الفرق بين الرجل والمرأة 4
هشام وسماح رجعوا من عند حماه وحماتة بعد ما ظبطوا المسائل وهدو النفوس....بين ام سماح وابوها ....دخلوا ناموا ...قاموا الصبح فطروا ....نزل هشام لشغله ودخلت سماح تشوف اللى وراها قبل العيال مايرجعوا من المدرسة ...الساعةاتناشر رساله من هشام ورد من سماح ...الساعة واحدة وهشام بيحضر ورقه علشان يروح ...دخلت علية السكرتيرة وقالت له فيه اجتماع مع العضو المنتدب كمان ربع ساعة ....هشام قال فى نفسة استر يارب ....بدأ الاجتماع ...سخن الاجتماع ... كان فاضل شويه والعضوالمنتدب يشتم بالاب والأم ...الدنيا ولعت والتهديد بالرفد كان عينى عينك ....خلص الاجتماع ..وصل هشام البيت وهوه مش عارف وصل ازاى ...أتغدى مع سماح وهوه سرحان بيفكر فى اللى حصل واللى حيحصل ....سماح :ايه مالك ....داخل مكشر وبتاكل وانت ساكت ...هشام : مافيش ...مشاكل فى الشغل ...سماح : دا بس اللى مدايقك ....هشام وهوة قايم من على السفرة :أيوة ...سماح : مش حتكمل غداك ؟! هشام : لأ....هشام طلع الجرنال من الشنطة وقعد يتصفح فيه ...لا بيقرأ ولا حاجة ....دخلت سماح : اعمل لك شاى ...هشام : لا شكرا ...سماح : ايه انت متغدى برة ولا اية ...هشام بشرود : ابدا ....سماح : انت بتقطم معايا فى الكلام ليه ...هشام : ياستى والله مافى حاجه ...سماح: لأفيه انت متغير ...لو فيه حاجة قولى ....هشام : ياستى فى عرض جاه النبى سيبينى دلوقت ...سماح : خلاص خلاص ...ياساتر هيه الواحده ماتعرفش تتكلم معاك .... انا ماشية ...رمى هشام الجرنال وفتح التلفزيون وقعد يقلب فى الدش وهوه سرحان فى اللى حصل واللى حيحصل ...... مافيش خمس دقايق ودخلت سماح : مش انا شديت البواب النهاردة ....هشام: امممم ....سماح : بقى زى الجزمة ...جاب لى حجاتى اول واحدة فى العمارة ...هشام : كويس ...سماح : الا مش حتقول لى مالك ....هشام : بعدين ....سماح وهيه حتموت وتعرف فيه ايه :ماكملتش قرايت الجرنال لية؟....هشام : اصلى قريتة فى المكتب ...سماح : مش عايز حاجةاعملها لك ؟ ....هشام وهوه بيكز على سنانه : شكرا ...مرسى ...ربنا يخليكى ... سماح : هوه الواحد لما يكون فيه حاجة مديقاة مش المفروض يفضفض مع مراته ؟ .... وانفجر هشام : مافيش زفت حاجة ...ممكن تسيبينى لوحدى ..... طلعت سماح وهيه بتقول :ماله دة ...هوه انا جيت جنبة ...دا جزاتى اللى عايزة اخفف عنه ...صحيح خير تعمل شرا تلقى ...والنبى ما انا مكلماه تانى ....بس لو يقولى فيه ايه ؟..
هوه صحيح هشام ما يستاهلش الخير اللى بيتعمل فيه ...ولا اللى بتعمله سماح ده شر مش خير ...
لا ده ولا ده ...هما بس مش فاهميين
سماح مش فاهمه ان هشام زى كل الرجاله اللى فى العالم ...لما بيتحط تحت ضغط او تهديد او يكون فى مشكله ....بيحبس نفسه جوة نفسه ...بينعزل ...لغاية مايلاقى حل لمشكلته وان ملقاش بيلهى نفسه فى اى حاجة علشان ينسى المشكله دى ...هشام ساعتها بيبقى زى اللى فاقد الوعى ... مش حاسس ولا سامع اى حاجه ...مش شايف غير مشكلته ...
سماح مش عارفة ان المساعده اللى بتقدمهاله ساعتها غير مطلوبه ...لانه بيعتبرها اهانة ...واقرار منها بانه عاجز عن حل مشاكله ...هوه فى الوقت دة مش عايز غير انه يفضل لوحده .....وماحدش يضغط عليه علشان يحكى ....هوه مش عايز غير مزيد من الاحترام لعزلته ...اللى ماتعرفهوش سماح ...ان الفترة دى لما بتعدى وهشام يلاقى حل للمشكله اوحتى يتناساها ....بيرجع على طول زى الاول ...ويطلع من عزلته ويحكى لها كل اللى نفسها تعرفه....
ممكن يا سمسم تسيبيه فى حاله ....اصبرى على نفسك شوية ياستى ...حيطلع ويرجع ويحكى ويرغى .
