روقة ..... (4)

روقة ..... (4)

اتكلمنا عن روقة المزيفة اللى بتشبع الراجل لغرض فى نفس يعقوب ... النهارده حنتكلم عن روقة الحقيقية اللى بتشبع الراجل علشان الراجل مش لاسباب اخرى ..على فكرة الراجل بيعرف روقة المزيفة من روقة الحقيقية ... بس بيعدى ايامه ... مش عبيط يعنى ... لان محدش عبيط اليومين دول .

معلومة مهمة قوى : ... الراجل لما يشبع بجد هوه كمان بيشبع الست بجد ... ودى المشكله ... اللى سببها العند او الكبر او الغباوه بتاعة السؤال الشهير ... طاب وليه انا ابدأ الاول ؟ مايبدأ هوه.... او هيه

خلينا فى روقة الحقيقية .. ودى زى ماقولت فى البوست اللى فات ... نادرة قوى ... لانها ست من نوع خاص .. ست عقلها متفتح ... برود مايند... زى مابيقولوا بالانجليزى ..بتشوف الامور من منظور غير منظور نوال السعداوى واقبال بركة ... ست بتشوف الدنيا بنظرة اشمل من نظرة اعضاء جمعيات حقوق المراة اللى يا إما مطلقات يا إما اجوازهم متجوزين عليهم فى السر ... برضه بأستطرد فى الكلام....يرجع مرجوعنا لروقة الحقيقية .

روقة علشان تبقى روقة لازم يتوافر فيها شروط... الشرط الاولانى انها تكون بتحب بجد ... لان اللى بيحب بجد بيعمل اى حاجة لحبيبه عن طيب خاطر ... حبيبك يبلع لك الزلط وكدهون ...

الشرط التانى والاصعب انها تكون مبسوطة انها ست ... ايون ..كتير على فكرة من الستات زعلانين انهم ستات ...كان نفسهم يطلعوا ولاد ...نتيجة الحريةاللى شايفين انهم اتحرموا منها وخدوها الولاد ولاد الكلب  ... او صدقوا سعاد حسنى لما قالت لهم ان البت زى الولد مش كمالة عدد .. مافهموش ان البت فعلا زى الولد فى الحقوق والواجبات ... لكن غير كده ماينفعش البت تبقى زى الولد ...ماهو لو كان ينفع كان ربنا سبحانه خلقنا صنف واحد .... مش كده ولا ايه ؟!

روقة الحقيقية لازم تكون ست من برة ومن جوه ... يعنى ماينفعش تكون من برة باربى ومن جوه بكار ...لازم تكون بتفكر ست ... بتلبس ست ... بتاكل ست .. بتغضب ست ... لازم تكون راضية وفرحانه انها ست رغم كل الموانع العرفية والشرعية اللى محوطاها ...

لازم تعرف كويس قوى الفرق بين الدكتورة او المهندسة او الوزيرة وبين انها ست فى بيتها مع جوزها ... لازم تكون مقتنعة ان الراجل شريك عمر على الحلوة والمرة مش مجرد إيه تى ام .. او حامل شرعى للحيوانات المنوية لزوم الامومة .

من الاخر علشان روقة تبقى حقيقة لازم تكون ست من برة ومن جوه وتكون بتحب ...لو الشرطين الاساسيين دول اتوفروا ... روقة مش حتتعب ولا تتعب الراجل ... الاتنين حيبقوا مبسوطين وسعدا ... ويعملوا اسرة جميلة نواه لمجتمع جميل .... طاب والنبى احنا عايزين ايه من دنيتنا غير ان الكل يبقى مبسوط ... مش كفايه المرار الطافح اللى شايفينة من الاخوان والبرادعى والنوشتاء والكائن الهلامى اللى اسمه حمدين ...؟!!

