الفرق بين الرجل والمرأة3
بعد معركة اللحمة بيومين ...اليوم التالت بقى.... بدأهادى جدا .... قام هشام صلى الصبح ولبس هدومه ...وقعد يفطر مع سماح...قعدوا يتكلموا ويحكوا وهما بيفطروا ...عطاها بوسة ونزل راح شغلة ...سماح دخلت تشوف اللى وراها قبل العيال مايرجعوامن المدرسة ....الساعة اتناشر هشام بعت رساله لسماح بيقولها وحشتينى ياروحى .....سماح ردت برساله انت اكتر ياقلبى....الساعة اتناشر ونصف مامة سماح كلمتها فى التليفون ...سماح طفت النار على الاكل وراحت تتكلم ....اتكلموا يجى ساعة ....بعدها قامت جرى تكمل الغدا وشغل البيت قبل ما هشام والعيال يرجعوا ...الساعة تلاتة سماح وهشام والعيال قعدوا يتغدوا ....الساعة اربعة ....سماح قعدت تشرب الشاى مع هشام ....سماح : انا خلاص ماعدش قادرة ... .ماما كلمتنى يجى ساعتين ...بتشتكى من بابا كالعادة..ماهما طول عمرهم على كدة ...طاب انا اعمل ايه يعنى ؟!....ماعندها اخواتى تخليهم يتدخلوا ...اشمعنى انا يعنى اللى كل مرة اتدخل واصالحهم واحايلهم ......هشام وهوة بيحاول يخفف عنها : ماهية دى امك ...ايه الجديد ...سماح وهى اكثر انفعالا :هوة انا ملاحقة على طلباتكم ...ولا الغسيل ولا الطبيخ ...هشام يقدم لها الحل : كبرىدماغك ....اروح لها ازاى والعيال اقعدهم من المدرسة يعنى ...محدش بيرحم ...انا عاملة زى الخدامة ...طول النهار واقفة على رجلى ....دا الصداع ماسك دماغى من الصبح ....هشام : اجيب لك حباية كيتوفان ....سماح : عارف انا زهقت من الزفت البواب دة ....ساعتين علشان يجيب لى كيلو طماطم ....هشام : بصى انت تكتبيلى اللى انت عايزاة وانا اجيبهولك وانا جاى وارتاحى من البواب ....سماح :انا حاسة ان كل اللى حوالية بينتش فية ...انا مش لاقية نفسى ...انا عمرى ماخدت اجازة ....هشام وبدأ يزهق : ماكل الناس على دا الحال ....انت عمرك ما فسحتنى زى الرجالة اللى بتفسح ستاتها .....عمرك ما قولتلى كلمه حلوة ...انا زهقت انا طهقت ...وقامت وسابت هشام وهوه بيقول فى نفسه ايه هوه اللى عمرك ما فسحتنى ....امال رحلة شرم اللى كانت فى الصيف دى اية ...حلم؟!....البت دى اتعبطت ولا اية ؟....مانا حليت لها كل المشاكل مش عاجبها ....نكدية كل الستات نكدية ....يلعن ابو الجواز على اللى عايز يتجوز ...
هوه صحيح سماح عبيطة ونكدية ؟ولاهشام هوه اللى عبيط؟
لا سماح عبيطة ولا هشام عبيط هما بس مش فاهمين .
هشام مش فاهم ان سماح زى اى ست فى العالم ...العاطفة والمشاعر عندها اعلى من المنطق والتحليل ...فالما بتحكى ...بتحكى بالعاطفة ..تلاقيها دايما تقول انا حاسة اناشاعرة ...دا غير انها بتعمم كل حاجة وتخليها فى المطلق ...يعنى تلاقيها بتقول عمرك مافسحتنى ...عمرك ماجبتلى ...عمرك ماقولتلى ...سماح ياهشام لما بتحكى بتبقى عايزة تفضفض مجرد فضفضة ...عايزة حد يسمعها ويطبطب على مشاعرها ...هيه مش محتاجة حلول ...ولا محتاجة حد يقولها تعمل اية....هيه مش محتاجة اكتر من كلمة الله يكون فى عونك ...فعلا والله انت بتتعبى ...هية عايزاك تقف جنبها عاطفيا ...وتشاركها متاعبها اللى بتزيد وتنفجر لما سعادتك بدال ماتواسيها تعرض عليها حلولك الجهنمية ...ياعم هيه عايزاك تسمعها بس...اسمعها ينوب اهلك ثواب
سماح هيه كمان مش فاهمة ان هشام زيه زى اى راجل فى العالم ...دماغة متسلسله منطقية...فية مشكلة يبقى ندور على حل ....مش نقعد نولول ...واللى بيزيد الطين بله ...انك ياسماح لما مابتسمعيش لحلوله العبقرية بيفهم انك بتضطهدية ...ومابتقدريش افكارة وحلوله ...وبياخدها بمحمل شخصى ...ويقول دى ماعادتش تثق فية وفى قدراتى على حل المشاكل ...شايفة انى ماليش لازمة ....مابقتش تحبنى ...
