الخميس، 15 أكتوبر، 2009

الفرق بين الرجل والمرأة 1

فرق فسيولوجى

ربنا لما خلق المخ خلقة نصين ...فصين....فص يمين وفص شمال ...وخلق بينهم صمام يوصل وينقل بينهم ...وخلى الفص اليمين مسؤل عن العاطفة والخيال والذوق والابداع ...اما الفص الشمال فمسئول عن الارقام والتحليل والترتيب والقرارات ...ولما خلق الرجل خلاه يستخدم الفص الشمال ....ولما خلق المرأة خلاها تستخدم الفص اليمين ...علشان كدة تلاقى المرأة حنينة اكتر ...ذوقها احسن ...خيالها اوسع ...ومن حكمة ربنا ..انه خلى الصمام اللى بيربط بين الفصين اوسع عند المرأة ...علشان تقدر تنقل من دة لدة بسرعة ...وعلشان كدة تلاقيها بتدير البيت بكل طلباتة ومشاكلة بطريقة يعجز عنها اجدع خبير معاه دكتوراة فى الادارة والاقتصاد من جامعة هارفارد...لأن البيت عايز فى ادارتة حد على طول فى حالة طوارىء....على طول فصين دماغة شغالين ...ولو خدتوا بالكوا من الست تلاقيها بترضع الواد ...وتخرط الملوخية وتتفرج على التمثيلية وترد على التليفون فى نفس الوقت ...الراجل بقى لو عايز تلخبطة ...اطلب منه حاجتين فى نفس الوقت ...حيفشل... وففى الحاجتين ....ولو بتلاحظوا شلة ستات قاعدين مع بعض تلاقيهم بيتكلموا كلهم فى نفس واحد وفى نفس الوقت سامعيين بعض كويس وبيردوا على بعض ....لكن الرجاله لأ ...مايقدرش ...فلما نطلب من الراجل يبقى زى الست ....نبقى عاملين زى اللى بيطلب من واحد مقطوع له رجل انة يدخل سباق 100 متر حواجز ....حكمتك يارب ...خليت التستستيرون (هرمون الذكورة) عند الراجل اعلى بكتير قوى من المرأة ...علشان الهرمون دة هوة اللى يخلية بيجرى ورا الست ....ويبوس ايد ابوها وخالها علشان يتجوزها ...وهية قاعدة فى بيت ابوها معززة ومكرمة ولا الاميرة ....شوفوابقى لو ان التستستيرون هو اللى عالى عند الست ...كان الراجل حيرضى انها تيجى تطلب ايدة ولا تقول له ياللا النهاردة ليلة الجمعة ؟؟!! شكل الراجل كان حيبقى وحش قوى ....-مع الاحتفاظ الكامل بحق المرأة فى ان تطلب زوجها ليلة الجمعة – عرفتوا بقى لية الراجل عينة زايغة ...غصب عنه والله مش بمزاجه ....تستستيرونة عالى ...نعمل ايه؟ نخلية مايبصش برة ازاى ؟ ....ماهو يا نخلية أغا علشان نرتاح ....ومش حنرتاح ...يا اما نرفع مناعته ونملى عينة ونهدى تستستيرونه ... مش عشانة بس ...عشانك انت كمان ...جربى كدة واقعدى فى البيت وانت رابطة الطرحة ...ولا عاملة شعرك كحكة ....ولابسة البيجامه ومية غسيل المواعين بلة وسطك ...وهباب الحله على خدك ...وشوفى حاسة بإية ؟؟!! وجربى كدة بعد ماتخلصى شغل بيتك ...وافردى شعرك ..والبسى قميص نوم حلو ...واتمكيجى ...واتبرفنى ...حاسة بإية؟ حاتحسى بانوثتك ...حتبقى فرحانة بنفسك وواثقة فيها ...وبالمرة ياستى حترفعى مناعة ابو تستستيرون ....بس خلى بالك ...ساعات بنعمل كدة من غير نفس ...وتضربى القميص الاحمر وانت بتقولى فى سرك ايكش يطمر فى المفترى ابن المفترية .....لأن اللى ماتعرفيهوش انه بيسمعك مع انك ما بتقوليهاش بصوت عالى ....أما انت بقى يا ابو عين زايغة ....وانت راجع كدة من الشغل وتعبان وعرقان ومترّب ....اول ماتدخل خد لك دش واحلق دقنك ...والبس بيجاما نضيفة ...بلاش تقعدش بال..... ياريتة كان بوكسر كنت عديتها ....ماهوانت طول النهار حلو وشيك ومتبرفن ...خليك كدة كمان فى بيتك ...كمل يومك وانت شيك وحلو وفرحان بنفسك وبمنظرك ....ماهواذا كان عندك شوية تستستيرون معذبينك ...فمراتك برضة عندها حبة تستستيرون ....