والى اللقاء فى الاجابة عن السؤالين المهمين .. هيه روقة صح ولا غلط ؟  ولو صح صح ليه ولو غلط غلط ليه ؟

روقة .... (3)

روقة .... (3)

النهارده حأحاول الاجابة على السؤال التانى : هل روقة موجوده فى الحقيقة ولا هيه مجرد خيال واحلام وامانى ؟

شوفوا .. هيه روقة موجودة ... بس روقة روقة اللى انا بقصدها نادرة حبتين .. لكن روقة المزيفة ... كتيير وكتيير قوى كمان .

روقة المزيفة هيه اللى بتشبع الزبون مش علشان الزبون لكن بتشبعة علشان حاجة تانية خالص .

 النوع الاول من روقة المزيفة ... وهوه النوع اللى بيشبع الزبون ... علشان فيها عيب وخايفه لا يسيبها ...يعنى مثلا ... مابتخلفش ..وخايفه لا الراجل يجى عليه يوم ويحن للعيال فلو سابهاحتبقى زى الشجرة الناشفة .. او تكون مقطوعة من شجرة يعنى لا اب ولا ام.. فلو سابها  حتنام فى الشارع ....او تكون ساقطة اعدادية ...فلما يسيبها مش حتلاقى شغل وتشحت يا اما مقدمهاش غير تنضيف البيوت ...وده النوع اللى بينطبق عليه المثل الشعبى اللى بيقول : لو ليك عند الكلب حاجة قوله ياسيدى .

فيه نوع تانى من روقة المزيفة .. وده نوع واطى بالفطرة بيطلقوا عليها لقب الوليه السو ... ودى عادة  مابتكون متطلقة او ارمله وساعات كتير بتبقى صاحبة المايلة اللى مش عارفة تحافظ على جوزها .. وداخلة بيتها وواكلة عيشها وملحها ...ودى بحكم الخبرة والعشرة بتبقى عارفة ايه الاكله اللى بيحبها الزبون وتشبعه ... فتاخد الراجل من على مراته وعياله ..وده النوع اللى بينطبق عليه المثل اللى بيقول : اللى يسلم دقنه للناس ... ينتفوها ..

النوع التالت بقى من روقة المزيفة ...ودى غالبا مابتبقى من برج الاسد ..( انا قولت انها دراسة غير علميه ).. هيه مابتبقاش طايقة ام الراجل ... بس لغاية ما حد عايز ياخده منى واستوب ... ده من ممتلكاتى الشخصية ... دا انا مابعتش موبيلى ال3300 يبقى حافرط فى جوزى لواحده تانيه ... ودى بتشبعة بس علشان ماحدش ياخده .. نوع من انواع الغيرة على الكرامة والكبرياء ... وده اللى بينطبق عليه المثل الشعبى : وجع بطنى ولا رمى طبيخى ....

روقة روقة بقى خليها البوست الجاى علشان انا كده طولت النهاردة .... الى اللقاء

روقه ...(2)

روقة ...(2)

علشان اجاوب على السؤال بتاع هوه ليه الرجالة عايزين روقة قوى كده ؟ ..عملت دراسة صغيرة شبه علمية ... وحطيت فرضية وحاولت اثبتها .... وفشلت فى اثبات الفرضية ... كان الفرض اللى فرضته ان الرجالة عايزين روقة علشان السيكو سيكو ...لكن طلع الموضوع مافيهوش سيكو سيكو خاااالص ...

ياربى ؟؟؟ النتيجة اللى وصلتلها دى دمرت افكار بقالها سنين راسخة فى عقول البشر ...زى فكرة الرجالة عينهم زايغة ومايملهاش الا التراب ... فكرة ان الواحده تآمن للميه فى الغربال ومتآمنش للرجال ... فكرة ان الرجالة عقلهم بين رجليهم وعلى طول يا قدام الهوت بيرد ياقدام مواقع الهارد والسوفت... يافاتحين البلوتوث يحملوا الافلام ويحطوا كلمة السر ... دا غير تعب الواحده فى اللف على محلات الانجيرى وجويا واوريفلام وايفون والايزى سويت ابو ليدوكايين ... علشان الطفس ابو عين يندب فيها رصاصة يتهد ويتبط ...حتى التعب ده.. طلع على فشوش ... صحيح .. بره وجوه فرشتله وهوه مايل ايه يعدله ...مافيش حاجة عاجبة ولا طمران فيه حاجة ...دا ايه ياختى الهم اللى عايشين فيه ده ؟!!..