يا تش ...الله يسترك لما سماح تحكى لك حاجة ...اسمعها بقلبك ....وطبطب على مشاعرها ...وبطل تقدم حلول ...امسك نفسك ياسيدى .
ياسمسم هشام لما بيقدم لك حلول مش معناها انه بيعايرك ولابيتعالى عليكى ولامش مقدر تعبك....هوة كدة تركيبتة كدة ...اى مشكلة بيدور ليها على حل ...فهوة قصدة انه يساعدك مش يتنطط .
افهم هية بتفكر ازاى ...وانتى افهمى هوه بيفكر ازاى ....وتقبلوا بعض
افهموا تســــــــــــــــــــــــــــــــــعدوا !!!
هي كلمة حكمة افهموا تسعدوا لان من غير مانفهم ونتفهم بعض الحياة حتكون صعبة
ردحذفورغم عدم اختلافي مطلقا في المعنى اللي عاوز توصله بين الست صورصارة والأخ مهتشام
ردحذفولكن الحديث بتاعهم اللي فوق استفزني لدرجة قاتلة
ورغم سدة النفس عن اي بوستات او تعليقات بس البوست اللي حضرتك تكتبه بالنسبة لي دايما بوست لازم افكر فيه
ايه البت سارة عديمة الإحساس دي
بقى لما ماما تبقى وحيدة ومحتاجاها كل اللي ترد بيه طب ما عندها اخواتي
يا شيخة يا ريتها ما حملتك وهنا على وهن ولا ياريتها للدنيا جابتك
وازي المهبب اللي انتي متجوازاه يقول لك ما دي امك ايه الجديد
جديد في عينك يا عديمة الرباية
وقاعدة بتكملي كمان معاه الكلام عادي
ده انا حسيت كأنك بتتكلمي عن الزبال مش امك
وبعدين يتبعها بكلمة كبري دماغك
السؤال
ايه الحل اللي قدمه لها مهشم الروح ده في الجزئية دي
ده بيقدم حل لنفسه هو ومصالحه الشخصية
لكن لم يقدم لها حل لأنها ان شاء الله لو استمرت كده جهنم وبأس القرار
الى كل ست في بيت
جميل جدا ومطلوب جدا انك تقومي على رعاية بيتك وجوزك واسرتك
ولكن ابوكي الوحيد او امك الوحيدة مش عبأ على سيادتك
وجوزك مش ها يحل الموضوع ابداااااااااااااااااا
لأن الحل يعني ان جزء من وقتك كجارية لسموه ها يروح لحد تاني
في حالة الأب والأم بقول لكل شاب ولكل فيتاه
احذرواااااااااااا الطرف الأخر تماما لو حسيتوا انه عديم الإحساس
ساعتها لازم ولابد تاخدوا انتم قرارات فردية
ولازم تحنوا على اللي حنوا عليكم صغيرين
واشفقوا عليكم من غدر السنين
واللي انتم بدعوة الفجر منهم عايشين ومبسوطين
بابا او ماما عمرهم ما كانوا عبأ
يوم ما يدخلوا القبر
ها تعرفوا ان اللي بيحبكم حب غير مشروط وبلا مبرر وبلا اي احتمالات غدر ذهب بلا رجعة
بابا وماما وخدمتهم وسعادتهم كنز كبير عظيم الشأن
عيب جدا تشتكوا منهم لنصكم التاني
وعيب سيرتهم تيجي بالشكل ده
وعيب جدا جدا جدا تسكتوا لو جه الرد "ما دي امك .. كبري دماغك"
معلش يا دكتور اسلام
المبدأ لا أختلف ابدا معاك فيه
لكن علشان الحتة النونو دي اتحطت فقلت ارد
لأن مفيهاش اي حلول
غير الواوا يوم القيامة
الست غير مكلفة بخدمة جوزها
شرعيا عليه يجيب لها خدامة وهي تدير البيت
ولو مش قادر بنقتدي بخير القرون وخير البرية صلى الله عليه وسلم ونكون في خدمته وخدمة ابناءه
لكن الأم انا مكلفة بيها
ومسئولة عنها
وها أحاسب عنها حساب يسير او عسير على حسب قلبي
تحياتي وخالص دعواتي
ستيتة العزيزة
ردحذفانا معاكى قلبا وقالبا فى اللى قولتية ....بس انا مقصدش المعنى دة خالص .... ورغم ان كلامك صح ...بس البنى ادم لما يحس انه مضغوط بيهلفط بكلام كتير وبيلطش فى الكل بس مش معنى كدة انه بيعوق الوالدين وبيرجع تانى يبوس ايديهم ويشيلهم على راسه ... الغلطة عندى انى ماحضرتش للحوار كفاية ...كان كل تركيزى فى الفرق بين تفكير الراجل والست ...وحراعى دة فى اللى جاى
بس انا عايز رايك فى المقصود مش فى الحوار وكأنك ماقرأتيش الحوار
ازاي مقرأتش
ردحذفنو
انا بقرأ اي بوست تنزله حتى لو كنت اخر تعليق
انا موافقة تماما على المعنى
وقلتها مرة
لما حكيت اني كنت متجوزة جديد وحامل ومبعرفش اسستم اي شيء وعملت عزومة لأصدقاء زوجي
