شر. م . . الشيخ
دى المرة السادسة اللى اروح فيها شرم الشيخ ...ودايما باروحها مع الشغل ...لكن المرة دى كت مختلفة شوية ....كل اللى اشتغلناة كان يوم واحد بس ...ويومين فرى ...فرى فرى يعنى ...روحوا اعملوا اللى نفسكوا فية ...وكله على حساب صاحب المحل. ....قبل ما أسافر كانت نظرات الغيرة والغبطة وأحيانا الحسد محوطانى من كل ناحية ...دا غير يابختك ياعم ...أيوه ياسيدى ...ماشية معاك ياباشا ...ارزاق ...المهم رحت شرم الشيخ ...مافيش حاجة اتغيرت هيه هيه من عشر سنين ....لسه اول ما بتدخل من البوابة ...فرد الامن يوقفك ويقولك : شنطة العربية لوسمحت ...تفتح لة الشنطة ...يبص فيها ...يقفلها ...ويقولك بذوق مخلوط بالغباء الحاد : اتفضل يا بيه ....دا طبعا على اساس انى لو انا معايا قنبلة حأحطها فى شنطة العربية ...زى ماقولتلكوا كل حاجة زى ما هية ...لكن الواضح انى انا اللى اتغيرت ...القصد ...خلصنا يوم الشغل وبدأنا الفرى ...قولت ياواد ياللا بقى استمتع واغسل هم الشغل والعيال ومصروف البيت والعيشة واللى عايشينها ..ولبست الشورت والفانلة والكاب ...وطلعت على البيسين ..وزى العادة لقيت البنات والستات ناسيين النص الفوقانى من المايوة ...قولت بلاش البيسيين ...اطلع اقعد على البحر شويه ...لقيت البحر برضة زى ماهوه ...الستات والرجالة ناسيين المايوة كله بقى المرة دى ...قولت اطلع اقعد فى كافيتيريا اشرب حاجة ...لقيت كل اللى حوالية خمرة ...بينى وبينكوا الازايز شكلها تحفة ...تقولش فازات كريستال عصفور ....قولت ياواد احسن حل تروح تقعد فى اللوبى ...اهو تتفرج على اللى داخل واللى طالع حاكم الريسيبشن دة بيبقى عامل زى السوق....لقيت كل واحد مقعد على رجلة واحدة وهاتك يا كلام سر فى بقها ...ايوة كلام سر مش كلمة وتعدى .......بصيت الناحية التانية لقيت بنتين بيقولوا لبعض كلام سر برضة فى بقهم ....قولت ياواد احسن حل اطلع اودتى ...دخلت الاودة وفتحت التليفزيون ...طلع كلة من المتشفر يامعلم ...اتهببت وقعدت فى الفرندة ...قولت امدد كدة واتمتع بالمناظر الحلوة والخضرة ....مافيش دقيقتين ولقيت لوط بنات روسى استيراد خاصة –اكيد عليهم هدية مدفع ولا دبابة –بيتدربوا على الشو الروسى ...دخلت وقفلت الفراندة والتليفزيون واتصلت بالريسيبشن رد علية صوت ...صوت صوت ... ماى اى هلب يو ...كان فاضل بس تقول يابيبى ...قولت : مش عايز تليفونات ..واترميت على المرتبة الاماراتى ...ونزلت تحت اللحاف الفيبر ونمت ...نمت خمستاشر ساعة ...ماهو المثل بييقول الايام السودة ديتها النوم ...هية الناس كانت حسدانى على اية ؟ وكانوا بيقولوا أيوة ياعم حتتمتع لية ؟ دا مافيش متعة واحدة نقدر نقول عليها حلال ....وليه فى كل مرة كنت باجى شرم كنت باشوف نفس اللى شوفتة وكنت بأبقى مبسوط ...اشمعنى المرة دى مش مبسوط ؟ هوة انا اتعودت مثلا ؟ ولايمكن علشان كبرت ؟ ولا اكونش اتدينت وانا مش واخد بالى ؟....ولا هوة مبقاش فية حاجة interesting
؟ ولا دى مبادىء اكتئاب من العيشة واللى عايشينها ...ولا انا علشان فهمت ؟ ولا انا مش فاهم حاجة اصلا ؟ ...ولا دا العقل ؟ ولادة العبط بعينة ..؟مش مهم كل دة مش مهم ...السؤال اللى تعبنى بجد ...هوة اية دخل الشيخ بشرم ؟ يعنى اية العلاقة الجوهرية بين شرم وبين الشيخ ...نسيت اقول الفندق اللى كنت فية كان فندق سبع نجوم ...الفندق مش ناسى حاجة ...لازق تحت التليفزيون ورقة فيها اتجاه القبلة ...علشان لا سمح الله لو الشيطان وزك وحبيت تصلى ولاحاجة تبقى عارف مكان القبلة ....
فية حاجة اخيرة بأقاوم علشان ماأكتبهاش بس بصراحة مش قادر القافية حكمت زى ما بيقولوا ... أ ى ط لو حطينا كل حرف مكان النقط اللى فى العنوان بالترتيب طبعا مش كان الاسم كدة حيبقى اوقع ومقنع اكتر........؟؟؟؟؟!!!!!!!
الاول الف حمد لله على سلامة حضرتك يا دكتور
ردحذفومش عارفه والله اضحك من كلامك حضرتك واسلوك العسول ولا احزن فعلا على المناظر اللى بنشوفها هناك وبنحس كأننأ غرباء في بلدنا
والمشكلة ان في الاماكن دى بكون دايما خايفه على بناتى من انهم يشوفو اللى بيحصل دا
اختى كانت في شرم يوم السبت اللى فات وفي شغل بردو لمدة يومين في المؤتمر اللى كان هناك ورجعت بنفس ملاحظات حضرتك بالظبط
ربنا يستر علينا من اللى بيحصل والله
وكالعادة دايما بوست رائع يا دكتور
ههههههههههههههههههههههههههههههههههههههههههههههههههههههههههههههههههههههههه
ردحذفمعلش انا عارفه انك متغاظ
بس مش قادره امسك نفسي الحقيقه
عارف وانا كنت فى دبي قعدنا اربع شهور فى فندق خمس نجوم برضه
وكان الاوضه لها بلكونه على البسين
مش عايزه اقولك يا فندم ما كانش رضا يقدر يطلع البلكونه بدون طلب رسمي وعليه دمغه ومعاينه مسبقه مني
هل هما لابسين المايوهات ولا لا
ههههههههههههههههههه
عموما احنا بلد ما لهاش كرامه يا فندم بنسيب اي حد يعمل اي حاجه فى اي حته
اييييييييه انت عايز تضر بالسياحه ؟؟
ملحوظه على هامش الفرسه الكبيره دي
تمثال بوذا فى الهند وفى الصين
اي حد سواء بوذي مش بوذي سايح نايح ما لهمش دعوه
ممنوع حد يديه ظهره
يعنى لو صادفت تمشي من قدام التمثاااااال لازم تمشي بظهرك مالهومش دعوه بقى
والناس بتروح برضه وبتزور المعابد بتاعتهم وبتحترم مقدساتهم
احنا بقى ايه ؟؟؟؟؟؟؟
طزززززززززززززز ولا حاجه
شرم الشيخ مدينة جميلة
ردحذفوبالفعل ما أروعها مدينة !
وجزيت خيراً على هذا الموضوع
وأحسنت الإختيار
أتمنى زيارة مدونتى
فرسان على مر الزمان
على الرابط التالى
http://fairsan.blogspot.com/
تحياتى
ويبقى التواصل