انها الحقيقة الغائبة .. السيكو سيكو مش هوه الاصل ... دا مش اكتر من تصبيرة ... والتصبيرة عمرها ماتسد جوع ...خصوصا لما يكون الجوع جوع ذات مش جوع بطن ...والذات عند الراجل من قديم الازل هيه رجولته ... واللى يشبع رجولة الراجل انه يحس انه جدع ... أسد ... ملك الغابة فى عرينة ..حامى الحمى ...الكلمة كلمته ... الشورة شورته ... والرأى رأيه ..كل كلمة ينطقها حكمة من حكم الزمان ... كل تصرف نتيجة رؤية مستقبلية وبعد نظر ...على رأى نجاة عايز ورا كل كلمة اقوله ياسلام ... او على رأى شادية لما تقوله: احنا من غيرك ولا حاجة وناقصنا كام مليون حاجة ... وياحمينا وياساترنا وكدهون .. ساعتها بس حيشبع ... ولما يشبع حيشيل اللى شبعته على دماغه .. ومايقدرش يستغنى عنها ... تبقى هيه دنيته ومايشوفش ست غيرها ... ويبقى ......... خاتم فى صوبعها .

روقة استوعبت الدرس وعرفت تعمل الاكله اللى تشبع الزبون .... بس الشطارة انها دايما تقومه نص بطن ... لانه لو شبع اوى ... عاديكى ياختى  من الشبعة بعد جوعة ... واطى واطى ياختى ...

شوفتوا روقة ناصحة ازاى مش زى النسوان الخايبة اللى تقولك سيكوسيكو وهيفا وصافيناز وقلع ومسخرة وقلة ادب ..

الى اللقاء مع السؤال التانى ... ياترى روقة موجوده فى الحقيقة ولا بس فى الخيال وف فيلم العار ؟

روقة .... (1)

روقة .... (1)

شوفوا انا مش عارف هية بتتكتب ازاى ... روقة .. رؤا... روءى... لكن عارف هيه بتتنطق ازاى ... وعلشان اللخبطة انا حأكتبها ... روقة ... وانتو بقى انطقوها زى ما كان نور الشريف بينطقها وهوه بينادى على نورا فى فيلم العار ..... أيون ... زى ما قولتها كده ... الله ينور عليك ..

من الاخر كده ... روقة كائن يسبح فى خيال كل انواع الرجال ... من اول نوع الرجالة اللى بجد ... لغاية النوع المعروف اعلاميا بإبن ابو النجا ورفيق كفاحه إبن عطية ... القصد علشان الواحد مايخوضش فى الاعراض وبعدين ارجع اندم وأأنب نفسى وأزعل منها والعن ابو السياسة اللى خلت الواحد بقى قليل الادب وكدهون .

كل الرجالة عايزين ... لا عايزين ايه ؟ ... دول حايموتوا ونفسهم فى روقة..ورغمن عن كده... ساكتين .. مابينطقوش ... مابيطلبوش .. مابيعبروش عن مشاعرهم ... خوف ... يأس ... كسوف .. رضا بالقضاء والقدر .. تفعيل مبدأ أهى عيشة والسلام ..المهم انهم مابيفتحوش بقهم ... رغم ان احنا عملنا ثورتين منهم واحده مجيده ...