مش كنت تعبانة بس
لأ كنت مقتولة
مجرد ما قال تسلم ايدك شرفتني
خلاااااااااااااااااص كل تعب وانتم بخير
كل ما بعمل شيء يسعده
بستنى بس كلمة شرفتيني او دعوة من بؤه
ايوه الست مش محتاجة غير كلمة تضامن اجتماعي واحساس بتعبها
وانا من منطلق اني ست حسب البطاقة
بقول انك جبت جون لما قلت
هيه مش محتاجة حلول ...ولا محتاجة حد يقولها تعمل اية....هيه مش محتاجة اكتر من كلمة الله يكون فى عونك
لأني ببساطة مش باخد حلول من اي مخلوق غير نفوخي بس
لكن برضه واحقاقا للحق هو لازم يقول حلول حتى لو هي ما أخذتش بيها
لأنه لما بيطبطب بس او يتضامن بس بحس انه بيقول كلمتين يخلصوه وخلاص
لأ يطبطب ويتضامن ويحن ولو عنده حل يقوله
قوم الست تنشكح بالطبطبة والتضامن
وتاخد الحل على انه بيحبها وساندها وحيطة متينة
وتعمل في الآخر اللي هي كده كده ها تعمله
مش بقول لك
الستات دول باب من أبواب الصبر والجنة :)
حلوه اوي البت دي اتعبطت
ردحذفهههههههههههههههههههه
انا باشبه على هشام ده على فكره
انا معاك بجد فى كل كلمه قلتها
انا عن نفسي باتغاظ جدا من كلمة طب وانا اعمل ايه
ما حدش قالك تقوم تبنى السد العالي
بس يعنى اظهر اهتمام على الاقل
زي ما انا برضه باسمع منك مشاكل الشغل واناقشك فيها واقترح عليك حلول واطبطب وادادي (دي قريبة نانسي)
بس والله يا دوك انا من وجهة نظري مش بس الست الى محتاجه طبطبه وتضامن ومشاركه وجدانيه هو كمان محتاج ده
المشكله ان الراجل بجد عنده حته انانيه كده بتنقع عليه ساعات
فبيبقى حاسس ان هو الى محتاج منها الطبطبه وانه غلبان شحتوف مظلوم فى هذه الدنيا
وكل الى بتقوله وبتعمله ما تجيش حاجه جمب انجازاته العظيمه فى الحياه ومشاكلها اليوميه دي ما تجيش نفطه فى بحر مشاكله المصيريه
وده هو الغلط بقى اننا مش بس ما نفهمش بعض لا كمان ما نحسش ببعض ونقدر بعض
الحقيقه هشام رده جامد ورخم بشكل فظيع
وسماح شعنونه بزياده برضه
وسنعود للرد على سوتيتة حياتي
عدنا
ردحذفمعلش اصل المواصلات بقى
بعد اذنك يا دوك هارد على سوتيتة حياتي
بصي يا ستيته هو صحيح ماما وبابا على العين والراس ده لازم ولابد منه
ولكن
ما تنكريش يا ستيته ان ساعات برضه الام والاب بجد بيتكوا علينا لا سبب بقى مش مقدرين الحياه بشكلها الحالي
مش لاقين حد تاني يتكوا عليه اي حاجه يعنى
اهو الواحد بيجيله وقت برضه يبقى هاطق من جنابه من عمايلهم
بس عادي ده مش معناه انى اقول ما عندها اخواتي او هاطنشها
بس ده مش معناه برضه انى اوقات باطنش عشان لو ما طنشتش يبقى هاموت فى اديهم بقى خلاص
بس بقى اخد انا هنا على هشام طريقة كلامة الرخمه اوي
اولا انه بيتكلم بدون اكتراث
ثانيا انه المفروض يهديها مش يقومها على امها
والمفروض يقولها معلش يا حبيبتى انتى برضه البركه فيكى
ولو مافيش بد يعنى يقولها طب معلش قوليلها اصل مش فاضيه واتحججى باي حجه كده يعنى يهدي النفوس
زي ما المفروض ده يحصل برضه على الجانب التاني
الواحده ممكن تشتكي لجوزها من حماتها بس ما تنتهزش فرصه انه مضايق من مامته فى حاجه وهاتك يا توليع
لا طبعا
اقصد يعنى ان الواحده لازم جوزها يبقى اقرب حد لها ممكن تتفك عليه بكلمتين ويكون هو اد الموقف بقى مش يبقى كده
بس خلاص
منورين يا دكاتره
صبرنى العزيزة
ردحذفوالله الكلام اللى قولتية دة هوه الى قصدة بالظبط
وعموما حأغير جملة الحوار علشان انا ماقدرش ازعل ستيتة ابدا
د. اسلام
ردحذفالحقيقة كلامك تمام جدا
الست محتاجة تقدير وعرفان دائم وعلى اقل مجهود
بيسعدها جدا ويرضيها داخليا
اما لو ده ما حصلش 99% منهم بيقلبوا الجراب ويخلوا الحسنات للخلف والسيئات فى الامام وتسحب منها فى السريع وتعد
تحياتى