السبت، 10 أغسطس 2013

رسالة الى الاخوان جمعاء ... جمعاء (3)

رسالة  الى الاخوان جمعاء ... جمعاء (3)
أخوانى الاخوان :
تحية طيبة وبعد
حاجى على نفسى واكدب عقلى واصدق انكوا بتدافعوا عن الاسلام ... وان اهم حاجة فى حياتكوا نصرة الدين الاسلامى ... واسلاميه اسلاميه ... والاسلام هو الحل وكدهوه ... وحصدق كمان انكوا عايزين تستشهدوا فى سبيل الله والاسلام... وحصدق كمان انك متوضى ومغتسل ومستعد للشهادة ... كل ده انا مصدقة ... كل ده جميل ... بس ليه مش بتسأل نفسك سؤال مهم .... هوه مش احسن اعيش علشان الاسلام بدل ما اموت علشان الاسلام ؟؟؟؟؟
نفنطها مع بعض ... لو رحت عند الحرس او المنصة وخدت رصاصة جابت اجلك ... بماذا نصرت الاسلام يا اخى العزيز ... بلاش دى ... هناك احتمالين ... بعد ماتموت ... الاحتمالين بأيد ربنا سبحانه وتعالى مش بأيد حد تانى مهما طالت دقنه أو على كادرة ...الاحتمال الاول انك تكون شهيد فعلا وتخش الجنه ... والاحتمال التانى ان ربنا يعتبرك منتحر ... او قاطع طريق .. او مروع لخلق الله ... ودى ربنا بيدخل فيها جهنم وبئس المصير...يعنى الجنه واحياء عند ربهم مش مضمونة يامعلم زى مابيحاولوا يقنعوك... كل الحكاية 50%.... وانت وبختك ياجميل ... السؤال هنا : هل حياتك مش مهمة للدرجة دى ... بلاش حياتك ... هل اخرتك وحياتك الابدية تستخمل مغامرة الفشل فيها نسبته 50%؟؟؟؟ ... جاوب بس بعد ماتفكر ...
نيجى بقى للاحتمال التانى ... انك تعيش فى سبيل الله والاسلام ...تخيل نفسك لو عشت فى سبيل الاسلام ... ودعيت للدين بالحكمة والموعظة الحسنة وبقيت قدوه كتير يتمنوا يبقوا زيك فى خلقك وشهامتك وامانتك وصدقك وايثارك ... شوف بقى حتاخد ثواب اد ايه من ورا اللى حيقلدوك ...اى نعم ماوعدكش ان مافيش نار ... بس اللى اقدر ااكد عليه ان نسبة الجنة حتكون اكتر بكتير من من 50% .
مش عيب انك تفكر ...العيب انك تسيب حد يفكرلك ... حتى لوكان طويل الدقن أو عالى الكادر .
الخلاصة : انا عارف ان احنا فى جاهلية ... وان حمزاوى وخالديوسف وايناس الدغيدى هما ابو جهل وابو لهب ومراته بتوع العصر ... بس صدقنى ماتجيش كده .. الرسول بنى الانسان والمجتمع الاول وبعدين بنى الدولة ... مش تقولى ان الرؤيه كانت انك تقفل النور الساعة 10 باليل علشان الشعب يقوم يصلى الفجر .... بصراحة انا شايل منكوا ياما ... وعلى رأى المثل ياقلبى يا كتاكت يا ما انت مليان وساكت ... بس فى الاخر رغم انهم بيقولوا عليه ليبرالى وعلمانى وشيوعى ...الا ان  النصيحة واجبة لاخوك فى الاسلام ... انا مسلم وموحد بالله ياجدع ... فوق الله يحرقك.

بالمناسبة ... مش الدين الاسلامى محتاج له جيش يحميه؟ ... ولا انت ناوى تحمية بالملتوف... حافظ على الجيش مش تهده يا اهبل 

هناك 6 تعليقات:

  1. اليهودي والأمريكي اخترعوا طائرات بدون طيار لكي يحافظوا على أرواح جنودهم
    اما احنا فقلنا في المظاهرات: ع القدس رايحين شهداء بالملايين!
    وده الفرق الكبير بيننا وبينهم

    ردحذف
  2. معتز ..
    سعيد بمرورك .. هوه بصراحة ماينفعش يكون فيه فرق ... لا مافيش وجه للمقارنة اساسا .... كل سه وانت طيب

    ردحذف
  3. معتز :
    نسيت اشكرك على الكحك... بالسمن البلدى يامعلم

    ردحذف

  4. عصابة النووى

    نشرت جريـدة المصرى اليوم فى 17 يوليو 2013 قال أحمد إمام، وزير الكهرباء والطاقة فى تصريحات صحفية، بعد إبلاغه بالاستمرار فى منصبه ضمن حكومة الببلاوى، إن البرنامج النووى لتوليد الكهرباء، سيكون أحد أهم محاور قطاع الكهرباء فى الفترة المقبلة.وأضاف:"لدينا برنامج جيد يستهدف إقامة 4 محطات نووية لإنتاج الطاقة،..

    الخبر واضح منه أن عصابة النووى مش ناويين يجبوها البر و كل ما يجئ رئيس يروحوا له لأقناعه بشراء مفاعلات نووية . لماذا نشترى مفاعل نووى تزيد تكلفته على 5.52 مليار إيرو ، و 300 من مراوح توليد طاقة الرياح تنتج ما يعادل مفاعل نووى و تتكلف 900 مليون إيرو فقط؟!!!

    بالرغم من كوارث المفاعلات النووية و أشهرها تشرنوبيل "أوكرانيا"عام 1986 و فوكوشيما "اليابان" عام 2011 مازال هناك فى مصر من المسئولين من يصر على أستغفال و أستحمار الشعب المصرى ، و يسعى جاهدا لأنشاء مفاعلات نووية لتوليد الكهرباء!!!!

    و أصبح واضحا كالشمس أن هناك عصابة منذ عهد حسنى مبارك مرورا بعهد محمد مرسى و حتى الأن تسعى جاهدة منذ سنوات لشراء مفاعلات نووية لمصر و لا يهم و لكنها صفقة العمر لأفراد العصابة من حيث عمولات بمثات الملايين من الدولارات يستطيعوا بها أن يعيشوا هم و عائلاتهم كالملوك فى أى بلد يختاروه فى العالم أما عواقب المفاعلات النووية التى سيكتوى بنارها المصريين فهذا أخر شئ يهم فاقدى الشرف والذمة و الضمير ...

    و نحن فى مصرنا نكتب منذ عام 2007 محذرين من مخاطر النووى و منبهين إلى البديل الأكثر أمانا و الأرخص

    ثقافة الهزيمة .. النووى كمان و كمان
    ثقافة الهزيمة .. العتبة الخضراء
    ثقافة الهزيمة .. أرجوك لا تعطنى هذا السرطان

    مزيـــد من التفاصيل و قراءة المقالات بالرابط التالى

    www.ouregypt.us

    ردحذف
  5. كل سنة وانت طيب يا دكتور اسلام
    اسمعت إن ناديت حيا .. ولا حياة لمن تنادي

    ردحذف
  6. ستيته :
    كل سنه انت طيبة وبخير وسلام وسعادة
    الحر يفهم بالاشارة .. والعبد تقرعة العصا !... انا عارف انهم عبيد بس قولت اعمل اللى عليه علشان مايبقاش حرمناهم من حاجة ... ولما ينفضوا بضرب الجزم مايزعلوش

    ردحذف