روقة بتفضل حلم العمر اللى بيتولد مع كل راجل ويعيش معاه وطبعا بيموت معاه

.. وهنا تبدأ طاحونه الأسئلة: هوه ليه الراجل عايز روقة قوى كده ؟ ...وياترى روقة موجوده فعلا ولا هيه بس فى خيال الرجالة وفى فيلم العار ؟.....ولو موجوده هيه صح ولا غلط ؟.... ولو صح صح ليه ولو غلط غلط ليه ؟ ... وهل سهل على اى ست انها تبقى روقة ؟.... ولو تقدر تبقى روقة  ليه بترفض انها تبقى روقة ؟... وهل روقة عيب لاسمح الله ؟ ... وهل فعلا وجود روقة يحل مشاكل مصر ؟ ... اوبمعنى اخر .. هل عدم وجود روقة سبب مشاكل مصر ؟ ... وهل روقة مبسوطة انها روقة ؟ ... وهل الراجل مبسوط ومرتاح مع روقة ولا كأى قط بيحب خناقة ؟ ... وهل ممكن الراجل يتجوز على روقة ؟ ..ولاممكن يتجوز روقة على مراته ؟ وهل روقة وحدها تكفى ؟ ... اسئلة كتير عايزة يجى ميت بوست ...بس على فكرة علشان انا تعبت ... لو مالقيتش على الاقل عشرين لايك .. مش حاكمل موضوع روقة ... وانتو حريين بقى .....انا قولت اهوه .

شكر خاص للاشتراكى الكبير ... مالكوف ايوبوف ... الشهير ب مالك ايوب 

الاعور والناظر...... باعونى

الاعور والناظر...... باعونى

فى اعدادى كانت المتعة الحرام اللى بامارسها بانتظام وبأتباهى بيها قدام صحابى ... هى انى كنت بأنط من على السور وازوغ من المدرسة وأدخل السينما ....كانت متعه شريرة انك تضحك على ابوك والناظر والفراش اللى قاعد على البوابة ... وتحس كده انك مقرطس الكل ...

السيما  زمان كانت بخيرها ... كان 3 افلام فى بروجرام واحد ... لأ وعرض مستمر كمان ... يعنى ممكن تلاقى واحد قاعد على الكرسى بقاله 3 ايام ومحدش بيقوله انت بتعمل ايه ؟ ... وكل ده كان ببريزة يعنى واحد على عشرة من الجنية ... كانوا بيعرضو فيلم اجنبى مطاردات وفيلم عربى لناهد شريف او نوال ابو الفتوح مع كنعان وصفى او غسان مطر ... وده بيبقى فيلم شبه تلاجة الفراخ فى كارفور .. كله وراك وصدور ... والاهم بقى فيلم لبروس لى ... وبروس لى ظاهرة لم ولن تتكرر ... هو شبه جاكى شان ... يعنى كاراتية وضرب ونيااااه وكدهون ...كنت باطلع من السينما اقف قدام مدرسة البنات وانا حاسس انى كنعان وصفى ومستنى البنات انها ترمى نفسها فى حضنى اول ماتشوفنى ... وبابقى مستنى حد يتكلم وانا اوريه فنون الكاراتية على اصلها ... نوع من انواع البحث عن الذات بيصيب المراهقين من الجنسين ... طبعا مش دى المشكله ...

المشكله انه مره وانا راجع من درس الانجليزى لمحت الاعور قاعد مع ابويا على القهوه ... هار اسود ... هوه الاعور بيعرف ابويا منين ؟!!

الاعور شخصية خرافيه ماتلقيهاش كتير ... شخصية معروفة جدا فى السينما ... بيعمل كل حاجة ... يقطع التذاكر ... وبعدين يطلع يشغل الفيلم .. وبعدين ينزل يمسك الكشاف ويقعد الناس ... ويعد الكراسى الفاضية علشان يشوف حيدخل كام نفر بدل اللى طلعوا .. ماقولتلكوا العرض مستمر ... وبعدين يدخل يفتش فى الحمامات علشان يمسك اللى بيشربوا حشيش واللى بيمارسوا الرزيله .. ولما الصاله تهيج و تنادى: الصوت يا اعور... يطلع يصلح المكنة ويرجع الصوت ... باليل بعد السينما ماتقفل ياخد السلم والغرا واعلانات الفيلم ويطلع يعلقها على الحيطة فى الشوارع ... الخلاصة السينما هى الاعور .. ومن غير الاعور مافيش سيما ... الغريبة انى لغاية دلوقت ما اعرفش هما سموه الاعور ليه رغم ان عنية الاتنين سليمة .. القصد روحت البيت زى الملاك البرىء وقعدت اذاكر .. باليل كله نام الا انا .. حموت الاعور يعرف ابويا منين؟! ... لقيت نور اودة ابويا منور ... ماعرفش ايه اللى خلانى اتسحب واققف ورا الباب .... ويالهول ماسمعت ..

