الفرق بين الرجل والمرأة 2
بدأ اليوم هادى جدا ...قام هشام صلى الصبح ولبس هدومه ...وقعد يفطر مع مراته...قعدوا يتكلموا ويحكوا وهما بيفطروا ...عطاها بوسة ونزل راح شغلة ...سماح دخلت تشوف اللى وراها قبل العيال مايرجعوا من المدرسة ....الساعة اتناشر هشام بعت رساله لسماح بيقولها وحشتينى ياروحى .....سماح ردت برساله انت اكتر ياقلبى ....الساعة اتنين وهشام بيلم ورقة علشان يروح ....سمع الموبيل ...رنت سماح ....ايوة يا حبيبتى ....سماح : والنبى يا حبيبى وانت جاى هات لنا اتنين كيلو لحمة بتلو...لاحسن اخر كيس عملاه على الغدا النهاردة ....رد هشام : حاضرياحبيبتى...سماح : جيب من عبدة ماتجيبش من حد تانى ...رد هشام : ما انا طول عمرى بأجيب من عبدة ...سماح ايوة بأقولك يعنى ...واركن العربية فى الشارع اللى قبلة ...شارعة زنقة وزحمة لاحسن العربية تتخبط ...هشام : حاضر ....وماتديهوش اكتر من 44 جنية ماما جيباها منه امبارح ب44جنية .....هشام بغيظ مكتوم :حاضر..واقف على ايدة وهوه بيقطع وقوله انا عايزها من الحته اللى تحت الضلعة .....هشام بدأ يطلع دخان : ماشى ...سماح : وعينك علية ليحط جلد ولا شغت ...اوعى يستعبطك ...وانفجر هشام : اييييه هوة انا مش حاعرف اجيب كيلو لحمة ...حاضر ياستى حاروح اقول له الهانم بتسلم عليك وبتقولك هات اتنين كيلوا لحمة واتوصى ...سماح : انت بتتريق هى الواحدة ماتعرفش تتكلم معاك ...خلاص مش عايزة حاجة مع السلامة ...قفلت الموبيل وراحت طلعت غلها فى المواعين ....هشام رمى الموبيل على المكتب فى دخلة موظف يمضى منه ورقة ...خصم له يوم ....
ياترى مين الغلطان سماح ولا هشام ....سماح علشان عاملته على انه عيل صغير امه بعتاه يجيب كيس ملح ...ولا هشام علشان اتريق على سماح وزعق فيها ....
هوة فى الحقيقة لا هشام غلطان ولا سماح غلطانة ....هما بس مش فاهميين ...مش فاهمين ان الراجل غير الست ....
سماح مش فاهمه ان طريقة تفكير الراجل غير طريقة تفكير الست ..الراجل ياسماح حساس قوى ناحية اللى بيقدم له مساعدة ...بيفهمها على انها اشارة واضحه لعجزة وعدم قدرتة على تسيير الامور ..فلما انت تقولى له اعمل كدا ولا كدا ...فدا معناه ان انت مش واثقة فية وانه ماينفعش وانت بتصلحية ...مساعدة يعنى هوه ضعيف وعاجز وانت مابتحبيهوش .....هية بتوصل له كدا.
وهشام مش فاهم ان سماح لما بتقدم له نصيحة او ترشده لحاجة ... دا دليل على الاهتمام والحب ....هيه الست كدا بتبقى فرحانة وهيه بتراعى اللى حواليها وتساعدهم سماح عارفة انك شاطر وتقدر تعمل كل حاجة لواحدك ...ومساعدتها ليك معناها انها بتحبك ومهتمة بيك مش اكتر
بصى ياسماح حاولى ماتبقيش انتقادية وامسكى نفسك شوية فى موضوع النصايح دة وشوفى النتيجة حتبقى حلوة ازاى
وانت يا اتش سماح بتحبك بس هية دى طريقتها فى التعبير عن الحب.... افهمها ...واستحمل شوية نصايح يا اخى !!!!
