الخميس، 13 أغسطس، 2009

رحلة فى دماغ بنى ادم1

رحلة فى دماغ بنى ادم

قررت اعيش دور قارىء افكار على المدونة بس!!!.... مش طالع فى الفضائيات!!!..... بس مايمنعش لو جات الفرصة اهبش فيها ....ماهو محدش يقول للسبوبة لأ....ولا اييييييييييييييييييييييية؟

نتكلم جد بقى...دى فكرة جديدة عبارة عن خمس دقايق فى دماغ بنى ادم وهوة مع نفسة نشوف هوة بيقول اية ؟

يارب تطلع حلوة......يارب

أمانى

بعد ما قطفت أمانى الملوخية حطيتها على الصينية ....جابت المخرطة وقعدت على الارض تخرطها...قالت لنفسها : جربت كتير وقليل ...بس الملوخية مابتطلعش ملوخية الا بالمخرطة ...لا الخلاط نفع ولا الكبة شفعت...ياه الايام بتجرى بسرعة ...انا فاكرة لما كنت باروح لجارتنا ام حمدى استلف منها المخرطة لماما ...كانت ديما تدينى طوفى وتقولى حلى بقك يابت ...الله يرحمها كانت ست طيبة قوى ...ولا عم بدر البقال هوة كمان كان بيدينى طوفياية لما كنت باجيب منة التموين ....نسيت اقول لأحمد يصور شهادة الميلاد بتاعة البت حبيبة علشان نضيفها على بطاقة التموين ....هوه مش حقنا ولا ايه ...احسن من عين الحكومة اللى مابناخدش منها حاجة ...كلة بالغلا والكوى ...لما اخلص عايزة اكوى قمصان أحمد الا يجى يفتح صوتة ....ماهى نقصاة هوة كمان ...مابخدش غير زعيق ونرفزة ...مافيش رحمة ...مافيش مرة يدخل علية بهدية ....بلاش هدية ...يقول كلمة حلوة ...الا اول كلمة يقولها وهوة داخل : الاكل جاهز؟... واقع من الجوع...طبيخ وغسيل ومسح ومكوة وطلبات عيال وطلبات جوز ...ادى الجواز اللى كنتى حتموتى علية ياهبلة ....طلبات طلبات ....دا لسة طلبات رمضان ....دا انا لازم اقول لماما تيجى تفطر معايا اول يوم ماهو ماينفعش تفطر لوحدها اول يوم رمضان.....ماانا اعمل اية؟... لاهية راضية تقعد عندى ولا احمد راضى نقعد عندها ...وانا اعملهم اية بقى ....بالمرة وانا باجيب حاجة رمضان ابقى اشترى شنطة للبت حبيبة ....مع ان شنطتها لسة بحالتها ...بس اعمل اية فى ابوها اللى مابيرفضلهاش طلب....بتتدلع ومابتذاكرش .....ياختى يعنى هما اللى ذاكروا وتعبوا وسهروا وخدوا شهادات عملوا اية؟ ...قعدوا فى البيت زى الخدامين ....وياريت عاجب ...كلة بينتش فية ...محدش مقدر ...محدش راحم....ياسلام لو الواحدة كدة يكون عندها عربية ...وتسافر كدة لوحدها بعيد كام يوم ....وافرد شعرى واقلع الطرحة ....والبس بنطلون جينز ....وبلوزة كت ....والبس مايوة وانزل البحر....واسمع مزيكا وارقص واسهر واعمل زى البنات بتوع اليومين دول واروش ....استغفر الله العظيم ...استغفر الله العظيم ...اية اللى بتقولية دة يا بت ....انتى اتعبطى ولا اية ....اييييية ....حتخيبى على كبر ولا اية ؟ ....استغفر الله العظيم فوقى يابت دا بدال ماتقولى عايزة اعمل عمرة ....بس ماهوبرضة مش حرام ان الواحدة تشوف نفسها.....والعيال اسيبهم عند ماما يومين تلاتة ايه اللى حيحصل يعنى ....مالناس بترمى عيالها بالاسبوع والاتنين....يوووة

استغفر الله العظيم اللهم اخزيك يا شيطان....خدت امانى الملوخية وراحت علشان تفورها ...قعدت تسقطها حبة حبة علشان ماتسقطش .....جرس الباب ضرب ...راحت تفتح ...لقتة احمد ...احمد دخل من الباب واول كلمة قالها :الأكل جاهز؟.....انا واقع من الجوع

هناك 5 تعليقات:

  1. وحشتنا يادكتور السلاسل دى

    بس انت كتبت كدا ازاى

    ازاى وانت رجل تكتب ما يدور في عقل امرأة بالجمال دا وكانك فعلا داخل هذا العقل

    مبدع والله كالعادة

    خليتنى وانا بقرأها انسى حالة الزهق اللى مسيطرة علينا الايام دى من اللى بيحصل

    في انتظار البوست القادم ان شاء الله

    ردحذف
  2. مبتكرة
    رائعة
    صادقة
    واقعية

    انت عرفت أماني منين؟

    ردحذف
  3. ازيك
    بجد بجد فطست علي روحي من الضحك
    فعلا اي ست لما بتشتغل في البيت بيقعد دماغها يودي ويجيب في كل اتجاه
    زي الموتور الخربان
    ولازم تتحسر علي نفسها
    بجد جميله ياريت تكمل وتدخل دماغ راجل عجوز او ست عجوزه او طفل او حمار مشيلينه اكتر من حمله ميت مره
    بجد برافوا عليك

    ردحذف
  4. لا انا اعترض

    انا لسه كنت دلوقتي باقطف ملوخيه والله ما فكرتش كده خااااااالص

    لانى كنت قاعده مع البت اختي وبتحكيلى على حماتها وبحاول امسك لساني ما اشتمش للبت جوزها على الاقل

    هههههههههههههههههه


    بوست رائع كالعاده وحقيقى ده بيدور فى دماغ ستات كتير قول تسعين فى الميه منهم

    بس على فكره كون انها تحلم انها تفرد شعرها وتلبس مايو وتنزل البحر والنبى ما حرام نحلم كده ولا حاجه

    يعنى نلاقي الظروف المواتيه ونعمل كده
    ان شاء الله انا وستيته هانعمل مدينه فاضله خاليه من الرجال ونعمل كده براااااااااااحتنا

    بالغيظه فيكم

    تحياتي لحضرتك والموضوع شكله هايبقى كبير كبير كبير

    ردحذف
  5. بجد مش قادرة اصدق
    ياترى الدكتور ازاى نخور فى دماغ امانى
    وطلع كل الافكار والاحلام ديه
    ده مخزون الستات يادكتور
    واللى محدش يقدر يطلع عليه
    ماشى ياامانى كده تفرجى الدكتور على افكارنا
    واحنا بنخرط الملوخية
    ربنا يهديكى ياشيخة

    ردحذف