امى : انت حتسكت على اللى قالهولك الاعور عن الواد .. لا ياحاج كفاية الناظر اللى كل يوم والتانى يقولك ابنك بينط من على السو ويزوغ .. وكمان بيخش السيما .

ابويا : سيبى الواد يتعرف على دنيته .. سيبية يشوف ويتعلم ... يضرب وينضرب .. يغلط ويصحح غلطه بنفسه ...ابنى متربى وانا متأكد انه عمرة ما حيعمل حاجة حرام .. وبعدين الواد شاطر ونمره كويسة ..سيبية يعيش سنه .

امى : يقولنا ... هوه احنا مانعينه .. يقولنا ويروح انشالله كل جمعة .. مش ينط من على السور زى الحرامية .

ابويا : مافيش فايده ... ياوليه افهمى ... هوه متعته مش فى السيما ... متعته انه يزوغ ويحس انه كبر وبيضحك عينا ويقرطسنا ... نوع من التمرد اللى لازم يبقى موجود فى السن ده ...سيبيه انت بس واوعى تقولى له حاجة ولا حتى بالتلميح ... انا واخد بالى منه كويس وحارسة من بعيد لبعيد.. وعمرى ما حاسيبة يقع فى الغلط ... واتطمنى ابنك راجل .

انتوا طبعا متخيلين انا كان شكلى ايه بعد ماسمعت الكلمتين دول .. . ما اعرفش ايه اللى خلانى ماانطش من على السور ولا اخش السنيما تانى ... ممكن علشان لعبه قرطسة ابويا والناظر ماعادتش ممتعه بعد ما اتكشفت ... ولا علشان سمعت ابويا بيقول عليه راجل .. وده اللى كنت بأعمل عشانه .. ولا علشان اتكسفت من نفسى ... ماعرفش ... المهم ان دخولى السينما بعد كده كان شرعى وبعلم الجميع وفى النور .... برضة مش دى المشكله ...

المشكله ان ابنى عمل زيى ... وبيزوغ ويدخل السيما ... رحت اشتكيت لأبويا ... ضحك جامد قوى .. وقالى : على فكرة زمان كنت بتزوغ وتخش السيما ... وتقف تتصنت على ابوك وامك وهما بيتكلموا ... مااللى ماتعرفوش ياعبيط ان خيالك كان باين من ورا الازاز ... وضحك ... ضحك جامد قوى ..

مسكته من كتافه وقولت له : حرام عليك يابا... بتعمل فيه كدا ليه ... حرام عليك.. خادنى فى حضنه وهوه مازال يضحك .

سيبوا العيال تكتشف دنيتها .. واحرسوهم من بعيد ... علشان تلحقوهم وقت اللزوم ... حكمة من حكم الحاج ... ادعوله بالشفا

لحظة اكتشاف انك حمار

لحظة اكتشاف انك حمار

وحيد حامد قال على لسان يوسف شعبان فى فيلم كشف المستور : أعظم لحظة فى الوجود هى اللحظة اللى انا اكتشفت فيها انى كنت حمار ... لان الحمار بس هوه اللى يصدق ان الوطن ممكن يستفيد من العمليات القذرة ..

وعلى لسانى اقول : لحظة اكتشاف انك حمار هيه اعظم لحظة فى الوجود لأن..

