مى وآسر اتجوزوا بعض
آسر بعد مافك خطوبتة ....اكتشف اواتهيأله انه اكتشف انه بيحب مى ...حب حب مش اخوات وصداقة ...وفضل وراها لغاية ما اقنعها ...او برضة هية اللى سابتة يقنعها ..ماهو معناه اية انها كانت بتتدايق لما كان بيروح يتفسح مع خطيبته ...ومعناه اية لما كانت بتصلح بينهم وهيه من جواها بتتمنى انهم يسيبوا بعض ...معناة ايه غير انها بتحب آسر مش صداقة وأخوات والعبط دة ...الحقيقة ان ماحدش فاهم آسر قدها ...ومحدش فاهمها قد آسر ...وبعدين ماهما الاخوات فى الدراسة ممكن يتجوزوا مافيش مايمنع شرعا ...وان كان على قرطسة المجتمع ... دى سهلة ... المجتمع خد على كدة ...اخوات ..متجوزين ...متطلقين ...كاتبين الكتاب فى القسم ..ماعادتش تفرق ...شوية وحلاوة اللبانة تروح ويشوف غيرها وصلى على رسول الله ....واتجوزوا بعد ماعملوا فرح وزفة وفندق خمس نجوم دفعوا فيه دم قلبهم علشان يرقصوا ...ورقصوا ...ماتوا من الرقص ..الله بفلوسهم ...وبدأت الحياة ...الايام الاولانية كانت فى منتهى السعادة ...فاهمين بعض بقى ...حاسيين بعض ....(نفسى اعرف هما بيشيلوا الباء اللى قبل بعض لية....معلش يا اخونا فلاح بقى )...قريبيين من بعض ...المصيبة بقى فى قريبيين وحاسيين وفاهمين دى ...فاهمين وقريبيين وحاسيين زيادة عن اللزوم ...كل واحد فاهم التانى اكتر من نفسه ..حتى كلمات الاعجاب والحب اللى بينهم كانت معروفة مسبقا ...نظرة آسر للبنات الى فى الشارع وهوة ماشى مع مى مفقوسة ماهى عارفاه وعارفة زوقة ...كانت ردود افعال مى قدام اى موقف معروفة لآسر ...ماهوة اللى مربيها ...وشوية شوية ... التفاهم والاحساس اللى بينهم بقى عامل زى الفيلم الابيض والاسود اللى بيتشاف للمرة المليون ...بس اللى كان بيوجع مش انهم شافوا الفيلم قبل كدة ...اللى كان بيوجع انهم لازم يضحكوا ويبكوا ويتشدوا على نفس المشاهد اللى حفظوها... يضحكوا ويبكوا ويتشدوا بنفس الحماس اللى كان موجود فى اول مرة شافو فيها الفيلم ....وبدأت الخلافات ...خلافات من نوع غريب ...خلافات نتيجة عن زيادة الفهم مش نتيجة لعدم الفهم ...وبدأ آسر ومى يفكروا ...هوة كان صح انهم اتجوزوا ولا كان الاحسن يفضلوا صحاب ...وبعدين فكروا اكتر ...هما كانوا صحاب ولا اخوات فى الدراسة ولا دة كان حب ولا دى كانت طبطبة ..ولايكونش دة كان تعود ...لا لا دا كان حب تملك ...الاكيد انه دة طبع البنى آدم ...عايز كل حاجة ...ومش عاجبة اى حاجة ..آسر ومى حمدوا ربنا انهم ماخلفوش ...واتفقوا على الطلاق ...
وخسروا.... خسروا الجوازة وخسروا الصداقة والاخوة فى الدراسة
انا كدة خلصت بس ححكى ليكوا حدوتة....صلوا على النبى :
كان ياما كان فيه 3سمكات ...سمكة غبية وسمكة ذكية وسمكة اذكى ...كانوا عايشين فى بحيرة صغيرة جنب البحر ....وفى يوم عدى عليهم اتنين صيادين ...الاولانى قال للتانى شايف التلت سمكات دول ...واحنا رجعين نبقى نصطادهم ....السمكة الاذكى سمعت الكلام ماكدبتش خبر ....راحت نطة فى البحر وهربت بعمرها ....رجع الاتنين صيادين ...السمكة الذكية عملت نفسها ميتة وطفت على وش المية ...خدها الصياد ورماها فى البحر ...فنجت هية كمان ....الغبية بقى فضلت تلف وتدور حوالين نفسها .....وطبعا انتوا عارفين نهايتها ....كانت الذ عشوة سخنة بالفلفل والكمون
ماينفعش.... ماينفعش ... والله ماينفع ...ولا حل من التلاتة ينفع ...لأن اصلا العود معووج ...ومدام العود معووج عمر ضله ماحيطلع عدل ...ويارب... يارب...نسمع كلام ربنا علشان نرتاح ...
