الاثنين، 3 يناير 2011

فوق الفظيع

فوق الفظيع

كان ياما كان فى سالف العصر والاوان ملك مجنون بالملابس الجديدة ... كل يوم يلبس حاجة ملبسهاش قبل كدة ... وفى يوم من الايام جاله اتنين خياطين نصابين اقنعوه انهم بيخيطوا لبس سحرى ... وانهم ممكن يعملوا له بدله سحرية ماتعملتش قبل كدة ولا حتتعمل بعد كدة ... بدله اللى مايشوفهاش يبقى يا خاين ياحرامى يا نصاب يامجرم ... وبكدة يعرف كل اعداءه ويقتلهم ... الملك العبيط وافق .. والخياطبن طلبوا خيوط دهب وفضة وماس واحجار كريمة علشان يبدأوا فى نسج القماش وتفصيل البدله ... وبعد اسبوع بعت الملك الوزير علشان يشوف هما عملوا ايه ... راح الوزير لقاهم بيعملوا حركات فى الهوا وكانهم بيغزلوا القماش ... فاستغرب ...قاله واحد منهم ايه رايك فى القماش ... الوزير خاف يقول انه مش شايف حاجة ...لاحسن يقولوا عليه خاين ونصاب والملك يطير رقبته .... رجع للملك وقال القماش اللى اتغزل روعة يا مولاى ... واكيد البدله حتبقى روعة ... وبعد اسبوع بعت الملك كبير الياوران علشان يتطمن على البدله .. رجع له وقال : روعة يا مولاى وحيخلصوها بكرة ... تانى يوم دخل الخياطين ... وقلعوا الملك هدومة وعملوا انهم بيلبسوه البدله ... الملك ماقدرش يقول انه مش شايف حاجة لاحسن يطلع خاين للبلاد والعباد والشعب ينقلب علية .... ركب الملك العربية بتعته وهوه عريان ملط قدام الجماهير وقال لا عوانه خدوا بالكوا اللى مش حيشوف البدله امسكوه لا نه كدة حيبقى يا حرامى يانصاب يامجرم ....الناس كانت عرافه الحكاية فكان كل مايمر على مجموعة تهتف وتعلى صوتها وتقول يا جمال البدله ياحلاوتها ...وفى شارع من الشوارع كانت واقفة واحدة ست وشايله ابنها الصغير ... اول ما عدى عليهم الملك الولد الصغير صرخ وهوه بيضحك ... الملك عريان .. الملك عريان ...

ما اعرفش ايه اللى خلانى افتكر الحدوته دى وانا باتفرج على فيلم رسايل البحر ... اللى روتانا سينما عملت معانا واجب جامد جدا وجابتهولنا هدية فى راس السنة ... دا طبعا علشان انه فيلم فوق الفظيع ولامم جوايز ومشارك فى مهرجانات وكل الجرايد والمجلات بتشكر فيه وفى المبدعين اللى اشتركوا فى تاليفة وتمثيله وطبعا اخراجة .

وبعدين لقيت نفسى باظلم الفيلم ... اشمعنى هوه يعنى اللى مش عايز اصدق انه فيلم كويس ... ما احنا مصدقين كل اللى بيتقال حوالينا ... مش علشان هوه حقيقة او هوه صح ... لا ...خالص .. احنا مصدقين علشان مانبانش جهله ومتخلفين .

ما احنا مصديقن ان اقتصادنا فوق الفظيع وان احنا احسن من امريكا ودبى اللى باظوا ياولداه فى الازمة الاقتصادية ... مع ان تلتين الشعب مش عارف يكمل الشهر .

ما احنا مصدقين ان جامعاتنا فوق الفظيع واننا مركز اشعاع العلم واحنا اللى علمنا العالم القراية والكتابة ... مع اننا ماطلعناش من الخمسميت جامعة الكويسة على مستوى العالم .

ما احنا مصدقين ان القرد ابو صديرى اللى بيتنطط على المسرح وصوت الموسيقى اللى وراه مغطية على صوته ... انه العندليب بلبل زمانه ... مع اننا عمرنا ماسمعنا صوت عندليب ولا بلبل .

ماحنا مصدقين ان النادى الاهلى نادى القرن واحسن فريق بيقدم كورة ... مع انه بيجيب لعيبه جاهزة ديليفرى من النوادى اللى جنبه .. مع ان الاهلى لوماطلعش مواهب مين يطلع ؟.

ما احنا مصدقين ان الازهر فوق الفظيع وانه منارة الاسلام من الف سنه مع ان علمائه بيطلعوا يقولولنا .. اشربوا بول النبى ..والمكوجى اللى يكوى فستان ولا جيبة لازم يتوضى بعدها .

ما احنا مصدقين ان دبلوماسيتنا فوق الفظيع واننا رمانة الميزان ... مع ان العالم كله مش شايفنا اصلا ... وضاربنا بالجزمة ومتدخل فى كل كبيرة وصغيرة عندنا .

ما احنا مصدقين ان جو مصر لسه فوق الفظيع وانه حار جاف صيفا دافئ ممطر شتاءا ... مع ان المناخ اتغير فى لعالم كله .. وان الشتا عندنا واخد اجازة السنة دى .

احنا بجد فوق الفظيع علشان مصدقين .. او عاملين مصدقين .. او مش فاهمين.. او عاملبن مش فاهمين ... او عبط او بنستعبط ... او ان مافيش فايدة من اللى باعمله دة ...بس برضة حاعمله لان ماحلتيش غير لسانى وكى بوردى ... وشوية ناس صغيرين بيقولوا ساعات بيبقى عندك حق .

هناك 4 تعليقات:

  1. لا مش مش شوية ناس صغيرين فيه ناس كتير بيقولوا ان عندك حق ...وكلهم مالهمش حيلة غير لسانهم وكي بوردهم بس احيانا تاثير الكي بورد بيكون قوي وممكن يوصل لناس كتير ويكون سبب في تغيرهم هنعيش يعني هنعيش يا دكتور ...

    ردحذف
  2. دكتور إسلام....... إنت فوق الفظيع
    عندك حق فى كل كلمة قولتها
    إلا موضوع الأهلى

    ردحذف
  3. اه تصور الحدوته دي لايقه



    بس انا ما شوفتش الفيلم ده
    انما عارفه الناس الناس الى انت تقصدهم

    بمثلوا انهم مثقفين

    اه وبيسمعوا منير وبيقروا جرايد معارضه
    وبيكتبوا شعر او بيسمعوه على الاقل

    وبيروحوا ساقيه الصاوي

    وبيشتموا فى الحكومه
    وبيتكلموا عن العلمانيه والتحضر
    والمؤمرات الخارجيه
    ويطالبوا بحرية الصحافه
    والخ الخ الخ

    مثقفين بقى
    اه نسيت وعندهم مدونه :)

    اصبحنا بنمثل اننا متدينين
    بمنثل اننا مثقفين
    بمنثل اننا فاهمين
    بنمثل حاجات كتير كتير كتير وبنصدق التمثيليه

    ردحذف
  4. معاك جدا فى كل الللى بتقوله ولو انك دايما تقلب المواجع

    ردحذف