الحمار بس...... اللى يصدق ان فيه حاجة بتتغير او حتتغير .

الحمار بس...... اللى يصدق ان زمان كان احلى وينسى انه زمان كان بيقول زمان  كان احلى .

الحمار بس ...... اللى يصدق ان داعش لما تقتل مسلمين مش يهود تبقى عايزة تنصر الاسلام .

الحمار بس ...... اللى يصدق ان ليلى علوى خست وان ده مش فوتو شوب.

الحمار بس.....اللى يصدق انه حيرتاح لما يتجوز تانى .

الحمار بس ....... اللى يصدق ان حزب النور كل شغله فى النور ومابيعملش حاجة فى الضلمة .

الحمار بس ....... اللى يصدق ان الاخوان مسلمين بجد .

الحمار بس ..... اللى يصدق ان الاعلام بيعمل لمصلحة حد غير نفسه .

الحمار بس ...... اللى يصدق ان عماد اديب ومزته ممكن يرجعوا مصر .

الحمار بس ..... اللى يصدق ان فيه حد حيفتكره لما يعجز ... او يفلس .

الحمار بس ...... اللى يصدق انه لما ياخد الام بى ايه .. حيشتغل بعشرتلاف جنية ويجيبوله سكرتيرة مزه تروقه ..

الحمار بس .... اللى يصدق ان رجل الاعمال اللى مشغله ممكن يقدر تعبه وشغله ويزود له المرتب .

الحمار بس .... اللى يصدق ان اللى معاه دكتوراه يبقى لازم يكون بيفهم .

الحمار بس .... اللى يصدق انه ممكن يفهم حاجة قبل مايموت .

طاب تصدقوا بقى ... الحمار اجدع ... الحمار الوحيد اللى فاهم صح ... لانه حمار ومصدق انه حمار .. وعايش على انه حمار ... لكن احنا ... لغاية دلوقتى مش مصدقين ان احنا بنى ادمين ... لا ومصممين ان احنا ملايكة وبنتاجر على بعض ... وعلى نفسنا ... وعلى ربنا.... استغفر الله العظيم .

وسيبقى قبرى جافا

وسيبقى قبرى جافا

لما تنهار منظومة القيم المتعارف عليها من قديم الازل وتلاقى الباطل بقى هوه الحق ... والعافيه مصدر السلطات ...والوساخة شعار المرحلة ..والنفاق نبى الدين الجديد والخيانة شعائرة ... لما يتحول كل اللى حواليك لسوق كبير بيتباع فيه كل حاجة وأى حاجة ... سوق بقى فيه الامانه والشرف والمروءة بضاعة راكده منتهية الصلاحية ... سوق كل ماتقلع فيه أكتر كل ما تعلى فيه اكتر وتكسب اكتر واكتر .... سوق ... التجارة الرايجة فيه ..هيه التجارة بهموم الغلابة وفقر الفقرا وغرائزالشباب وبراءة الاطفال وحلم جنة الاخره للى ضاعت منهم جنة الدنيا ...   لما تلاقى كل ده حواليك يبقى ماقدامكش غير حل من اتنين ..

ياإما تلجأ للمخدرات بانواعها من حشيش لترامادول لديجيتال لفيس بوك لحزب النور لداعش لصافيناز لافلام السبكى ..والاختيارات متعدده زى ما انت شايف ...اختارلك واحدة او اتنين وعيش يامعلم ... او غيب...

يا إما تنسحب بهدوء من الحياة وتلزم دارك وتعض على اللى فاضل من ادميتك بالنواجز وتبكى على خطاياك وتقول يارب توب عليه وارحمنى....

طبعا حيطلع زعبوله القلة يقولى : ايه ياعم الكآبة والتشاؤم ده .... الخير جاى.. وحتبقى احسن ..دى مصر المحروسة المذكورة فى القرآن .. دا احنا شعب سبعتلاف سنه حضارة ...

حأرد بهدووووووء : ابقى اعمل بيبيه على قبرى !!!