التتر
يارب نسمع كلام ربنا
((اخوات فى الدراسة))
قصة
صبرنى يارب
سيناريو وحوار
حنعيش يعنى حنعيش
بطولة
آسر
مى
شكر خاص لــــــ
جوز مى
مرات آسر
تصوير
خيال كل واحد
انتاج
الكتالوج للانتاج والتوزيع
اخراج
بلوج اسبوت
تصدق فعلا ابوخ حاجة ان الواحدة تبقى فاقسة حركات جوزها .. والعكس
ردحذفده فعلا بيسبب مشاكل كتير والموضوع يا بينتهى زى ما قولت بعدم القدرة على الاحتمال والطلاق
او الصبر المكتوم العصبى اللى بينشطه اتفه حاجة
او اللامبالاة
جميل جدا ختامك للموضوع " يارب نسمع كلام ربنا عشان نرتاح "
الاحداث اللى تخيلتها بتتحقق فعلا مش بس فى حالة اخوات فى الدراسة
لا كمان فى حالة الحب قبل الزواج
يعنى ترتبط بحد عاطفيا قبل الجواز وتتجوز حد تانى خالص
عشان كده انا من انصار جواز الصالونات المبنى على التفاهم بشرط ان الطرفين يكونوا لم يسبق لهم الارتباط قبل كده عاطفيا .. لكن لو حد فيهم كان مرتبط قبل كده هينكد عالطرف التانى وهتفضل المقارنات الخفية تحت الرماد الى ان تنفجر
الخلاصة فعلا .. اللى يمشى فى طريق ربنا يرتاح
خالص التحية
حلاوتك لما تسخن على البلوج يا دوك
ردحذفههههههههههههههه
بص انا معاك ان الى يمشي على كتاب ربنا ما يتعبش
بس انا ما قلتش ان الصداقه بينهم كانت خارج كتاب ربنا
اصل الحكايه بتكون علاقه طبيعيه يا دوك يعنى زي القرايب كده
هما طلعوا لقوا نفسهم اصحاب ما يقدروش يغيروا ده
الى مش من الكتالوج انها صدقت نفسها انه اخوها
لا هو مش اخوها
من هنا للصبح مش اخوها برضه
كمان مختلفه معاك فى حكاية الفهم زياده عن اللزوم بيعمل مشاكل
عشان لومشينا بالمبدأ ده يبقى انا دلوقتي بعد عشر سنين جواز وثلاثه خطوبه وكتب كتاب وكرسي اعتراف فظيع مريع
عارفاه حافظاه قارياه فاهماه عارفه بيبص ازاي للبنات فى الشارع عارفه كل سم عاجبه فى الممثله المزه الى بيحبها
ومع ذلك ده مش عاملي مشاكل خالص بالعكس
ده عاطينى مساحه اكبر من التفاهم معاه وهى كمان فاهمنى بس مش مركز معايا زي ما انا مركزه معاه
ههههههههههههههههههههه
تحياتي لحضرتك وميرسي اوي اوي على السيناريو الجامد
الله ينور عليك يادكتور
ردحذفهو دا اللى قصدته بالظبط لما قلت انهم غالبا مش بينفعو يتجوزو في ردى على حضرتك في البوست اللى فات
لانهم عاشو مع بعض مواقف كتير ولما يتجوزو مش هايحسو انهم بيكتشفو بعض زى اى اتنين متجوزين
المتجوزين اوك بيفهمو بعض اوى ودا رد على كلام صبرنى بس بيكتشفو دا وهما متجوزين مش بيكونو مكتشفين بعض جاهزين
والمواقف المكررة بتكون ممله
بس يادكتور انا مش شايفه ان كل صداقة بين امرأة ورجل او شاب وشابة غلط لو كانت في نطاق محترم وضمن حدود معروفة بين الاتنين
سيناريو وحوار حنعيش يعني حنعيش بس كاتب السيناريو لانه فكرته المسبقة انه رافض الصداقة اللي بين مي واسر في حكاية صبرني ده انعكس على كتابته للسيناريو في الثلاث حكايات وخلاه مصر انهم يخسروا بعض في كل مرة مع ان العكس ممكن ومش مستحيل لكن هو رافضه فمصر ميحطهوش
ردحذفعلى فكرة علاقة مي واسر ممكن تتحول لزواج ناجح ومعرفتهم ببعض وفهمهم الكبير لبعض يكون سبب للنجاح مش الفشل
تحياتي لك
تدعوكم الحملة الشعبية لجمع المليون توقيع لوقف بناء جدار العار لحضور ورشة عمل تحت عنوان " مدونون ضد جدار العار" وذلك يوم الأربعاء الموافق 13/ 1/ 2009 فى تمام الساعة الخامسة ؛ فى الإسكندرية مقر كتلة نواب الإخوان المسلمين؛ بمنطقة سموحة - شارع السوبر القديم - أعلى صيدلية البر.
ردحذفعفوا مجاهدى الصغير ...لن استطيع المشاركة .... اننى ضد اسرائيل وممارساتها ...وكذلك ضد اى شكل من اشكال التطبيعمع العدو الاسرائيلى ولكنى لست ضد امن بلدى وحريتة فى اتخاذ مايلزم للحفاظ علية
ردحذفوفقكم الله