الأمور كلها بسيطة ...اولها نفهم..... وتانيها نقدّر.... وثالثها ننسى الافكار المسبقة ....ورابعها نبطل نتهم بعض ....وخامسها نحب نفسنا قبل مانحب اللى قدامنا ....وسادسها انا تعبت بس برضة حأكمل لأنى مقتنع ان الدنيا على حسب ما نعوزها ....حلوة أو مُرة ... احنا اللى بنختار

سؤال للتفكير وليس للإجابة:

لية اتحولت الحكاية الى واجب روتينى ...له طقوس محددة....وزى رسمى ...وميعاد معروف مسبقاً...ليلة الجمعة ؟

هناك 7 تعليقات:

  1. شوفوابقى لو ان التستستيرون هو اللى عالى عند الست
    -------------------------------------
    ها يطلع لها شنب :)


    تستستيرونة عالى ...نعمل ايه؟
    ------------------------------
    نديه استروجين وبرجسترون ونتفرج على سالي :)



    جربى كدة واقعدى فى البيت وانت رابطة الطرحة ...ولا عاملة شعرك كحكة ....ولابسة البيجامه ومية غسيل المواعين بلة وسطك ...وهباب الحله على خدك
    ----------------------------------
    نفسييييييييييييييييييي اعرف بتشوفوا ستات كده فين؟ كل ما اقرأ مقال يقول رابطة شعرها أو تربيعة .. حتى الخدامات بطلوا يربطوها .. وبعدين هباب حلة؟ هو لسه فيه للحلل هباب؟ الله يرحم الباجور على ما اعتقد هو بتاع الهباب


    الست لو مكنتش تبقى حلوة في بيتها لنفسها قبل جوزها - مفروض لو سوية - متعرفش حتى تذاكر مش ترضي أبو تستيرون عالي .. والله أجزم أنها لا تستطيع حتى أن تتصالح مع نفسها وتحترمها


    اللي حضرتك متعرفوش لأنه شيء انثوي بحت إن الست بقى عكس الراجل مش بتزعل لو جوزها راجع من الشغل فطسان وعرقان وشكله زي أم المعارك
    هي بس بتفتكر شكله وتعايره لما يبتدي يوريها "الأصل" بتاع الميديل إيدج كريسس .. ساعتها بس بتعمل نفسها مستحملة الأفندي وشايفة منه الإيشي .. لكن الست بتحب جوزها زي ما هو كده بلا مبررات ولا برفانات "سيكولوجي مختلف بقى" نعمل فيه ايه؟ ربنا مراضينا بس يارب دعبس يعرف يبقى راضي هو كمان .. المشكلة تستيرونه ربنا يشفيه


    ههههههههههههههههههههههههههههههههه
    وتضربى القميص الاحمر وانت بتقولى فى سرك ايكش يطمر فى المفترى ابن المفترية
    ---------------------------------
    فكرتني بمشهد عادل امام وماجدة زكي في الإرهاب والكباب


    رغم أني عادة بجواب كل اسئلة اي امتحان حتى الإختيارية بس مش مجاوبة على السؤال الأختياري

    بوست كوميدي حقيقي واقعي في مدونتك للمرة الأولى

    سؤال للتفكير وليس للإجابة:
    ليه الرجالة ينضحوا مرارة وكوميديا سوداء عند الحديث في هذه المواضيع؟

    ردحذف
  2. مجربتش الحوارات دى كلها
    لسة شوية
    بس بوست لذيذ جدا
    زى العسل
    اكيد هاستفيد منه
    شكرا كتير

    ردحذف
  3. انت معاك حق الحاجه ملحه اكتر عند الرجاله

    لكن كمان زي ما قالت الاخت ستيته احنا بنرضى بقليلنا وانتم ما بترضوش ابدا

    بالنسبه لقميص النوم الى من غير نفس

    انا دايما ليا راي ان العلاقه الجنسيه الناجحه لا تعتمد على قميص النوم وقلم الروج ابدا

    قد يكونوا مؤثرين بس مش هما الحل

    كمان باتفق مع الاخت ستيته ان الست لو ما كانتش تبقى حلوه لنفسها يبقى باظت العمليه

    اكره الى بتتزوق ليلةالجمعه على رايك دي

    بالنسبه لسؤالك
    انا من فتره نزلت بوست اسمه نصائح للستات ياريت تقراه
    http://b3b3a.blogspot.com/2009/09/blog-post_26.html

