الاثنين، 17 أغسطس، 2009

رحلة فى دماغ بنى آدم 3

رحلة فى دماغ بنى آدم3

حبيبة

يوم الجمعة حبيبة صحت قبل امانى واحمد ....قالت فرصة اتفرج على التلفزيون براحتى ....فتحت التليفزيون وقعدت تقلب فى القنوات ...جابت فيلم اجنبى البطل فية كان بيبوس البطلة...قالت فى نفسها هما بيبوسو بعض ولا بيعضوا بعض ....لو بابا صاحى دلوقت كان ضير القناة وقال مناظر زبالة ....ماعرفش هوة بيعمل كدة لية ؟ .... مع انة لما بيتتفرج لوحدة مابيديرش القناة ولا حاجة ...بابا دة له حاجات غريبة مش بفهمها ....فرصة وهما نايمين اجيب نيكلوديان علشان افرج على جيمى نيترون وساندى ...من زمان ماشفتهمش ....والمدارس قربت وحيغلسوا علية ...ويقولى قومى نامى علشان تصحى بدرى للمدرسة ....ماأنا اول يوم لازم اقوم بدرى علشان اقعد جنب صاحبتى هانيا واوريها الشنطة الجديدة اللى حيجيبها لى بابا ....انا حاخلى بابا يجيب لى شنطة عليها فلة ...انا بحبها قوى ...مع ان تيتا مابتحبهاش وتقول عليها اية البت الغم دى اللى على طول ملبسينها اسود ... بس انا عارفة ان بابا حايجيب لى اللى انا عايزاة ...انا بحبة قوى علشان هوة بيجيبلى كل اللى نفسى فية ...مع انة ساعات بيغلس علية ويشخط فية ويقولى قومى صلى ...انا لسة صغيرة ...تيتا بتقول كدة ....وبابا دايما يتعارك مع ماماويقول لها خلى امك تبعد عن البت ...وتبعد لية هية مش تيتا ولا اية ....وماما كمان مش بتحب تيتا ام بابا .....مع انها على طول بتجيب لنا هدايا ولعب وتدينا فلوس ...وبرضة ماما بتاخد مننا الفلوس ....لما هية مابتحبش تيتا بتاخد مننا الفلوس اللى بتديها لنا ليه....النهاردة حنروح نزور خالتى ...وحالعب مع الواد زياد كونكت فور واغلبة زى ماغلبتة الاسبوع اللى فات لما كانوا عندنا ...واغيظة واقولة يا مغلوب ....زى مابيغيظنى ويقولى يا طخينة ....طاب مايبص لنفسة وسنانة البايظة واللى مركب لها تقويم ....احمد صحى ونادى على حبيبة وقالها يابت سيبى التليفزيون وتعالى نامى جنب بابا ....هوة انتى علطول كدة سيبانى ونايمة جنب امك ...حبيبة قالت له بس بشرط تحكى لى حدوتة ...قالها ماشى يابت الكلب بس تعالى

هناك 4 تعليقات:

  1. ومازلت اندهش جدا ازاي الأفكار دي بتيجي لك
    ايوه هي بتحصل حوالينا وشايفنها وبنسمع تسؤلات الأطفال وخاصة لو انصدموا من شيزوفرينيا اوامر الآباء اللي بيعملوا عكسها
    بس برضه انك تكتبها لازم اقول ما شاء الله عليك
    بس حاسة ان اخر اربع اسطر فيهم غلطة
    واظن بابا اللي قام مش احمد

    ردحذف
  2. طيب يعنى قلنا قولنا اماني قالتلك على الملوخيه

    واحمد كان معاك فى الفصل وانت صغير

    طيب البت حبيبه دي نطيت فى دماغها ازاي
    هههههههههههههههه

    حقيقى باحس ان بنتى بتفكر كده بالظظظظظبط

    وبتصحى قبلنا وقبل اخواته مسروووووعه على التلفزيون

    بس انا مش باديهم فرصه يقلبوا اساسااااا على طول التلفزيون على الكارتون

    بس للعلم انا شلت قناة نيكلوديان من عندي عشان سخيييييييييفه جدا وفيها افلام امريكاني مترجمه ما عجبنيش الفكر الى بيرسخوه فى دماغ العيال

    تحياااااااااااتي لدماغك الجامده جدا

    ردحذف
  3. يادكتور انت رائع

    لك قدرة رهيبة على الغوص في اعماق الناس


    لازم اقوم اجيب اى قبعة حتى ارفعها اعجابا بافكارك

    ردحذف
  4. د. اسلام
    تمام جدا افكار الصغار دى
    هذا ما يقوله صغيرى 8سنوات ويفعله
    وعلى الرغم من هذا كثيرا ما نستهون بافكارهم وتحليلهم لما نقول ونفعل
    تحياتى لعبقريتك

    ردحذف