هشام بقى مش عارف ان الستات غير الرجاله ....وانها لما بتبقى تحت ضغط ...بتتكلم وتحكى وتزعق وتفضفض زى ما حصل فى البوست اللى فات ....
افهم هيه بتفكر ازاى ....وافهمى هوه بيفكر ازاى .... وتقبلوا بعض
افهموا تسعدوا|...
مساء الخير يا دكتور اسلام
ردحذفمش دايما الست لما تبقى تحت ضغط تتكلم وتحكي وتزعق وتفضفض
انا ببقى شبه هشام
بس الحمد لله ان جوزي كمان شبه هشام
بس القصة برضه فيها عيب خطير بتعمله الستات
مع انهم بقوا ناصحين دلوقت وبيقرأوا وبيفهموا ومش زي الأول
يعني الضغط على اي انسان وهو في حالة خنقة بيزود الخنقة
اللي هي بتعمله ده مش حب ولا احتواء ده زي حد بيشك حد بإبرة
الشكوى وهو في الحالة دي او اي حكايات مملة من بتاعة البواب والشغالة تبقى غباء انساني عالي
كمان انا اتخيل ان هي لما بتعمل كده هو مش بيعتبرها اهانة ولا محاولات مساعدة ابدا
هو بيعتبرها غزو من مخلوق فضائي غتيت
طب بنيت فكرة انها مش اهانة ازاي؟
لما بيكونوا في نفس المجال ويهدأ التعبان شوية ويفصل شويتين بيروح عادي جدا يحكي وممكن ياخد من شريك حياته رأيه
مش لازم ينفذه بحذافيره بس بيتقبل منه انه فتح ليه مناطق كان الغضب والإحباط قافلها
تحياتي على الطرح البديع
لا لا لا هشام ده غتيت اخر حاجه بصراحه
ردحذفيعنى كان هايجراله ايه لما يحكى لها حتى بدون تفاصيل
كانت تقف جمبه وتطمنه جايز
ولو ان باين عليها هبله يعنى
ههههههههههههههههه
وبعدين ايه الاهانه فى انه يكون مضغوط ولا محتاس ولا اي حاجه ويروح يحكى لمراته
ايه انتم واخدنها كده ليه يا جماعه
وبعدين ماشي هى المفروض تحترم عزلته خصوصا لو كان بيفكر بس برضه يعنى هو ما يبقاش غلس هى قلقانه عليه وعايزه تطمن
مش بتغلس عليه يعنى الحكايه اصلها مش تخصه لواحده
حتى لو كان شغله هو فده يخصها برضه
ده جوزها وبيتها وحياتها برضه
وانا اختلف معاكي يا ستيته فى نقطة انه لو كان المجال مشترك بس ممكن يروح يحكى وياخد الراي
عشان انا شايفه ان مش محتاجين يكون مجالنا مشترك عشان نكون اصحاب او عشان اديلك رايي
بالعكس وانتى بره المشكله بتشوفي اوضح كتير من ما تكوني داخلها
وده لعلمك مبدأ من مباديء حل المشكلات انك تاخدي راي حد واقف بره بعيد عن المشكله عشان هو ممكن يشوف الى انتى مش شايفاه
وكمان لو هو متعود يحكيلاه ويفضفض معاها
هاتكون هى ساعتها تقدر تسمع دايما مشاكله وتفهمها حتى لو كانت فنيه فى شغله
وكمان مش هايحس ابدا باهانه ولا غيره معاها وهو بيحكى
بس ده ما يمنعش انه ساعات الواحد بيبقى بيدخل فى حاله انا باسميها التتنيح الى هو الواحد يبقى شبه البتنجانه كده ومش بيتكلم خالص وطبعا بيبقى فى اسباب قد اعلمها وقد لا اعلمها واوقات بابقى عايزه اتكلم واوقات ما باكونش عايزه اتكلم
عادي بتحصل
تحياتي على البوست يا دوك
وانا هاجوز هشام ده واحده من افراد الجمعيه بقى عشان تخلص منه ايه ده يا اخواتي الرجاله دي
انا مش مع رأي ان الستات تفضل منكوكب والرجالة من كوكب تاني
ردحذفامال هم اتلاقو ليه؟
علشان يوصلو لنقطة وسط بين اختلافاتهم
أينعم هم في اختلافات جوهرية بينهم
بس ايه المانع لو هو وضحلها مشكلته بشكل بسيط وقالها انه عايز وقت هادي يفكر فيه مع نفسة
وهي أكيد هتديلة المساحة دي وتشغل نفسها بأي حاجة
لابد ان يكون هناك مساحة للتنفس بين الزوجين واذا سأل طرف برفق عن اسباب واحتاج الاخر لعدم الكلام
ردحذفلابد احترام صمته
وهذا من اوائل المشاركة الناجحة
تحياتى
خلاصة الكلام ان الراجل هو الراجل والست هى الست ولا يمكن التغيير ولكن عندما تذوب الفوارق وتختفى الانا تكون النتيجه الطبيعيه هى الموده والرحمه
ردحذف