رحلة فى دماغ بنى آدم 4
حماة احمد
الحاجة عديلة حماة احمد قامت من النوم ...ركبها بتنشر عليها ....يادوب نزلت رجليها على الارض...وسندت على ايديها ....قالت فى نفسها ...جرى اية يابت يا عديلة ....انتى عجزتى ولا اية ....اوعى يابت الروماتيزم يغلبك...لا انا مش حاسكت على نفسى ...النهاردة حاروح للدكتور اللى قالت لى علية عنايات ...لما كنا فى النادى ....بتقول علية بركة ....يادوب حط ايدية على ركابها ...قامت زى الحصان ....شوف الولية المايصة قال لما حط ايدية صحت ....يعنى الدوا مش هوة اللى صحاها ....ماهى طول عمرها متدلعه وصحتها حلوة مع انها اكبر منى بسنتين ....طول عمرها بختها حلو ...جوزها مدلعها ومهنيها.....ومش مخلى فى نفسها حاجة .....حتى بناتها..... الناصحة جوزتهم معاها ....ماهى عملت شقةلكل واحدة ....حسرة علية ....طول عمرى شقيانة ...وتعبانة وماشفت يوم حلو ....البنات اتجوزوا والراجل مات...يعنى وهوة حى كان بيعمل اية ....ماهو ليل نهار كان منكد عليةوعلى عيشتى وكان كاتم على نفسى ...الا مافى واحدة فكرت تخش علية بحتة كيكة ولا نص صينية بسبوسة ...ولا يقولوا لى تعالى اقعدى معانا يومين ...بدال مانتى قاعدة لوحدك كدة ....وهوة انا حارضى اروح عند واحدة منهم ...علشان المعدول جوزها يسمعنى كلمة كدة ولا كدة ......خصوصا اللى اسمة احمد جوز امانى دة ...دة يهودى ...ماحدش بياخد منه لاحق ولا باطل ....والهبلة مش عارفة تطوية ....مش شاطرة اللى كل ماتيجى تقعد تشتكى منة ومن عمايلة ....بس والنبى ومن نبى النبى نبى لانكد علية ...واخد لها حقها العبيطة دى .....اللىمش دريانة باللى بيحصل حواليها ...دا طول النهار برة ...لاهى عارفة بيعمل اية ولا بيروح فين ....بس فالحة تقولى شغلة كدة ياماما ...لية هوة احنا مشتغلناش ولا اية ...دا تلاقية بيلعب بديلة ويتسرمح ...ايوة هوة الصنف دة كدة ......انا عارفاة ...ماهو لوماكنش بيلعب بديلة ...كان زمانة داخل عليها بجزمة ولا شنطة ولاحتة سيغة ...يبقى بيودى الفلوس اللى بياخدها فين ... مش بعيد يكون متجوز عرفى عينى عليكى يابتى ....بختك زى بخت امك ..ولا المنيل التانى اللى بيلهف مرتب البت على داير مليم ....لا...لا..والله لفوقلكوا ...بس ارجع من رحلة شارم الشيخ اللى عاملها نادى المسنين ....ورحلة مطروح اللى عملاها جمعية رسالة ...واخلص من العمرة ...واوريكوا ...النبى لا اخلص القديم والجديد ....مبقاش ورايا حاجة الراجل ومات والشغل وبقيت معاش والروماتيزم وحاروح للدكتور بتاع عنايات ايوة لازم اخد بالى من صحتى ..,,بناتى عايزينى ...قامت عديلة من السرير وراحت تتصل بعنايات تاخد منها نمرة الدكتور اللى بيحط ايدة يخلى الركب ولا ركب ابو تريكة
يا اسلام يابو الافكار النيرة
ردحذفخلصت مع الاطفال ودخلت على الحموات
والله رحلتك زى العسل
نيجى بقى للست ام ركب عاوزة تزييت ..ومش عاتقة ولا رحلة ولا خروجة ورايها فى اجواز البنات .. خلى بالك الست تحب جوز البنت شوية وتتحمل منه .. لكن ربنا ما يوريك رايها فى المنيلة مرات المسكين ابنها
فى انتظار حلقاتك الممتعة يا دكتور
ايه الجمال ده
ردحذفانا طلعت الاولى والثانية
كل رمضان وانت طيب
ههههههههههههه
ردحذفحلوه حلوه حكاية الركب دي
طب عارف لو كان لها مرات ابن يا سلاااااام كانت اتلهت فيها بقى وسابت ا جواز البنات
والنبى نادي المسنين ده ما بياخدش حد فى الثلاثين ؟
اه نسيت اقولك كل سنه وانت طيب ورمضان كريم ومبارك ان شاء الله
ردحذفكل سنة وانت طيب وبصحة وخير وفضل من ربنا
ردحذفلأ انا عندي صنف تاني خالص من الحموات
انا حماتي فدي نسمة ربنا يخليها ويديها الصحة
واما امي اجارك الله وربنا يخليها وما يحرمني منها
امي رائعة
عاوزة الولد يكون ديك في بيته محدش يدن غيره
وطب والبنت اللي هي انا
برضه ديك
الله طب يا ماما ما لازم يكون فيه فراخ علشان تبيض في البيوت دي كلها
يعني لما كلنا نكون ديوك
ها نفضل نصيح قدام بعض
ومحدش ها يبيض
بس لأنها مامتي حبيبتي مضطرة اعمل ديك صناعي علشان هي ترتاح نفسيا وتحل عن المسكين حسبو
والله احمد صعب علي زمنها عملت العمرة ورجعت له توريه شغله