    وقريب هانزل بوست نصائح للرجال

    وردا على سؤال الاخت ستيته

    اقولها لان الراجل فعلا مظلوم فى الحياه الجنسيه بشكل او باخر
    لان المجتمع والفكر المجتمعي لما طلع الستات مشوهين فكريا من الناحيه دي
    اذى الستات طبعا

    وبالتبعيه اذى الرجاله

    احنا الرسول قال ايه النساء شقائق الرجال

    زيهم يعنى

    احنا بقى ربينا البنت على افكار مشوهه فعلا خصوصا بالنسبه للعلاقه الجنسيه


    موضوع كبير محتاج كلام كتير


    بوست جميل سلم قلمك

    ردحذف
  4. حقيقة يا دكتور انا مش عارفة اقول ايه؟؟!!!!

    لا دول عاجبهم و لا دول عاجبهم


    يعنى انا شايفة الموضوع فى الاول و الاخر بيعتمد على الثقافة و اسلوب التربية

    بعد كدا التفاهم بين الاتنين و تحمل كل منهم للاخر
    و التماس العذر




    انما بردوا نرجع نقول ... أسأل مجرب و لا تسألش خبير

    و بما انى لا مجرب و لا خبير
    يبئا أقعد ساكتة احسن لى :)

    دمت بخير

    ردحذف
  5. والله كالعادة السلاسل بتاعة حضرتك بتكون رائعة ومفيدة

    لكن انا مع القائدة ستيتة في اغلب كلامها واكتر الستات دلوفتى بيهتمو بنفسهم علشان نفسهم اولا واخيرا

    مع ذلك انا شايفه ان كلام حضرتك فير جدا في نصائحك للمرأة وللرجل

    وانا مش مع ستوتة في ان الست بتكون راضية بأى حاجة من الرجل لا طبعا هى كمان تحب تشوفه في احسن حالاته لانه على الاقل هاتحس انه بيهتم بنفسه من اجلها هى زى ما بيهتم بنفسه وهو برا البيت

    في انتظار البوست القادم

    ردحذف
  6. احم احم

    سالخير

    اولا ايوه كده اعترفوااااااا ان قدراتنا اعلى من قدراتكم

    وان احنا اصلا اصلا مش عايزين مساواه ولا عايزين نبقى زيكم هع

    اعتقد ان الناس اعطت فى الفتره الاخيره انطباع مبالغ فيه

    عن كون ان اهمال الزوجه للزوج ينحصر فى مظهرها

    ياما ستات مزوقين ليلا نهارا لكن برضه مش ستات الى من بره بس

    انا شايفه ان اهمال الزوجه ده مش حاجه كده بسيطه

    لا لا ده وضع مركب جدا نتيجه لتراكمات اهمال من الطرفين

    ده يهمل والتاني يهمل قصاده
    وبعدين حد منهم فجأه يفوق ويبص للتاني ويقوله ااااااه يا بليد يا ابو ملحق يا مهمل

    ما ينفعش

    ركزتوا على المظهر اوي يا ناس خليتوا الستات مهبوله على اللبس والميك اب

    وتبقى بوزها اخس ومطلع عينه وعين اهله

    وتيجى اخر الليل تضرب القميص الاحمر على رايك

    ما ينفعععععععععش

    الدنيا يا تتعاش بنفس يا بلاها العيشه والى عايشنها

    الدنيا صعبه

    لو كل واحد فينا ما لقاش اخر اليوم صدر حنين هانموووووووت

    مش حانعيش يعنى حانعيش

    ما تضيعوش الفرصه دي من اديكم

    عارف يا دكتور اسلام
    القرآن بيقول ايه ؟؟

    وجعلنا لكم من انفسكم ازواجا لتسكنوا اليها

    وبيقول كمان

    وجعلنا بينكم مووووووده ورحمه


    عارف جعلنا دي ايه ؟؟
    دي كنايه عن وهب من الله

    ربنا وهبنا ازواج نلجأ اليه ونسكن اليهم

    ومش بس كده ووهبنا الموده والرحمه

    بس احنا بنردم على كل ده ونعيش م عارك ضاريه لييييييييييييييييييييه
    مش عاااااااااارفه

    اعتقد الناس مخها تعبت

    وبالنسبه لسؤالك

    الاجابه عليه هو لان احنا عندنا مشكله كبيييييييره جدا فى الجانب ده واكبر مما البعض يتخيل وما حدش مصدق وما حدش بيقول الحقيقه

    عشان عيب وما يصحش واختشوا وايه قلة الادب دي

    تحيااااااااااااتي

    ويارب يكون الشغل عجبك يا باشا

    ردحذف
  7. وااو .. متفقه تماما مع تعليق ستيته :)

    ردحذف