الاثنين، 9 أغسطس 2010

مش عايز اتجوز 4

العروسه الثالثه

قولت للحاجه واختى ... شوفوا بقى ... انا عايز واحدة متدينه ... حجاب وكده يعنى ... مش عايز بنات الفيديو كليب دول ... امى قالت ... بس لقيت لك طلبك ... بنت ام حمزة ... ابوها امام الزاويه اللى ورانا ... زاويه الجماعة ... راجل تقى وعارف ربنا ومراته ست كمل ... دى بتحفظ البنات الصغيرة القرآن ببلاش ... شوف بقى ناس زى دول بنتهم تبقى ايه ... قولت: نشوف ... قالت وهيه بتحضنى : خلاص اعمل حسابك نروح لهم الخميس الجاى ... يوم الخميس عديت على محل الحلويات وجبت صينية بسبوسة بالمكسرات ... خبطنا على الباب ... فتح ابو حمزة ... راجل فى الستينات ..لاطويل ولا قصير ... دقنه طويله .. لابس قميص والبنطلون مقصره شويه ذيادة ... مارفعش عينه من على الارض ... قال : اهلا وسهلا ... تفضلوا ... النساء يجلسون فى الصاله ...اما انت فاتبعنى الى الصالون ... دخلت الصالون ... حطيت صينبة البسبوسه على التربيزة ... فقال لى ابو حمزة : شكرا يابنى على الفالوذج ... ترددت وانا باقوله العفو يا مولانا ... فانا مش عارف هوه ايه الفالوذج ده ... وقطع ترددى دخول حمزه وهو يحمل صينية عليها ثلاثة اكواب من الينسون ... وضعها وسلم على... وقبلنى فى كتفى ... وقال : اهلا وسهلا .. جزاك الله خيرا يا اخى ... فالزواج عصمة للشباب فى هذه الايام السوداء ...واشار الى الينسون وقال : تفضل يا اخى قبل ان يبرد الينسون ... ولأنى مابحبش الينسون قولت : اعفينى يا أخ حمزة .. اصلى مابشربش الينسون ... فقال وقد بدأت تظهر عليه بوادر الغضب : يبدوا انك من الذين يشربون شراب الكفره ... البيبسى والنسكافيه ... وربما الكباتشينوا ايضا !!... قولت فى نفسى ...دا ايه الليله السودا دى ... والله يا اخ حمزه مش الفكره بس انا الينسون بيعملى اسهال ...عموما خلينا نتكلم فى الموضوع اللى جايين علشانه ... فقال : نعم بارك الله فيك ... ولكن فى البدايه انا الاحظ انك لاتطلق لحيتك ... فقلت : انشاء الله يا اخ حمزة ... فقال: نعم يا اخى جزاك الله خيرا ... فان اللحيه سنه مؤكده ... كما انها هى التى تفرق بيننا وبين الكفرة ... وهنا تدخل ابو حمزة فى الحديث : وفى اى مسجد تصلى الجماعة يا اخ خالد .. قلت : والله ماليش جامع محدد ... اول ما بتيجى الصلاه بادخل اقرب جامع ... قال : المفروض ان تصلى فى مساجد السلفيين وليس فى مساجد الحكومه ... فقلت : والله يا حاج انا شايف ان كلها بيوت ربنا ... مافيش فرق بين مساجد السلفيين ومساجد الحكومه ... فقال لى وهو ينظر الى حمزة : انت نبت طيب ولكن يحتاج الى قليل من الرعايه ...فقلت : عموما يا مولانا انا كنت جاى علشان اتعرف على بنتكوا ... فقال : نعم انت من حقك ان ترى وجهها هكذا وصانا الرسول الكريم حتى يؤدم بينكم ... اذهب يا حمزة ونادى اختك .... شويه ودخلت العروسه وهى تلبس النقاب ... وقالت : السلاموا عليكم ورحمة الله وبركاته ... وقفت ذوقيا وقولت وعليكوا السلام ... فقالت اجلس يا اخى فلا قيام لغير الله ... ثم اذاحييتم بتحية فحيو باحسن منها او ردوها ... وانا حييتك بقولى السلاموا عليكم ورحمة الله وبركاته ... وانت رددت بوعليكم السلام ... فهذا لا يجوز ... قولت وانا بدأت اتخنق من الدنيا ومن نفسى : معلش بس يمكن علشان الموقف ملخبطنى شويه ... فسألتنى : كم تحفظ من اجزاء القرآن ... فقلت : تلت اجزاء ... فقالت: فقط؟!!! عليك باكمال الحفظ ... واين تعمل ؟ قولت : فى شركة كمبيوتر ...انتفضت قائله: استغفر الله العظيم ... انه اداة من ادوات الشيطان ... ان به من الموبقات الكثير ... قلت: وبه من الخير الكثير ... ولا ايه رايك فى سى ديهات القرآن وتفاسيرة ... مش دى برضة حاجة كويسة ... قالت باذدراء : درء المفسدة مقدم على جلب المنفعة .. فقلت : وحضرتك بقى خريجة ايه ؟ فقالت : خريجه ... نحن لا ندخل الجامعة ... ان الجامعة مفسدة اختلاط وفسوق ...سكتت ثم قالت : ان من حقك الشرعى ان ترى وجهى ... ولكن لمدة دقيقة واحدة فقط ...نظرت الى ثم رفعت النقاب ... مش عارف ايه اللى خلانى افتكر الاستاذ عبد السلام مدرس الجغرافيا فى الاعدادى وهوه بيشرح لنا يعنى ايه غابات السافانا ... وقولت فى نفسى .. انا لا ادعى انى افهم فى الدين ولا فى الحديث ... بس ما اظنش ان رسولنا الكريم كان يقصد اللى فهمته الاخت دى واهلها من حديث النامصه ... فقلت لها : يكفى هذا يا اختى ماشاء الله تبارك الخلاق ... فقال ابو حمزة : هل ارتضيت ؟... قلت ان شاء الله ... ولكن لابد وان اعلمكم شيئا ... فقال : وما هو .... ؟ قلت : لو اراد الله لهذة الزيجة ان تتم فلن نعيش هنا ... فقال : واين ستقيمون ؟ قلت : فى شرم الشيخ ... لانى سوف انتقل الى فرع الشركة هناك ... فقام ابو حمزة منتفضا وقال صارخا : هذا لن يكون ابدا ...الا شرم الشيخ ... شوف يا بنى شرفت وانست .... احنا ماعندناش بنات للجواز ...............والى اللقاء مع العروسه الرابعة

