الثلاثاء، 9 فبراير 2010

سكر معقود

سكر معقود

أنا من الناس اللى مع تنظيم الأسرة ...خصوصا ان احنا بقينا كتير على الفاضى ...كغثاء السيل يعنى ...فالمفروض محدش يجيب اكتر من اتنين.....مش خوف لمانعرفش نجيب لهم المم ....دى الارزاق بتاعة ربنا ...بس الخوف ان احنا مانعرفش نربيهم فى زمن الماركيتنج اللى احنا عايشينة ....بس لما ربنا يريد محدش يقدر يقول لأ ....زى النهاردة السنة اللى فاتت ....ربنا رزقنى ببنتى التالتة ....آخر العنقود .....قعدت يجيى اسبوع ادور ليها على اسم ....ولأنى شايف ان الحياة حلوة وتستاهل ان الواحد يعيشها .....سمتها حنعيش يعنى حنعيش .....هوه فى الحقيقة انا ابوها الشرعى ...ابوها وامها كمان ....يعنى مش محتاجين دى ان اية ولا غيرة ...بس فية ناس كتير ربوها معايا ....وساعدونى كتير فى التغيير والبامبرز والافلام دى ....كبروها معايا لغاية ماشوفتها بتدخل مسابقات وتاخد مراكز ...حتى قبل ماتكمل السنه .....فاذا كانت مصر ام الدنيا ...فحنعيش يعنى حنعيش بنت المدونين ...بنت لماضة اللى قالت لى ازاى اعمل مدونة .....بنت صبرنى يارب اللى كل البنارات اللى شيفينها دى من تصميمها ......بنت ريم اللى بتفكرنى بالاميرة انجى فى فيلم رد قلبى ....بنت ستيتة اللى يارب تكون سامحتنى على سوء التفاهم ....بنت خواطر شابة اللى خلتنى قديش نفسى اتعلم لهجة المغرب العربى ....بنت عاشقة الرومانسية والقدر وانا ...بنت ام مالك اللى بفرح قوى لما الاقيها على المدونة ....بنت الشجرة الام اللى حتى لو اختلفنا فى وجهات النظر برضة اصحاب .....بنت عمود النور اللى دخل مرة واحدة طفطف ومرجعش ....بنت كل اللى دخل المدونة ...ودايما منورنى وكل سنة وبنتكوا بخير وبنتى طبعا .....

ملحوظة مكررة للمرة المليون :

هذة المدونة للآدميين فقط ....ارجو عدم دخول الكائنات الاسرائيلية حفاظا على نظافة المكان ...

ملحوظة مكررة للمرة المليار :

تحيا مصر ...تحيا مصر ....تحيا مصر ...حتى لو زعلتنى او قست علية

هناك 6 تعليقات:

  1. والله انت قلبك ابيض قوي
    ده انت يا دكتور اسلام غالي جدا
    طب ابقى اسئل صبصب امبارح كنت بقول على حضرتك ايه؟

    انا فيه ثلاثة عرفت عقليتهم الجبارة ولا نزكيهم على الله عن طريق المدونات
    حضرتك
    وعمر بدر صاحب الحبشتكانات الفلسفية
    وتامر علي اللي معاه ريشة وقلم

    ولا يضاهيكم احد مع خالص احترامي وتقديري لكل فرد مدوني بأسمه

    كل سنة وانت منور عقولنا بفكرك
    وصدقت فعلا في الأول انك جبت بنوتة عندها سنة
    هههههههههههههههههههههههههههههههههههه


    ملحوظة
    علقت على بوست او معلقتش ده بس لظروفي انا الشخصية وابدا ابدا مكنش لأن البوست مش عاجبني

    انا قلتها لتامر علي مرة
    مدونتك يا تامر عمري ما قرأتها من باب المجاملة
    وكذلك حضرتك
    عمري ما قرأت لك مجاملة
    ولا قرأت شيء الا ويعجبني جدا حتى لو كانت وجهة نظري مختلفة

    ردحذف
  2. كل سنة وبنوتك السكر المعقود طيبة

    وكل سنة وحضرتك طيب ومنورنا انت وبنوتك بموضوعات حلو وكلام واراء احلى


    ميرسي يادكتور على رأي حضرتك فيا وكلامك الحلو وانا مع ستوتة تماما في ان بالذات المدونة دى عمري ما قريتها مجامله وبصراحة كدا كانت اول مدونة ارشحها في استفتاء بسكوته

    عقبال 100 سنة يادكتور ويارب كل البنوتات يكونو سكر معقود كدا زى بنوتك

    ردحذف
  3. كل سنه وحضرتك والمدونه طيبين وبخير يادكتور
    كل سنه وكلامك بيفتح قلوبنا وعقولنا يارب
    انا من اشد المعجبين بكلام حضرتك وعقليتك
    وطريقة تفكيرك بتعجبنى مووووووووت
    وان كنت غالبا مش بارد على بوستاتك بس مش بافوت بوست الا ولازم اقراه
    وعدم ردى بيكون راجع لانى باعجز عن وصف كلامك او اضافه شئ مفيد له لانه بيكون عبر كل الحدود دى
    وباشكرك طبعا انك منحتنى شرف امومه اخر العنقود حنعيش يعنى حنعيش :)

    ردحذف
  4. بداية كل سنة وبنتك طيبة وبخير وفي عطاء دائم ومستمر ان شاء الله
    والله العظيم أسعدني أني كنت من ضمن من ذكرت فهذا يشرفني أكيد
    تمنياتي لك بدوام الصحة والعافية ولمدونتك بدوام الازدهار ان شاء الله

    ردحذف
  5. كل سنه وانت طيب يا دوك

    ايه ده انت داخل التدوين فى شهر فبراير برضه زيي
    بس انا سبقتك سنه بقى

    وشكرا على على الكلام الجميل بتاعك والله ده ابسط حاجه
    ده انا الى ليا الشرف انى اقدر اساعدك فى المدونه الى بجد لها مكانه خاصه عندي

    وزي ما قالت ستيته احنا فعلا كنا في سيرتك وتقريبا كدا ناويين ننشل منك محتويات المدونه
    هههههههههههههههههه

    المهم
    ايه حكاية الكائنات دي مش فاهمه ايه الموضوع

    لو كان العداد بتاعك بيظهر فيه اسرائيل احب انبهك انه مش من الضروره يكون حد اسرائيلي
    لان في مناطق فى فلسطين تقريبا ما عندهمش اتصالات الا ا لشركات الاسرائليه

    لان انا مره على تليفون الشغل جاني رساله من عميل بيقول انه فلسطينى غزاوي وانه عايز يتعامل معانا
    فانا رديت عليه برساله برضه
    جت الفاتوره فيها انى بعت رساله لرقم ظاهر انه اسرائيل

    الله اعلم طبعا مين كان باعت لكن يعنى انا افترضت حسن النيه وقلت يجوز بيستعمل خط بس تابع لشركة اسرائليه
    والله اعلم

    بارغي كتير انا

    كل سنه وانت طيب يا دوك ودايما منورنا انت والمحروسه حنعيش يعنى حنعيش

    ردحذف
  6. د. اسلام
    كل سنة وانت وبنوتك الثالثة بخير
    ويارب دايما فى منورة لينا
    وطبعا احنا المستفادبن الاوائل من ازدهارها لاننى شخصيا اتمتع واستفيد بكل ما تكتب

    ردحذف