعادة الوهمية ... وده اللى حصل معانا فى ثورتنا الميمونة.

خلع مبارك كان اورجازم مؤقت صاب الشعب كله ... كان هدف لذاته ... مخدر ... مزيل مؤقت للاحتقان  ... وبعد الاغتسال .... فضلت الوساخة زى ماهيه ... فضلت الخيبة والتخلف والزباله الفكرية زى ماهيه ... بل زادت الطينة بله ... فأصبح تحرير البلاد العربية.. وشرعية الجواز من البنات القصر...وفرز وتجنيب الكفرة ...واكل المنجة ...واللعب فى الحساس والخطابة فى الناس هى من اهم انجازاتنا .

ملحوظة :

عفوا لاسلوب الكتابة ... فالناس على دين ملوكهم ... وملوكنا دينهم الجنس والنسوان ... وانا من الناس علشان كدة تلاقى كل بوستاتى اليومين دول جنسية النزعة .