هناك 7 تعليقات:

  1. كل عام وانت بخير
    ربنا يتقبل منا ومنكم رمضان ويجعلنا من عتقاءه

    ردحذف
  2. ستيته
    كل سنه وانت بخير وسعادة انت والاسرة الكريمة

    ردحذف
  3. حلوه حلوه حلوه

    هههههههههههههههههههههههههه

    المدونه بتاعتك دي بمزاجها اوقات تقفل معايا ومش عايزاني اعلق

    يلا ادينا العروسه الى بعدها بسرعه

    اه بالمناسبه
    انا دبست فى الحلقه بتاعة عصام فى الليالي لانه اعتذر وعشان ما نغيرش الجدول بقى

    وكل سنه وانت طيب يا دوك ورمضان كريم

    ردحذف
  4. لا خطأ مطبعي دبستك انت مش اتدبست انا نيهاهاها

    يعنى انت الى هاتكتب حلقة عصام راجع بقى الجدول

    ردحذف
  5. ندى
    بقى دى كل سنه وانت طيب بتاعتك ... ماشى ماشى ...

    ردحذف
  6. حلوة جدا ..... كل سنة وأنت طيب ...رمضان كريم

    ردحذف
  7. لا حول ولا قوة إلا بالله

    انت وقعت في ناس متشددين

    سبحان الله

    الشرع انه تشوف وجهها ثلاث مرات رؤية شرعية

    مش دقيقة واحده

    ضحكت جدا لما قلت لهم انكم مش بتشرب ينسون

    ههههههههههه

    يبقى بتشرب مشروبات الكفرة

    راجل عسل هههههههه

    ردحذف