الأربعاء، 29 يوليو، 2009

الحبال الدايبة

الحبال الدايبة

وانا صغير فى المدرسة....كانوا المدرسين يحكولنا على السراب ....ويقولولنا لما تمشى فى الصحرا ....تشوف مية قدامك ...بس لما توصلها ماتلاقيهاش ......عجبتنى قوى حكاية السراب دى ....وبقيت ادخلها فى كل كلامى وحكاياتى ......وبقيت ادخلها فى مواضيع التعبير علشان اخد نمرة حلوة......كل دة وانا لاشفت السراب ولاغيرة.....وفى يوم كنت مسافر على الطريق الصحراوى الساعة اتنين الضهر .....وشفت السراب على الاسفلت.....بقيت اجرى بالعربية وهوة يجرى قدامى ....كانت لعبة حلوة هونت عليا المشوار .....وخلصت السكة بسرعة ...سرحت شوية مع نفسى ....لقيت السراب مش بس فى الصحرا ولاعلى الاسفلت .....اكتشفت ان الحياة كلها سراب .....من ساعة ما بنيجى الدنيا واحنا بنجرى ورا سراب كل مايتهيئلنا ان احنا وصلنا نلاقى سراب ابعد نقوم نجرى وراة ....بنجرى ورا الشهادة وتطلع سراب ....نجرى ورا النجاح نلاقية سراب ....الفشل سراب ....الحب سراب ....الجواز سراب ....حتى العيال هما كمان سراب ....الصحاب سراب ....الاعداء سراب .....الفلوس سراب ....المتع والفسح سراب ....الزعل سراب ....والسعادة هية كمان سراب ......وكل ما نخلص سراب نجرى ورا سراب ...نجرى ونجرى ونجرى لغاية ما ينقطع نفس اللى جابونا ....سألت نفسى : احنا بنعمل فى نفسنا كدة ليه؟....مالقيتش غير اجابة واحدة : ما اهلنا كانوا بيعملوا كدة .....سألت تانى : طاب احنا بنقلدهم لية ؟....مالقيتش برضة غير اجابة واحدة : غباوة ...ايوة غباوة ....والله غباوة ...بنجرى ورا سراب الدنيا وسايبين الحقيقة اللى احنا جايين الدنيا علشانها ....نعبد ربنا ونعمل لاخريتنا ...مش لاقى حاجة اقولها غير المثل اللى دايمنا تقولة الحاجة : اتعلقى يا خايبة بالحبال الدايبة

هناك 9 تعليقات:

  1. ياااااااااااأمثالك
    ههههههههههههههه
    الدنيا طريق بنعدى منه للاخره
    لكن احنا بننسى الهدف الاساسى وبنروح للسراب

    ردحذف
  2. عندك حق
    احنا مش بنجرى وراء السراب طول الطريق عشان يسلينا ونوصل للنهاية واحنا مش عاملين حاجة نقدر نأخدها معانا
    عندك حق
    تقبل مرورى

    ردحذف
  3. صح جدا

    الحاجة الحقيقية الوحيدة واللى مش سراب

    بننساها للاسف او بنتجاهلها في ظل انشغالنا

    بالجري ورا السراب

    جميل كالعادة ونشبيهاتك رائعة

    يا دكتور مبروك على تجديدات شقتك

    وياريت تقولى هو الموضوع دا متعب اوى يعنى ؟

    اصلى ناوية اعمله ان شاء الله وخايفة اوى يجي رمضان وانا لسا مش خلصت

    ردحذف
  4. هوه إنت عندك حق
    الدنيا كلها لا تساوي عند الله جناح بعوضه
    تسلم إيدم
    (رغم إنك كأبتنا شويه بموضوع السراب ده)


    وانت عمال تقول سراب سراب سراب
    افتكرت السراب والجزمه
    :)

    ردحذف
  5. حلو المثل ده اول مره اسمعه تخيل ؟

    بس عارف احنا نقدر نعيش حياتنا ونكسب فلوس ونتجوز ونربي عيالنا ونشتغل واحنا بنعمل كده ننوى فى نفسها انه لله ورسوله من قلبنا

    يبقى كده عشنا الدنيا وان شاء ا لله عملنا الى احنا موجودي عشانه عبادة ربنا

    لو نتقى الله فى كل كبيره وصغيره ونفكر فى ربنا دايما

    ونبتغي رضا من كل حركه وسكنه لنا هاتلاقي الدنيا اسهل اوي

    وتهون اوي اوي

    وما تشوفش السراب تاني وان شوفته مش هاتجري وراه







    انا كمان بالعب لعبة السراب بتاع الاسفلت ده
    هههههههههههههههههههه

    ردحذف
  6. كده كده لازم نسعى في الدنيا رغم اننا شايفين الأمثلة اللي قبلنا وخدوا ايه معاهم القبر

    نعيش في الدنيا وناخد نصيبنا منها
    وبرضه نشوف الباقيات الصالحات وربنا يحسن لنا كلنا الخواتيم

    ردحذف
  7. الكنز في الرحلة مش في نهاية الرحلة
    كل حاجة عشناها وكل طريق مشيناه وكل شخص قابلناه ساب اثر فينا وسبنا اثر فيه
    المهم ان نكون سبنا اثر كويس
    ساعتها المثل المناسب هيكون
    الايد اللى تاخد متديش

    سمراء

    ردحذف
  8. سمراء سعيد جدا بانضمامك للعيلة نورتى وشرفتى

    ردحذف
  9. التشبيه جميل وانا مع راى
    الحبيبة صبرنى يارب
    ان ممكن نتخذ من اعمال دنياتنا لنحقق الهدف الذى
    خلقنا من اجله
    واحنا بنعتبر الدنيا حصالة للحسنات فى الاخرة
    بس يارب هذا التعلق لايكون بالحبال الدايبة
    ربنا يطلعنا منها على خير يادكتور

    ردحذف