ملحوظة : والنبى والنبى بطلى ياسماح تغييرى هشام ....ووالنبى والنبى يا هشام بطل تغير سماح ...لان لا هية حتتغير ولا انت حتتغير...وحتضيعوا وقت كتير على الفاضى ....افهم هية بتفكر ازاى ...وانتى افهمى هوه بيفكر ازاى ....وتقبلوا بعض
بجد بوست جامد ويارب الناس تفهم
ردحذفتقبلي مروري وتحياتي
"افهم هية بتفكر ازاى ...وانتى افهمى هوه بيفكر ازاى ....وتقبلوا بعض" هذه الجملة فيها الخلاصة والحل السحري للعيش بسعادة بغيرها سيظل ناقر ونقير عايشين مع بعض في غم او يفرقوا الشمل وكل واحد من طريق
ردحذفعلشان هو يفهمها وهي تفهمه فيه طريقة من اتنين
ردحذفيا يكونوا من قبل ما يقابلوا بعض لهم عين راصدة
وأذن واعية
وأم وأب صح مهتمين بالمذاكرة وجنبها الكلام عن الحياة
يا إما
ها يتعلموا في بعض
ويا يستحملوا يتعلموا في بعض يا يعلموا على بعض
حسب قدرة كليهما على الصبر في العلاقة
بالمناسبة
كنت في الهايبر وجه راجل للجزار وقال له المدام عاوزة تكلم
وطلب الراجل مراته في التليفون وادى الموبيل للجزار
اللي فضل يفهم من المدام هي عاوزة ايه
وبعدين خد الراجل الموبيل من الجزار وفضل يقول
حاضر
حاضر
حاضر
وقفل الموبيل وأدى الجزار بقشيش ووقف بعيد لحد ما الجزار يجهز طلبات المودام
القصة دي فكرتني باليوم ده
هههههههههههههههههههههههه
ردحذفانا باشبه على سماح دي
لا بس هى برضه اوفر اينعم انا باقوله عدي على حسن بس قوله اتقى الله يا حسن لو عايزنى اجي معاك عدي عليا لو حبيت وابقى هات موزه او حته من بيت اللوح وما تنساش تسأل مامتك عايزه ولا لا ولو لقيت كبده هات
هههههههههههههههههه
عااااااااااااااااااااادي بس كمان هو بيقبل الكلام عادي
وبعدين على ما يوصل للجزار يكون نسي الى انا قولته طبعا فيقوم متصل بيا وهو هناك ونقول تااااني
هو ليه زعلان انها بتفكره ؟؟!!
وهي ليه ما بتراعيش طريقة كلامها؟؟؟!!
يفهموا يارب يفهموااااا
تحياتي يا دوك على البوست الجميل
د. اسلام
ردحذفكل سنة وانت وبنوتك الثالثة بخير
ويارب دايما فى منورة لينا
وطبعا احنا المستفادبن الاوائل من ازدهارها لاننى شخصيا اتمتع واستفيد بكل ما تكتب
ده اولا
ثانيا الست دايما شايفة ان جوزها مش شاطر زيها فى طلبات المطبخ وعلشان كده حقيقى بتقرفه وحتى لو جاب شئ كويس بتكون متاكدة انها لو عملتها هى حيكون احسن
دى للاسف طبيعة ثابتة عند اغلب الستات خاصة العاشقين للمطبخ وادارة المنزل
وللاسف تانى
الطريقة دى بتوسع دايرتها لتشمل حاجات تانية مما يسبب العديد من المشاكل ويكون الرجل غالبا معذور لان الزوجة تؤكد له يوميا انها مديرة شاطرة فى مملكتها
وعليه
ياما يتنحى الرجل عن المشاركة من بدرى
يا يتحمل النكد اليومى صابرا
وبرضه الست مش حتتغير
ايوة دا رايى
رغم انى واحدة ست
بس شايفة الحقيقة دى امامى على طول
تحياتى يا دكتور
والله انت مش ممكن يادكتور
ردحذفطيب حضرتك راجل بس فاهم عقلية الستات ونفسياتهم جدا جدا
كلنا تقريبا سماح واحنا بنطلب حاجة
بس بجد يادكتور مرات الرجالة بيصعبو عليا لما بفكر بحيادية بحس ان ممكن يكون عندهم حق وان احنا فعلا بنزودها بدون قصد طبعا
ومع كل النصائح اللى سماح قالتها دى انا متأكده بردو ان اللحمة جت مش زى ماهى عاوزه بالظبط
يارب يا دكتور الاتنين يفهمو